Blog

‎امریکی صدر ڈونلڈ ٹرمپ نے اعلان کیا ہے کہ آبنائے ہرمز میں بحری آمد و رفت کی بحالی کے لیے اقدامات کیے جا رہے ہیں اور وہاں موجود جہازوں اور عملے کو معمول کی سرگرمیوں کی طرف لوٹنے کی تیاری کرنی چاہیے۔
‎صدر ٹرمپ نے اپنے سوشل میڈیا پلیٹ فارم پر جاری بیان میں ایران کے ساتھ جاری مذاکرات کے حوالے سے اہم نکات بیان کرتے ہوئے کہا کہ بعض معاملات پر پیش رفت ہوئی ہے، تاہم حتمی فیصلہ ابھی باقی ہے۔
‎انہوں نے کہا کہ ایران کے ساتھ کسی بھی ممکنہ معاہدے کی بنیادی شرط یہ ہوگی کہ تہران کبھی بھی جوہری ہتھیار حاصل نہ کرنے کے عزم کا واضح اظہار کرے۔
‎صدر ٹرمپ کے مطابق آبنائے ہرمز کو فوری طور پر مکمل طور پر کھولنا ضروری ہے تاکہ عالمی تجارتی اور توانائی سپلائی چین متاثر نہ ہو۔
‎انہوں نے زور دیا کہ بین الاقوامی بحری ٹریفک بلا رکاوٹ جاری رہنی چاہیے اور کسی بھی جہاز سے کسی قسم کا ٹول یا اضافی فیس وصول نہیں کی جانی چاہیے۔
‎امریکی صدر کا کہنا تھا کہ آبنائے ہرمز میں موجود بارودی سرنگوں کے مسئلے کو بھی فوری طور پر حل کیا جانا چاہیے تاکہ بحری جہازوں کی محفوظ نقل و حرکت یقینی بنائی جا سکے۔
‎انہوں نے مزید کہا کہ ایران کے جوہری پروگرام سے متعلق معاملات پر بھی خصوصی توجہ دی جا رہی ہے اور افزودہ یورینیم کے ذخائر سے متعلق مستقبل کے اقدامات مذاکرات کا اہم حصہ ہیں۔
‎ٹرمپ کے بیان کے مطابق مختلف امور پر پیش رفت ہو چکی ہے جبکہ چند اہم معاملات پر مزید مشاورت اور حتمی منظوری درکار ہے۔
‎سیاسی مبصرین کے مطابق اگر امریکا اور ایران کے درمیان مجوزہ مفاہمت کامیاب ہو جاتی ہے تو اس سے نہ صرف مشرق وسطیٰ میں کشیدگی کم ہو سکتی ہے بلکہ عالمی تیل منڈیوں اور سمندری تجارت کو بھی استحکام مل سکتا ہے۔

‎اسرائیلی وزیراعظم بنجمن نیتن یاہو نے غزہ میں فوجی کارروائیوں کو مزید وسعت دیتے ہوئے اسرائیلی فوج کو علاقے کے 70 فیصد حصے پر کنٹرول حاصل کرنے کی ہدایت جاری کر دی ہے۔
‎غیر ملکی میڈیا رپورٹس کے مطابق نیتن یاہو نے مقبوضہ مغربی کنارے میں قائم ایک اسرائیلی بستی میں نیوز کانفرنس کے دوران یہ اعلان کیا۔
‎اسرائیلی وزیراعظم کا کہنا تھا کہ اسرائیلی فوج پہلے ہی غزہ کے بڑے حصے پر کنٹرول حاصل کر چکی ہے اور اب مزید علاقوں میں کارروائیاں جاری رکھی جائیں گی۔
‎انہوں نے دعویٰ کیا کہ اسرائیلی فورسز نے پہلے غزہ کے تقریباً 50 فیصد اور بعد ازاں 60 فیصد علاقے پر کنٹرول حاصل کیا، جبکہ اب فوج کو 70 فیصد علاقے تک پیش قدمی کا حکم دیا گیا ہے۔
‎اس اعلان کے بعد غزہ میں جاری انسانی بحران کے مزید سنگین ہونے کے خدشات پیدا ہو گئے ہیں۔
‎غزہ کی بڑی آبادی پہلے ہی مسلسل بمباری، فوجی کارروائیوں اور نقل مکانی کے باعث محدود علاقوں میں پناہ لینے پر مجبور ہے۔
‎انسانی حقوق کی تنظیموں کے مطابق لاکھوں فلسطینی بے گھر ہو چکے ہیں جبکہ خوراک، پانی، ادویات اور بنیادی سہولیات کی شدید قلت برقرار ہے۔
‎تجزیہ کاروں کا کہنا ہے کہ غزہ کے مزید علاقوں پر کنٹرول حاصل کرنے کی اسرائیلی حکمت عملی خطے میں کشیدگی کو مزید بڑھا سکتی ہے۔
‎ماہرین کے مطابق مسلسل فوجی کارروائیوں اور آبادی کی نقل مکانی سے انسانی صورتحال مزید خراب ہونے کا خدشہ ہے۔
‎دوسری جانب فلسطینی حلقوں نے اسرائیلی اقدامات کو بین الاقوامی قوانین اور فلسطینی عوام کے حقوق کے خلاف قرار دیتے ہوئے عالمی برادری سے فوری مداخلت کا مطالبہ کیا ہے۔

‎قطر کے امیر شیخ تمیم بن حمد آل ثانی اور امریکی صدر ڈونلڈ ٹرمپ کے درمیان اہم ٹیلی فونک رابطہ ہوا جس میں مشرقِ وسطیٰ کی موجودہ صورتحال اور خطے میں امن و استحکام کے حوالے سے تبادلہ خیال کیا گیا۔
‎امیرِ قطر کے دفتر سے جاری بیان کے مطابق گفتگو کے دوران دونوں رہنماؤں نے خطے میں بڑھتی کشیدگی، سفارتی کوششوں اور امن کے امکانات پر تفصیلی بات چیت کی۔
‎شیخ تمیم بن حمد آل ثانی نے اس موقع پر زور دیا کہ مشرقِ وسطیٰ میں مزید کشیدگی اور تصادم سے بچنے کے لیے تمام فریقین کو مکالمے، سفارت کاری اور سیاسی حل کو ترجیح دینی چاہیے۔
‎بیان میں کہا گیا کہ قطری امیر نے خطے کے مسائل کے حل کے لیے بات چیت اور سفارتی ذرائع کے استعمال کی اہمیت پر زور دیا اور امن کے فروغ کے لیے مشترکہ کوششوں کی ضرورت اجاگر کی۔
‎دوسری جانب امریکی صدر ڈونلڈ ٹرمپ نے خطے میں کشیدگی کم کرنے کے لیے قطر کے کردار کو سراہا اور اس کی سفارتی کاوشوں کی تعریف کی۔
‎بیان کے مطابق صدر ٹرمپ نے پاکستان کی ثالثی کوششوں میں قطر کے تعاون اور کردار کو بھی قابلِ تحسین قرار دیا۔
‎امریکی صدر نے کہا کہ پاکستان اور قطر کی جانب سے خطے میں امن، استحکام اور کشیدگی میں کمی کے لیے کی جانے والی کوششیں مثبت نتائج کی جانب پیش رفت میں مددگار ثابت ہو رہی ہیں۔
‎سیاسی مبصرین کے مطابق ایران، امریکا اور اسرائیل کے درمیان جاری تناؤ کے دوران قطر اور پاکستان دونوں ممالک سفارتی سطح پر اہم کردار ادا کر رہے ہیں۔
‎ماہرین کا کہنا ہے کہ موجودہ صورتحال میں علاقائی طاقتوں کی جانب سے مذاکرات اور ثالثی کی کوششیں مشرقِ وسطیٰ میں کسی بڑے تصادم کو روکنے کے لیے انتہائی اہم ہیں۔

‎ایران نے آبنائے ہرمز کے قریب فضائی نگرانی اور دفاعی صلاحیتوں کو مضبوط بنانے کے لیے ایک نئے فضائی دفاعی نظام متعارف کرانے کا دعویٰ کیا ہے۔
‎غیر ملکی میڈیا رپورٹس کے مطابق ایرانی حکام کا کہنا ہے کہ نیا دفاعی نظام "آرش کمان گیر” مستقبل میں آبنائے ہرمز اور حساس ساحلی علاقوں کے قریب دشمن ڈرونز اور فضائی خطرات کا مقابلہ کرنے کے لیے استعمال کیا جائے گا۔
‎ایرانی میڈیا کے مطابق اس نئے نظام کا نام فارسی داستانوں کے مشہور ہیرو "آرش” کے نام پر رکھا گیا ہے، جسے قومی دفاع اور مزاحمت کی علامت قرار دیا جاتا ہے۔
‎رپورٹس میں دعویٰ کیا گیا ہے کہ اس دفاعی نظام کے ذریعے جدید امریکی ایم کیو نائن ریپر ڈرون کو نشانہ بنانے کا کامیاب تجربہ بھی کیا گیا۔
‎ایرانی ذرائع کا کہنا ہے کہ یہ نظام روایتی ریڈار پر مکمل انحصار کے بجائے جدید اسٹیلتھ اور خفیہ ٹیکنالوجی سے لیس ہے، جس سے اسے دشمن کی نظروں سے محفوظ رہتے ہوئے مؤثر کارروائی کی صلاحیت حاصل ہوتی ہے۔
‎حکام کے مطابق نئے دفاعی نظام کا مقصد سرحدی اور ساحلی علاقوں میں فضائی نگرانی کو بہتر بنانا اور ممکنہ خطرات کا بروقت جواب دینا ہے۔
‎دوسری جانب دفاعی ماہرین کا کہنا ہے کہ ایران مسلسل پابندیوں اور دباؤ کے باوجود اپنے مقامی دفاعی نظام کو جدید بنانے کی کوشش کر رہا ہے۔
‎مغربی دفاعی تجزیہ کاروں کے مطابق یہ نظام کم لاگت، متحرک اور بغیر روایتی ریڈار کے کام کرنے والی دفاعی صلاحیتوں پر مبنی ہو سکتا ہے۔
‎ماہرین کا خیال ہے کہ اگر ایرانی دعوے درست ثابت ہوتے ہیں تو یہ نظام خطے میں فضائی آپریشنز کی حکمت عملی پر اثر انداز ہو سکتا ہے اور مخالف قوتوں کو زیادہ فاصلے سے مہنگے ہتھیار استعمال کرنے پر مجبور کر سکتا ہے۔
‎تجزیہ کاروں کے مطابق حالیہ کشیدگی کے دوران ایران اپنی دفاعی صلاحیتوں کو نمایاں کر کے خطے میں اپنی عسکری موجودگی اور دفاعی تیاری کا پیغام دینا چاہتا ہے۔

‎امریکا میں صدر ڈونلڈ ٹرمپ کی تصویر والے 250 ڈالر کے نئے کرنسی نوٹ کی تیاریوں سے متعلق رپورٹس نے سیاسی حلقوں میں نئی بحث چھیڑ دی ہے۔
‎غیر ملکی میڈیا رپورٹس کے مطابق امریکی آزادی کے 250 سال مکمل ہونے کے موقع پر خصوصی یادگاری کرنسی نوٹ جاری کرنے کی منصوبہ بندی کی جا رہی ہے جس پر صدر ڈونلڈ ٹرمپ کی تصویر شامل کیے جانے کا دعویٰ کیا گیا ہے۔
‎رپورٹس کے مطابق امریکی وزیر خزانہ نے بھی 250 ڈالر کے مجوزہ نوٹ پر ٹرمپ کی تصویر چھاپنے کی تیاریوں کی تصدیق کی ہے۔
‎اگر یہ منصوبہ عملی شکل اختیار کرتا ہے تو ایک صدی سے زائد عرصے بعد امریکی تاریخ میں پہلی مرتبہ کسی زندہ شخصیت کی تصویر کرنسی نوٹ پر شائع ہوگی۔
‎اطلاعات کے مطابق امریکا کی بعض وفاقی عمارتوں پر بھی صدر ٹرمپ کی تصاویر پر مشتمل بینرز آویزاں کیے گئے ہیں جبکہ ان کی تصویر والے یادگاری سونے کے سکے اور خصوصی پاسپورٹ ڈیزائنز پر بھی کام جاری ہے۔
‎رپورٹ میں کہا گیا ہے کہ نئے کرنسی نوٹ پر صدر ٹرمپ کے دستخط بھی شامل کیے جا سکتے ہیں۔
‎تاہم امریکی قانون کے تحت کسی زندہ شخص کی تصویر سرکاری کرنسی نوٹ پر شائع کرنے کی اجازت نہیں ہے۔
‎اسی وجہ سے اس قانونی پابندی کو ختم کرنے کے لیے امریکی کانگریس میں ایک بل بھی پیش کیے جانے کی اطلاعات سامنے آئی ہیں۔
‎دوسری جانب اپوزیشن جماعتوں، ناقدین اور بعض سیاسی مبصرین نے اس اقدام پر شدید تحفظات کا اظہار کیا ہے۔
‎ناقدین کا کہنا ہے کہ سرکاری دستاویزات، کرنسی اور قومی علامات پر موجودہ صدر کی تصویر شامل کرنے کی کوشش سیاسی شخصیت پرستی کو فروغ دے سکتی ہے۔

‎عید الاضحیٰ کے تیسرے روز ملک بھر میں سونے کی قیمت میں مزید کمی ریکارڈ کی گئی ہے، جس کے بعد خریداروں اور سرمایہ کاروں کیلئے قیمتی دھات نسبتاً سستی ہو گئی ہے۔
‎آل پاکستان جیمز اینڈ جیولرز ایسوسی ایشن کے مطابق فی تولہ سونے کی قیمت میں 500 روپے کی کمی ہوئی ہے۔
‎کمی کے بعد ملک میں ایک تولہ سونے کی نئی قیمت 4 لاکھ 74 ہزار 862 روپے ہو گئی ہے۔
‎ایسوسی ایشن کے اعداد و شمار کے مطابق 10 گرام سونے کی قیمت میں بھی 429 روپے کی کمی ریکارڈ کی گئی، جس کے بعد 10 گرام سونا 4 لاکھ 7 ہزار 17 روپے میں فروخت ہو رہا ہے۔
‎دوسری جانب عالمی مارکیٹ میں بھی سونے کی قیمتوں میں معمولی کمی دیکھی گئی ہے۔
‎عالمی بازار میں فی اونس سونے کی قیمت 5 ڈالر کم ہو کر 4525 ڈالر تک پہنچ گئی ہے۔
‎ماہرین کے مطابق عالمی منڈی میں سونے کی قیمتوں میں اتار چڑھاؤ، ڈالر کی قدر، عالمی سیاسی صورتحال اور سرمایہ کاروں کے رجحانات مقامی مارکیٹ پر بھی براہ راست اثر انداز ہوتے ہیں۔
‎تجزیہ کاروں کا کہنا ہے کہ حالیہ دنوں ایران اور امریکا کے درمیان ممکنہ سفارتی پیش رفت اور عالمی مالیاتی منڈیوں میں بہتری کے باعث محفوظ سرمایہ کاری کے طور پر سونے کی طلب میں کچھ کمی دیکھی ۔
‎صرافہ بازار کے ماہرین کے مطابق اگر عالمی مارکیٹ میں قیمتوں میں کمی کا رجحان برقرار رہا تو آنے والے دنوں میں مقامی سطح پر بھی سونا مزید سستا ہو سکتا ہے۔

‎امریکی وزیر خزانہ اسکاٹ بیسینٹ نے کہا ہے کہ صدر ڈونلڈ ٹرمپ نے ایران کے حوالے سے اپنی ریڈ لائنز واضح کر دی ہیں اور کسی بھی ممکنہ معاہدے میں ایران کو انتہائی افزودہ یورینیم سے دستبردار ہونا ہوگا۔
‎میڈیا سے گفتگو کرتے ہوئے اسکاٹ بیسینٹ نے کہا کہ صدر ٹرمپ ایران کے معاملے پر کوئی کمزور یا ناقص معاہدہ قبول نہیں کریں گے اور امریکی مفادات کے تحفظ پر کوئی سمجھوتہ نہیں کیا جائے گا۔
‎انہوں نے کہا کہ ایران کے جوہری پروگرام سے متعلق امریکی مؤقف واضح ہے اور تہران کو ایسے اقدامات کرنا ہوں گے جو خطے اور عالمی برادری کے تحفظات کو دور کر سکیں۔
‎امریکی وزیر خزانہ کے مطابق آبنائے ہرمز کو بین الاقوامی جہاز رانی کے لیے مکمل طور پر کھلا رکھنا بھی کسی بھی ممکنہ مفاہمت کا اہم حصہ ہے۔
‎انہوں نے زور دیتے ہوئے کہا کہ عالمی تجارت اور توانائی کی ترسیل میں آبنائے ہرمز کی اہمیت انتہائی زیادہ ہے، اس لیے وہاں کسی قسم کی رکاوٹ قابل قبول نہیں ہو سکتی۔
‎ایران اور امریکا کے درمیان مجوزہ 60 روزہ جنگ بندی اور مفاہمتی یادداشت سے متعلق سوال پر اسکاٹ بیسینٹ نے کہا کہ مذاکرات جاری ہیں، تاہم حتمی فیصلے صدر ٹرمپ کی منظوری کے بعد ہی سامنے آئیں گے۔
‎انہوں نے مزید بتایا کہ عمانی حکام نے امریکا کو یقین دہانی کرائی ہے کہ آبنائے ہرمز میں جہازوں پر کسی قسم کا ٹول ٹیکس عائد کرنے یا نیا مالیاتی نظام نافذ کرنے کا کوئی منصوبہ موجود نہیں۔
‎دوسری جانب ایران اور امریکا کے درمیان ممکنہ معاہدے کی خبروں نے عالمی مالیاتی منڈیوں میں مثبت اثرات مرتب کیے ہیں جبکہ خام تیل کی قیمتوں میں بھی کمی دیکھی جا رہی ہے۔
‎سیاسی تجزیہ کاروں کے مطابق جوہری پروگرام، آبنائے ہرمز اور علاقائی سلامتی آئندہ مذاکرات کے اہم ترین نکات ہوں گے۔