Category: بلاگ

یکم مئی مزدوروں کا عالمی دن
ضیاء الحق سرحدی، پشاور
ziaulhaqsarhadi@gmail.com
پاکستان میں مزدوروں کا عالمی دن یکم مئی کو منایا جاتا ہے۔ اس کا فیصلہ 1972ء کو کیا گیا تھا کہ اس دن کو منایا جائے اور عام تعطیل کی جائے۔ مختلف ممالک میں یہ دن دوسری تاریخوں میں بھی منایا جاتا ہے۔ مثلاً امریکہ اور کینیڈا میں ستمبر کے پہلے سوموار کو منایا جاتا ہے۔ اس کی بنیادی اہمیت اس تحریک میں ہے جس میں آٹھ گھنٹے کام، آٹھ گھنٹے تفریح اور آٹھ گھنٹے آرام کی پالیسی اپنانے کی استدعا کی گئی تھی۔ پاکستان میں یکم مئی کو عام تعطیل ہوتی ہے۔ اس دن کی مناسبت سے کوئی خاص نشان نہیں ہے بلکہ پوسٹرز اور دیگر جگہوں پر ہتھوڑے اور درانتی کے نشان کو علامت سمجھا جاتا ہے۔

پاکستان عالمی مزدوروں کی تنظیم آئی ایل او کا 1947ء سے ممبر ہے جو انصاف اور معاشرتی حقوق کے تحفظ کا پرچار کرتی ہے۔ اس وقت مزدوری کا تعین پندرہ سو روپے یومیہ تک ہے لیکن کام کروانے والے لوگ ہزار، بارہ سو سے اوپر نہیں دیتے۔ ان کی مجبوری اور اس بات کا احساس نہیں کیا جاتا کہ ان کا بھی خاندان ہے اور ضروریاتِ زندگی ہیں جن کو پورا کرنا ان کی ذمہ داری ہے۔ مغرب کی ترقی کا راز یہی ہے کہ انہوں نے ہنر اور کام کی قدر کی ہے۔ یہ نہیں دیکھا کہ کام کرنے والا کون ہے، کہاں رہتا ہے اور اس کی ذاتی حیثیت اور حالات کیسے ہیں۔ ایک مزدور کو بھی ہر وہ سہولت حاصل ہے جو دوسرے لوگوں کو ہے۔

طبقے تو ہر ملک اور معاشرے میں ہوتے ہیں لیکن مواقع فراہم کرنا کہ محنت کرنے والا اور ہنر مند بھی کسی مقام پر پہنچے اور اپنے خاندان کو بنیادی سہولت فراہم کرے، ضروری ہے۔ مزدور کو پسینہ خشک ہونے سے پہلے مزدوری دینے کا حکم ہے۔ اسی سے محنت اور مزدوری کی قدر و منزلت کا اندازہ ہوتا ہے۔

پاکستان عالمی ادارہ آئی ایل او کا باقاعدہ ممبر ہے اور ILO کی قراردادوں پر دستخط کرنے کے بعد پابند ہے کہ ملک بھر میں مزدوروں کی فلاح و بہبود، یونین سازی کا حق سمیت مزدوروں کی بہتری کے لیے قانون بنائے جو ILO قوانین کے متصادم نہ ہوں۔ یہی وجہ ہے کہ پاکستان میں وزارت محنت، سوشل سیکیورٹی، محکمہ لیبر کے تحت لیبر کورٹس، پیلنٹ لیبر ٹربیونلز، قومی صنعتی تعلقات کمیشن (NIRC) کے ادارے قائم ہیں۔

افسوس یہ ہے کہ یہ ادارے بھاری بھر کم مراعات لے کر بھی ذمہ داری پوری نہیں کر رہے ہیں۔ حالانکہ یکم مئی مزدور ڈے ہوتا ہے، ملک بھر کے سرکاری ادارے، عدلیہ، بیوروکریسی چھٹی مناتی ہے مگر مزدور طبقہ یا درجہ چہارم کے سرکاری ملازمین کو حقیر ترین مخلوق سمجھا جانے لگا ہے۔ ان کے لیے انصاف اور حقوق مشکل تو پہلے بھی تھے مگر اب ناممکن بنا دیے گئے ہیں۔

اس وقت ملک بھر سے 1600 سے زائد صنعتی ادارے بغیر قانونی تقاضے پورے کیے بند کر دیے گئے ہیں، جس سے ملک بھر کے مزدور بے روزگار ہو کر بے یار و مددگار، کسمپرسی کی زندگی بسر کرنے پر مجبور ہو چکے ہیں، جس کی بنا پر ان کے خاندان فاقوں کا شکار ہو گئے ہیں۔

لیبر قوانین آئی آر اے 2010ء کے تحت اگر کوئی صنعتی ادارہ بند کرنے کی معقول وجہ ہو تو پہلے 50 فیصد مزدوروں کو انڈسٹریل ریلیشن ایکٹ کے تحت حقوق دے کر فارغ کیا جاتا ہے اور کم از کم چھ ماہ کے اندر باقی 50 فیصد مزدوروں کو حقوق دیے جانے کے بعد صنعتی و سرکاری ادارہ بند کرنے کی اجازت ہوتی ہے۔

اس میں محکمہ محنت، پرائیڈنگ آفیسر اور ادارے کی CBA یونین شامل ہوتے ہیں۔ حیرانگی اور دکھ کی بات ہے کہ اس بارے میں اعلیٰ عدلیہ سمیت حکومتی اداروں نے کوئی اقدام کیا ہے، نہ ہی کوئی آواز سینیٹ، قومی یا صوبائی اسمبلیوں سے اٹھائی گئی ہے۔ جبکہ صدرِ مملکت نے حکومت کو انتخابات کے حوالے سے خط لکھا ہے اور عدالتِ عظمیٰ نے بھی انتخابات کے لیے حکم فرما دیا ہے اور کئی پٹیشنیں بھی دائر ہو چکی ہیں۔ ممکن ہے جب یہ تحریر شائع ہو، حالات یکسر بدل چکے ہوں۔

جن صنعتی اداروں کو بند کیا گیا ہے، اس بارے میں محکمہ لیبر اور لیبر عدالتیں بھی خاموش ہیں۔ عدالتِ عظمیٰ کو از خود نوٹس لینا چاہئے تھا۔ ملک بھر سے کسی ٹریڈ یونین یا کسی سیاسی جماعت کے لیبر ونگ نے بھی آواز نہیں اٹھائی۔ سب پر اسرار طور پر خاموش ہیں۔

ٹریڈ یونینز کو ختم کیا جا رہا ہے، حالانکہ مزدوروں کی ویلفیئر اور ٹریڈ یونینز کو تحفظ دینے والے ادارے اور عدالتیں بدستور قائم و دائم ہیں۔ اس کے باوجود مزدوروں کو نہ حقوق ملتے ہیں، نہ ہی مزدوروں اور یونین کے عہدیداروں کی عزتِ نفس کا خیال رکھا جاتا ہے۔

اس بارے میں صدرِ مملکت، وزیرِاعظم اور نہ ہی پی ٹی آئی کی قیادت کروڑوں بے روزگار ہونے والے مزدوروں سے ناانصافی پر آواز اٹھاتے ہیں کیونکہ مزدوروں کو حقوق سے محروم کرنے والوں کی اکثریت خود اسمبلیوں میں بیٹھی ہے۔

اور تو اور، سرکاری و نیم سرکاری اداروں میں بعض اعلیٰ افسران بھی صرف رجسٹرڈ ٹریڈ یونینز کے خلاف ہی سوچتے ہیں، جبکہ ایسوسی ایشنز جن کا ہڑتال، جلسے، جلوس، تالہ بندی کا حق ہی نہیں، وہ آئے روز ہڑتالیں، تالہ بندیاں، جلسے جلوس کرتے رہتے ہیں، انہیں پوچھا تک نہیں جاتا۔

صنعتی و سرکاری اداروں میں درجہ چہارم کے ملازمین کے ساتھ ہونے والی انتقامی کارروائیوں، افسران اور مالکان کے ستائے مزدور و یونین کے عہدیدار جب مزدوروں کو تحفظ دینے کے لیے قائم اداروں کے پاس جاتے ہیں تو انہیں دھتکارا جاتا ہے اور مزدوروں کو حقیر سمجھتے ہوئے نفرت و حقارت کا نشانہ بناتے ہوئے ان کی عزتِ نفس مجروح کی جاتی ہے۔

جس کا ثبوت یہ ہے کہ مزدوروں کے حقوق کے لیے قائم اداروں کی ماہانہ کارکردگی کا جائزہ لیا جائے تو 30 دنوں میں 30 مزدوروں کو بھی حقوق نہیں دلائے گئے ہوں گے۔

حکومت وقت، خصوصاً وزرائے قانون و انسانی حقوق سے پُرزور اپیل ہے کہ مزدوروں کی بہتری کے لیے قومی صنعتی تعلقات کمیشن (NIRC)، لیبر کورٹس، محکمہ لیبر کو جدید تقاضوں کے مطابق فعال کیا جائے۔

اس وقت مزدوروں کے خلاف انتقامی کارروائی عروج پر ہے مگر ظالم و جابر کا ہاتھ روکنے والا کوئی مؤثر ادارہ نہیں ہے۔ سروسز ٹربیونلز کے ممبران کو بھی درجہ چہارم کے ملازمین کے خلاف انتقامی کارروائی پر حکمِ امتناعی اور آرڈر معطل کرنے کا اختیار دیا جائے اور ادارے سے اپیل کو ضروری نہ سمجھا جائے، کیونکہ ادارے کے سینئر آفیسر نے بھی وہی کرنا ہوتا ہے جو نچلے افسر نے کیا ہوتا ہے۔

اس سے کئی ماہ ملازم انتظار کرنے پر مجبور رہتا ہے۔ انصاف میں تاخیر ہی ناانصافی ہے۔ وزارتِ انصاف، انسانی حقوق اس بار نوٹس لے۔ مزدوروں کو انصاف فراہم کرنے والے اداروں کی ماہانہ کارکردگی کا جائزہ لیا جائے تاکہ حقائق سامنے آ سکیں۔

جبکہ یوم مئی جو کہ مزدوروں کا دن ہے، بہتر تو یہ ہوتا کہ اس دن پر ان مزدوروں کی بات کی جاتی جو کہ مزدور ہوتے ہوئے بھی مزدور نہیں۔

حکومت پر دباؤ ڈالا جاتا کہ غیر رسمی مزدور طبقہ کو حکومتی ریکارڈ کا حصہ بنایا جائے، کیونکہ مزدوروں کی اتنی بڑی تعداد کو حکومتی ریکارڈ میں لائے بغیر قانون سازی اور حقوق کی باتیں کرنا ہوا میں قلعے بنانے جیسا ہے۔

اس کا یہ مطلب ہرگز نہیں کہ رسمی مزدور طبقہ کے معاملات پر بات نہ کی جائے، ضرور کی جائے مگر غیر رسمی مزدور طبقہ کے مسئلہ کو زیرِ بحث لائے بغیر مزدور حقوق کی بات کرنا ہے تو اس دن کا نام بھی "رسمی یومِ مزدور” رکھ لیا جائے۔

مزدوروں کا عالمی دن منانے کا مقصد یہی ہے کہ ہر سطح پر مزدوروں کے حقوق کا تحفظ کرنے کا تجدیدِ عہد کیا جائے، انہیں ان کا جائز حق دیا جائے اور انہیں بھی دوسروں کی طرح مواقع فراہم کیے جائیں کہ وہ زندگی میں آگے بڑھیں اور ملک و قوم کی ترقی و خوشحالی میں شامل ہوں۔

موجودہ دور اور اُردو زبان کی جنگ
ازقلم:ارم سعید
اردو زبان برصغیر کی ایک مایہ ناز، شیریں، دلکش اور ہمہ گیر زبان ہے۔ اس نے اپنے دامن میں نہ صرف شاعری، نثر، تاریخ، فلسفہ اور سائنس کی دولت سمیٹی ہے، بلکہ تہذیب، ثقافت، شائستگی، اور محبت کی زبان بھی کہلائی ہے۔ اردو نے ہندو مسلم یکجہتی، صوفی ازم، اور عوامی مزاحمت کی آواز بن کر صدیوں تک ایک روشن کردار ادا کیا۔ لیکن آج کے تیز رفتار، ٹیکنالوجی کے غالب، اور عالمی زبانوں کے غلبے والے دور میں اردو زبان کو شدید چیلنجز کا سامنا ہے۔

یہ کہنا غلط نہ ہوگا کہ اردو زبان آج ایک نفسیاتی، تہذیبی اور سماجی جنگ لڑ رہی ہے—ایک ایسی جنگ جس کا میدان تعلیمی ادارے، سوشل میڈیا، حکومتی پالیسیاں، اور ہماری روزمرہ زندگی ہے۔ یہ مضمون اردو زبان کی اس جنگ کا جائزہ لیتا ہے، اس کے اسباب، اثرات اور ممکنہ حل پر روشنی ڈالتا ہے۔

اردو زبان: ایک تاریخی پس منظر
اردو زبان کی جڑیں دکن سے دہلی تک اور پنجاب سے لکھنؤ تک پھیلی ہوئی ہیں۔ اس نے فارسی، عربی، ترکی، سنسکرت اور مقامی بولیوں سے الفاظ لے کر ایک منفرد اسلوب اختیار کیا۔ مغلیہ دور میں اسے درباری زبان کی حیثیت حاصل ہوئی اور بعد ازاں یہ عوام الناس کی زبان بن کر ابھری۔ اردو نے تحریک آزادی میں کلیدی کردار ادا کیا۔ سرسید، حالی، اقبال اور قائداعظم نے اسے ایک قومی شناخت کی علامت بنایا۔

1947 میں پاکستان کے قیام کے بعد اردو کو قومی زبان قرار دیا گیا لیکن حقیقت یہ ہے کہ اسے محض علامتی طور پر اپنایا گیا، عملی طور پر انگریزی کا غلبہ قائم رہا۔

موجودہ دور کے تقاضے اور اردو زبان
موجودہ دور میں دنیا ایک عالمی گاؤں بن چکی ہے۔ انگریزی زبان بین الاقوامی رابطے، تعلیم، تجارت، سائنس اور انفارمیشن ٹیکنالوجی کی زبان بن چکی ہے۔ یہی وجہ ہے کہ ہر والدین اپنے بچوں کو انگلش میڈیم سکول میں داخل کرانے کے لیے کوشاں ہیں۔ اردو زبان جو کبھی علم و تہذیب کی علامت تھی، اب کمزور طبقات، پسماندہ علاقوں یا صرف جذباتی نعروں تک محدود ہو کر رہ گئی ہے۔

تعلیمی نظام اور اردو کا حاشیہ نشین ہونا
پاکستان کا تعلیمی نظام طبقاتی تقسیم کا شکار ہے۔ ایک طرف انگلش میڈیم، کیمبرج اور آئی بی جیسے ادارے ہیں جو مغربی معیار تعلیم کو فروغ دے رہے ہیں، دوسری طرف اردو میڈیم سرکاری اسکول ہیں جو وسائل کی کمی، ناقص نصاب اور غیر تربیت یافتہ اساتذہ کے باعث پسماندگی کا شکار ہیں۔

اردو میڈیم تعلیم کو حقیر، کم درجے کی اور "ناکام لوگوں” کا راستہ سمجھا جانے لگا ہے۔ یہی سوچ اردو زبان کی وقعت کو گھٹا رہی ہے۔ نتیجہ یہ ہے کہ بچے اردو بولنے سے کتراتے ہیں، اردو لکھنے سے قاصر ہیں اور اردو ادب سے ناواقف ہیں۔

میڈیا، انٹرنیٹ اور زبان کا استحصال
سوشل میڈیا اور ڈیجیٹل پلیٹ فارمز نے زبان کی ساخت کو بدل کر رکھ دیا ہے۔ "رومن اردو” یعنی انگریزی حروف میں اردو لکھنے کا رجحان عام ہو گیا ہے۔ نوجوان طبقہ "Ap kya kr rhy ho?” جیسے جملے استعمال کر کے زبان کی ساخت اور جمالیات کو نقصان پہنچا رہا ہے۔

ٹی وی چینلز، ڈرامے، فلمیں اور اشتہارات میں اردو کی جگہ ایک مخلوط زبان نے لے لی ہے جو نہ مکمل اردو ہے، نہ مکمل انگریزی۔ یہ زبان دراصل "انگریزی زدہ اردو” ہے، جو اردو کی اصل روح کو مجروح کر رہی ہے۔

اردو زبان کے خلاف سازش یا ہماری بے حسی؟
کیا اردو زبان کے ساتھ زیادتی دانستہ ہو رہی ہے؟ یا ہم خود اپنی زبان سے بے وفائی کر رہے ہیں؟ حقیقت یہ ہے کہ اردو کے خلاف کوئی خارجی سازش نہیں، بلکہ ہماری اپنی نیت، رویہ اور ترجیحات اس کے زوال کے ذمہ دار ہیں۔ ہم نے اسے صرف شاعری، جذبات، تقریروں اور تقریبات تک محدود کر دیا ہے۔

ہماری جامعات میں تحقیق انگریزی میں ہوتی ہے، دفاتر میں مراسلے انگریزی میں لکھے جاتے ہیں، عدالتوں کے فیصلے انگریزی میں ہوتے ہیں۔ اردو کو صرف ترجمے کا ذریعہ بنا دیا گیا ہے، جب کہ اسے خود علمی زبان بننے کا موقع نہیں دیا گیا۔

اردو زبان کی بقا: روشن مثالیں اور امید کی کرن
اگرچہ مجموعی صورتحال مایوس کن ہے، لیکن کچھ روشن مثالیں اب بھی موجود ہیں۔ سوشل میڈیا پر کچھ نوجوان اردو شاعری، ادب، اور تحریر کو فروغ دے رہے ہیں۔ یوٹیوب چینلز، اردو بلاگز، پوڈکاسٹس اور آن لائن لٹریچر پلیٹ فارمز اردو کو نئی زندگی دے رہے ہیں۔

اردو ادب کی نئی صنف "اردو افسانوی وی لاگنگ” ابھر رہی ہے، جہاں نوجوان اپنی کہانیوں کو ویڈیو کی صورت میں پیش کرتے ہیں۔ یہ ایک مثبت پیش رفت ہے، جو اردو کو ڈیجیٹل دنیا سے جوڑ سکتی ہے۔

حکومت، تعلیمی ادارے اور معاشرتی کردار
اردو زبان کے فروغ کے لیے حکومت کو سنجیدہ اقدامات کرنے ہوں گے:

قومی نصاب میں اردو زبان کی تدریس کو مضبوط کیا جائے۔
سائنسی و تکنیکی مواد اردو میں ترجمہ کیا جائے۔
دفاتر اور عدالتوں میں اردو کے استعمال کو یقینی بنایا جائے۔
اردو ادب اور زبان کے ماہرین کو قومی سطح پر پذیرائی دی جائے۔
اردو زبان کی ترقی کے لیے فنڈز مختص کیے جائیں۔
اسی طرح تعلیمی اداروں کو اردو زبان کی تدریس کو جدید تقاضوں کے مطابق بنانا چاہیے۔ اردو کو بوریت یا مجبوری کے طور پر نہیں بلکہ ایک زندہ اور موثر زبان کے طور پر پیش کیا جائے۔

ہمارا انفرادی اور اجتماعی فرض
ہر فرد کا بھی فرض ہے کہ وہ اردو زبان کو صرف جذباتی یا قومی فخر کے طور پر نہ دیکھے بلکہ اس کے عملی استعمال کو فروغ دے۔ گھر میں اردو بولی جائے، کتابیں اردو میں پڑھی جائیں، اردو اخبارات، رسائل اور ویب سائٹس کو فروغ دیا جائے۔
والدین اپنے بچوں کو اردو ادب سے روشناس کرائیں۔ اساتذہ اردو کو صرف نصاب تک محدود نہ رکھیں بلکہ اس کے تخلیقی پہلو کو اجاگر کریں۔

اردو زندہ ہے، لیکن خطرے میں ہے
اردو زبان محض ایک لسانی اظہار نہیں بلکہ ایک تہذیب، ایک روایت اور ایک تاریخ کا نام ہے۔ موجودہ دور میں اسے مختلف محاذوں پر جنگ لڑنی پڑ رہی ہے تعلیم، میڈیا، انفارمیشن ٹیکنالوجی اور قومی پالیسی کی سطح پر۔
اگر ہم نے ہوش کے ناخن نہ لئے تو آنے والے وقت میں اردو صرف کتب خانوں اور ماضی کی یادگاروں تک محدود ہو کر رہ جائے گی۔ لیکن اگر ہم نے اس زبان کی حفاظت، ترقی اور فروغ کو اپنا مشن بنا لیا تو یہ زبان نہ صرف زندہ رہے گی بلکہ دنیا میں اپنا مقام بھی واپس حاصل کرے گی۔

اردو کو بچانا صرف زبان کو بچانا نہیں، بلکہ اپنی شناخت، ثقافت، تاریخ اور تہذیب کو بچانا ہے۔