ملک بھر کے بجلی صارفین سے فی یونٹ تقریباً 9 روپے تک اضافی ٹیکس وصول کیے جانے کا انکشاف سامنے آیا ہے، جس کے باعث گھریلو اور صنعتی صارفین شدید مالی دباؤ کا شکار ہو گئے ہیں۔
ذرائع کے مطابق ایف بی آر کی جانب سے توانائی کے شعبے کو ٹیکس وصولی کے اضافی ذریعے کے طور پر استعمال کیا جا رہا ہے، جس کے نتیجے میں بجلی کے بلوں میں مختلف مدات کے تحت متعدد ٹیکس شامل کیے جا رہے ہیں۔رپورٹس کے مطابق بجلی کے بلوں میں مجموعی طور پر 6 مختلف اقسام کے ٹیکس وصول کیے جا رہے ہیں، جن میں 18 فیصد جنرل سیلز ٹیکس (جی ایس ٹی)، انکم ٹیکس اور ایڈوانس ٹیکس شامل ہیں۔ ان اضافی ٹیکسز کی وجہ سے صارفین کو اصل بجلی قیمت کے علاوہ بھاری اضافی ادائیگیاں کرنا پڑ رہی ہیں۔ماہرین کا کہنا ہے کہ بجلی پر عائد اضافی ٹیکسوں سے نہ صرف عام شہری متاثر ہو رہے ہیں بلکہ صنعتی شعبے کی پیداواری لاگت میں بھی نمایاں اضافہ ہو رہا ہے، جس کے اثرات ملکی معیشت اور مہنگائی پر پڑنے کا خدشہ ہے۔صارفین نے حکومت سے مطالبہ کیا ہے کہ بجلی کے بلوں میں شامل اضافی ٹیکسوں پر نظرثانی کی جائے تاکہ عوام کو کچھ ریلیف فراہم کیا جا سکے۔