Author: ممتاز حیدر

واشنگٹن: امریکی سپریم کورٹ کی جانب سے خواتین کے کھیلوں میں حیاتیاتی جنس کی بنیاد پر شرکت کی اجازت دینے کے تاریخی فیصلے کے بعد ویسٹ ورجینیا کی طالبہ اڈیلیا کراس نے پہلی بار تفصیل سے اپنے تجربات بیان کرتے ہوئے کہا ہے کہ اس فیصلے نے انہیں "ذہنی سکون” دیا ہے، کیونکہ اب دوسری لڑکیوں کو وہ مشکلات پیش نہیں آئیں گی جن کا انہیں سامنا کرنا پڑا۔

امریکی میڈیا کے مطابق اڈیلیا کراس نے دعویٰ کیا کہ جب وہ برج پورٹ مڈل اسکول میں آٹھویں جماعت کی طالبہ تھیں تو ایک ٹرانس جینڈر طالب علم، جو ساتویں جماعت میں زیر تعلیم تھا، نے لڑکیوں کے لاکر روم میں ان کے ساتھ نامناسب، جنسی نوعیت کے جملے کہے اور انہیں ہراساں کیا۔اڈیلیا کراس کا کہنا تھا کہ سپریم کورٹ کے حالیہ فیصلے کے بعد انہیں یہ احساس ہوا ہے کہ اگرچہ ان کے ساتھ پیش آنے والے واقعات کا ازالہ ممکن نہیں، لیکن اب ان کی چھوٹی بہن، ان کی دوستوں اور دیگر طالبات کو محفوظ ماحول مل سکے گا۔انہوں نے کہا کہ وہ اس طالب علم کے لیے بھی نیک خواہشات رکھتی ہیں اور ان کی دعا ہے کہ وہ اپنی زندگی میں درست راستہ اختیار کرے۔

اڈیلیا کراس نے بتایا کہ مذکورہ طالب علم کی لڑکیوں کی ٹیم میں شمولیت کے بعد پورے لاکر روم کا ماحول تبدیل ہوگیا تھا۔ان کے مطابق بیشتر طالبات نے لاکر روم میں کپڑے تبدیل کرنا چھوڑ دیے تھے اور وہ واش روم کے بند کیبن یا الگ جگہوں پر کپڑے بدلنے پر مجبور ہوگئی تھیں۔انہوں نے کہا کہ کھیلوں کے مقابلوں کے دوران بھی لڑکیاں خود کو غیر محفوظ محسوس کرتی تھیں اور کوشش کرتی تھیں کہ اس طالب علم سے دور رہیں۔اڈیلیا کراس کے مطابق بعض دیگر اسکولوں کی ٹیموں نے بھی مقابلوں میں شرکت منسوخ کر دی تاکہ ان کی طالبات کو ایسی صورتحال کا سامنا نہ کرنا پڑے۔انہوں نے کہا کہ لڑکیوں کو اپنی نجی جگہوں میں محفوظ محسوس کرنے کا حق حاصل ہے، مگر ان سے یہ حق چھین لیا گیا تھا۔

دوسری جانب امریکن سول لبرٹیز یونین نے ان تمام الزامات کی تردید کرتے ہوئے کہا ہے کہ ان کے مؤکل اور اس کی والدہ ان دعوؤں کو مسترد کرتے ہیں۔تنظیم کے مطابق اسکول انتظامیہ نے شکایت کی تحقیقات کی تھیں، تاہم الزامات کی تصدیق نہیں ہو سکی تھی۔ادھر اڈیلیا کراس کی نمائندگی کرنے والی قانونی تنظیم کا کہنا ہے کہ ان کی مؤکل نے متعدد عدالتی کارروائیوں میں حلف کے ساتھ اپنے مؤقف کو دہرایا ہے اور ان واقعات کے باعث انہیں اپنی پسندیدہ کھیلوں کی سرگرمیاں ترک کرنا پڑیں۔

اڈیلیا کراس اور ان کے والدین کا کہنا ہے کہ انہوں نے واقعے کی باقاعدہ شکایت اسکول انتظامیہ کو دی تھی، لیکن انہیں کبھی تحقیقات کے نتائج سے آگاہ نہیں کیا گیا۔ان کے والد کا کہنا تھا کہ شکایت جمع کرانے کے بعد اسکول کی جانب سے کوئی مؤثر جواب نہیں ملا۔رپورٹ کے مطابق متعلقہ اسکول ڈسٹرکٹ سے بھی اس معاملے پر متعدد بار مؤقف لینے کی کوشش کی گئی، تاہم خبر شائع ہونے تک کوئی نیا جواب سامنے نہیں آیا۔

واضح رہے کہ امریکی سپریم کورٹ نے 30 جون 2026 کو فیصلہ دیا تھا کہ ریاستیں خواتین اور لڑکیوں کے کھیلوں میں شرکت کے لیے حیاتیاتی جنس کو بنیاد بنا سکتی ہیں۔عدالت نے ویسٹ ورجینیا اور آئیڈاہو کی جانب سے بنائے گئے ان قوانین کو برقرار رکھا جن کے تحت خواتین کی کھیلوں کی ٹیموں میں صرف حیاتیاتی طور پر خواتین کو شرکت کی اجازت دی گئی ہے۔

اڈیلیا کراس کا کہنا ہے کہ اس قانونی کامیابی کے باوجود انہیں ذاتی زندگی میں بھاری قیمت ادا کرنا پڑی۔انہوں نے بتایا کہ ان کے کئی قریبی دوستوں نے ان سے تعلق ختم کر لیا، بعض اساتذہ نے بھی ان کے ساتھ سخت رویہ اختیار کیا جبکہ انہیں دھمکیوں اور شدید تنقید کا سامنا بھی کرنا پڑا۔ان کا کہنا تھا کہ اگرچہ ان کے اسکول کی اکثریت ان کی حمایت کرتی ہے، لیکن چند مخالف افراد کی مسلسل مخالفت نے ان کی روزمرہ زندگی کو مشکل بنا دیا۔انہوں نے یہ بھی بتایا کہ مسلسل تنازعات اور دباؤ کے باعث وہ گزشتہ دو برس سے کھیلوں سے دور ہیں اور اب اپنے آخری تعلیمی سال میں دوبارہ مقابلوں میں واپسی کا ارادہ نہیں رکھتیں۔

اڈیلیا کراس نے کہا کہ جب انہوں نے پہلی بار اس معاملے پر عوامی سطح پر آواز اٹھانے کا فیصلہ کیا تو وہ صرف 14 برس کی تھیں اور شدید خوف کا شکار تھیں۔ان کے مطابق بائبل کی ایک آیت نے انہیں حوصلہ دیا کہ وہ خاموش رہنے کے بجائے اپنے تجربات دوسروں کے سامنے بیان کریں۔انہوں نے کہا کہ ان کا مقصد صرف یہ ہے کہ معاشرہ ان لڑکیوں کی بات بھی سنے جو خود کو غیر محفوظ محسوس کرتی ہیں اور انہیں تحفظ فراہم کیا جائے۔

یہ معاملہ امریکہ میں ٹرانس جینڈر افراد کے حقوق اور خواتین کے کھیلوں میں ان کی شرکت سے متعلق جاری قومی بحث کا حصہ ہے۔ایک جانب اڈیلیا کراس اور ان کے حامیوں کا مؤقف ہے کہ خواتین کے لیے مخصوص کھیلوں اور نجی مقامات کا تحفظ ضروری ہے، جبکہ دوسری جانب شہری حقوق کی تنظیمیں اس بات پر زور دیتی ہیں کہ ٹرانس جینڈر طلبہ کو بھی امتیازی سلوک سے پاک، محفوظ اور مساوی تعلیمی ماحول فراہم کیا جانا چاہیے۔ اس مخصوص کیس میں دونوں فریق ایک دوسرے کے مؤقف سے اختلاف رکھتے ہیں اور الزامات و جوابات اپنی اپنی جگہ موجود ہیں

نئی دہلی: بھارت کی قومی تحقیقاتی ایجنسی این آئی اے کے دہشت گردی سے متعلق مقدمے میں گرفتار امریکی شہری میتھیو ایرن وین ڈائیک نے تہاڑ جیل میں فراہم کیے جانے والے کھانے پر اعتراض کرتے ہوئے دہلی کی عدالت سے درخواست کی ہے کہ اسے جیل میں اپنا کھانا خود پکانے کی اجازت دی جائے۔

درخواست میں مؤقف اختیار کیا گیا ہے کہ تہاڑ جیل کا کھانا زیادہ مصالحے دار، تیل والا اور گہری فرائی کیا ہوا ہوتا ہے، جسے وہ بطور امریکی شہری کھانے کا عادی نہیں۔ اس کا کہنا ہے کہ اسی وجہ سے وہ 6 مئی 2026 سے بھوک ہڑتال پر ہے۔
ملزم نے عدالت کو بتایا کہ مناسب خوراک نہ ملنے کے باعث اس کا تقریباً 14 کلوگرام وزن کم ہو چکا ہے، نظر متاثر ہوئی ہے اور جسمانی طاقت و مدافعت میں بھی نمایاں کمی آئی ہے۔اس کے وکیل نے عدالت میں مؤقف اختیار کیا کہ انسانی ہمدردی کی بنیاد پر وین ڈائیک کو اپنی خوراک خود تیار کرنے کی اجازت دی جائے۔ درخواست کے مطابق اس کا خاندان تمام اخراجات، خوراک، برتن اور دیگر سامان کی قیمت خود ادا کرنے کے لیے تیار ہے۔درخواست میں دالیں، سرخ گوشت، چکن، مچھلی (خصوصاً جھینگے)، پاستا، کچے نوڈلز، چاول، آلو، پیاز، پھلیاں، مصالحے، بریڈ، مکھن، زیتون کا تیل، دودھ، سویا ملک اور بوتل بند پانی رکھنے کی اجازت مانگی گئی ہے۔ اس کے علاوہ انڈکشن چولہا، برتن، پیالے اور پلاسٹک کا چاپر رکھنے کی بھی استدعا کی گئی ہے۔عدالت نے تہاڑ جیل انتظامیہ سے جواب طلب کرتے ہوئے سماعت 21 جولائی تک ملتوی کر دی ہے۔

این آئی اے کے مطابق میتھیو وین ڈائیک کو 13 مارچ کو کولکاتا ایئرپورٹ سے چھ یوکرینی شہریوں کے ساتھ گرفتار کیا گیا تھا۔ تفتیشی ادارے کا الزام ہے کہ ملزمان بھارت میں کالعدم باغی تنظیموں سے رابطے میں تھے، انہیں اسلحہ اور دیگر عسکری سامان فراہم کرتے تھے اور تربیت بھی دیتے تھے۔تحقیقات کے مطابق ملزمان سیاحتی ویزے پر بھارت آئے، آسام اور میزورم کا سفر کیا اور بعد ازاں بغیر اجازت میانمار داخل ہوئے، جہاں مبینہ طور پر مسلح گروہوں کو تربیت دی اور ڈرونز کی ترسیل میں بھی سہولت فراہم کی۔این آئی اے نے تمام ملزمان کے خلاف غیر قانونی سرگرمیاں (روک تھام) ایکٹ کی مختلف دفعات، جن میں مجرمانہ سازش بھی شامل ہے، کے تحت مقدمہ درج کر رکھا ہے، جبکہ کیس کی مزید تحقیقات جاری ہیں۔

واشنگٹن: امریکی ریاست مین سے ڈیموکریٹک پارٹی کے سینیٹ امیدوار گراہم پلیٹنر نے جنسی زیادتی کے سنگین الزامات کے بعد اپنی انتخابی مہم معطل کرنے کا اعلان کر دیا ہے۔ ان پر ایک سابق خاتون ساتھی نے ریپ کا الزام عائد کیا، جسے پلیٹنر نے مکمل طور پر مسترد کرتے ہوئے بے بنیاد قرار دیا ہے، تاہم سیاسی دباؤ میں اضافے کے بعد انہوں نے بالآخر انتخابات سے دستبرداری اختیار کر لی۔

امریکی میڈیا رپورٹس کے مطابق پیر کے روز خاتون کی جانب سے الزامات سامنے آنے کے بعد ڈیموکریٹک پارٹی کے کئی اہم رہنماؤں اور حامیوں نے گراہم پلیٹنر سے انتخابی دوڑ سے الگ ہونے کا مطالبہ کیا۔ سابق امریکی سینیٹر باربرا باکسر نے بھی ان کی حمایت واپس لیتے ہوئے کہا کہ وہ خواتین کے حقوق کے لیے پوری زندگی جدوجہد کرتی رہی ہیں، اس لیے ایسے الزامات کے بعد پلیٹنر کی حمایت جاری نہیں رکھ سکتیں۔گراہم پلیٹنر نے بدھ کی شب 11 منٹ پر مشتمل ایک ویڈیو پیغام میں اپنی انتخابی مہم معطل کرنے کا اعلان کیا، تاہم انہوں نے اپنے خلاف لگائے گئے تمام الزامات کو جھوٹ قرار دیتے ہوئے کہا کہ بااثر حلقے ان الزامات کو ان کی سیاسی مہم ختم کرنے کے لیے استعمال کر رہے ہیں۔ انہوں نے ویڈیو میں کسی قسم کی معذرت نہیں کی، جس پر ڈیموکریٹک رہنماؤں اور پارٹی کارکنوں نے شدید تنقید کی۔

سیاسی مبصرین کے مطابق پلیٹنر کے رویے نے پارٹی کے اندر مزید اختلافات کو جنم دیا۔ ان کے کئی قریبی مشیروں نے انہیں نرم لہجہ اختیار کرنے اور کارکنوں سے معذرت کرنے کا مشورہ دیا تھا، تاہم انہوں نے ایسا کرنے سے گریز کیا۔

رپورٹ کے مطابق گراہم پلیٹنر کی انتخابی مہم ابتدا ہی سے مختلف تنازعات کا شکار رہی۔ گزشتہ برس ان کی پرانی سوشل میڈیا پوسٹس منظر عام پر آئیں، جن میں انہوں نے خواتین، جنسی ہراسانی اور پولیس سے متعلق متنازع تبصرے کیے تھے۔ بعد ازاں ان کے جسم پر ایک ایسا ٹیٹو بھی سامنے آیا جو نازی علامت سے مشابہت رکھتا تھا، جس پر انہوں نے معذرت کرتے ہوئے اسے ختم کرانے کا اعلان کیا۔اس کے علاوہ ان کی اہلیہ نے بھی ماضی میں انتخابی مہم کے منتظمین کو بتایا تھا کہ پلیٹنر شادی کے ابتدائی عرصے میں دیگر خواتین کو نامناسب نوعیت کے پیغامات بھیجتے رہے تھے۔ بعد میں چند سابقہ ساتھی خواتین نے بھی ان پر دھمکی آمیز اور خوفزدہ کرنے والے رویے کے الزامات عائد کیے تھے۔

تازہ ترین بحران اس وقت پیدا ہوا جب جینی ریسیکوٹ نامی خاتون نے دعویٰ کیا کہ تقریباً پانچ سال قبل پلیٹنر نے نشے کی حالت میں ان کے گھر میں داخل ہو کر ان کے ساتھ زیادتی کی۔ پلیٹنر نے اس الزام کو یکسر مسترد کرتے ہوئے کہا کہ یہ سراسر جھوٹ ہے، تاہم اس الزام کے بعد ان کی حمایت میں تیزی سے کمی آنا شروع ہوگئی۔

امریکی سینیٹ کے امیدوار گراہم پلاٹنر کو اپنی سابقہ ساتھی کی جانب سے لگائے گئے سنگین الزامات کے بعد شدید سیاسی دباؤ کا سامنا ہے۔ سابقہ ساتھی لنڈسے فیفیلڈ نے دعویٰ کیا ہے کہ 2013 سے 2015 کے دوران تعلقات کے دوران پلاٹنر نے متعدد مواقع پر ان کی رضامندی کے بغیر کنڈوم ہٹا دیا۔لنڈسے فیفیلڈ نے ایک انٹرویو میں کہا کہ انہوں نے بارہا واضح کیا تھا کہ وہ برتھ کنٹرول ادویات استعمال نہیں کر رہی تھیں، اس لیے محفوظ طریقہ اختیار کرنا ان کے لیے ضروری تھا۔ ان کے مطابق، اس کے باوجود ان کی رضامندی کے بغیر تحفظ ہٹایا جاتا رہا۔اس معاملے نے امریکی سیاست میں نئی بحث چھیڑ دی ہے، کیونکہ رضامندی کے بغیر جنسی تعلقات کے دوران کنڈوم ہٹانے کے عمل کو "اسٹیلتھنگ” کہا جاتا ہے۔ متعدد امریکی ریاستوں اور دیگر ممالک میں اس عمل کو قانونی طور پر سنگین جرم یا جنسی استحصال کی ایک شکل تصور کیا جاتا ہے۔رپورٹس کے مطابق، لنڈسے فیفیلڈ اس سے قبل بھی پلاٹنر پر جسمانی تشدد اور بدسلوکی کے الزامات عائد کر چکی ہیں۔ تاہم، ان الزامات پر متعلقہ عدالتی کارروائی یا حتمی قانونی فیصلہ سامنے نہیں آیا۔

امریکی سینیٹر برنی سینڈرز، جو پہلے پلیٹنر کے بڑے حامی سمجھے جاتے تھے، نے بھی انہیں انتخابات سے الگ ہونے کا مشورہ دیا۔ اسی طرح سینیٹر الزبتھ وارن سمیت متعدد ڈیموکریٹ رہنماؤں نے بھی ان سے دستبردار ہونے کا مطالبہ کیا۔پلیٹنر کی دستبرداری کے بعد ڈیموکریٹک پارٹی کے پاس اب محدود وقت رہ گیا ہے تاکہ وہ ریاست مین میں ریپبلکن سینیٹر سوزن کولنز کے مقابلے کے لیے نیا امیدوار نامزد کر سکے۔ پارٹی قوانین کے مطابق پلیٹنر کی باضابطہ دستبرداری کے بعد 27 جولائی تک نئے امیدوار کا انتخاب کیا جانا ضروری ہے۔

سیاسی تجزیہ کاروں کا کہنا ہے کہ گراہم پلیٹنر کی مہم کا خاتمہ نہ صرف ڈیموکریٹک پارٹی بلکہ امریکہ کی ترقی پسند سیاسی تحریک کے لیے بھی ایک بڑا دھچکا ثابت ہوا ہے، کیونکہ انہیں پارٹی کے ابھرتے ہوئے چہروں میں شمار کیا جا رہا تھا۔ تاہم تازہ جنسی زیادتی کے الزامات نے ان کے سیاسی مستقبل پر سوالیہ نشان لگا دیا اور بالآخر انہیں انتخابی دوڑ چھوڑنے پر مجبور کر دیا۔

نیویارک، وفاقی وزیر داخلہ محسن نقوی نے(یو این کوپس) اقوام متحدہ پولیس سربراہان کی سمٹ سے خطاب کرتے ہوئے کہا ہے کہ تمام وزراء، پولیس چیفس اور معزز شخصیات کا اہم سمٹ میں خیرمقدم کرنا اعزاز کی بات ہے۔ آج دنیا کو مشترکہ سیکورٹی چیلنجز کا سامنا ہے۔

محسن نقوی کا کہنا تھا کہ ایسے چیلنجز جو قومی سرحدوں پر نہیں رکتے بلکہ ماروائے سرحد ہیں۔ دہشت گردی، منظم جرائم، سائبر کرائم، منشیات سمگلنگ، انسانی سمگلنگ، منی لانڈرنگ،ان چیلنجز سے ہر ملک متاثر ہے۔کوئی ملک ان چیلنجز سے محفوظ نہیں اور کوئی ملک اکیلے ان سے نہیں نمٹ سکتا۔ان چیلنجز کے تناظر میں بین الاقوامی تعاون آج پہلے سے کہیں زیادہ اہم ہے۔ہمیں مل کر کام کرنا چاہیے اور کرنا ہے ۔ہمیں ایک دوسرے پر بھروسہ کرنا چاہیے اور فوری طور پر معلومات کا اشتراک کرنا چاہیے۔ہمیں ایک دوسرے کا ساتھ دینا چاہیے۔ہمیں قانون نافذ کرنے والے اداروں کے درمیان مضبوط شراکت داری قائم کرنا ہوگی ۔ٹیکنالوجی بہت تیزی سے بدل رہی ہے۔جرائم پیشہ افراد جرائم کے لیے نئی ٹیکنالوجی استعمال کر رہے ہیں۔ ہمیں ان کی روک تھام کے لیے جدید ٹیکنالوجی کا استعمال کرنا چاہیے۔ہمیں اپنے پولیس افسران کی صلاحیتوں کو بہتر بنانا ہے ۔افسران کی تربیت کو مضبوط بنانا چاہیے اور جدت کا زیادہ سے زیادہ استعمال کرنا ہوگا ۔ سیشن میں دنیا کے تمام ملکوں سے تجربہ کار رہنما اکٹھے ہیں ۔آپ میں سے ہر ایک قیمتی علم اور عملی تجربہ رکھتا ہے۔آئیے ان خیالات کا اشتراک کریں اورآئیے ایک دوسرے کی کامیابیوں سے سیکھیں۔ آئیے مل کر کام کرنے کے نئے طریقے تلاش کریں۔اقوام متحدہ ہمیں اس کے لیے ایک منفرد پلیٹ فارم مہیا کرتا ہے۔اقوام متحدہ پولیس کے ایڈوائزر فیصل شاکر کا شکریہ ادا کرتا ہوں کہ ہمیں اپنے ہم منصبوں اور دوستوں سے ملاقات کا موقع ملا۔یہ ہمیں اپنے ممالک کو محفوظ بنانے کے لیے ایک مشترکہ مقصد کے ساتھ اکٹھا کرتا ہے۔اپنے لوگوں کی حفاظت اور دنیا بھر میں امن و سلامتی کو مضبوط کرنے کے لیے یہ سمٹ بہت خاص ہے۔

جنوبی ایران کے مختلف علاقوں میں دھماکوں کی اطلاعات بھی سامنے آئیں، جن میں بندر عباس، بوشہر، چغادک اور کنارک شامل ہیں۔

ایران کے جنوبی صوبے بوشہر میں واقع بوشہر اور قریبی شہر چغادک میں 6 دھماکوں کی آوازیں سنی گئیں، جبکہ صوبہ سیستان و بلوچستان کے شہر کونارک میں بھی تین دھماکوں کی اطلاعات موصول ہوئی ہیں،ایران کی خبر رساں ایجنسی مہر کے مطابق جنوبی ایران میں بوشہر اور اس سے ملحقہ شہر چغادک کے اطراف دو دھماکوں کی آوازیں سنی گئی ہیں جبکہ کونارک میں بھی 3 دھماکوں کی آوازیں سنی گئیں،ایران کے شہر بندرعباس میں بھی دھماکے سنے گئے،بوشہر وہ شہر ہے جہاں ایران کا اہم جوہری بجلی گھر واقع ہے،

بوشہر کے ایک مقامی سیکیورٹی عہدیدار نے بتایا کہ ممکنہ طور پر فضائی دفاعی نظام متحرک ہوا، تاہم یہ بھی زیرِ تفتیش ہے کہ آیا کسی دشمن میزائل یا ڈرون کو نشانہ بنایا گیا یا کسی فوجی تنصیب پر حملہ ہوا۔بعد ازاں ایرانی حکام نے دعویٰ کیا کہ بوشہر کے نواح میں واقع ایک فوجی اڈہ امریکی حملے کا نشانہ بنا، جبکہ دوسری جانب امریکی حکام نے ایسے کسی نئے حملے کی تردید کرتے ہوئے کہا کہ گزشتہ رات کے بعد امریکہ نے ایران پر کوئی تازہ فضائی کارروائی نہیں کی۔

اس دوران اسرائیلی وزیراعظم بنیامین نیتن یاہو اور اسرائیلی فوج کے سربراہ نے بھی واضح کیا ہے کہ ایران کے ساتھ جنگ ابھی ختم نہیں ہوئی۔ اسرائیلی فوجی قیادت کے مطابق مستقبل میں مزید بڑے فوجی آپریشنز کا امکان موجود ہے اور فضائیہ کو ہر وقت فوری کارروائی کے لیے تیار رہنے کی ہدایت کی گئی ہے۔

امریکی حکام کے مطابق گزشتہ دو روز کے دوران امریکی افواج نے ایران میں سڑکوں، پلوں اور ان بنیادی ڈھانچوں کو نشانہ بنایا جو مبینہ طور پر ایرانی پاسدارانِ انقلاب کی عسکری نقل و حرکت اور اسلحے کی ترسیل کے لیے استعمال ہو رہے تھے۔امریکی اہلکاروں کا کہنا ہے کہ اس دوران ایران کی جانب سے داغے گئے بیلسٹک میزائلوں، ڈرونز اور کروز میزائلوں کو بحرین اور دیگر خطوں میں امریکی دفاعی نظام نے کامیابی سے تباہ کیا، جبکہ امریکی فوجی اڈوں کو کوئی بڑا نقصان نہیں پہنچا۔ تاہم میزائلوں کے ملبے سے چند غیر فوجی عمارتوں کو جزوی نقصان پہنچنے کی اطلاعات بھی موصول ہوئی ہیں۔