Author: ممتاز حیدر

ایرانی وزیر خارجہ نے حکومت پاکستان اور عوام کیلئے اردو میں تشکر کا اظہار کرتے ہوئے کہا ہے کہ پاکستانی حکومت اور عوام کا تہہ دل سے شکریہ ادا کرتا ہوں۔

عباس عراقچی کا کہنا ہے کہ امریکا اور اسرائیل کی جارحیت پر پاکستان نے ایران کے ساتھ حمایت کا بھرپور اظہار کیا، ایران اپنی حاکمیت اور علاقائی سالمیت کا دفاع کررہا ہے۔انہوں نے کہا کہ ایران جارحیت کیخلاف ثابت قدمی اور استقامت کے ساتھ کھڑا ہے۔ایرانی وزیر خارجہ کا کہنا ہے کہ روحانی اور بابرکت دنوں میں حکومت اور عوامِ پاکستان کا تہہ دل سے شکر گزار ہوں، پاکستانی عوام اور حکومت کی حمایت پر دل کی گہرائیوں سے شکر گزار ہوں۔
عباس عراقچی نے کہا کہ اللّٰہ تعالیٰ پر کامل توکل کے ساتھ ایران کھڑا ہے۔

امریکا نے پہلی بار بھارتی انتہاء پسند تنظیم آر ایس ایس اور خفیہ ایجنسی را پر پابندیاں لگانے کی سفارش کردی۔

مذہبی آزادی سے متعلق امریکی کمیشن (USCIRF) نے بھارت میں انسانی حقوق اور مذہبی اقلیتوں کی بگڑتی ہوئی صورتحال پر سخت تشویش کا اظہار کرتے ہوئے بھارتیہ جنتا پارٹی کی مربی تنظیم آر ایس ایس (RSS) اور خفیہ ایجنسی ‘را’ (RAW) پر ٹارگٹڈ پابندیاں عائد کرنے کی سفارش کر دی ہے۔ کمیشن نے اپنی تازہ ترین رپورٹ میں بھارت کو ‘خاص تشویش والے ممالک’ (CPC) کی فہرست میں شامل کرنے کا مطالبہ بھی دہرایا ہے۔

رپورٹ کے مطابق بھارت میں مذہبی اقلیتوں کے خلاف تشدد، امتیازی قوانین اور ریاستی سطح پر پشت پناہی میں اضافہ ہوا ہے، جس میں آر ایس ایس کا نظریہ کلیدی کردار ادا کر رہا ہے۔ ماہرین کا کہنا ہے کہ یہ پہلا موقع ہے کہ کسی معتبر امریکی ادارے نے بھارتی خفیہ ایجنسی ‘را’ کے خلاف براہِ راست پابندیوں کی بات کی ہے، جو بین الاقوامی سطح پر بھارت کے لیے بڑی سفارتی سبکی کا باعث بن سکتا ہے۔ اگر امریکی محکمہ خارجہ ان سفارشات پر عمل درآمد کرتا ہے، تو متعلقہ اداروں اور افراد کے اثاثے منجمد اور ان کے سفر پر پابندی عائد کی جا سکتی ہے۔

متحدہ عرب امارات کے شہر دبئی میں پیر کی علی الصبح ایک ڈرون سے متعلق واقعے کے بعد دنیا کے مصروف ترین ہوائی اڈوں میں شمار ہونے والے دبئی انٹرنیشنل ایئر پورٹ کے قریب ایندھن کے ایک ٹینک میں آگ لگ گئی، جس کے بعد سیکیورٹی ادارے فوری طور پر متحرک ہوگئے۔

حکام کے مطابق واقعے کے بعد حفاظتی اقدامات مزید سخت کر دیے گئے ہیں جبکہ صورتحال کو قابو میں لانے کے لیے ہنگامی ٹیمیں موقع پر موجود ہیں۔دبئی میڈیا آفس کے مطابق حکام اس وقت اس آگ پر قابو پانے اور علاقے کو محفوظ بنانے کے لیے کارروائی کر رہے ہیں جو ایک ڈرون سے متعلق واقعے کے نتیجے میں ہوائی اڈے کے قریب بھڑک اٹھی۔ بیان میں کہا گیا کہ تمام متعلقہ ادارے شہریوں اور مسافروں کی حفاظت کو یقینی بنانے کے لیے ضروری اقدامات کر رہے ہیں۔

عینی شاہدین کے مطابق حملے کے بعد ایئرپورٹ کے قریبی علاقے میں زور دار دھماکوں کی آوازیں سنائی دیں اور آسمان پر دھوئیں کے بادل دیکھے گئے۔ ابتدائی اطلاعات کے مطابق ایک ایندھن ذخیرہ کرنے والے ٹینک کو نشانہ بنایا گیا جس کے بعد آگ بھڑک اٹھی۔ تاہم فوری طور پر کسی جانی نقصان کی تصدیق نہیں ہوئی۔

یہ واقعہ ایسے وقت پیش آیا ہے جب خطے میں کشیدگی میں تیزی سے اضافہ دیکھا جا رہا ہے۔ اسرائیل اور امریکہ نے مشترکہ طور پر ایران پر حملے کیے تھے، جس کے بعد خطے میں فوجی کشیدگی بڑھ گئی ہے۔ ان حملوں کے نتیجے میں ایران کے سپریم لیڈر بھی مارے جا چکے ہیں،اس کے جواب میں ایران نے مبینہ طور پر ڈرون اور میزائل حملے کرتے ہوئے خلیجی ممالک میں موجود امریکی فوجی تنصیبات کو نشانہ بنانے کی کوشش کی، جس کے باعث پورے مشرقِ وسطیٰ میں سیکیورٹی خدشات بڑھ گئے ہیں۔

امریکی صدر ڈونلڈ ٹرمپ نے کہا ہے کہ ایران طویل عرصے سے میڈیا مینپولیشن اور جھوٹی معلومات پھیلانے میں ماہر ہے،

صدر ٹرمپ کا کہنا تھا کہ ایران عسکری طور پر کمزور ہے مگر فیک نیوز میڈیا کو جھوٹی معلومات فراہم کرنے میں مہارت رکھتا ہے،ایران اے آئی کو نئی پروپیگنڈا اور ڈس انفارمیشن ہتھیار کے طور پر استعمال کر رہا ہے، سمندر میں امریکی جہازوں پر حملوں کے نام پر دکھائی جانے والی “کامی کازے بوٹس” جعلی ہیں، امریکی ری فیولنگ طیاروں کی تباہی سے متعلق رپورٹس غلط ہیں، تمام طیارے تقریباً مکمل طور پر سروس میں ہیں، آگ میں جلتے امریکی جہازوں اور عمارتوں کی تصاویر اے آئی سے بنائی گئی فیک نیوز ہیں، طیارہ بردار بحری جہاز USS Abraham Lincoln (CVN‑72) کے جلنے کی خبریں مکمل طور پر جھوٹ ہیں،ایران اور فیک نیوز میڈیا مل کر جھوٹی کہانیاں پھیلا رہے ہیں،جھوٹی معلومات پھیلانے والے میڈیا اداروں پر غداری کے الزامات لگنے چاہئیں،ایران میدان جنگ میں شکست کھا رہا ہے اور صرف اے آئی کے ذریعے پروپیگنڈا کی جنگ جیتنے کی کوشش کر رہا ہے، بائیں بازو کا میڈیا جان بوجھ کر جھوٹی خبریں پھیلا رہا ہے، امریکی میڈیا کی ساکھ کمزور ہو چکی ہے اور عوامی اعتماد کم ہے،حکومتی اہلکار Brendan Carr میڈیا اداروں کے لائسنس کا جائزہ لے رہے ہیں، کچھ میڈیا ادارے مفت امریکی ایئر ویوز استعمال کر کے جھوٹ پھیلا رہے ہیں

بغداد: عراق کے دارالحکومت بغداد میں واقع بغداد انٹرنیشنل ایئرپورٹ اور اس کے اطراف کے علاقوں پر راکٹ حملوں کے نتیجے میں کم از کم پانچ افراد زخمی ہو گئے۔

خبر رساں ادارے ایسوسی ایٹڈ پریس کے مطابق عراقی سیکیورٹی فورسز نے اس واقعے کی تصدیق کی ہے۔سیکیورٹی حکام کے مطابق حملے میں ایئرپورٹ سیکیورٹی کے چار اہلکار اور ایک انجینئر زخمی ہوئے۔ زخمیوں کو فوری طور پر قریبی اسپتال منتقل کر دیا گیا جہاں انہیں طبی امداد فراہم کی جا رہی ہے۔ ابتدائی اطلاعات کے مطابق زخمیوں کی حالت خطرے سے باہر بتائی جا رہی ہے۔عراقی سیکیورٹی ذرائع کا کہنا ہے کہ حملے میں متعدد راکٹ اور ڈرون استعمال کیے گئے۔ دو سیکیورٹی عہدیداروں کے مطابق حملے کا اصل ہدف ایئرپورٹ کے قریب واقع ایک سابق امریکی فوجی اڈہ تھا، جو اگرچہ اب فعال فوجی اڈہ نہیں ہے تاہم اب بھی امریکی آپریشنز کے لیے لاجسٹک سپورٹ فراہم کرتا ہے۔

دوسری جانب امریکہ نے عراق میں موجود اپنے شہریوں کو فوری طور پر ملک چھوڑنے کی ہدایت جاری کی ہے۔ بغداد میں امریکی سفارتخانے نے ایک بیان میں خبردار کیا ہے کہ ایران کے حمایت یافتہ ملیشیاؤں کی جانب سے "سنگین خطرہ” موجود ہے، جس کے باعث امریکی شہریوں کو غیر ضروری نقل و حرکت سے گریز کرنے اور جلد از جلد عراق سے نکلنے کا مشورہ دیا گیا ہے۔ماہرین کے مطابق بغداد ایئرپورٹ پر ہونے والا یہ حملہ خطے میں بڑھتی ہوئی کشیدگی اور پراکسی جنگ کے خدشات کو مزید تقویت دے سکتا ہے، جس کے اثرات نہ صرف عراق بلکہ پورے مشرق وسطیٰ کی سیکیورٹی صورتحال پر پڑ سکتے ہیں۔

آبنائے ہرمز کھلوانے کے لیے امریکی صدر ڈونلڈ ٹرمپ نے چین سمیت دنیا بھر سے مدد کی جو اپیل کی تھی اس پر دنیا بھر سے خاموش ردعمل سامنے آیا ہے اور اب تک کسی ایک ملک نے بھی ٹرمپ کی اپیل پر خطے میں بحری جہاز بھیجنے کا اعلان نہیں کیا۔

امریکا کے معاشی اتحادی جاپان نےبھی آبنائے ہرمز میں اپنے بحری جہاز بھیجنے سے انکار کر دیا ہے،جاپانی حکمراں جماعت کے پالیسی چیف نے کہا کہ خطے میں بہت بڑی دہلیز پار ہوئی تبھی جاپانی بحری جہاز آبنائے ہرمز بھیجے جا سکیں گے،چین بھی ٹرمپ کے مطالبے پر خاموش ہوگیا،ادھر واشنگٹن میں چینی سفارت خانے نے کہا کہ چین متعلقہ فریقین سے رابطے موثر بنانے پر کام کر کے تعمیری کردار ادا کرے گا۔

امریکی وزیر توانائی نے بھی چین سے امداد مانگ لی۔ کرس رائٹ نے کہا کہ انہیں توقع ہے کہ چین آبنائے ہرمز کھلوانے میں تعمیری شراکت دار کا کردار ادا کرے گا۔برطانوی وزیر توانائی ایڈ ملی بینڈ نے کہا کہ ہم آبنائے ہرمز کھلی رکھنے کے لیے امریکا اور دیگر اتحادیوں سے بات چیت کر رہے ہیں، ہو سکتا ہے ہم بارودی سرنگیں تلاش کرنے والے ڈرون بھیج دیں۔اس کے علاوہ جنوبی کوریا نے کہا ہے کہ ہم نے ٹرمپ کی اپیل پڑھ لی ہے، مشرق وسطیٰ کی صورت حال کا قریبی سے جائزہ لے رہے ہیں،واضح رہے کہ فرانس خطے میں اپنے بحری جہاز بھیجنے سے پہلے ہی انکار کر چکا ہے۔

عرب میڈیا کے مطابق آبنائے ہرمز کی بندش کے بعد ایک ہزار بحری جہاز آبنائے ہرمز سے گزرنے کے انتظار میں کھڑے ہیں،عرب میڈیا کے مطابق ان جہازوں میں 20 تیل کے ٹینکر بھی شامل ہیں، آبنائے ہُرمُز دنیا بھر میں تیل کی فراہمی کرنے والے ٹینکروں کی گزرگاہ بھی ہے۔

خلیج فارس کی حالیہ کشیدگی کے دوران امریکی طیارہ بردار بحری جہاز ابراہیم لنکن کی خراب حالت میں واپسی کی خبروں نے عالمی میڈیا اور عسکری حلقوں میں نئی بحث چھیڑ دی ہے۔ مختلف بین الاقوامی خبر رساں اداروں اور مبصرین کا کہنا ہے کہ اس واقعے نے جدید جنگ میں طیارہ بردار جہازوں کے کردار پر سنجیدہ سوالات کھڑے کر دیے ہیں۔

برطانوی خبر رساں ادارے رائیٹرز کے مطابق خلیج فارس میں پیش آنے والے حالیہ واقعات نے یہ تاثر پیدا کیا ہے کہ طیارہ بردار جہازوں کا روایتی دور شاید اختتام کے قریب پہنچ رہا ہے۔ رپورٹ میں کہا گیا کہ ایران کی عسکری حکمت عملی اور جدید دفاعی صلاحیتوں نے یہ ثابت کرنے کی کوشش کی ہے کہ طیارہ بردار جہاز اب ناقابلِ تسخیر قلعے نہیں رہے بلکہ بڑے اور مہنگے اہداف بن سکتے ہیں۔

امریکی نشریاتی ادارے سی این این نے اس صورتحال کو امریکہ کے لیے ایک “قومی صدمہ” قرار دیا۔ رپورٹ کے مطابق تقریباً 13 ارب ڈالر مالیت کے اس بحری جہاز کے چند ہی لمحوں میں غیر مؤثر ہونے کے دعووں نے امریکی فوجی طاقت کے بارے میں سخت سوالات پیدا کر دیے ہیں۔ سی این این کے مطابق اس حالت میں جہاز کی امریکہ واپسی کو بعض تجزیہ کار ویتنام جنگ کے بعد امریکی فوجی ساکھ کو لگنے والا سب سے بڑا دھچکا قرار دے رہے ہیں۔

روسی خبر رساں ادارے ے اپنے تجزیے میں لکھا کہ “ایک زمانے میں سمندری طاقت کی علامت سمجھا جانے والا یہ جہاز اب اپنی پرانی حیثیت کھوتا دکھائی دے رہا ہے۔” رپورٹ میں طنزیہ انداز میں کہا گیا کہ جو جہاز خطے کو دھمکانے آیا تھا وہ اب “پانی میں تیرتے ملبے” جیسی حالت میں واپس جا رہا ہے۔

اسی طرح فرانسیسی خبر ایجنسی Agence France-Presse نے دعویٰ کیا کہ اس واقعے کے بعد امریکی محکمہ دفاع میں تشویش کی فضا پیدا ہو گئی ہے۔ رپورٹ کے مطابق جہاز کی واپسی سے مشرق وسطیٰ میں طاقت کا توازن ایران کے حق میں جھکتا ہوا دکھائی دے رہا ہے۔ اے ایف پی کے مطابق امریکی اتحادی ممالک میں بھی خدشات پیدا ہو رہے ہیں کہ اگر امریکہ کا سب سے بڑا جنگی جہاز بھی اپنے دفاع میں مشکلات کا شکار ہو سکتا ہے تو خطے میں امریکی تحفظ کی ضمانت پر سوال اٹھ سکتے ہیں۔

برطانوی اخبار دی ٹیلیگراف نے اس صورتحال کو مغربی بحری بالادستی کے لیے ایک علامتی دھچکا قرار دیا۔ اخبار کے مطابق اگر یہ دعوے درست ثابت ہوتے ہیں تو تاریخ میں اسے وہ لمحہ سمجھا جا سکتا ہے جب مغربی بحری طاقت کی روایتی برتری کو پہلی بار سنجیدہ چیلنج ملا۔

مشرق وسطیٰ کی بدلتی ہوئی عسکری صورتحال کے تناظر میں یہ واقعہ عالمی طاقتوں کے درمیان جاری اسٹریٹجک مقابلے کی ایک نئی مثال بن سکتا ہے۔