امریکی حکام نے ایران پر معاشی اور سیاسی دباؤ بڑھانے کے لیے ایرانی تیل بردار ٹینکرز کو ضبط کرنے کے ممکنہ اقدام پر غور شروع کر دیا ہے۔ وال اسٹریٹ جرنل کے مطابق اس منصوبے کا مقصد ایران کی سب سے بڑی آمدنی یعنی تیل کی برآمدات کو نشانہ بنا کر تہران کو اپنی پالیسیوں میں سخت اقدامات پر مجبور کرنا ہے۔
اخبار کے مطابق وائٹ ہاؤس میں اس اقدام پر بحث ہو رہی ہے اور اسے ایران کے جوہری مذاکرات کے عمل میں ایک آپشن کے طور پر دیکھا جا رہا ہے، تاکہ مذاکرات ناکام ہونے کی صورت میں امریکی حکومت کے پاس متعدد متبادل آپشنز موجود ہوں۔
تاہم امریکی حکام کو خدشہ ہے کہ ٹینکرز کو ضبط کرنے کے دوران ایران جوابی کارروائی کر سکتا ہے، جس میں آبنائے ہرمز میں بارودی سرنگیں بچھانا یا خطے میں امریکی اتحادی ممالک کے آئل ٹینکروں کو نشانہ بنانا شامل ہو سکتا ہے۔
واضح رہے کہ گزشتہ چند ماہ میں امریکا نے متعدد ایسے جہاز ضبط کیے ہیں جو ایران کے ’’شیڈو فلیٹ‘‘ یعنی خفیہ بیڑے کا حصہ سمجھے جاتے ہیں، جو پابندیوں کے باوجود تیل منتقل کرتے ہیں۔
ماہرین کا کہنا ہے کہ اگر امریکا ایران کے ٹینکرز کو ضبط کرنے کا فیصلہ کرتا ہے تو یہ ایران کی معیشت پر دباؤ ڈالے گا اور خطے میں تیل کی قیمتوں اور عالمی مارکیٹ پر اثر ڈال سکتا ہے، جبکہ ایران کی ممکنہ جوابی کارروائی خطے میں کشیدگی بڑھا سکتی ہے۔
یاد رہے کہ امریکا ایران کے ساتھ مذاکرات ناکام ہونے کی صورت میں فوجی کارروائی کی بھی تیاری کر رہا ہے، اور سابق صدر ٹرمپ نے دھمکی دی ہے کہ مذاکرات ناکام ہوئے تو ایران پر حملے کے لیے دوسرا طیارہ بردار بحری بیڑہ بھیجا جا سکتا ہے۔
Blog
-
ایران پر دباؤ بڑھانے کے لیے امریکی حکام کا تیل بردار جہازوں کو ضبط کرنے پر غور
-
نیپرا کا عوام کو ٹیکا ،300 یونٹ ماہانہ تک بجلی استعمال کرنے والے صارفین پر بھی فکسڈ چارجز
اسلام آباد: نیشنل الیکٹرک پاور ریگولیٹری اتھارٹی (نیپرا) نے گھریلو صارفین کے لیے بجلی کے بلوں میں فکسڈ چارجز کے نفاذ سے متعلق اہم فیصلہ جاری کر دیا ہے، جس کے تحت اب 300 یونٹ ماہانہ تک بجلی استعمال کرنے والے صارفین پر بھی فکسڈ چارجز عائد ہوں گے۔
نیپرا کی جانب سے یہ فیصلہ پاور ڈویژن کی درخواست پر جاری کیا گیا۔ اس سے قبل فکسڈ چارجز صرف 300 یونٹ سے زائد بجلی استعمال کرنے والے نان پروٹیکٹڈ صارفین پر لاگو تھے، تاہم نئے فیصلے کے بعد پروٹیکٹڈ اور نان پروٹیکٹڈ دونوں اقسام کے صارفین اس دائرہ کار میں آ گئے ہیں۔نیپرا فیصلے کے مطابق ماہانہ 100 یونٹ تک بجلی استعمال کرنے والے پروٹیکٹڈ صارفین پر 200 روپے ماہانہ فکسڈ چارجز عائد کیے گئے ہیں۔ماہانہ 200 یونٹ تک بجلی استعمال کرنے والے پروٹیکٹڈ گھریلو صارفین پر 300 روپے ماہانہ فکسڈ چارجز مقرر کیے گئے ہیں۔
نان پروٹیکٹڈ صارفین کے لیے فکسڈ چارجز کی نئی شرحیں درج ذیل ہیں،100 یونٹ تک استعمال پر 275 روپے ماہانہ فکسڈ چارجز،200 یونٹ تک استعمال پر 300 روپے فکسڈ چارجز،300 یونٹ تک استعمال پر 350 روپے فکسڈ چارجز ہوں گےمزید برآں 301 سے 400 یونٹ تک استعمال کرنے والے نان پروٹیکٹڈ صارفین کے فکسڈ چارجز میں 200 روپے اضافہ کر کے 400 روپے مقرر کر دیے گئے ہیں۔401 سے 500 یونٹ تک استعمال پر 100 روپے اضافے کے بعد فکسڈ چارجز 500 روپے مقرر کیے گئے ہیں۔600 یونٹ ماہانہ استعمال پر فکسڈ چارجز میں 75 روپے اضافہ کر کے 675 روپے کر دیے گئے ہیں۔700 یونٹ تک استعمال کرنے والوں کے لیے 125 روپے کمی کے بعد فکسڈ چارجز 675 روپے مقرر کیے گئے ہیں۔700 یونٹ سے زائد بجلی استعمال کرنے والے صارفین کے لیے 325 روپے کمی کے بعد فکسڈ چارجز 675 روپے مقرر کیے گئے ہیں۔
توانائی ماہرین کے مطابق فکسڈ چارجز کے نفاذ کا مقصد بجلی کی تقسیم کار کمپنیوں کی مالی حالت بہتر بنانا اور ریونیو میں استحکام لانا ہے، تاہم اس فیصلے سے کم اور متوسط آمدنی والے صارفین پر اضافی بوجھ پڑنے کا امکان ہے۔صارفین تنظیموں کی جانب سے خدشہ ظاہر کیا جا رہا ہے کہ بجلی کے بنیادی ٹیرف کے علاوہ فکسڈ چارجز میں اضافے سے مجموعی بلوں میں نمایاں اضافہ ہوگا، جس سے مہنگائی کے موجودہ دور میں عوام کی مشکلات مزید بڑھ سکتی ہیں۔نیپرا کی جانب سے جاری کردہ فیصلہ آئندہ بلنگ سائیکل سے نافذ العمل ہوگا، جس کے بعد صارفین کو اپنے ماہانہ بلوں میں نئی شرحوں کے مطابق فکسڈ چارجز ادا کرنا ہوں گے۔
-
عافیہ صدیقی کیس:وزیرِاعظم اور وفاقی وزرا کے خلاف توہینِ عدالت کی کارروائی روک دی
وفاقی آئینی عدالت نے ڈاکٹر عافیہ صدیقی کیس میں وزیراعظم اور وفاقی وزرا کے خلاف توہینِ عدالت کی کارروائی سے اسلام آباد ہائی کورٹ کو روک دیا ہے۔
تفصیلات کے مطابق چیف جسٹس امین الدین خان کی سربراہی میں تین رکنی بینچ نے وفاقی حکومت کی اپیلوں پر سماعت کی اور فریقین کو نوٹس جاری کیے۔
وفاقی حکومت نے 16 مئی 2025 کے حکم کو چیلنج کرتے ہوئے درخواست میں ترمیم کی اجازت کالعدم قرار دینے کی استدعا کی تھی۔ اسلام آباد ہائی کورٹ نے وزیراعظم اور کابینہ سے امریکا میں قانونی کوششوں کی حمایت نہ کرنے پر وضاحت طلب کی تھی۔
وفاقی حکومت کا کہنا ہے کہ درخواست میں ترمیم عدالتی اختیارات سے تجاوز اور طے شدہ مقدمات کی حتمیت کے منافی ہے۔ اکتوبر 2024 میں وزیراعظم نے امریکی صدر کو رحم کی اپیل کی حمایت میں خط لکھا، اعلیٰ سطحی وفد بھیجا گیا اور قیدیوں کی منتقلی سے متعلق معاہدوں کی کوششیں کی گئیں، مگر امریکی حکام نے معاہدے پر آمادگی ظاہر نہیں کی۔
عدالت نے بعد ازاں اس معاملے کی سماعت ملتوی کر دی۔ -
سابق آرمی چیف جنرل (ر) قمر جاوید باجوہ گھر میں گر کر زخمی
اسلام آباد: سابق آرمی چیف جنرل ریٹائرڈ قمر جاوید باجوہ اپنے گھر میں گرنے کے باعث زخمی ہو گئے، جس کے بعد انہیں فوری طور پر اسپتال منتقل کر دیا گیا جہاں ان کا علاج جاری ہے۔
ذرائع کے مطابق جنرل (ر) قمر جاوید باجوہ کو گرنے سے جسم کے مختلف حصوں پر چوٹیں آئی ہیں۔ خاندانی ذرائع کا کہنا ہے کہ یہ واقعہ منگل کی صبح تقریباً ساڑھے چار بجے پیش آیا جب وہ اپنے گھر کے واش روم میں اچانک پھسل کر گر گئے۔ابتدائی اطلاعات کے مطابق گرنے کے نتیجے میں ان کے سر پر بھی زخم آئے ہیں، جس کے باعث ڈاکٹروں نے انہیں انتہائی نگہداشت وارڈ (آئی سی یو) میں منتقل کر دیا ہے۔ اسپتال ذرائع کے مطابق سابق آرمی چیف کی حالت پر مسلسل نظر رکھی جا رہی ہے اور ماہر ڈاکٹروں کی ٹیم ان کا معائنہ کر رہی ہے۔
خاندانی ذرائع کا کہنا ہے کہ جنرل (ر) باجوہ کو بروقت طبی امداد فراہم کر دی گئی تھی اور فی الحال وہ ڈاکٹروں کی زیر نگرانی ہیں۔ مزید طبی معائنے اور ضروری ٹیسٹ بھی کیے جا رہے ہیں تاکہ اندرونی چوٹوں کے امکان کو مکمل طور پر مسترد کیا جا سکے۔
یاد رہے کہ جنرل ریٹائرڈ قمر جاوید باجوہ نے نومبر 2022 میں اپنی مدتِ ملازمت مکمل کرنے کے بعد پاک فوج کی سربراہی سے ریٹائرمنٹ حاصل کی تھی۔ ان کی اچانک علالت کی خبر سامنے آنے کے بعد مختلف حلقوں کی جانب سے ان کی جلد صحتیابی کے لیے نیک خواہشات کا اظہار کیا جا رہا ہے۔
-
پاکستان سٹاک مارکیٹ میں ٹی پلس ون سیٹلمنٹ سسٹم نافذ
پاکستان اسٹاک ایکسچینج میں لین دین کے لیے ٹی پلس ون (T+1) سیٹلمنٹ سسٹم مؤثر طور پر نافذ کر دیا گیا ہے، جس کے بعد پاکستان دنیا کا ساتواں ملک بن گیا ہے جو یہ جدید نظام اپنا رہا ہے۔
حکام کے مطابق 9 فروری کو ہونے والے سودے 10 فروری کو کامیابی کے ساتھ سیٹل کیے گئے، جو نئے نظام کے تحت پہلی باقاعدہ سیٹلمنٹ تھی۔
ٹی پلس ون سیٹلمنٹ کے تحت شیئرز کی خرید و فروخت کے سودے ایک کاروباری دن بعد مکمل کیے جاتے ہیں، جس سے سرمایہ کاروں کو تیز اور مؤثر لین دین کی سہولت ملتی ہے۔
چیئرمین سیکیورٹیز اینڈ ایکسچینج کمیشن آف پاکستان (ایس ای سی پی) ڈاکٹر کبیر سدھو نے اس پیش رفت کو ملکی کیپٹل مارکیٹ کے لیے اہم سنگِ میل قرار دیا اور کہا کہ یہ نظام مارکیٹ میں شفافیت، کارکردگی اور رسک مینجمنٹ کو بہتر بنانے میں مددگار ثابت ہوگا۔
ماہرین کے مطابق ٹی پلس ون سیٹلمنٹ سے سرمایہ کاروں کا اعتماد بڑھے گا، غیر ملکی سرمایہ کاری کو فروغ ملے گا، لیکویڈیٹی بہتر ہوگی اور مارکیٹ میں سرمایہ کی گردش تیز ہونے سے مجموعی مالیاتی نظام کو استحکام حاصل ہوگا۔ -
بلوچستان میں بھارتی مداخلت کے خاتمے کیلیے اقدامات کئے جائیں،صدر مرکزی مسلم لیگ
مرکزی مسلم لیگ کے صدر خالد مسعود سندھو نے کہا ہے کہ بلوچستان پاکستان کی جان ہے، لاہور میں بیٹھ کر ادھر تم ادھر ہم کی باتیں کرنے والے ملک دشمنوں کی ترجمانی کر رہے ہیں، بلوچستان پاکستان کا حصہ تھا، ہے اور رہے گا ،ملک دشمنوں کی زبان بولنے والوں کے خلاف سخت کاروائی ہونی چاہئے.
خالد مسعود سندھو کا کہنا تھا کہ بلوچستان میں دہشتگردی بڑھ چکی ہے، آئے روزنہتے شہریوں، سیکورٹی فورسز کے جوانوں کی شہادتیں ہو رہی ہیں،بھارت کی ہمیشہ سے یہ کوشش رہی ہے کہ وطن عزیز پاکستان کو دہشتگردی،افراتفری سے عدم استحکام سے دو چار کیا جائے ،بلوچستان میں بھارت کی مداخلت کے واضح ثبوت ہیں، کلبھوشن یادیو بھی بلوچستان ہی گرفتار ہوا تھا، اب پاکستان کے نام نہاد رہنما بھی دشمنوں کی زبان بولنا شروع ہو گئے ہیں، لاہورمیں ادھر ہم ،ا دھر تم کا بیان واضح طور پر ملک دشمنی ہے، اس پرکسی صورت خاموشی اختیار نہیں کی جا سکتی،پاکستان کلمہ کے نام پر بنا تھا ،پاکستان کا دفاع مضبوط ہاتھوں میں ہے،ادھر ہم ادھر تم کی باتیں کرنے والوں کے خلاف کاروائی کی جائے،بلوچوں کو پاکستان سے کوئی الگ نہیں کر سکتا، اہل بلوچستان کی محرومیوں کے خاتمے کی ضرورت ہے،بلوچستان میں بھارتی مداخلت کے خاتمے کے لیے اقدامات کئے جائیں.
-
کولمبیا کے صدر گستاوو پیٹرو پر مبینہ قاتلانہ حملے کی کوشش
کولمبیا کے صدر گستاوو پیٹرو نے انکشاف کیا ہے کہ ان کے خلاف مبینہ قاتلانہ حملے کی کوشش کی گئی، جس کے باعث ان کے ہیلی کاپٹر کو طے شدہ مقام پر اترنے کے بجائے راستہ تبدیل کرنا پڑا۔
غیر ملکی ذرائع ابلاغ کے مطابق صدر پیٹرو نے صدارتی انتظامیہ کے یوٹیوب چینل پر نشر ہونے والے ایک سرکاری اجلاس میں بتایا کہ انہیں اطلاع ملی تھی کہ ان کے ہیلی کاپٹر پر فائرنگ کا خطرہ ہے۔
صدر پیٹرو نے کہا کہ انہوں نے وہاں نہیں اترنے کا فیصلہ کیا جہاں منصوبہ تھا کیونکہ خدشہ تھا کہ جس ہیلی کاپٹر میں وہ اور ان کے بچے سوار تھے، اس پر فائرنگ کی جا سکتی ہے۔
ان کا کہنا تھا کہ اس صورتحال کے باعث پرواز کا رخ تبدیل کیا گیا اور ہیلی کاپٹر نے چار گھنٹے تک کھلے سمندر کے اوپر پرواز کی۔ اس طرح وہ ممکنہ جان لیوا حملے سے محفوظ رہے۔ مزید تفصیلات ابھی تک جاری نہیں کی گئیں۔ -
وزیراعلیٰ پنجاب مریم نواز کا سپورٹس سٹی اور کھیلتا پنجاب پنک گیمز 2026 کا آغاز
وزیراعلیٰ پنجاب مریم نواز شریف نے لاہور کے پنجاب سٹیڈیم نشتر پارک سپورٹس کمپلیکس میں کھیلتا پنجاب پنک گیمز 2026 کی افتتاحی تقریب سے خطاب کرتے ہوئے پنجاب کے پہلے سپورٹس سٹی کی تعمیر کا اعلان کیا اور تحصیل سطح پر پنک گیمز کے آغاز کا اعلان کیا۔ انہوں نے پنک گیمز کی خواتین کھلاڑیوں کے لیے 2 کروڑ روپے کے انعامات، رہائش اور طعام کے خصوصی انتظامات کی ہدایت بھی دی۔
وزیراعلیٰ نے خواتین کھلاڑیوں کو "سپر پنجاب کی سپر بیٹیاں” قرار دیتے ہوئے کہا کہ عورتیں ملک، صوبہ، وزارت اور معیشت چلا سکتی ہیں، جنگ لڑ سکتی ہیں، جہاز اڑا سکتی ہیں اور وزیراعلیٰ بن کر مردوں کو ٹف ٹائم دے سکتی ہیں۔ انہوں نے بیٹیوں سے کہا کہ "زمین آپ کی ہے، آسمان آپ کا ہے، آگے بڑھیں اور جیت کر دکھائیں”۔
تقریب میں ہر ڈویژن کی اتھلیٹس نے پنک گیمز کی مشعل لے کر سٹیڈیم کا چکر مکمل کیا اور اولمپین اتھلیٹ فائقہ ریاض نے مارچ پاسٹ کی قیادت کی۔ تقریب میں وزراء، ارکان اسمبلی، ویٹرن کھلاڑیوں اور ہزاروں بچیوں نے شرکت کی۔ تقریب کے دوران وزیراعلیٰ نے صوبائی وزیر کھیل فیصل کھوکھر اور سپورٹس ڈیپارٹمنٹ کی ٹیم کو شاباش دی۔
وزیراعلیٰ نے کہا کہ کھیلوں کو تحصیل تک لے جا رہے ہیں، خواتین کھلاڑیوں کو ماہانہ وظیفے دیے جا رہے ہیں اور ہر ڈسٹرکٹ میں ہاکی کے فروغ کے لیے سینتھیٹک آسٹرو ٹرف سٹیڈیم بنائے جائیں گے۔ انہوں نے ملک کی نوجوان نسل میں ٹیلنٹ اور بیٹیوں کی کامیابی پر فخر کا اظہار کیا اور کہا کہ حالات مشکل بھی ہوں تو گھبرانا نہیں، عورت صنف آہن ہے اور ہر میدان میں نمایاں کامیابی حاصل کر سکتی ہے۔
اس موقع پر تقریب میں 3,400 خواتین کھلاڑیوں نے حصہ لیا اور پورا سٹیڈیم ڈھول کی تھاپ اور نعروں سے گونجتا رہا۔ وزیراعلیٰ نے اعلان کیا کہ رواں سال سپورٹس سٹی کی تعمیر کا آغاز ہوگا اور پنک گیمز کو یونین کونسل سطح تک بڑھایا جائے گا تاکہ زیادہ سے زیادہ نوجوانوں اور خواتین کو کھیلوں میں حصہ لینے کے مواقع فراہم کیے جا سکیں۔ -
حکومتی بینچز پر موجود ہونے کے باوجود ہم عوام دشمن فیصلوں کا حصہ نہیں بنتے،شازیہ مری
پیپلز پارٹی کی سیکرٹری اطلاعات ،رکن قومی اسمبلی شازیہ مری نے کہا ہے کہ پاکستان پیپلز پارٹی ہمیشہ عوامی مسائل کی آواز بلند کرتی آئی ہے۔ حکومتی بینچز پر موجود ہونے کے باوجود ہم عوام دشمن فیصلوں کا حصہ نہیں بنتے،آج بجلی اور نیٹ میٹرنگ سے متعلق فیصلوں نے نہ صرف ماضی کی غلطیوں کا بوجھ عوام پر ڈالا بلکہ موجودہ اور مستقبل کے صارفین کی حوصلہ شکنی بھی کی ہے،
میڈیا سے گفتگو کرتے ہوئے شازیہ مری کا کہنا تھا کہ عوام معاشی بدحالی کا شکار ہیں، روزگار کے موقع تلاش کر رہے ہیں کھانے کے لالے پڑے ہیں، حکومت کو ایسے وقت میں بھی کوئی احساس نہیں، حکومت اپنیصفوں میں وہ لوگ تلاش کرے جو اسے کمزور کر رہے ہیں، پیپلز پارٹی عوام کے ساتھ کھڑی ہے، وزیراعظم کو نوٹس لینا چاہیئے.ایسی پالیسی سے پہلے کیوں نہیں بات کی جاتی ،اعتماد میں لیا جاتا،
-
پی ایس ایل 11: فہیم اشرف سب سے مہنگے کھلاڑی، وارنر کراچی کنگز کا حصہ
پاکستان سپر لیگ کے 11ویں ایڈیشن کے لیے کھلاڑیوں کی آکشن جاری ہے، جہاں آٹھ فرنچائزز 16 سے 20 رکنی اسکواڈ تشکیل دے رہی ہیں۔ اس سال آکشن کے لیے 800 سے زائد ملکی و غیر ملکی کھلاڑی رجسٹرڈ ہیں۔
آکشن کے ابتدائی مرحلے میں اسلام آباد یونائیٹڈ نے فہیم اشرف کو 8 کروڑ 50 لاکھ روپے کی سب سے بڑی بولی دے کر اپنی ٹیم میں شامل کر لیا۔ اسی مرحلے میں عماد وسیم کو کسی ٹیم نے نہیں خریدا۔
کراچی کنگز نے آسٹریلوی بیٹر ڈیوڈ وارنر کو 7 کروڑ 90 لاکھ روپے میں حاصل کیا۔ لاہور قلندرز نے حارث رؤف کو 7 کروڑ 60 لاکھ روپے میں اپنے اسکواڈ کا حصہ بنایا۔
کوئٹہ گلیڈی ایٹرز نے رائلی روسو کو 5 کروڑ 55 لاکھ روپے میں خریدا، جبکہ حسین طلعت، سعود شکیل اور احسان اللہ اس مرحلے میں منتخب نہ ہو سکے۔ راولپنڈی نے نسیم شاہ کو 8 کروڑ 65 لاکھ روپے میں اپنی ٹیم میں شامل کیا۔
ہر فرنچائز کو اسکواڈ مکمل کرنے کے لیے 50 کروڑ 50 لاکھ روپے کا بجٹ دیا گیا ہے۔ اسلام آباد یونائیٹڈ کے پاس 34 کروڑ 60 لاکھ روپے باقی ہیں، کراچی کنگز کے پاس 32 کروڑ 26 لاکھ روپے جبکہ لاہور قلندرز کے پاس 31 کروڑ 36 لاکھ روپے کا پرس موجود ہے۔
آکشن کا عمل مکمل ہونے کے بعد ٹیموں کی حتمی فہرست جاری کی جائے گی۔