جو ہمارے پانی پر ہاتھ ڈالے گا اس کا ہاتھ کاٹ دیں گے،مصدق ملک

وفاقی وزیر مصدق ملک کا کہنا ہے کہ گزشتہ ایک دو ماہ کے دوران سندھ طاس معاہدے کے معاملے کو بین الاقوامی سطح پر اٹھایا گیا، پاکستان نے تباہ کن سیلابوں کا سامنا کیا ہے، مودی پاکستان میں آبی دہشت گردی کرنا چاہتا ہے، پاکستان کی 20 سے 25 فیصد معیشت زراعت سے منسلک ہے، پاکستان میں بڑے طبقے کا ذریعہ معاش زراعت ہے جو پانی سے وابستہ ہے۔

عطا تارڑ کے ہمراہ پریس کانفرنس کرتے ہوئے مصدق ملک کا کہنا تھا کہ پاکستان واضح کرچکا ہے کہ وہ اپنے حصے کے پانی پر کوئی سمجھوتا نہیں کرے گا، ساری دنیا میں بغیر معاہدے کے پانی بہہ رہا ہے کل دنیا کے سامنے مقدمہ رکھیں گے، جو ہمارے پانی پر ہاتھ ڈالے گا اس کا ہاتھ کاٹ دیں گے۔مصدق ملک کا کہنا ہے کہ سندھ طاس معاہدہ بین الاقوامی مقدمہ بن چکا ہے جواب کسی کے پاس نہیں، باطل کے سامنے ہم سے کوئی جھکنے والا نہیں ہے، بھارت ابھی تک ہمارا پانی نہیں روک سکا نہ روکنے دیں گے، سندھ طاس معاہدے کے حوالے سے دنیا پاکستان کے مؤقف کو تسلیم کرچکی ہے، بہتے پانی سے بجلی بنانے کا ایک طریقۂ کار ہے، اندھا دھند پانی نہیں روک سکتے۔رہنماء مسلم لیگ ن نے کہا کہ بھارت کے پاس پانی روکنے کی گنجائش نہیں تھی ایک دو دن بعد چھوڑ دیا گیا، کل ہونیوالی کانفرنس انصاف اور حقوق سے متعلق ہے۔