لاہور: کوٹ لکھپت کے علاقے میں ایک نجی اسکول کی ٹیچر کو مبینہ طور پر اجتماعی زیادتی کا نشانہ بنانے کے الزام میں پولیس نے دو ملزمان کو گرفتار کر لیا ہے۔
پولیس کے مطابق گرفتار ملزمان میں اسکول کا سیکیورٹی گارڈ محسن اور اس کا دوست اسد شامل ہیں۔ متاثرہ خاتون کے والد کی مدعیت میں مقدمہ درج کر لیا گیا ہے، جبکہ واقعے کی مختلف پہلوؤں سے تحقیقات جاری ہیں۔ایف آئی آر کے مطابق ملزم محسن نے اسکول میں چھٹی کے بعد متاثرہ ٹیچر کو ورغلا کر اپنے دوست اسد کے گھر لے گیا، جہاں دونوں ملزمان نے مبینہ طور پر خاتون کو زبردستی نشہ آور مشروب پلایا، تشدد کا نشانہ بنایا اور اجتماعی زیادتی کی۔پولیس کا کہنا ہے کہ مقدمہ درج کرنے کے بعد فوری کارروائی کرتے ہوئے دونوں نامزد ملزمان کو گرفتار کر لیا گیا ہے، جبکہ واقعے سے متعلق شواہد اکٹھے کیے جا رہے ہیں۔ تفتیش مکمل ہونے کے بعد مزید قانونی کارروائی عمل میں لائی جائے گی۔
دوسری جانب متاثرہ خاتون کا طبی معائنہ بھی کرایا گیا ہے، جبکہ پولیس حکام کا کہنا ہے کہ کیس کی شفاف اور میرٹ پر تفتیش یقینی بنائی جائے گی تاکہ ذمہ داروں کو قانون کے مطابق سزا دلائی جا سکے۔