Blog

مریکی ریاست آئیڈاہو میں ائیر شو کے دوران امریکی نیوی کے دو لڑاکا طیارے فضا میں آپس میں ٹکرا کر تباہ ہوگئے۔ حادثے کے بعد علاقے میں ہنگامی صورتحال پیدا ہوگئی جبکہ حکام نے تحقیقات کا آغاز کر دیا ہے۔

امریکی میڈیا رپورٹس کے مطابق اتوار کے روز ہونے والے ائیر شو میں امریکی نیوی کے دو EA-18G گرولر لڑاکا طیارے دورانِ پرواز ایک دوسرے سے ٹکرا گئے، جس کے نتیجے میں دونوں طیارے زمین پر گر کر تباہ ہوگئے۔رپورٹس میں بتایا گیا ہے کہ حادثہ ماؤنٹین ہوم ائیر فورس بیس سے تقریباً 2 میل دور پیش آیا۔ دونوں طیاروں میں سوار 4 پائلٹس نے بروقت ایمرجنسی ایجیکشن کر کے اپنی جانیں بچالیں۔امریکی میڈیا کے مطابق امدادی ٹیمیں فوری طور پر جائے وقوعہ پر پہنچ گئیں جبکہ زخمیوں اور نقصانات کے حوالے سے مزید تفصیلات جمع کی جا رہی ہیں۔

حادثے کے بعد سیکیورٹی خدشات کے پیش نظر ماؤنٹین ہوم ائیر فورس بیس کو لاک ڈاؤن کر دیا گیا۔ حکام کا کہنا ہے کہ واقعے کی مکمل تحقیقات جاری ہیں تاکہ حادثے کی اصل وجہ معلوم کی جا سکے۔

‎امریکی صدر ڈونلڈ ٹرمپ نے سوشل میڈیا پر ایک پراسرار اور دھمکی آمیز پیغام جاری کر دیا، جسے مبصرین خطے میں بڑھتی کشیدگی کے تناظر میں اہم قرار دے رہے ہیں۔
‎سماجی رابطے کی ویب سائٹ پر جاری کی گئی ایک تصویر میں صدر ٹرمپ کو ایک بحری جہاز میں موجود دکھایا گیا، جبکہ اس کے ساتھ تحریر تھا: ’’یہ طوفان سے پہلے کی خاموشی تھی۔‘‘
‎ایک اور تصویر میں ٹرمپ کو ہاتھ کے اشارے کے ساتھ دکھایا گیا، جہاں وہ اپنی معروف “Make America Great Again” یعنی ’’امریکا کو دوبارہ عظیم بناؤ‘‘ کیپ پہنے ہوئے نظر آئے۔
‎اگرچہ صدر ٹرمپ نے اپنے پیغام میں کسی ملک کا نام نہیں لیا، تاہم سیاسی تجزیہ کار اس بیان کو ایران اور مشرق وسطیٰ کی حالیہ صورتحال سے جوڑ کر دیکھ رہے ہیں۔
‎سوشل میڈیا پر ٹرمپ کے اس پیغام کے بعد مختلف قیاس آرائیاں شروع ہو گئی ہیں، جبکہ بعض مبصرین کا کہنا ہے کہ یہ ممکنہ طور پر آنے والے امریکی اقدامات یا پالیسی اشاروں کی طرف اشارہ ہو سکتا ہے۔
‎امریکی صدر ماضی میں بھی اسی نوعیت کے سخت اور مبہم بیانات کے ذریعے عالمی توجہ حاصل کرتے رہے ہیں، خاص طور پر ایران، چین اور دیگر عالمی معاملات پر۔
‎سیاسی ماہرین کے مطابق ایسے بیانات عالمی منڈیوں، سفارتی ماحول اور خطے کی سکیورٹی صورتحال پر اثر انداز ہو سکتے ہیں، خصوصاً ایسے وقت میں جب مشرق وسطیٰ پہلے ہی شدید کشیدگی کا شکار ہے۔
‎دوسری جانب ٹرمپ کے حامیوں نے اس پوسٹ کو طاقت اور قیادت کا اظہار قرار دیا، جبکہ ناقدین نے اسے غیر ضروری اشتعال انگیزی سے تعبیر کیا ہے۔

‎روس نے ایران پر دوبارہ ممکنہ حملوں کی خبروں پر سخت ردعمل دیتے ہوئے خبردار کیا ہے کہ ایسا اقدام اس بات کا ثبوت ہوگا کہ امریکا اور اسرائیل نے ماضی کی غلطیوں سے کچھ نہیں سیکھا۔
‎ویانا میں بین الاقوامی تنظیموں کیلئے روس کے مستقل مندوب میخائل اولیانوف نے اپنے بیان میں کہا کہ ایران پر دوبارہ حملے خطے کو مزید عدم استحکام کی طرف دھکیل سکتے ہیں۔
‎انہوں نے کہا کہ اگر امریکا اور اسرائیل دوبارہ عسکری کارروائی کی جانب جاتے ہیں تو یہ ماضی کی ناکام پالیسیوں اور غلط فیصلوں کا اعادہ ہوگا۔
‎یہ بیان ایسے وقت سامنے آیا ہے جب نیویارک ٹائمز کی ایک رپورٹ میں دعویٰ کیا گیا کہ امریکا اور اسرائیل ایران کے خلاف دوبارہ ممکنہ حملوں کی تیاری کر رہے ہیں۔
‎میخائل اولیانوف نے چینی وزیر خارجہ وانگ ای کے اس مؤقف کی بھی مکمل حمایت کی جس میں آبنائے ہرمز کو کھولنے اور خطے میں کشیدگی کم کرنے کیلئے مکمل جنگ بندی پر زور دیا گیا تھا۔
‎روسی مندوب کا کہنا تھا کہ موجودہ صورتحال کا واحد حل سفارتکاری، مذاکرات اور فوری جنگ بندی ہے، نہ کہ مزید عسکری کارروائیاں۔
‎سیاسی تجزیہ کاروں کے مطابق روس اور چین مسلسل اس بات پر زور دے رہے ہیں کہ مشرق وسطیٰ میں بڑھتی کشیدگی عالمی امن اور معیشت کیلئے خطرہ بن سکتی ہے، خاص طور پر آبنائے ہرمز جیسے اہم بحری راستے کی صورتحال کے باعث۔
‎ماہرین کا کہنا ہے کہ اگر خطے میں دوبارہ جنگی کارروائیاں شروع ہوئیں تو عالمی تیل منڈی، توانائی کی سپلائی اور بین الاقوامی تجارت شدید متاثر ہو سکتی ہے۔
‎دوسری جانب عالمی برادری بھی ایران، امریکا اور اسرائیل کے درمیان بڑھتے تناؤ پر تشویش کا اظہار کر رہی ہے اور سفارتی حل تلاش کرنے پر زور دے رہی ہے۔

‎غزہ میں اسرائیلی فوج کی کارروائیاں بدستور جاری ہیں، جہاں مختلف علاقوں پر تازہ حملوں کے نتیجے میں مزید 11 فلسطینی شہید جبکہ 60 سے زائد افراد زخمی ہو گئے ہیں۔
‎غیر ملکی میڈیا رپورٹس کے مطابق اسرائیلی فوج نے غزہ کے مختلف رہائشی علاقوں کو نشانہ بنایا، جس کے باعث متعدد عمارتوں کو نقصان پہنچا اور شہریوں میں خوف و ہراس پھیل گیا۔
‎طبی ذرائع کے مطابق حملوں میں زخمی ہونے والوں میں خواتین اور بچے بھی شامل ہیں، جبکہ کئی افراد کی حالت تشویشناک بتائی جا رہی ہے۔
‎عینی شاہدین کا کہنا ہے کہ حملوں کے بعد امدادی ٹیموں نے ملبے تلے دبے افراد کو نکالنے کیلئے کارروائیاں شروع کر دیں، تاہم مسلسل بمباری کے باعث امدادی سرگرمیوں میں مشکلات کا سامنا ہے۔
‎غزہ میں جاری کشیدگی کے دوران انسانی بحران مزید سنگین ہوتا جا رہا ہے، جبکہ خوراک، ادویات اور طبی سہولیات کی شدید قلت بھی رپورٹ کی جا رہی ہے۔
‎بین الاقوامی امدادی اداروں نے فوری جنگ بندی اور شہریوں کے تحفظ کیلئے عالمی برادری سے عملی اقدامات کا مطالبہ کیا ہے۔
‎سیاسی مبصرین کے مطابق خطے میں بڑھتی کشیدگی نہ صرف مشرق وسطیٰ بلکہ عالمی امن کیلئے بھی خطرہ بنتی جا رہی ہے، جبکہ جنگ بندی کی کوششیں تاحال کامیاب نہیں ہو سکیں۔

‎عالمی ادارہ صحت (ڈبلیو ایچ او) نے جمہوریہ کانگو اور یوگنڈا میں ایبولا وائرس کے پھیلاؤ کو بین الاقوامی سطح پر عوامی صحت کیلئے ایمرجنسی قرار دے دیا ہے۔
‎ڈبلیو ایچ او کے مطابق دونوں ممالک میں اب تک 300 سے زائد مشتبہ کیسز جبکہ 88 اموات رپورٹ ہو چکی ہیں، جس کے بعد خطے میں تشویش کی لہر دوڑ گئی ہے۔
‎17 مئی کو جاری اپنے بیان میں عالمی ادارہ صحت کے ڈائریکر جنرل ٹیڈروس ایڈہانوم گیبریسس نے کہا کہ اگرچہ صورتحال ابھی مکمل وبائی ایمرجنسی کی سطح تک نہیں پہنچی، تاہم پڑوسی ممالک میں وائرس کے پھیلنے کا خطرہ بہت زیادہ ہے۔
‎طبی حکام کے مطابق اس بار ایبولا کی خاص قسم Bundibugyo Virus Disease (BVD) سامنے آئی ہے، جس کیلئے تاحال کوئی منظور شدہ ویکسین یا مؤثر دوا دستیاب نہیں۔
‎ماہرین کا کہنا ہے کہ کانگو اور یوگنڈا میں ماضی میں 20 سے زائد بار ایبولا پھیل چکا ہے، تاہم BVD وائرس کی یہ صرف تیسری بڑی تصدیق ہے۔
‎ڈبلیو ایچ او کے مطابق اصل کیسز کی تعداد رپورٹ ہونے والے اعداد و شمار سے کہیں زیادہ ہو سکتی ہے۔
‎رپورٹس کے مطابق زیادہ تر کیسز کانگو کے مشرقی صوبے Ituri میں سامنے آئے ہیں، جو یوگنڈا اور جنوبی سوڈان کی سرحد کے قریب واقع ہے۔
‎افریقا سینٹرز فار ڈیزیز کنٹرول اینڈ پریونٹیشن نے 336 مشتبہ کیسز اور 87 اموات کی تصدیق کی ہے۔
‎یوگنڈا نے 16 مئی کو ایک متاثرہ مریض کی تصدیق کی تھی، جس کے بارے میں بتایا گیا کہ وائرس کانگو سے منتقل ہوا، تاہم مریض انتقال کر گیا۔ بعد ازاں ایک اور کیس کی بھی تصدیق کی گئی۔
‎عالمی ادارہ صحت نے متاثرہ افراد کو فوری طور پر الگ تھلگ رکھنے، مقامی سفر 21 دن تک محدود کرنے اور احتیاطی تدابیر اختیار کرنے کی ہدایت کی ہے، تاہم عالمی ادارے نے سرحدیں بند کرنے یا تجارت روکنے سے گریز کرنے کا مشورہ دیا ہے۔
‎ایبولا ایک خطرناک وائرس ہے جو انسانوں اور جانوروں دونوں میں پایا جاتا ہے۔ اس کی علامات میں بخار، گلے میں درد، جسمانی درد، قے، ڈائریا اور شدید کمزوری شامل ہیں، جبکہ مرض بڑھنے پر جسم سے خون بہنے لگتا ہے۔