Category: معاشرہ و ثقافت

ہم دنیا میں آئے پانی کی طرح شفاف اور روئی کی طرح نرم مزاج دل تھے ہم نے اپنی زندگی کا سلسلہ طے کرنا شروع کیا جو زندگی میرے رب نے ہمیں عطا کی تھی وہ بلکل گناہوں سے پاک صاف تھی لیکن ہم نے دنیا کی راہوں پر چلتے ہوئے اپنی زندگی کو ایک نیا رنگ دیا رب کی بنائی گئی زندگی سے ناواقف ہو گئے ہم دنیا کی رنگینیوں میں کھو گئے رب تعالی کے فیصلوں کو چھوڑ کر ہم نے اپنی خواہشات کو ترجیح دی میرا رب ہمیں اپنی طرف بلاتا رہا
حی علی الفلاح

مگر ہم اپنے کاموں اپنے مال اور تجارت میں کھو بیٹھے اس بات کو بھول بیٹھے کہ ہمارا رب ہماری کامیابی کی بات کر رہا ہے میرے رب نے ہمیں مال۔پیسہ اور تجارت میں کامیابی کی ہی طرف بلایا ہے مگر ہمارا رب ہم سے محبت کرتا ہے ہماری زندگی کی ایک ایک سانس اس کی امانت ہے

ہم جب اپنے رب کو بھول جائیں اپنے رب کے فرمان اور اسکے رسول کریم کے بتائے گئے اسوہ حسنہ کو بس عموما لینا شروع کر دیں تو رب پھر اپنی مخلوق کو جنجھوڑتا بھی ہے میرا رب کہتا ہے کہ میرے بندے قیامت کے عذاب کو عام سمجھنے لگتے ہیں تو ہم انہیں دنیا میں عذاب کا مزہ چکھاتے ہیں

کرونا وائرس جیسی بیماری(عذاب ) نے ہمیں اپنی زندگی کی اہمیت یاد دلائی ہے ہمیں احساس دلایا ہے کہ ہم کیوں دنیا میں آئے؟ہمیں رب نے اپنی فرمانبرداری کے لیے پیدا کیا تھا ہم کفار کے دین کے پیروکار ہو گئے شراب۔جوا۔نشہ۔چوری اور زنا کو اپنی زندگی کا مشغلہ بنا لیا حقوق العباد کو بھول بیٹھے اپنی زندگی میں مگن ہو گئے خود اچھا کھا لیا ہمسائے کی فکر نہیں یتیم بھوکا سوتا رہااور ہم حلال کو حرام میں اڑاتے رہے

پھر میرے رب نے پوری دنیا کو بند کر دیا اور ثابت کر دیا کہ حکمرانی کا ذات کی ہے مرضی کس ذات کی چل سکتی ہے
15 تا 30 دن تک دکانیں بند کرنے والوں سے جب رمضان المبارک میں 10 دن کے اعتکاف کا بول دیا جائے تو انکے بچے بھوکے اور کاروبار بند ہونے لگتے ہیں مگر میرے رب نے آج دنیا کا نقشہ بدل کر رکھ دیا ہے
ابھی وقت ہے اپنی زندگی کا محاسبہ کرتے چلیں کہ ہم نے اپنی زندگی میں کیا بویا اور کیا کاٹا ہے

اپنے گناہوں کی معافی مانگیں جس مقصد کے لیے دنیا میں آئیں ہیں اس مقصد کو نبھاتے چلیں دنیا کو ترک کر کے دین پر عمل پیرا ہو جائے حرام کو حرام سمجھیں تو اپنے رب کے عذاب سے محفوظ ہو جائیں
بلاشبہ آپ کے رب کا عذاب بہت درد ناک ہے

آئیں اپنی زندگی کا محاسبہ کریں
🌹🌹🌹🌹🌹🌹🌹🌹🌹🌹
✍🏻از قلم۔۔۔
مشی حیات

لانگ ویک اینڈ کے بعد آج پہلے دن گھر سے باہر نکلنا ہوا۔ گلیاں، بازار سنسان، شاہرائیں ٹریفک سے خالی، شہر میں ہو کا عالم، ایک اور نیا مظاہرہ جو دیکھنے کو ملا وہ چوکوں چوراہوں پر پولیس افسران اور سپاہی اور کہیں فوجی جوان، کسی سمت ٹریفک وارڈنز اور کہیں رینجرز کے جوان۔ ائیر پورٹ روڈ پر "Chippa” کی ایمبولینس اور مستعد ڈرائیور، شہر میں ایمرجنسی اور کرفیو کا سماں پیش کر رہا تھا ۔

وہ سڑکیں جہاں رش کی وجہ سے میں جانا پسند نہیں کرتا تھا سنسان پڑی تھیں۔ دل مغموم تو ہوا مگر ساتھ ہی مطمئن بھی کہ قوم نے حالات کو سنجیدگی سے لیا ہے اور حفاظتی اقدامات پر طوحاً و قرحاً عمل شروع کر دیا ہے۔ وبا ہی ایسی پھیلی ہے کہ بچے بڑے سب اس سے محتاط ہو گئے ہیں ۔ ایک ریڑھی بان کو دیکھا جو بچوں سمیت سڑک پر جا رہا تھا اور اس نے ماسک لگا رکھا تھا۔

اس کی بیوی اور معصوم بیٹی بھی دوپٹے سے اپنا منہ ڈھانپے ہوئے نظر آئیں۔ سٹوڈنٹس سے بات ہوئی تو ان کے والدین پہلے سے آمادہ تھے کہ بچوں کو آن لائن ٹیوشن دے دیں۔ الغرض ہر سمت ایسے مناظر دیکھنے کو ملے کہ یقین ہو گیا ہم ایک منظم قوم ہیں اور کرونا کو شکست دینے کے لیے پر عزم ہیں۔ اسی قومی جذبے کی ضرورت تھی جو بیدار ہو چکا ہے اور یقیناً یہ کرونا فری پاکستان کا آغاز ہے۔
۔۔۔۔۔۔۔۔۔۔۔۔۔۔۔۔۔۔۔۔۔۔۔
ان الانسان کان ظلوما جہولا
خالق کائنات نے اپنے کلام قرآن مجید میں انسان کو ظالم اور بے علم قرار دیا۔ انسان کی کیفیت ایسی ہی ہے کہ وہ قریب کی چیز کا اثر فوراً قبول کرتا ہے اور دور کی چیز کو ایسے بھلا دیتا ہے گویا اس کو مانتا ہی نہیں ۔ آج دنیا بھر میں کرونا وائرس پھیل رہا ہے، اس کی وجہ سے کربناک اموات نظر آ رہی ہیں، تشویشناک صورتحال ہے اور ہر کوئی خبردار نظر آتا ہے ۔ بہت اچھی بات ہے اس سے کوئی انکار نہیں مگر انسان عقبیٰ کو بھول چکا، اپنے دنیا میں آنے کے مقصد کو بھلا چکا ہے۔

یہ بھول چکا ہے کہ اسے اشرف المخلوقات کا درجہ دیا گیا۔ اس کا حق تو یہ تھا کہ دنیا میں خدا کی نیابت اختیار کرتا اور اللہ کے احکامات کو نافذ کرتا مگر وہ سب بھول کر اپنی ہی دنیا میں مگن ہو گیا۔ جب تک ڈھیل ملی رہی انسان نے پلٹ کر نہیں دیکھا۔ صدیوں سے انسانی رویے میں تبدیلی نہ آ سکی۔ جدید سائنسی تحقیق اور علوم و فنون میں مہارت بھی انسان میں قبل از وقت توبہ کا شعور بیدار کرنے سے قاصر رہی اور آج بھی جب مصیبت گلے پڑ جاتی ہے تو رجوع الی اللہ کی فکر جاگتی ہے۔

جب انسان اپنی فطرت پر قائم ہے تو قربان جاؤں اس مالک کائنات پر جو ہر بار خطا کاروں سے درگزر کا معاملہ فرماتا ہے۔ قریب ایک ماہ بعد رمضان کی آمد آمد ہے۔ سابقہ تاریخ گواہ ہے کہ رمضان تزکیہ قلوب اور اصلاح نفس کا موقع فراہم کرتا ہے مگر اس بار تو رمضان سے پہلے ہی لوگوں کے دلوں سے زنگ اتر جائے گا۔

کرونا وائرس، احتیاط اور تزکیہ نفس
محمد نعیم شہزاد

کُچھ جہد مسلسل سے تھکاوٹ نہیں لازم

انسان کو تھکا دیتا ہے سوچوں کا سفر بھی

پوری دنیا میں پھیلتی ہوئی موزی مرض کرونا وائرس نے ہر انسان کو خوف زدہ کر دیا ہے اور امیر و غریب میں فرق محسوس کیے بغیر ہر فرد آج بے بس نظر آرہا ہے۔۔۔
کیوں کہ ابھی تک اس بیماری کا علاج دریافت نہیں ہوا جس کی وجہ سے پوری دنیا مایوس ہو رہی ہے کہ اگر بیماری لاحق ہو گئی تو ہمارا کیا ہو گا؟؟؟؟؟؟؟

غیر مسلم تو چلو مانا کہ مایوس ہیں۔۔
مگر۔۔۔۔۔۔۔۔۔۔
اے مسلمان تُو کیوں مایوس ہے؟؟؟

ایک اللہ واحد لا شریک پے یقین رکھنے والا مایوس کیوں ہوا؟؟.
کیا ہمیں معلوم نہیں کہ عزت دینے والا۔۔۔
ذلت دینے والا۔۔۔
صحت دینے والا۔۔۔
بیماری دینے والا۔۔۔
دولت دینے والا۔۔۔
شہرت دینے والا۔۔۔
شفاء دینے والا۔۔۔۔

وہ پاک پروردگار ہے دونوں جہاں کا مالک و مختار ہے اللہ تعالیٰ کے لئے تو کچھ بھی نہ ممکن نہیں۔۔۔
پھر یہ بیماری کیا میرے رب کریم سے زیادہ بڑی ہے ؟؟؟

اگر نہیں تو اے مسلمان تُو مایوس نہ ہونا اپنے اللہ تعالیٰ پے کامل یقین رکھنا اپنا ایمان کمزور نا ہونے دینا۔۔۔

رسول اللہ صلی اللہ علیہ وآلہ وسلم نے فرمایا۔۔۔۔۔

علاج کرو کیوں کہ جس ذات نے بیماری نازل کی ہے اُس کا علاج بھی اُتارا ہے

ہمارے پیارے نبی صلی اللہ علیہ وآلہ وسلم نے جو فرمایا وہ بلاشبہ حق اور سچ ہے اس لیے سب سے پہلے تو اس بات پر یقین رکھنا کہ اللہ تعالیٰ نے جو بیماری نازل کی اُس کا علاج بھی اُتارا یہ الگ بات ہے کہ اس خوف اور مایوسی میں مبتلا انسان ابھی تک دریافت نہیں کر سکے۔۔۔۔

لیکن ہمیں مایوس نہیں ہونا کیونکہ مایوسی ہمارے کمزور ایمان کی نشانی ہے اللہ تعالیٰ سے اپنے گناہوں کی معافی مانگیں بیشک یہ بیماری بھی اللہ تعالیٰ کی طرف سے ہم پر عذاب ہے کہ شاید یہ انسان اب بھی سمبھل جائے۔۔۔۔
اللہ تعالیٰ سے توبہ کرتے رہیں دعائیں کریں وہی اس بیماری سے شفا عطا کر سکتے ہیں۔۔۔۔
اور ساتھ ساتھ اپنی اسلامی تعلیمات پر عمل کرتے ہوئے صفائی ستھرائی کا خیال رکھیں۔۔۔

رسول اللہ صلی اللہ علیہ وسلم نے فرمایا۔۔
صفائی نصف ایمان ہے۔۔۔۔

ہر لحاظ سے صفائی کا خیال رکھنے کا حکم ہم مسلمانوں کو آج سے چوداں سو سال پہلے آگاہ کر دیا گیا تھا اگر صحیح سے عمل کرتے تو شاید ہمارا یہ حال نا ہوتا جو آج ہوا ہے۔۔۔
اس میں ہمیں جسمانی صفائی گھر کی صفائی ستھرائی غرض یہ کہ ہر قسم کی صفائی سے متعلق احتیاطی تدابیر اختیار کرنا ہوں گی اور اللہ تعالیٰ پر مکمل بھروسہ کرتے ہوئے جہد مسلسل سے کام لینا ہو گا فضول سوچوں سے مایوسیوں سے نکلنا ہو گا اور اللہ تعالی اور نبی اکرم صلی اللہ علیہ وآلہ وسلم کے بتائے ہوئے اصولوں پر چلنا ہو گا بیشک اسی میں ہماری فلاح ہے۔۔۔۔

پھر ان شاء اللہ ہم اس کرونا وائرس جیسی بیماری سے نجات حاصل کر لیں گے۔۔۔۔
مگر اس کے لیے ایک ہی بات ۔۔۔۔۔
اللہ تعالی پر بھروسہ۔۔۔
مایوسی سے بچنا۔۔۔۔
اور جہد مسلسل۔۔۔۔۔

اٹھو مومنو! آج سے عہد کر لو حبیب خدا کی اطاعت کریں گے

عقیدت پے پہلو بہ پہلو عمل سے حقیقت میں تعمیل سنت کریں گے

ان شاء اللہ

جہد مسلسل

تحریر: ساجدہ بٹ

تصور کی لہروں پر سفر کرتے کرتے میری سوچوں کا دھارا مجھے دور کہیں بہت دُور کے دور میں لے گیا…
کورونا وبا کے خدشات،صورت حال اور بدلتی دنیا کے پس منظر میں تدابیر،حفاظتی اقدامات اور بے بسی سبھی سوچوں کے سمندر میں مختلف زاویے بنا رہے تھے…
قوم میں افواہیں،ہیجانی کیفیت،اور خوف کے سائے…وسائل کی کمی،مشکل صورت حال میں کیا ہو گا وغیرہ…

یہ سچ ہے کہ جب مصیبت یا بلا و وبا سے سامنا ہوتا ہے تو بسا اوقات وسائل و اسباب بھی کارگر ثابت نہیں ہوتے…
یہی وجہ ہے کہ ان اسباب اور وسائل کو اختیار کر کے ان کے مؤثر یا غیر مؤثر ہونے کا انجام اس ذات پر ہی چھوڑ دینا چاہیئے جو تمام وباؤں اور بلاؤں کو ٹالنے کی قدرت و اختیار رکھتی ہے…
ان وائرس کے پھیلنے اور مرض کا محرک بننے کا اذن بھی اسی کی طرف سے ہوتا ہے

بحثیت مسلمان قوم کے ہمارا یہی ایمان ہے اور ہونا چاہیئے…!!!
مصیبت کی گھڑیوں میں اسے پکارنے کی بھی ایک اپنی ہی شان اور مزہ ہے…
اور مذہب پر یقین رکھنے والے اس سے انکار نہیں کر سکتے…!

قرآن مشرکین کی حالت زار کا نقشہ بھی یوں ہی کھینچتا ہے کہ جب تُند و تیز ہواؤں اور طوفانی لہروں کی زد میں ان کی کشتیاں پھنس جاتی ہیں…
ملاح بے بس ہو جایا کرتا تھا
ٹیکنالوجی ساتھ دینے سے انکار کر دیتی تھی…

معبودانِ باطل کہیں نظر نہیں آتے تھے
مدد کو نہیں پہنچتے تھے تو وہ اسی اکیلے اللّٰہ کو اخلاص کے ساتھ پکارتے…
جب کشتی طوفانی لہروں کے بھنور سے نکل کر ساحل کی خشکی پر پہنچتی تو ان کے وہی رنگ ڈھنگ ہو جاتے…

مشکل حالات گزر جانے کے بعد پرانی روش اختیار کر کے اللّٰہ کے شریک بنانے لگتے…
تو اللّٰہ تعالٰی نے انسانیت کی رہنمائی کرتے ہوئے قرآن مجید میں اُن کی اس ادا و انداز کو سخت نا پسند فرمایا ہے…!!!

پرت در پرت واقعات ذہن کے دریچوں پر جھلملانے لگ گئے__
وہ نوح علیہ السلام کا بیٹا تھا ناں۔۔۔

باپ کی شفقت پدری نے جوش مارا اور پکارا کہ اے بیٹے !!!!
آ جاؤ ہمارے ساتھ اس کشتی پر سوار جاؤ…

تب بیٹے نے بڑی لا پرواہی سے جواب دیا، نہیں میں موجوں کے مقابل پہاڑ پر پناہ لے لوں گا…
نوح علیہ السلام نے کتنا دردِ دل سے کہا ہو گا_:

لا عاصم الیوم الا من رحم ربی_
اور اس کے اور پہاڑ کے درمیان منہ زور موج حائل ہو گئی تھی…!!!!!

یادوں کی لہروں کا سفر جاری تھا…میرے ذہن میں یونس علیہ السلام کا واقعہ آیا…
جب قوم کو اللّٰہ کے عذاب سے ڈرا کر کشتی میں سوار ہو گئے تھے

کشتی ہچکولے کھانے لگ گئی تو کسی مسافر کی کمی کی تجویز پیش گئی…
معاملہ قرعہ اندازی تک پہنچا تو حضرت یونس علیہ السلام ہی دریا کی لہروں کے سپرد کیئے جانے والے ٹھہرے__

لہروں میں جاتے ہی مچھلی نے صحیح سالم نگل لیا…
اُس مچھلی کے پیٹ کے اندر وقت کے پیغمبر نے کیا کہا تھا_؟

لا الہ الا انت سبحانک انی کنت من الظالمین¤
تب خالق کائنات نے اپنے پیغمبر کی اس ادا کی کتنی بھاری جزا رکھی تھی کہ:

"پس اگر وہ تسبیح کرنے والوں میں سے نہ ہوتے تو لوگوں کے دوبارہ اٹھائے جانے تک اس(مچھلی) کے پیٹ میں رہتے__!!!”
اس دعا نے صدیوں تک متوقع سفر کو کس قدر جلدی سے طے کر دیا…؟
ہاں یہ پکار کتنی اہمیت رکھتی ہے__!!!

کہ ایمان والوں کو نصیحت کی گئی کہ جب تم حالتِ جنگ میں ہو تو ثابت قدم رہو اور اللّٰہ تعالٰی کا ذکر کثرت سے کرو تاکہ فلاح و کامرانی تمہارا مقدر ٹھہرے…
اس پکار کے عمل سے ہی مدد آیا کرتی ہے…

کائنات کا خالق و مالک ہماری پکار پر ہماری طرف متوجہ ہو کر ہماری فریاد سنتا ہے اور اس سے نکلنے کی راہیں ہموار کرتا ہے…!!!
تبھی اپنا پیغام پہنچا دیا کہ

کہہ دو اے نبی صلی اللّٰہ علیہ وسلم_!!!
اگر تمہاری دعائیں نہ ہوں تو میرا رب بھی متوجہ نہیں ہوتا__!!!(الفرقان)۔

ابراہیم علیہ السلام نے کیا کہا تھا؟
اور جب میں بیمار ہوتا ہوں تو وہی مجھے شفا دیتا ہے…!!!

رحمتِ عالم صلی اللّٰہ علیہ وسلم نے دعا کو ہی عبادت کہا…
پیارے پیغمبر صلی اللّٰہ علیہ وسلم کی ہر موقع اور وقت کے لیئے کی گئی وسیع المعانی دعائیں ہمارا زادِ سفر ہیں…

اے قوم__!!!
انتظامیہ و قوانین نافذ کرنے والے اداروں کی طرف سے دی گئی ہدایات اوراحتیاطی تدابیر، اختیار کرنے کے بعد اپنے رب سے رابطہ بھی مضبوط کر لیجیئے…

اپنے گھروں کے اندر رہتے ہوئے بھی انہیں مسجدوں کی صورت بنا لو__!!!
توبہ کے سجدوں میں گڑگڑا کر اسے راضی کریں اور اپنے گناہوں کی مغفرت مانگتے ہوئے آئندہ ان کا اعادہ نہ کرنے کا عہد کریں…

ہماری حفاظت کی خاطر تدبیر کے لیئے لاک ڈاؤن کی صورت میں اُس سے تعلق کو لاک نہ ہونے دیں اور کسی گھمبیر صورت حال سے بچنے کی دعائیں مانگیں…
کہ یہ وبا ہم پر سے جلد از جلد چھٹ جائے کہ
یمحو اللّٰہ ما یشآء و یثبت،و عندہ علم الکتٰب¤[الرعد]۔

"اللّٰہ جسے چاہے مٹا دیتا ہے اور جسے چاہے ثابت رکھتا ہے،اور اسی کے پاس لوح محفوظ ہے…!!!”

پس اس کی رحمت کا اتنا سوال کیجیئے کہ وہ ہمارے اوپر سے اس وبا کو مٹا دے…
لغزشوں کو مغفرت اور بدبختیوں کو سعادتوں میں بدل دے…!!!

معاشی اور اقتصادی بحران اس قوم کو نہ ڈسنے پائے اور افراتفری کی بجائے احتیاط کی جائے…!!!
کہ ہم بے بس اور محدود وسائل والے اور لاریب اس کی رحمت و خزانے لا محدود ہیں…!!!

یہ پکار مصیبت میں بہت بڑی دوا ہے، یہ تمام رکاوٹوں،موسمی تغیرات،فضاؤں اور خلاؤں کا سینہ چیرتی سیدھی عرش والے کے پاس پہنچتی ہے اور وہی تو اس کائنات کا پیدا کرنے والا اور اس میں بستی تمام مخلوقات کا رب ہے…!!!
ہم حالتِ جنگ میں ہیں،کئی محاذوں پر جنگ اور جنگی حالات میں کثرت سے اللّٰہ کا ذکر کایا پلٹ دیا کرتا ہے…
واذکرو اللّٰہ کثیر لَّعلَّکُم تفلحون¤

اسباب اختیار کر کے ان کے انجام کو مسب الاسباب پر چھوڑ دینا توکل اور یقین کا ہی حصہ ہے،جس سے ہمارے دین نے ہمیں منع نہیں فرمایا ہے بلکہ اس کی تاکید کی ہے…!!!
احتیاطی تدابیر اپنانے کے بعدبیماریوں سے بچاؤ اللّٰہ تعالٰی کے سپرد کر دینا، اور اپنے ایمان،توحید اور توکل کی مضبوطی کے ساتھ اعمال کی درستگی اور اخلاق و آداب کی اصلاح پر توجہ آج کی اہم ترین ضرورت ہے_!!!

مومن اسباب اختیار کر کے ان پر تکیہ نہیں کر بیٹھتا بلکہ ان کے مؤثر ہونے کے لیئے ان اسباب کے مالک کی طرف رجوع کرتا ہے کہ اس کے رحم کا ساتھ جسم میں روح کی طرح ضروری ہوتا ہے…
اے ہمارے رب !!!
ہم پکارتے ہیں:
ربنا ولا تحملنا ما لا طاقۃ لنا بہ واعف عنا واغفرلنا وارحمنا انت مَوْلٰنَا،اَنتَ مَوْلٰنَا،اَنتَ مَوْلٰنَا_واحفظنا مِمِّا نخافُ و نَحذر_!!!
آمین ثم آمین…!!!

==========================🌻🌻🌻

مصیبت کی گھڑی میں پکار کی اہمیت_!!!
تحریر✍🏻:(جویریہ چوہدری)۔

"ہم نرمی ،افہام و تفہیم اور مناسب طرز عمل سے اپنا پسندیدہ ماحول پیدا کر سکتے اور اپنی بات منوا سکتے ہیں۔”

لوگوں سے اچھے برتاؤ کی ترکیبیں استعمال کرنے کے حوالے سے آپ کی صلاحیت اس وقت دو چند ہو جائیں گی جب آپ کسی سے ایسا عمدہ معاملہ کریں گے کہ اسے احساس ہو وہ آپ کو سب سے زیادہ پیارا ہے۔ آپ کا دوسروں سے سلوک اس درجہ خوبصورت اور ہم آہنگ، انس و محبت اور تکریم سے بھر پور ہو کہ وہ یہ سوچنے پر مجبور ہو جائیں آپ کا ایسا شاندار تعلق ان کے سوا کسی اور سے نہیں۔

ایسا ہی رویہ اپنے والدین، بیوی بچوں اور اپنے ہم چشموں کے ساتھ رہن سہن میں بھی اختیار کریں۔ جن افراد سے کبھی کبھی واسطہ پڑتا ہے ان کے ساتھ بھی آپ کا طرز عمل مثالی ہونا چاہیے۔

ان سب لوگوں کا اس بات پر اتفاق ہونا ممکن ہے کہ آپ انہیں سب سے زیادہ محبوب ہیں لیکن ایسا صرف اسی وقت ہو سکتا ہے جب آپ انہیں یہ باور کرانے میں کامیاب ہو جائیں کہ آپ کو ان سے زیادہ پیار کسی اور سے نہیں۔

ایسے طرز زندگی کے متعلق رسول اللہ صلی اللہ علیہ وسلم کا اسوۃ ہمارے سامنے ہے جو آدمی آپ کی سیرت کی ورق گردانی کرے گا اسے یہ تسلیم کر لینے میں تامل نہیں ہو گا کہ آپ اعلی اخلاقی روایات کے حامل تھے۔ آپ ہر ملنے والے کی عزت کرتے، اسے اہمیت دیتے، اسے ہم آہنگ ہوتے یا اسے ہم آہنگ کرنے کی کوشش کرتے اور ہر ایک سے نہایت خندہ روئی اور بشاشت سے پیش آتے۔جس کسی سے بھی رسول اللہ صلی اللہ علیہ وسلم کی ملاقات ہوتی تو وہ یہی سمجھتا کہ آپ اسے سب سے بڑھ کر چاہتے ہیں۔ نتیجتاً وہ بھی آپ کو سب سے زیادہ چاہتا کیونکہ آپ اسے اپنی بے پناہ محبت کا احساس دلا دیتے تھے ۔

"ہم بھی لوگوں کے ساتھ، وہ چاہے جیسے بھی ہوں اسی محبت سے پیش آئیں تو کوئی وجہ نہیں کہ ہم ان کے دلوں کو مسخر نہ کر سکیں ۔”

دلوں کو مسخر کیسے کریں
حافظہ قندیل تبسم