Blog

وفاقی وزیر مصدق ملک کا کہنا ہے کہ گزشتہ ایک دو ماہ کے دوران سندھ طاس معاہدے کے معاملے کو بین الاقوامی سطح پر اٹھایا گیا، پاکستان نے تباہ کن سیلابوں کا سامنا کیا ہے، مودی پاکستان میں آبی دہشت گردی کرنا چاہتا ہے، پاکستان کی 20 سے 25 فیصد معیشت زراعت سے منسلک ہے، پاکستان میں بڑے طبقے کا ذریعہ معاش زراعت ہے جو پانی سے وابستہ ہے۔

عطا تارڑ کے ہمراہ پریس کانفرنس کرتے ہوئے مصدق ملک کا کہنا تھا کہ پاکستان واضح کرچکا ہے کہ وہ اپنے حصے کے پانی پر کوئی سمجھوتا نہیں کرے گا، ساری دنیا میں بغیر معاہدے کے پانی بہہ رہا ہے کل دنیا کے سامنے مقدمہ رکھیں گے، جو ہمارے پانی پر ہاتھ ڈالے گا اس کا ہاتھ کاٹ دیں گے۔مصدق ملک کا کہنا ہے کہ سندھ طاس معاہدہ بین الاقوامی مقدمہ بن چکا ہے جواب کسی کے پاس نہیں، باطل کے سامنے ہم سے کوئی جھکنے والا نہیں ہے، بھارت ابھی تک ہمارا پانی نہیں روک سکا نہ روکنے دیں گے، سندھ طاس معاہدے کے حوالے سے دنیا پاکستان کے مؤقف کو تسلیم کرچکی ہے، بہتے پانی سے بجلی بنانے کا ایک طریقۂ کار ہے، اندھا دھند پانی نہیں روک سکتے۔رہنماء مسلم لیگ ن نے کہا کہ بھارت کے پاس پانی روکنے کی گنجائش نہیں تھی ایک دو دن بعد چھوڑ دیا گیا، کل ہونیوالی کانفرنس انصاف اور حقوق سے متعلق ہے۔

پنڈی کہوٹہ روڈ پر اسلام آباد پولیس نے اپوزیشن قیادت کو کشمیر جانے سے روک دیا

اپوزیشن قیادت اور پولیس کے درمیان روکے جانے پر گفتگو ہوئی ہے، پولیس نے شاہد خاقان عباسی کو کہا کہ ہم نے ناکہ لگا رکھا ہے آپ آگے نہیں جا سکتے .جس پر شاہد خاقان عباسی نے کہا کہ ہم آزادکشمیر میں جا کر بات کرنا چاہتے ہیں کہ احتجاج کیوں ہو رہا ہے ۔ اپوزیشن لیڈر قومی اسمبلی و سینٹ کو روک کر کوئی مثبت پیغام نہیں دیا جا رہا ۔ محمود اچکزئی کا کہنا تھا کہ ہم بات چیت کے ارادے سے کشمیر جا رہے ہیں ہماری سوچ مثبت ہے۔ اگر مطالبات جائز ہوئے تو سنیں گے ورنہ انہیں مثبت مشورہ ہی دینگے ۔ علامہ ناصر عباس کا کہنا تھاکہ پاکستان کی مرکزی قیادت کو کشمیر جانے سے روک کر منفی تاثر گیا ہے۔پولیس کہتی ہے اوپر سے حکم آیا ہے افسوس کہ ہم کشمیر بھی نہیں جا سکتے۔ شاہد خاقان عباسی نے کہا کہ اگر گاڑی نہیں جانے دیتے تو ہم پیدل کشمیر چلے جاتے ہیں۔ پاکستان کی مرکزی قیادت کو کشمیر جانے سے روکنے پر بھارت سب سے زیادہ خوش ہوگا۔

عمران خان اور بشریٰ بی بی نے 190 ملین پاؤنڈ کیس کا فیصلہ سپریم کورٹ میں چیلنج کردیا۔

بانی پی ٹی آئی عمران خان اور بشریٰ بی بی نے اسلام آباد ہائیکورٹ کا فیصلہ چیلنج کرتے ہوئے سزا معطلی کے لیے سپریم کورٹ سے رجوع کیا ہے،عمران خان اور بشریٰ بی بی کی جانب سے دائر درخواستوں میں کہا گیا ہے کہ سزا معطلی کی درخواست مسترد کرنا انصاف کے تقاضوں کے خلاف تھا، درخواست قابلِ سماعت مان کر بھی کیس کے نکات نظرانداز کیے گئے، دورانِ قید بینائی کا عارضہ لاحق ہوا، علاج کے لیے جیل سے باہر منتقل کیا گیا۔درخواست میں کہا گیا ہے کہ بانی پی ٹی آئی اور ان کی اہلیہ کو شدید صحت مسائل کے باوجود رہائی نہ دینا ناانصافی ہے، تنہائی میں قید سے دونوں کو غیرمعمولی ذہنی اذیت کا سامنا کرنا پڑا، سزا معطلی کی درخواست جان بوجھ کر مؤخر کی جاتی رہی، ٹرائل کے دوران ضمانت مل چکی تھی، الزام بے بنیاد قرار دیے گئے تھے۔

سپریم کورٹ میں دائر درخواست میں کہا گیا ہے کہ سزا معطلی پر فیصلہ کرتے ہوئے مقدمے کے نکات دیکھنا قانونی طور پرممکن ہے، شواہد کا ابتدائی جائزہ لیے بغیر درخواست مسترد کرنا غلط تھا، نیب نے بار بار التواء لےکر اپیل کو طول دیا اور انصاف میں تاخیر پیدا کی۔پی ٹی آئی کی جانب سے دائر درخواست میں مؤقف اختیار کیا گیا ہے کہ عمران خان اور بشریٰ بی بی کی گرفتاری کا طریقۂ کار غیر قانونی اور غیر ذمہ دارانہ تھا، غیرقانونی گرفتاری پر اعلیٰ عدالت نے رہائی کا حکم دیا تھا، احتساب کے نام پر سیاسی بنیادوں پر کارروائی کی گئی، نیب قوانین میں ترمیم سے حتمی اپیل آئینی عدالت کو سننے کا اختیار دیا گیا۔درخواست میں کہا گیا ہے کہ اپیل میں آئینی عدالت جانے کا ذکر موجود نہیں، سزا معطلی کی اپیل سپریم کورٹ میں ہی قابل سماعت ہے، ہائیکورٹ کا حکم کالعدم قرار دے کر سزا معطل کی جائے، رہائی کا حکم دیاجائے۔

واضح رہے کہ اسلام آباد ہائیکورٹ نے عمران خان اور بشریٰ بی بی کی سزا معطلی کی اپیلیں خارج کی تھیں۔