Blog


مشرق وسطیٰ میں بڑھتی ہوئی کشیدگی کے پیش نظر سعودی عرب نے بیک ڈور سفارت کاری کو تیز کر دیا ہے۔
بلوم برگ کی رپورٹ کے مطابق سعودی عرب نے خطے میں کشیدگی کم کرنے کے لیے ایران کے ساتھ براہ راست رابطے بھی کیے ہیں۔
‎رپورٹ کے مطابق سعودی ولی عہد محمد بن سلمان نے یورپی ممالک کو بھی اعتماد میں لیا اور جنگ روکنے کے لیے فعال کردار ادا کرنے پر زور دیا۔
‎سعودی وزارت خارجہ کے مطابق سعودی ولی عہد اور برطانوی وزیراعظم کیئر اسٹارمر کے درمیان ٹیلیفونک گفتگو بھی ہوئی جس میں ایران جنگ اور خطے کی مجموعی صورتحال پر تبادلہ خیال کیا گیا۔
‎اس کے علاوہ شہزادہ محمد بن سلمان نے ترک صدر رجب طیب اردوان سے بھی ٹیلی فونک رابطہ کیا جبکہ قبرص کے صدر نے بھی سعودی ولی عہد سے گفتگو کی۔


متحدہ عرب امارات کے شہر دبئی میں واقع 23 مرینا نامی رہائشی ٹاور پر مبینہ ڈرون حملے کی اطلاعات سامنے آئی ہیں جس کے بعد عمارت سے رہائشیوں کے انخلا کا عمل شروع کر دیا گیا ہے۔
رپورٹس کے مطابق یہ عمارت دبئی مرینا کے ساحلی علاقے میں واقع ہے اور حملے کے بعد سکیورٹی اداروں نے فوری طور پر احتیاطی اقدامات کرتے ہوئے عمارت کو خالی کرانا شروع کر دیا۔
‎ابتدائی اطلاعات میں دعویٰ کیا گیا ہے کہ حملے میں عمارت کے اندر موجود سکیورٹی کنٹرول اور کمانڈ روم کو نشانہ بنایا گیا جو مبینہ طور پر اسرائیلی اداروں سے متعلق بتایا جا رہا ہے۔
‎حکام کی جانب سے ابھی تک حملے کی تفصیلات یا نقصان کے بارے میں باضابطہ بیان جاری نہیں کیا گیا جبکہ سکیورٹی ادارے صورتحال کا جائزہ لے رہے ہیں۔

‎اسرائیل نے لبنان کو خبردار کیا ہے کہ وہ حزب اللہ کو غیر مسلح کرے ورنہ سنگین نتائج کے لیے تیار رہے۔
‎اسرائیلی وزیر دفاع اسرائیل کاٹز نے بیان میں کہا کہ اسرائیل کا لبنان کے خلاف کوئی علاقائی دعویٰ نہیں ہے تاہم لبنانی سرزمین سے اسرائیل پر حملے کسی صورت قابل قبول نہیں۔
‎ان کا کہنا تھا کہ لبنان کی حکومت کو اس صورتحال پر فوری کارروائی کرنی چاہیے اور حزب اللہ کی سرگرمیوں کو روکنا چاہیے۔
‎اسرائیلی وزیر دفاع نے مزید کہا کہ لبنانی حکومت ہماری ہدایات پر عمل کرے اس سے پہلے کہ اسرائیل مزید سخت کارروائیاں کرنے پر مجبور ہو۔


برطانیہ میں مجرمانہ ریکارڈ رکھنے والے غیر ملکی افراد کے خلاف سخت کریک ڈاؤن شروع کر دیا گیا ہے اور ایسے افراد کے داخلے پر پابندیاں عائد کی جا رہی ہیں۔
برطانوی میڈیا رپورٹس کے مطابق مجرمانہ ریکارڈ رکھنے والے افراد کو برطانیہ میں داخلے کی اجازت نہیں دی جائے گی جبکہ ایسے افراد کے ویزے بھی منسوخ کیے جا سکیں گے۔
‎رپورٹس کے مطابق وہ غیر ملکی افراد بھی برطانیہ آنے کے اہل نہیں ہوں گے جنہیں 12 ماہ کی معطل سزا سنائی گئی ہو۔
‎برطانیہ کی وزیر داخلہ شابانہ محمود کا کہنا ہے کہ برطانیہ آنا کسی کا حق نہیں بلکہ ایک اعزاز ہے اور جو لوگ برطانوی عوام کے لیے خطرہ بنیں گے انہیں ملک بدر کر دیا جائے گا۔
‎انہوں نے کہا کہ حکومت اب تک تقریباً 60 ہزار غیر قانونی تارکین وطن اور مجرموں کو ملک بدر کر چکی ہے جبکہ نئے امیگریشن قوانین 26 مارچ سے نافذ کیے جائیں گے۔


متحدہ عرب امارات نے عوامی تحفظ کو بہتر بنانے کے لیے نیا قانون نافذ کرنے کا اعلان کر دیا ہے جس کے تحت عوامی مقامات اور تقریبات کے لیے سخت حفاظتی قواعد متعارف کرائے گئے ہیں۔
اماراتی حکام کے مطابق یہ نیا قانون یکم جون سے پورے ملک میں نافذ العمل ہوگا۔ قانون کے تحت عوامی مقامات اور ایونٹس میں محفوظ داخلے اور اخراج کے انتظامات لازمی قرار دیے گئے ہیں جبکہ مناسب روشنی اور گنجائش کی حد مقرر کرنے کی بھی ہدایت کی گئی ہے۔
‎قانون کے مطابق تقریبات کے منتظمین کے لیے آگ بجھانے کا سامان رکھنا، ہنگامی انخلا کے انتظامات کرنا، فرسٹ ایڈ کی سہولت فراہم کرنا اور تربیت یافتہ حفاظتی عملہ تعینات کرنا لازمی ہوگا۔
‎اس کے علاوہ بغیر اجازت دھماکا خیز مواد اور آتش بازی کا سامان رکھنے پر پابندی عائد کر دی گئی ہے جبکہ خطرناک یا آتش گیر مادوں کے استعمال اور نقل و حمل پر بھی سخت ضوابط لاگو ہوں گے۔
‎حکام نے ساحلوں پر تیراکی کے لیے مقررہ اوقات کی پابندی اور ممنوعہ علاقوں سے دور رہنے کی بھی ہدایت کی ہے۔
‎نئے قانون کے تحت خلاف ورزی کرنے والوں پر 500 درہم سے لے کر 10 لاکھ درہم تک جرمانہ عائد کیا جا سکتا ہے جبکہ سال کے دوران دوبارہ خلاف ورزی کی صورت میں جرمانہ 20 لاکھ درہم تک بڑھایا جا سکتا ہے۔