Blog


ایران میں تیل کی تنصیبات پر شدید بمباری کے بعد ماحولیاتی آلودگی میں خطرناک حد تک اضافہ ہو گیا ہے جس کے نتیجے میں تہران میں سیاہ بادل چھا گئے اور بعض علاقوں میں تیل سے آلودہ کالے پانی کی بارش کی اطلاعات سامنے آئی ہیں۔
رپورٹس کے مطابق ایران پر جاری حملوں کے دوران اسرائیل اور امریکا کی جانب سے تیل کے بنیادی ڈھانچے کو نشانہ بنایا گیا جس کے بعد فضاء میں دھوئیں اور آلودگی کی بڑی مقدار شامل ہو گئی۔ اس صورتحال کے باعث تہران اور قریبی علاقوں میں غیر معمولی موسمی کیفیت دیکھنے میں آئی۔
‎اس واقعے کے بعد پڑوسی ممالک میں بھی ممکنہ موسمی اور ماحولیاتی اثرات کے خدشات ظاہر کیے جا رہے ہیں۔ پاکستان میں خاص طور پر اس حوالے سے تشویش پائی جا رہی ہے کیونکہ دونوں ممالک کی سرحدیں ایک دوسرے سے ملتی ہیں۔
‎محکمہ موسمیات کے مطابق تیل کی تنصیبات پر حملوں سے ایران میں شدید ماحولیاتی نقصان ہوا ہے اور بعض علاقوں میں کالی تیزابی بارش کی اطلاعات بھی موصول ہوئی ہیں۔ تاہم اب تک پاکستان میں اس کے براہ راست اثرات دیکھنے میں نہیں آئے۔
‎ماہرین کا کہنا ہے کہ تہران پاکستان سے کافی فاصلے پر واقع ہے اور کسی فوری ماحولیاتی اثر کا سب سے پہلے افغانستان پر پڑنے کا امکان زیادہ ہے۔
‎محکمہ موسمیات کے مطابق حملوں کے باعث فضاء میں کاربن کے اخراج میں اضافہ ہوا ہے جو اوپری ماحول کے درجہ حرارت اور نمی کے نظام کو متاثر کر سکتا ہے۔ اس کے نتیجے میں خطے میں بارش کے پیٹرن میں تبدیلی کا امکان بھی ظاہر کیا جا رہا ہے۔
‎حکام کا کہنا ہے کہ تیل کے بنیادی ڈھانچے پر بڑے پیمانے پر حملوں سے ماحولیاتی اور موسمیاتی تبدیلیاں پیدا ہو سکتی ہیں جو طویل مدت میں زراعت، آبی وسائل اور صحت عامہ کو متاثر کر سکتی ہیں۔ اس صورتحال کی نگرانی کے لیے سیٹلائٹ مانیٹرنگ کے ذریعے آلودگی اور ہوا کے معیار کا جائزہ لیا جا رہا ہے۔
‎محکمہ موسمیات نے شہریوں کو ہدایت کی ہے کہ وہ صرف سرکاری ذرائع سے جاری ہونے والی معلومات پر اعتماد کریں اور سوشل میڈیا پر گردش کرنے والی غیر مصدقہ خبروں سے گریز کریں۔


امریکی فوجی کمان سینٹ کام نے ایرانی شہریوں کے لیے ہنگامی ہدایت جاری کرتے ہوئے انہیں گھروں کے اندر رہنے کا مشورہ دیا ہے۔ امریکی حکام نے الزام عائد کیا ہے کہ ایرانی افواج گنجان آباد شہری علاقوں کو ڈرون اور میزائل حملوں کے لیے استعمال کر رہی ہیں۔
مشرق وسطیٰ میں تعینات امریکی سینٹرل کمانڈ کے مطابق تہران شہری علاقوں کو عسکری کارروائیوں کے لیے استعمال کر رہا ہے جو بین الاقوامی قوانین کی خلاف ورزی قرار دی جا رہی ہے۔
‎سینٹ کام کے اعلامیے میں دعویٰ کیا گیا ہے کہ ایرانی افواج خاص طور پر گنجان آباد مقامات کو ڈرون اور میزائل حملوں کے لیے استعمال کر رہی ہیں جس سے شہری آبادی خطرے میں پڑ رہی ہے۔
‎امریکی حکام کے مطابق شہری آبادی کو عسکری کارروائیوں کے لیے انسانی ڈھال کے طور پر استعمال کرنا بین الاقوامی قانون کے تحت سنگین جرم تصور کیا جاتا ہے۔
‎اعلامیے میں کہا گیا ہے کہ بین الاقوامی قوانین کے تحت وہ مقامات جو فوجی مقاصد کے لیے استعمال کیے جائیں اپنی حفاظتی حیثیت کھو دیتے ہیں اور ایسے مقامات قانونی طور پر فوجی ہدف بن سکتے ہیں چاہے وہ شہری علاقوں کے قریب ہی کیوں نہ ہوں۔
‎امریکی حکام نے مزید کہا کہ ایران کی جانب سے خلیجی ممالک کو نشانہ بنانے کے اقدامات نہ صرف خطے کے امن کو متاثر کر رہے ہیں بلکہ ایرانی شہریوں کی زندگیوں کو بھی خطرے میں ڈال سکتے ہیں۔


روسی صدر ولادیمیر پیوٹن نے ایران کے نئے سپریم لیڈر آیت اللہ مجتبیٰ خامنہ ای کو مبارک باد کا پیغام بھیجا ہے اور مشکل حالات میں ایرانی قیادت کے لیے نیک خواہشات کا اظہار کیا ہے۔
اپنے پیغام میں پیوٹن نے کہا کہ ایسے وقت میں جب ایران بیرونی جارحیت کا سامنا کر رہا ہے، اس اہم منصب پر ذمہ داریاں سنبھالنا یقیناً ہمت اور عزم کا تقاضا کرتا ہے۔ انہوں نے کہا کہ انہیں یقین ہے کہ مجتبیٰ خامنہ ای اپنے والد کے مشن کو وقار کے ساتھ آگے بڑھائیں گے اور سخت حالات میں ایرانی قوم کو متحد رکھیں گے۔
‎روسی صدر نے اپنے بیان میں ایران کے ساتھ روس کی حمایت کا اعادہ کرتے ہوئے کہا کہ روس اسلامی جمہوریہ ایران کا قابل اعتماد شراکت دار رہا ہے اور آئندہ بھی رہے گا۔
‎یاد رہے کہ 56 سالہ مجتبیٰ خامنہ ای ایران کی تاریخ کے تیسرے سپریم لیڈر بنے ہیں۔ اس سے قبل آیت اللہ علی خامنہ ای تقریباً 37 سال تک اس منصب پر فائز رہے۔ رپورٹس کے مطابق 28 فروری کو امریکا اور اسرائیل کے مشترکہ فضائی حملے میں تہران میں ان کی رہائش گاہ کو نشانہ بنایا گیا تھا جس میں وہ ہلاک ہوگئے تھے۔

امریکا اور ایران کے درمیان جاری تنازع کے دوران ایک اور امریکی فوجی ہلاک ہو گیا ہے جس کے بعد اس جھڑپ میں مارے جانے والے امریکی فوجیوں کی تعداد سات ہو گئی ہے۔
‎امریکی میڈیا کے مطابق ہلاک ہونے والا فوجی کینٹکی سے تعلق رکھنے والا 26 سالہ آرمی سارجنٹ تھا۔ اس کی شناخت کی تصدیق سی این این کی جانب سے جاری بریکنگ نیوز میں کی گئی ہے۔
‎رپورٹس کے مطابق مشرق وسطیٰ میں جاری کشیدگی کے باعث امریکی افواج خطے میں مختلف فوجی کارروائیوں میں مصروف ہیں۔ اس دوران حالیہ مہینوں میں تنازع شدت اختیار کر چکا ہے جس نے عالمی سطح پر تشویش پیدا کر دی ہے۔
‎امریکی محکمہ دفاع نے تاحال فوجی کی ہلاکت کی تفصیلات جاری نہیں کیں اور واقعے کی تحقیقات جاری ہیں۔
‎ماہرین کے مطابق یہ واقعہ مشرق وسطیٰ میں جاری فوجی کشیدگی اور وہاں تعینات اہلکاروں کو درپیش خطرات کو نمایاں کرتا ہے۔


تہران میں ایرانی پارلیمنٹ کے اسپیکر محمد باقر قالیباف نے دعویٰ کیا ہے کہ اسرائیل کا دفاعی نظام آئرن ڈوم اب مؤثر نہیں رہا اور ایران اب جہاں چاہے میزائل حملے کرنے کی صلاحیت رکھتا ہے۔
اپنے بیان میں قالیباف نے کہا کہ ایران مؤثر اور طاقتور حملے کرنے کی مکمل صلاحیت رکھتا ہے۔ ان کے مطابق امریکی صدر ڈونلڈ ٹرمپ اور اسرائیلی وزیراعظم بنیامین نیتن یاہو کا یہ خیال کہ جنگ چند دنوں میں ختم ہو جائے گی ایک بڑی غلطی ثابت ہوا ہے۔
‎انہوں نے کہا کہ ایران اپنے وجود اور سلامتی کے تحفظ کے لیے پوری طاقت کے ساتھ مقابلہ کر رہا ہے اور اس راستے پر ثابت قدمی سے آگے بڑھتا رہے گا۔


متحدہ عرب امارات میں ایک فوجی ہیلی کاپٹر گر کر تباہ ہو گیا جس کے نتیجے میں مسلح افواج کے دو اہلکار ہلاک ہو گئے ہیں۔
اماراتی وزارتِ دفاع کے مطابق یہ حادثہ پیر 9 مارچ 2026 کو اس وقت پیش آیا جب فوجی ہیلی کاپٹر قومی ڈیوٹی انجام دے رہا تھا۔ ابتدائی معلومات کے مطابق ہیلی کاپٹر تکنیکی خرابی کے باعث گر کر تباہ ہوا۔
‎وزارتِ دفاع نے بتایا کہ حادثے میں مسلح افواج کے دو اہلکار جان کی بازی ہار گئے۔ حکام کی جانب سے واقعے کی تحقیقات شروع کر دی گئی ہیں تاکہ حادثے کی وجوہات کا مکمل تعین کیا جا سکے۔
اماراتی وزارتِ دفاع نے شہید اہلکاروں کے اہل خانہ سے اظہار تعزیت بھی کیا اور ان کے لیے ہمدردی اور یکجہتی کا پیغام جاری کیا۔


عالمی ادارہ خوراک (ورلڈ فوڈ پروگرام) نے خبردار کیا ہے کہ افغانستان دنیا کے شدید ترین غذائی بحرانوں میں سے ایک کا سامنا کر رہا ہے جہاں لاکھوں افراد کو خوراک تک رسائی میں شدید مشکلات پیش آ رہی ہیں۔
جمعرات کو جاری کی گئی رپورٹ میں ادارے نے کہا کہ ملک بھر میں شدید غذائی قلت میں اضافہ ہو رہا ہے جس کے باعث ہزاروں بچے سنگین خطرے سے دوچار ہیں۔
‎ورلڈ فوڈ پروگرام کے مطابق افغانستان اور پاکستان کی سرحد پر بڑھتی ہوئی جھڑپوں کے باعث کمزور اور ضرورت مند آبادی کے لیے صحت کی سہولیات اور انسانی امداد تک رسائی بھی متاثر ہو رہی ہے۔
‎ادارے نے خبردار کیا کہ اگر سرحدی علاقوں میں لڑائی جاری رہی تو پہلے ہی غربت اور بھوک کا شکار خاندان مزید مشکلات کا شکار ہو سکتے ہیں اور ان کے حالات زندگی مزید خراب ہو جائیں گے۔
‎یہ انتباہ ایسے وقت میں سامنے آیا ہے جب سرحدی صوبوں پکتیا اور خوست میں افغان طالبان اور پاکستانی فورسز کے درمیان جھڑپوں کی اطلاعات سامنے آ رہی ہیں۔
‎اقوام متحدہ کے دفتر برائے رابطہ انسانی امور کے مطابق حالیہ سرحدی جھڑپوں کے باعث مشرقی افغانستان میں کم از کم 16 ہزار 370 خاندان بے گھر ہو چکے ہیں۔
‎انسانی امدادی اداروں کا کہنا ہے کہ افغانستان میں معاشی بحران، خشک سالی اور امداد کی کمی کے باعث دیہی علاقوں میں لاکھوں افراد ہنگامی غذائی امداد پر انحصار کر رہے ہیں۔
‎امدادی تنظیموں نے خبردار کیا ہے کہ اگر مستقل انسانی امداد اور بہتر سکیورٹی صورتحال فراہم نہ کی گئی تو آنے والے مہینوں میں افغانستان کا غذائی بحران مزید سنگین ہو سکتا ہے۔


امریکی صدر ڈونلڈ ٹرمپ نے کہا ہے کہ ایران کے ساتھ جاری جنگ کے خاتمے سے متعلق فیصلہ اسرائیلی وزیراعظم نیتن یاہو کے ساتھ مشاورت کے بعد کیا جائے گا۔
اپنے بیان میں ٹرمپ کا کہنا تھا کہ نیتن یاہو کو اس تنازع کے حل کے حوالے سے اپنی رائے دینے کا مکمل موقع دیا جائے گا۔ ان کے مطابق یہ معاملہ مشترکہ نوعیت کا ہے اور اس پر دونوں ممالک کے درمیان مسلسل رابطہ اور مشاورت جاری ہے۔
‎امریکی صدر نے مزید کہا کہ مناسب وقت آنے پر حتمی فیصلہ کیا جائے گا اور اس دوران تمام اہم عوامل کو مدنظر رکھا جائے گا۔
‎دوسری جانب امریکا نے اپنے شہریوں کو سعودی عرب چھوڑنے کی ہدایات بھی جاری کر دی ہیں۔ امریکی سفارتخانے کا کہنا ہے کہ اس وقت سعودی عرب سے پروازیں جاری ہیں اور امریکی شہری اس موقع سے فائدہ اٹھاتے ہوئے ملک چھوڑ سکتے ہیں۔