سندھ طاس معاہدے کو یکطرفہ طور پر معطل نہیں کیا جا سکتا،عطا تارڑ

وفاقی وزیر اطلاعات و نشریات عطا اللہ تارڑ نے کہا ہے کہ سندھ طاس معاہدے پر پاکستان کا مؤقف عالمی سطح پر تسلیم کیا گیا ہے –

اسلام آباد میں پریس کانفرنس سے خطاب کرتے ہوئے عطا اللہ تارڑ نے کہا کہ سندھ طاس معاہدے کو یکطرفہ طور پر معطل نہیں کیا جا سکتا، کیونکہ یہ دونوں ممالک کے درمیان باقاعدہ طور پر طے پانے والا بین الاقوامی معاہدہ ہے،اور بین الاقوامی برادری نے اس معاہدے کی قانونی حیثیت کو تسلیم کرتے ہوئے پاکستان کے مؤقف کو تقویت بخشی ہے۔

انہوں نے کہا کہ وزیراعظم اور فیلڈ مارشل نے ہمیشہ اس بات پر زور دیا ہے کہ پانی پاکستان کی بقا کا معاملہ ہے، لہٰذا اس حوالے سے قومی مفادات پر کوئی سمجھوتا نہیں کیا جائے گا، پاکستان میں سندھ طاس معاہدے کے حوالے سے اپنی نوعیت کا پہلا بین الاقوامی سیمینار منعقد ہو رہا ہے، جس میں دنیا بھر سے آبی وسائل کے ماہرین شریک ہوں گے اس سیمینار سے پاکستان کے مؤقف کو عالمی سطح پر مزید تقویت ملے گی۔