Blog

وزیر داخلہ محسن نقوی نےسابق چئیرمین سی ڈی اے کامران لاشاری کے ساتھ سملی ڈیم کا تفصیلی دورہ کیا

وزیر داخلہ محسن نقوی کو سملی ڈیم کی توسیع کے بارے بریفنگ دی گئی،بتایا گیا کہ سملی ڈیم سے اسلام آباد کو 40 فیصد پانی فراہم کیا جاتا ہے۔ وزیر داخلہ محسن نقوی نے سملی ڈیم کی توسیع کے لئے قابل عمل پلان طلب کر لیا ،وزیر داخلہ محسن نقوی کا کہنا تھا کہ ڈیم کی توسیع سے پانی کی وافر فراہمی یقینی بنائی جا سکے گی۔ وزیر داخلہ محسن نقوی نے علاقے میں تفریحی سرگرمیوں کے فروغ اور ڈویلپمنٹ کا پلان طلب کر لیا ،کہا کہ سملی ڈیم سے متصل علاقے میں تفریحی سرگرمیوں کے بے پناہ مواقع موجود ہیں۔واٹر سپورٹس اور دیگر تفریحی سرگرمیوں کے فروغ سے علاقے میں ڈویلپمنٹ ہو گی۔اس علاقے کی ڈویلپمنٹ سے مقامی لوگوں کو روزگار کے مواقع ملیں گے۔شہریوں کو عالمی معیار کی تفریحی سہولیات میسر آئیں گی۔

ستائیسویں آئینی ترمیم کے بعد سپریم کورٹ، وفاقی آئینی عدالت کے دائرہ اختیار پر اہم فیصلہ جاری کردیا گیا، جس میں کہا گیا ہے کہ سپریم کورٹ اور وفاقی آئینی عدالت ایک دوسرے کے ماتحت نہیں ہم پلہ عدالتیں ہیں۔

چیف جسٹس پاکستان جسٹس یحییٰ آفریدی کی سربراہی میں 2 رکنی بینچ نے تفصیلی فیصلہ جاری کیا، جس میں کہا گیا ہے کہ سپریم کورٹ اور وفاقی آئینی عدالت ایک دوسرے کے ماتحت نہیں ہم پلہ عدالتیں ہیں، وفاقی آئینی عدالت کے فیصلے دیگر عدالتوں پر لازم ہوں گے۔سپریم کورٹ کا کہنا ہے کہ آئینی مقدمات وفاقی آئینی عدالت جبکہ ریگولر مقدمات سپریم کورٹ سنے گی، دونوں عدالتیں ایک دوسرے کے دائرہ اختیار کا احترام کرتے ہوئے فیصلے کریں گی۔عدالتی فیصلے میں کہا گیا ہے کہ آرٹیکل 189 ایک عدالت کو دوسری عدالت کے ماتحت نہیں بناتا، آئینی اور غیر آئینی مقدمات کو ایک ساتھ چلانا آئینی پیچیدگیاں پیدا کرسکتا ہے۔

بچوں کے حقوق کے تحفظ کے لیے سرگرم غیر سرکاری تنظیم سپارک نے آئندہ مالی سال 2026-27 کے وفاقی بجٹ میں سگریٹ پر عائد فیڈرل ایکسائز ڈیوٹی (ایف ای ڈی) میں نمایاں اضافے کی تجویز پیش کر دی ہے۔

سپارک کی جانب سے پیش کردہ سفارشات میں کہا گیا ہے کہ سگریٹ پر ٹیکس بڑھانے سے قومی خزانے کو تقریباً 51 ارب روپے تک اضافی آمدن حاصل ہو سکتی ہے۔ تنظیم نے تجویز دی ہے کہ کم قیمت سگریٹ کے پیکٹ پر کم از کم 35 روپے جبکہ مہنگے سگریٹ کے پیکٹ پر 21 روپے اضافہ کیا جائے،رپورٹ میں اس بات پر بھی زور دیا گیا ہے کہ سگریٹ پر ٹیکس کا یکساں نظام بتدریج نافذ کیا جائے تاکہ مختلف برانڈز کے درمیان قیمتوں کا فرق کم ہو اور سگریٹ کی آسان دستیابی محدود کی جا سکے۔

ماہرین کا کہنا ہے کہ ان اقدامات سے نہ صرف حکومتی آمدن میں اضافہ ہوگا بلکہ نوجوان نسل کو تمباکو نوشی سے بچانے میں بھی مدد ملے گی۔ اندازوں کے مطابق ان تجاویز پر عملدرآمد سے تقریباً 3 لاکھ 70 ہزار نوجوان سگریٹ نوشی شروع کرنے سے باز رہ سکتے ہیں، جبکہ 2 لاکھ 70 ہزار افراد کے اس عادت کو ترک کرنے کے امکانات بھی بڑھ جائیں گے۔ماہرین صحت نے حکومت سے مطالبہ کیا ہے کہ عوامی صحت کے تحفظ کے لیے ان تجاویز کو سنجیدگی سے زیر غور لایا جائے تاکہ مستقبل میں تمباکو نوشی سے جڑی بیماریوں میں کمی لائی جا سکے۔