Blog

یورپ: سات ممالک پر مشتمل ایک بڑے بین الاقوامی پولیس آپریشن میں ایسے منظم جرائم پیشہ نیٹ ورکس کا پردہ فاش کیا گیا ہے جو خواتین کو نشہ آور ادویات دے کر جنسی زیادتی کا نشانہ بناتے تھے اور آن لائن خفیہ چیٹ گروپس کے ذریعے ایک دوسرے کی حوصلہ افزائی، منصوبہ بندی اور مجرمانہ معلومات کا تبادلہ کرتے تھے۔

یورپی پولیس ادارے (یوروپول) اور برطانیہ کی نیشنل کرائم ایجنسی کے مطابق ان گروہوں میں شامل افراد نہ صرف متاثرہ خواتین کو بے ہوش یا نیم بے ہوش کرنے کے طریقے ایک دوسرے کو سکھاتے تھے بلکہ زیادتی کی ویڈیوز اور تصاویر بھی شیئر کرتے تھے، جبکہ مختلف ادویات کے استعمال، ان کی مقدار اور پولیس سے بچنے کے طریقوں پر بھی رہنمائی فراہم کی جاتی تھی۔برطانوی نیشنل کرائم ایجنسی کے مطابق جرمنی اور برطانیہ کی قیادت میں امریکا، برازیل، کینیڈا، فرانس، ہنگری، نیدرلینڈز اور اسپین کے قانون نافذ کرنے والے اداروں نے مشترکہ کارروائی کا آغاز کیا، جسے "پروجیکٹ میڈوسا” کا نام دیا گیا ہے۔یہ آپریشن رواں سال اپریل میں شروع کیا گیا تھا تاکہ آن لائن پلیٹ فارمز کے ذریعے منظم ہونے والے ایسے جنسی جرائم کا خاتمہ کیا جا سکے، جنہیں حکام نے تیزی سے بڑھتا ہوا عالمی خطرہ قرار دیا ہے۔یوروپول کے مطابق اب تک اس کارروائی کے دوران 150 سے زائد متاثرین اور مشتبہ ملزمان کی شناخت کی جا چکی ہے، جبکہ 270 سے زیادہ نئی تحقیقات کا آغاز کیا گیا ہے۔حکام کے مطابق اب تک 57 افراد کو گرفتار کیا جا چکا ہے، تاہم خدشہ ظاہر کیا گیا ہے کہ متاثرین کی اصل تعداد اس سے کہیں زیادہ ہو سکتی ہے کیونکہ ایسے کئی واقعات رپورٹ ہی نہیں ہوتے۔

برطانوی نیشنل کرائم ایجنسی کے مطابق زیادہ تر متاثرہ خواتین کو یہ معلوم ہی نہیں ہوتا کہ ان کے ساتھ جنسی زیادتی ہوئی ہے۔ کئی خواتین کو اس وقت اس ہولناک حقیقت کا علم ہوا جب پولیس نے تحقیقات کے دوران ان سے رابطہ کیا۔تحقیقات سے یہ بھی معلوم ہوا کہ اکثر واقعات میں زیادتی کرنے والا کوئی اجنبی نہیں بلکہ متاثرہ خاتون کا شوہر، ساتھی یا قریبی جاننے والا شخص ہوتا ہے، جبکہ بعض کیسز میں ایک ہی خاتون کو متعدد افراد اجتماعی منصوبہ بندی کے تحت نشانہ بناتے رہے۔یوروپول کے مطابق مجرم انکرپٹڈ میسجنگ ایپس، بند فورمز اور خفیہ چیٹ گروپس استعمال کرتے ہیں جہاں وہ ایک دوسرے کو نشہ آور ادویات کے استعمال، متاثرہ شخص کو بے ہوش کرنے، شواہد مٹانے اور قانون نافذ کرنے والے اداروں سے بچنے کے طریقے سکھاتے ہیں۔ان گروپس میں مجرمان اپنے جرائم کی ویڈیوز اور تصاویر بھی شیئر کرتے ہیں، جس سے ایسے رویوں کو معمول کا عمل بنا کر مزید افراد کو اس میں شامل ہونے کی ترغیب دی جاتی ہے۔

برطانیہ کے کراؤن پراسیکیوشن سروس کی نمائندہ سیوبھن بلیک نے کہا کہ یہ ان کے پورے پیشہ ورانہ کیریئر میں دیکھے جانے والے "سب سے ہولناک” جنسی جرائم میں شامل ہیں۔انہوں نے کہا کہ متاثرہ خواتین کو ان ہی کے گھروں میں، ایسے افراد کے ہاتھوں نشانہ بنایا جاتا ہے جن پر وہ مکمل اعتماد کرتی ہیں، جو اعتماد کی بدترین خلاف ورزی ہے۔

یہ تحقیقات فرانس کے معروف گیزیل پیلیکو کیس کے بعد سامنے آئیں، جس میں خاتون کے شوہر نے برسوں تک اسے نشہ آور ادویات دے کر بے ہوش کیا اور درجنوں اجنبی مردوں کو اس کے ساتھ زیادتی کی دعوت دیتا رہا۔اس مقدمے نے پوری دنیا کو ہلا کر رکھ دیا تھا اور خواتین کے خلاف جنسی تشدد اور صنفی امتیاز پر نئی عالمی بحث چھیڑ دی تھی۔ اس کیس میں مرکزی ملزم کو 2024 میں 20 سال قید کی سزا سنائی گئی تھی جبکہ مزید 50 افراد بھی مختلف سزاؤں کے مستحق قرار پائے تھے۔

حکام کے مطابق حالیہ برسوں میں یورپ میں اس نوعیت کے متعدد مقدمات سامنے آئے ہیں۔جرمنی میں ایک شخص کو برسوں تک اپنی بے ہوش بیوی کے ساتھ زیادتی کرنے اور اس کی ویڈیوز آن لائن شیئر کرنے کے جرم میں آٹھ سال اور چھ ماہ قید کی سزا سنائی گئی۔اسی طرح 2025 میں چین سے تعلق رکھنے والے ژین ہاؤ زو کو برطانیہ اور چین میں دس خواتین سے زیادتی کے جرم میں عمر قید کی سزا سنائی گئی، جبکہ اپریل میں پولینڈ میں بھی ایسے ہی ایک مشتبہ ملزم کو گرفتار کیا گیا، جس کا تعلق ایک خفیہ ٹیلیگرام گروپ سے بتایا گیا۔

قانون نافذ کرنے والے اداروں نے خبردار کیا ہے کہ اس قسم کے جرائم کا شکار کسی بھی عمر، سماجی حیثیت یا پس منظر سے تعلق رکھنے والی خواتین ہو سکتی ہیں۔پولیس نے اپیل کی ہے کہ اگر کسی شخص کو شبہ ہو کہ اسے نشہ آور ادویات دے کر جنسی زیادتی کا نشانہ بنایا گیا ہے تو وہ بلا خوف متعلقہ حکام سے رابطہ کرے تاکہ متاثرین کو انصاف اور مجرموں کو قانون کے کٹہرے میں لایا جا سکے۔یوروپول کا کہنا ہے کہ "پروجیکٹ میڈوسا” اپنی نوعیت کا پہلا بین الاقوامی آپریشن ہے، جس کا مقصد ایسے منظم جرائم کو بے نقاب کرنا ہے جو برسوں سے آن لائن خفیہ نیٹ ورکس اور بند دروازوں کے پیچھے پنپ رہے تھے۔

تہران: ایران کے شہید سپریم لیڈر آیت اللہ سید علی خامنہ ای کے تعزیتی اجتماع اور نمازِ جنازہ کے لیے ملک بھر میں غیر معمولی انتظامات کیے گئے ہیں، جبکہ مختلف اسلامی اور علاقائی ممالک کے اعلیٰ سطحی وفود بھی تہران پہنچ رہے ہیں۔

ایرانی خبر ایجنسی کے مطابق وزارتِ تعلیم نے اعلان کیا ہے کہ نمازِ جنازہ میں شرکت کے لیے آنے والے زائرین اور شہریوں کی سہولت کے پیشِ نظر ملک بھر کے 5 ہزار سرکاری اسکول عارضی رہائش کے لیے کھول دیے گئے ہیں۔ ان اسکولوں میں تقریباً 40 سے 50 ہزار کلاس رومز کو قیام، آرام اور بنیادی سہولیات کی فراہمی کے لیے مختص کیا گیا ہے تاکہ دور دراز علاقوں سے آنے والے افراد کو کسی دشواری کا سامنا نہ کرنا پڑے۔رپورٹس کے مطابق ایرانی حکام کو توقع ہے کہ آیت اللہ علی خامنہ ای کی نمازِ جنازہ میں 100 سے زائد ممالک کے سرکاری اور غیر سرکاری نمائندے شرکت کریں گے، جبکہ مجموعی شرکاء کی تعداد ایک کروڑ سے تجاوز کر سکتی ہے، جس کے باعث تہران اور دیگر شہروں میں سیکیورٹی اور ٹریفک کے خصوصی انتظامات کیے گئے ہیں۔

تعزیتی تقریبات کے سلسلے میں پاکستان کے فیلڈ مارشل سید عاصم منیر نے تہران میں ایرانی وزیر خارجہ عباس عراقچی سے ملاقات کی۔ملاقات کے دوران فیلڈ مارشل عاصم منیر نے شہید آیت اللہ علی خامنہ ای کی ایران کے لیے خدمات کو خراجِ عقیدت پیش کیا۔ بعد ازاں وہ تعزیتی اجتماع میں شرکت کے بعد وطن واپس روانہ ہو گئے، جہاں ایران کے وزیر داخلہ اسکندر مومنی اور اعلیٰ سول و عسکری حکام نے انہیں الوداع کیا۔

ایرانی میڈیا کے مطابق مختلف ممالک اور تنظیموں کے نمائندے بھی تعزیتی اجتماع میں شریک ہوئے، جن میں سعودی عرب کے نائب وزیر خارجہ ولید بن عبد الکریم الخریجی کی قیادت میں وفد، افغانستان کے نائب وزیر اعظم ملا عبدالغنی برادر، وزیر خارجہ امیر خان متقی، طالبان مخالف افغان رہنما احمد مسعود اور فلسطینی مزاحمتی تنظیم حماس کا اعلیٰ سطحی وفد شامل تھا۔حماس کے وفد میں اسماعیل درویش، موسیٰ ابو مرزوق، ظاہر جبارین، باسم نعیم اور ڈاکٹر خالد قدومی سمیت دیگر رہنما شریک ہوئے، جنہوں نے تہران میں آیت اللہ علی خامنہ ای کو خراجِ عقیدت پیش کیا۔

روس کی سلامتی کونسل کے سربراہ دیمتری میدودیف تہران پہنچ گئے، جہاں انہوں نے شہید سپریم لیڈر علی خامنہ ای کی تعزیتی تقریب میں شرکت کی۔انہوں نے کہا کہ ایرانی قوم امریکا کیخلاف جدوجہد میں فاتح بن کر ابھرے گی، یہ کسی بھی دوسرے ملک کے دباؤ میں نہیں آئے گی۔دیمتری میدودیف کا کہنا تھا کہ علی خامنہ ای کی شہادت پر روس بھی دوست ملک کے دکھ میں شریک ہے۔روسی وفد نے دورے کے دوران صدر مسعود پزشکیان سے بھی ملاقات کی ہے۔

جمعے کی دوپہر کو مسلح افواج کی قیادت نے الوداعی ہال میں حاضر ہوکر مجاہد عظیم، سپریم کمانڈر، رہبر شہید کو سلام اور خراج عقیدت پیش کیا، اس موقع پر خاتم الانبیا (ص) سینٹرل ہیڈکوارٹر کے کمانڈر میجر جنرل علی عبداللہی، اسلامی جمہوریہ ایران کی فوج کے سربراہ میجر جنرل امیر حاتمی، پولیس کے کمانڈر ان چیف بریگیڈیئر جنرل احمدرضا رادان، وزارت دفاع کے سرپرست، فوج کے چیف کوآرڈینیٹر افسر اور متعدد دیگر افسروں اور کمانڈروں نے الوداعی ہال میں حاضر ہوکر آيت اللہ العظمی شہید سید علی خامنہ ای کو خراج عقیدت پیش کیا،فوجی قیادت نے اس موقع پر رہبر انقلاب اسلامی کے خون سے سینچے گئے راستے پر گامزن رہنے کا عہد اور ملک اور انقلاب کی حفاظت کے لیے مکمل تیاری کا اعلان کیا۔

ایرانی حکام کے مطابق تعزیتی تقریبات اور نمازِ جنازہ کے موقع پر غیر ملکی وفود کی آمد کا سلسلہ جاری ہے، جبکہ سیکیورٹی، رہائش اور ٹرانسپورٹ کے حوالے سے وسیع پیمانے پر انتظامات کیے گئے ہیں۔تہران کے امام خمینی گرینڈ مصلیٰ میں ہزاروں ایرانی مرحوم سپریم لیڈر آیت اللہ علی خامنہ ای کو خراجِ عقیدت پیش کرنے کے لیے جمع ہوئے، ایران میں ایک ہفتے پر مشتمل تدفینی تقریبات جاری ، حکام کے مطابق میت کو قم، نجف اور کربلا لے جانے کے بعد 9 جولائی کو مشہد میں سپردِ خاک کیا جائے گا

علاوہ ازیں وزیراعظم شہباز شریف کا کہنا ہے کہ ایران میں شہید سپریم لیڈر علی خامنہ ای کی نماز جنازہ میں شرکت کی، پاکستان کے عوام اور حکومت کی جانب سے اظہار تعزیت کیا۔وزیراعظم شہباز شریف نے سوشل میڈیا پلیٹ فارم ایکس پر بیان میں کہا کہ شہید علی خامنہ ای کی قیادت اور بصیرت کو نسلیں یاد رکھیں گی، ایران سے اظہار یکجہتی کیلئے میرے ساتھ اعلیٰ سطح کا وفد بھی گیا، جس میں نائب وزیراعظم اسحاق ڈار اور فیلڈ مارشل سید عاصم منیر شامل تھے، بلاول بھٹو زرداری، اسپیکر ایاز صادق سمیت سینئر ارکان پارلیمنٹ بھی ساتھ تھے، سینئر وفاقی وزراء اور حکومتی اہلکار بھی پاکستان کے وفد کاحصہ تھے۔وزیراعظم شہباز شریف نے کہا کہ مشکل کی اس گھڑی میں پاکستان ایرانی بھائیوں کے ساتھ کھڑا ہے۔