Blog

ایران کے صدر نے کہا ہے کہ“ہم ہمسایہ ممالک پر حملہ نہیں کریں گے۔” مگر صرف 5 گھنٹے بعد ایرانی پاسدارانِ انقلاب نے اسے “غلطی” قرار دیا اور حملے جاری رکھے۔

ایک ایرانی ڈرون نے دبئی مرینا میں ایک رہائشی ٹاور کو نشانہ بنایا ، جو مکمل طور پر شہری عمارت تھی۔

اسرائیلی فوج نے ایران کی پارچین اور شاہرود میزائل فیکٹریوں کو تباہ کر دیا ، مقصد یہ بتایا جا رہا ہے کہ ایران کو مستقبل میں دوبارہ میزائل بنانے کی صلاحیت سے محروم کر دیا جائے۔

ایک بیلسٹک میزائل سعودی عرب کے پرنس سلطان ایئر بیس کے قریب گرا ، جہاں امریکی F-15 طیارے، THAAD اور پیٹریاٹ دفاعی نظام موجود ہیں۔

متحدہ عرب امارات نے ایران کو براہِ راست پیغام دیا “جارحیت فوری طور پر بند ہونی چاہیے۔”اور ایران کے میزائل پروگرام کو مکمل ختم کرنے کا مطالبہ کیا۔

امریکہ نے قشم جزیرے پر واقع ایک میٹھا پانی بنانے والے (ڈیسالینیشن) پلانٹ کو بمباری میں نشانہ بنایا،جس کے بعد 30 دیہات پانی کی فراہمی سے محروم ہو گئے۔

اسرائیل نے لبنان کی بقاع وادی پر حملہ کیا ، ایک ہی حملے میں 41 افراد ہلاک جبکہ مجموعی طور پر 339 لبنانی جانیں ضائع ہو چکی ہیں۔

ایران نے عبرانی زبان میں براہِ راست اسرائیلی شہریوں کو پیغام جاری کیا جس میں اسرائیل پر انسانی ڈھال استعمال کرنے کا الزام لگایا گیا۔

اٹلی نے قبرص کی جانب ایک جنگی جہاز بھیجنے کا اعلان کیا۔وزیراعظم نے کہا: “ہم اس جنگ کا حصہ نہیں ہیں۔” لیکن اس کے باوجود فوجی وسائل منتقل کیے جا رہے ہیں۔

عمان کے وزیر خارجہ نے کہا“اس جنگ کو روکنا تمام عرب ممالک کے لیے اعلیٰ ترین قومی مفاد ہے۔”

وہ باتیں جو سب سے زیادہ تشویشناک ہیں

ایران کے میزائل حملوں میں 90٪ کمی آئی ہے ، ماہرین کے مطابق یہ کمزوری نہیں بلکہ حکمتِ عملی میں تبدیلی ہے۔یعنی ایران طویل جنگ کے لیے گولہ بارود محفوظ کر رہا ہے۔ ایرانی پاسدارانِ انقلاب نے کھلے عام دنیا سے کہا کہ اپنے ہی صدر کی بات کو نظر انداز کریں ، جس سے ظاہر ہوتا ہے کہ حکومت کے اندر شدید تقسیم پیدا ہو چکی ہے۔ خلیجی ممالک پر حملے اب اسرائیل سے زیادہ بار ہونے لگے ہیں۔ اگر ایران میں حکومت کی تبدیلی کا منصوبہ ناکام ہو جاتا ہے تو امریکہ کے پاس متبادل منصوبہ نہیں ہے۔ امریکہ کے پانی کے پلانٹ پر حملے کے بعد ایران اب تمام شہری انفراسٹرکچر کو جائز ہدف سمجھ سکتا ہے۔ یہ صورتحال کم ہونے کے بجائے مزید سنگین ہو رہی ہے،صرف 8 گھنٹوں میں 8 ممالک اس بحران کی لپیٹ میں آ چکے ہیں، اور ہر گزرتے گھنٹے کے ساتھ حالات مزید خراب ہوتے جا رہے ہیں۔صورتحال انتہائی حساس اور خطرناک مرحلے میں داخل ہو چکی ہے۔

تہران: مشرقِ وسطیٰ میں جاری کشیدگی کے دوران ایران کے دارالحکومت تہران کے قریب آئل انفراسٹرکچر کو مبینہ طور پر فضائی حملوں کا نشانہ بنایا گیا ہے۔

رپورٹس کے مطابق اسرائیل اور امریکہ کی مشترکہ کارروائی میں اہم توانائی تنصیبات کو ہدف بنایا گیا،اطلاعات کے مطابق صوبہ البرز کے شہر کراچ میں واقع سہاران آئل ڈپو اور مشرقی تہران ریفائنری پر حملے کیے گئے۔ حملوں کے بعد متعدد مقامات پر آگ بھڑک اٹھی جبکہ زور دار دھماکوں کی آوازیں بھی سنائی دینے کی خبریں سامنے آئی ہیں۔عینی شاہدین اور سوشل میڈیا پر سامنے آنے والی ویڈیوز میں بعض علاقوں سے دھوئیں کے گھنے بادل اٹھتے دکھائی دے رہے ہیں۔ ابتدائی اطلاعات کے مطابق ان حملوں کا مقصد ایران کی توانائی اور اسٹریٹجک تنصیبات کو نشانہ بنانا تھا۔

ماہرین کا کہنا ہے کہ تہران کے قریب واقع فیول ڈپو اور ریفائنریوں پر حملے مقامی ایندھن کی فراہمی کو متاثر کر سکتے ہیں۔ ماضی میں بھی ایسے حملوں کے بعد بڑے پیمانے پر آگ لگنے اور فیول سپلائی میں رکاوٹیں پیدا ہونے کے واقعات سامنے آ چکے ہیں۔دوسری جانب ایرانی حکام کی جانب سے حملوں کے نقصانات یا ممکنہ جانی نقصان کے بارے میں فوری طور پر کوئی باضابطہ بیان جاری نہیں کیا گیا۔ تاہم سکیورٹی اور ہنگامی اداروں کو متاثرہ علاقوں میں بھیج دیا گیا ہے۔

ایران پر حملے کے نتیجے میں امریکی صدر ڈونلڈ ٹرمپ کے مواخذے کے امکانات بڑھ کر 67 فیصد ہوگئے ہیں ۔

یہ بات امریکی میڈیا نے سٹہ بازار کے اعداد و شمار کی بنیاد پر کہی ہے ،ماہرین کا کہنا ہے کہ سٹہ بازار سیاسی ماحول کی عکاسی تو کرتا ہے لیکن اُسے حتمی پیش گوئی نہیں سمجھا جا سکتا ۔،سیاسی تجزیہ کاروں کے مطابق فی الحال ٹرمپ کے مواخذے کا امکان کم ہے کیونکہ ری پبلکن پارٹی ایوانِ نمائندگان اور سینیٹ دونوں میں اکثریت رکھتی ہے اور پارٹی کے ارکان کی بڑی تعداد صدر کی حمایت کر رہی ہے ،تاہم اگر اس سال نومبر کے وسط مدتی انتخابات میں ڈیموکریٹس ایوانِ نمائندگان میں اکثریت حاصل کر لیتے ہیں تو صورتِ حال بدل سکتی ہے.


امریکی اخبار کی رپورٹ کے مطابق ایک خفیہ امریکی انٹیلی جنس جائزے میں خبردار کیا گیا ہے کہ بڑے پیمانے پر فوجی حملوں کے باوجود ایران کی موجودہ حکومت کو ہٹانا آسان نہیں ہوگا۔
رپورٹ کے مطابق یہ تجزیہ نیشنل انٹیلیجنس کونسل کے سینئر ماہرین نے تیار کیا ہے جو امریکا کی 18 انٹیلیجنس ایجنسیوں سے حاصل ہونے والی معلومات کی بنیاد پر خفیہ رپورٹس مرتب کرتے ہیں۔ یہ رپورٹ ایران پر امریکا اور اسرائیل کے حالیہ حملوں کے آغاز سے تقریباً ایک ہفتہ پہلے مکمل کی گئی تھی۔
‎رپورٹ میں کہا گیا ہے کہ اگر ایران کی اعلیٰ قیادت کو نشانہ بنایا جاتا ہے تو ملک کی مذہبی اور فوجی قیادت پہلے سے طے شدہ طریقہ کار کے مطابق فوری ردعمل دے سکتی ہے۔ اس کے ساتھ یہ بھی کہا گیا کہ ایران کی اپوزیشن کے اقتدار سنبھالنے کے امکانات بھی انتہائی کم ہیں۔
‎امریکی حکام کے مطابق اب تک ایران میں نہ تو بڑے پیمانے پر عوامی بغاوت کے آثار دیکھے گئے ہیں اور نہ ہی حکومتی ڈھانچے کے اندر ایسا کوئی واضح اختلاف سامنے آیا ہے جس سے نظام کی تبدیلی ممکن ہو۔
‎تجزیہ کاروں کا کہنا ہے کہ ایران میں مذہبی اور فوجی قیادت کا کنٹرول ابھی بھی مضبوط ہے اور صرف فوجی کارروائیوں کے ذریعے موجودہ نظام کو تبدیل کرنا مشکل ہوگا۔


ایران کی پارلیمانی قومی سلامتی کمیٹی نے کہا ہے کہ آیت اللہ علی خامنہ ای کے قتل کا بدلہ لینے تک دشمنوں کے خلاف جنگ جاری رکھی جائے گی۔
کمیٹی کے بیان میں کہا گیا ہے کہ ایران اپنی خودمختاری اور سلامتی کے دفاع کے لیے ہر ممکن اقدام کرے گا اور دشمنوں کے خلاف کارروائیاں جاری رہیں گی۔
‎دوسری جانب ایرانی صدر مسعود پزشکیان نے کہا ہے کہ ایران خطے کے ممالک کے ساتھ دوستانہ تعلقات کا خواہاں ہے تاہم یہ خواہش امریکا کے مقابلے میں ایران کے حق دفاع کی نفی نہیں کرتی۔
‎ایرانی صدر کے مطابق ایران نے اپنے دوست ہمسایہ ممالک کو نشانہ نہیں بنایا بلکہ خطے میں موجود امریکی فوجی اڈوں اور تنصیبات کو ہدف بنایا ہے۔
‎انہوں نے کہا کہ ایران نے خطے میں امریکی سہولیات اور فوجی مراکز کو نشانہ بنایا تاکہ اپنے دفاع کے حق کو استعمال کیا جا سکے۔


ایران پر جاری جنگ کے آٹھویں دن بھی تہران، اصفہان اور دیگر علاقوں میں فضائی حملوں کی نئی لہر دیکھی گئی جس کے نتیجے میں کم از کم آٹھ افراد جان سے گئے۔
ایرانی حکام کے مطابق امریکی اور اسرائیلی حملوں کے دوران اصفہان اور تہران کے بعض رہائشی علاقوں کو نشانہ بنایا گیا۔
‎دوسری جانب امریکی میڈیا کا کہنا ہے کہ حملوں میں فوجی اڈوں، میزائل لانچرز اور پاسداران انقلاب سے متعلق تنصیبات کو ہدف بنایا گیا جس کی ایرانی حکام نے بھی تصدیق کی ہے۔
‎اسرائیل نے دعویٰ کیا ہے کہ ان کارروائیوں کے دوران ایران کے 80 سے زائد لڑاکا طیارے تباہ کر دیے گئے تاہم ایران نے اس دعوے کی تصدیق نہیں کی۔
‎ادھر ایران نے بھی جوابی کارروائی کرتے ہوئے درجنوں ڈرونز اور میزائل داغے۔ اطلاعات کے مطابق بغداد ایئرپورٹ کے قریب امریکی فوجی اڈے اور بصرہ میں واقع امریکی آئل کمپلیکس کو ڈرون حملوں کا نشانہ بنایا گیا۔