Category: بلاگ

مصنوعی ذہانت اور آج کی صحافت، آزادی صحافت کے لیے جدو جہد
تحریر :سیدریاض جاذب

ہر سال 3 مئی کو دنیا بھر میں "عالمی یوم صحافت” منایا جاتا ہے، جس کا مقصد آزادی صحافت کا دفاع، اظہارِ رائے کی آزادی کی حمایت، صحافیوں کے تحفظ کی جدوجہد، اور میڈیا پر دباؤ کے خلاف آواز بلند کرنا ہے۔ اس دن کی مناسبت سے عوام کو یہ پیغام دیا جاتا ہے کہ ایک آزاد میڈیا ہی ان کے حقوق کا محافظ ہے، اور اگر میڈیا پر قدغن لگے، تو عوام کی آواز بھی دب سکتی ہے۔

سال 2025 کے عالمی یوم صحافت کا مرکزی موضوع ہے:
"Reporting in the Brave New World: The Impact of Artificial Intelligence on Press Freedom and the Media”
یعنی "نئی دنیا کی جرأت مند رپورٹنگ: صحافت اور آزادیِ صحافت پر مصنوعی ذہانت کا اثر”۔

مصنوعی ذہانت (AI) نے جہاں زندگی کے دیگر شعبہ جات کو متاثر کیا ہے، وہیں صحافت بھی اس سے مستثنیٰ نہیں رہی۔ AI کی مدد سے خبر تک رسائی، تحقیق، تجزیہ اور رپورٹنگ کے عمل میں تیزی آئی ہے۔ خبروں کی تیاری، ترسیل اور اشاعت کے عمل میں جدت آئی ہے، لیکن ساتھ ہی ساتھ بہت سے خطرات اور چیلنجز بھی سامنے آئے ہیں۔ جعلی خبریں (Fake News)، گمراہ کن مواد، اور خبروں میں انسانی حساسیت کی کمی جیسے مسائل نے صحافت کے معیار اور سچائی کو چیلنج کیا ہے۔

ماہرین کے مطابق صحافت میں AI کے استعمال کے دوران اخلاقی اصولوں، شفافیت، اور نگرانی کا برقرار رہنا ناگزیر ہے تاکہ خبر کی سچائی متاثر نہ ہو۔ مصنوعی ذہانت کو ایک معاون ٹول کے طور پر استعمال کرنا چاہیے، نہ کہ صحافت کے بنیادی اصولوں کی جگہ لینے کے لیے۔

اگر ہم پاکستان کے تناظر میں بات کریں تو سال 2024 صحافیوں کے لیے نہایت مشکل اور خطرناک رہا۔ فریڈم نیٹ ورک کی "امپونٹی رپورٹ 2024” کے مطابق، نومبر 2023 سے اگست 2024 کے درمیان صحافیوں کے خلاف 57 سنگین خلاف ورزیاں ریکارڈ کی گئیں، جن میں 11 قاتلانہ حملے بھی شامل تھے۔ اس کے علاوہ صحافیوں کو قانونی کارروائیوں، ہراسانی، دھمکیوں اور اغوا جیسے سنگین مسائل کا سامنا رہا۔

خصوصاً خواتین صحافیوں کے لیے صورتحال اور بھی نازک رہی۔ انہیں جنسی ہراسانی اور آن لائن بدسلوکی جیسے مسائل کا سامنا کرنا پڑا۔ صحافیوں کے خلاف "پیکا” (Prevention of Electronic Crimes Act) کے تحت بھی کارروائیاں جاری رہیں، جن کے نتیجے میں 150 سے زائد افراد کے خلاف مقدمات درج کیے گئے اور 20 سے زائد کو گرفتار بھی کیا گیا۔

ان حالات میں جب صحافت پر کئی اطراف سے دباؤ ہے، آزادی صحافت کی جدوجہد مزید اہم ہو جاتی ہے۔ اگرچہ یہ جدوجہد کٹھن ہے اور فوری طور پر مثبت نتائج نظر نہیں آتے، تاہم صحافی برادری ہمت، جذبے اور عزم کے ساتھ اپنے فرائض انجام دے رہی ہے۔

عالمی یوم صحافت صرف ایک دن منانے کا نام نہیں، بلکہ یہ آزادی اظہار، سچائی، اور عوام کے حقِ معلومات کے تحفظ کی علامت ہے۔ صحافت پر مصنوعی ذہانت کے بڑھتے ہوئے اثرات کے باوجود، معاشرتی اقدار، اصولوں اور آزادیِ صحافت کا دفاع ضروری ہے۔ صحافیوں کے لیے سازگار اور محفوظ ماحول کی فراہمی، ریاستی اور سماجی سطح پر ہماری مشترکہ ذمہ داری ہے۔

یکم مئی اور مزدور
تحریر:ملک ظفر اقبال
"مزدور کی مزدوری اس کا پسینہ خشک ہونے سے پہلے دے دو۔”
(سنن ابن ماجہ)

اسلام کا مزدور کے بارے میں تصور اور اس کے متعلق احکامات آج سے تقریباً 1450 سال قبل دیے گئے۔ مغربی دنیا آج ان اصولوں کی بات کر رہی ہے، مگر بدقسمتی سے ہم اسلامی اصولوں کو نہ صرف فراموش کر چکے ہیں بلکہ دوسروں کے اصول اپنانے میں کوئی کسر باقی نہیں چھوڑی۔ یہی وجہ ہے کہ آج کا مسلمان دربدر کی ٹھوکریں کھانے پر مجبور ہے۔ آج ہم یکم مئی کی تاریخی حیثیت اور پاکستان کے مزدور پر بات کریں گے۔

محنت انسانی تہذیب کا ستون ہے۔ ہر ترقی یافتہ معاشرہ اپنے محنت کشوں کے خون پسینے کا مرہونِ منت ہوتا ہے۔
یکم مئی کو دنیا بھر میں "یومِ مزدور” یا "لیبر ڈے” کے طور پر منایا جاتا ہے تاکہ محنت کش طبقے کی قربانیوں کو خراجِ تحسین پیش کیا جائے اور ان کے حقوق کے تحفظ کا عہد دہرایا جا سکے۔

یکم مئی کیوں منایا جاتا ہے؟
یومِ مزدور کی تاریخ 1886ء سے جڑی ہوئی ہے۔ انیسویں صدی میں امریکہ کے شہر شکاگو میں مزدوروں نے کام کے اوقات کم کروانے کے لیے ایک تحریک کا آغاز کیا۔ اس وقت مزدوروں سے روزانہ 12 سے 16 گھنٹے کام لیا جاتا تھا اور اس کے بدلے میں اجرت نہایت کم دی جاتی تھی۔

یکم مئی 1886ء کو ہزاروں مزدور سڑکوں پر نکلے اور "آٹھ گھنٹے کام، آٹھ گھنٹے آرام، آٹھ گھنٹے ذاتی وقت” کا نعرہ لگایا۔
یہ پرامن مظاہرہ جلد ہی پرتشدد تصادم میں بدل گیا۔ پولیس کی فائرنگ سے کئی مزدور شہید اور متعدد گرفتار ہوئے۔ بعد ازاں کئی مزدور رہنماؤں کو سزائے موت سنائی گئی۔

یہ قربانیاں رائیگاں نہیں گئیں۔ 1889ء میں پیرس میں انٹرنیشنل سوشلسٹ کانگریس نے اعلان کیا کہ یکم مئی کو دنیا بھر میں یومِ مزدور کے طور پر منایا جائے گا۔

محنت ایک ایسی خوشبو ہے جو انسان کی پیشانی سے پسینے کی صورت میں پھوٹتی ہے اور دنیا کو سنوارتی ہے۔
یومِ مزدور، یکم مئی کا دن، اسی مقدس خوشبو کو سلام پیش کرنے کا دن ہے۔

آج دنیا بھر میں، اور پاکستان میں بھی، یومِ مزدور منایا جاتا ہے۔ ریلیاں نکالی جاتی ہیں، تقاریر کی جاتی ہیں اور وعدے دہرائے جاتے ہیں۔ مگر اصل سوال یہ ہے: کیا ہم واقعی اپنے محنت کشوں کو ان کا جائز مقام دے رہے ہیں؟

مزدور وہ ہے جو اینٹ سے اینٹ جوڑ کر شہر بساتا ہے مگر خود کچے جھونپڑوں میں رہتا ہے۔ وہ کارخانوں کا پہیہ چلاتا ہے، مگر اپنی زندگی کے پہیے کو بمشکل گھسیٹتا ہے۔

یومِ مزدور ہمیں یاد دلاتا ہے کہ ترقی کی عمارت محنت کشوں کے کندھوں پر کھڑی ہے۔ اگر ہم ان کے حقوق، تحفظ اور عزت کو یقینی نہیں بناتے تو ہم اپنے ہی مستقبل کو کمزور کر رہے ہیں۔

پاکستان میں محنت کش طبقہ ملک کی معیشت کی ریڑھ کی ہڈی ہے۔ یہ وہ طبقہ ہے جو دن رات محنت کرتا ہے، لیکن بدقسمتی سے اس کی محنت کا درست معاوضہ نہیں دیا جاتا۔
مزدور کی زندگی میں چھائی غربت، محنت کے باوجود پستی، اور حکومتی اداروں کی خاموشی اس بات کی غمازی ہے کہ ریاست، جس کا فرض تھا کہ وہ اپنے مزدوروں کو تحفظ دے، خود ان کے استحصال کا حصہ بن چکی ہے۔

مزدوروں کا استحصال ایک حقیقت بن چکا ہے جو روز بروز بڑھتا جا رہا ہے۔ آج بھی پاکستانی فیکٹریوں، کھیتوں، تعمیراتی سائٹس اور دیگر صنعتوں میں مزدور انتہائی کم اجرت پر طویل گھنٹوں تک کام کرنے پر مجبور ہیں۔
پاکستان میں کم از کم اجرت ہر سال حکومت کی جانب سے بڑھا دی جاتی ہے، لیکن زمینی سطح پر اس کا کوئی عملی اثر دکھائی نہیں دیتا۔ البتہ سرکاری فائلوں میں سب اچھا ہونے کی رپورٹ شامل ہوتی ہے۔

آج بھی بہت سی فیکٹریاں، کارخانے اور کاروبار بارہ گھنٹے کام کے بدلے صرف 20,000 سے 30,000 روپے ماہانہ تنخواہ دیتے ہیں، جو کہ ایک فرد کی بنیادی ضروریات کو پورا کرنے کے لیے ناکافی ہے۔ یہ تنخواہیں لیبر قوانین کی کھلی خلاف ورزی ہیں، مگر سرکاری اداروں کی رضا مندی سے سب کچھ جاری ہے، کیونکہ ہماری ترجیحات کچھ اور ہیں۔

یہ مزدور اس معمولی رقم کو اپنی زندگی کے دباؤ کو کم کرنے میں صرف کرتا ہے، اور بدلے میں نہ صرف اضافی گھنٹے بلکہ سخت شرائط میں کام کرتا ہے، مگر اسے کوئی اضافی فائدہ نہیں ملتا۔

پاکستان کے قوانین کے مطابق، مزدور کو روزانہ آٹھ گھنٹے سے زیادہ کام پر مجبور نہیں کیا جا سکتا، مگر حقیقت یہ ہے کہ فیکٹریوں، تعمیراتی مقامات اور دفاتر میں مزدوروں سے 12، 14، حتیٰ کہ 16 گھنٹے تک کام لیا جا رہا ہے۔

یہ قوانین صرف کتابوں کی حد تک محدود ہیں، جب کہ ان پر عملدرآمد نہ ہونے کے برابر ہے۔

کام کے دوران حفاظتی تدابیر نہ ہونے کی صورت میں مزدوروں کے جانی نقصان کا خطرہ ہمیشہ موجود رہتا ہے، خاص طور پر تعمیراتی اور فیکٹری کے شعبوں میں، جہاں حفاظتی سامان کی شدید کمی دیکھی جاتی ہے۔اس طرح لاکھوں مزدور زخمی یا جان سے ہاتھ دھو بیٹھتے ہیں، جن کا سرکاری سطح پر کوئی باقاعدہ ریکارڈ موجود نہیں۔

پاکستان میں خواتین مزدوروں کا استحصال مزید سنگین ہے۔
انہیں نہ صرف کم اجرت دی جاتی ہے بلکہ جنسی ہراسانی، غیر محفوظ ماحول اور مختلف قسم کی زیادتیوں کا سامنا بھی کرنا پڑتا ہے۔

چائلڈ لیبر بھی ایک اہم مسئلہ ہے، جہاں اسکول جانے کی عمر کے بچے فیکٹریوں اور ورکشاپوں میں کام کرنے پر مجبور ہیں۔ اس کی بنیادی وجہ غربت اور معاشی بدحالی ہے۔
حقائق سے آگاہی کے باوجود حکومتی خاموشی ایک المیہ ہے۔

پاکستان میں وہ ادارے جو مزدوروں کے حقوق کے تحفظ کے لیے قائم کیے گئے ہیں، خود مزدوروں کے استحصال میں برابر کے شریک ہیں۔
لیبر ڈیپارٹمنٹ، ای او بی آئی، سوشل سیکیورٹی جیسے ادارے جو مزدوروں کی فلاح کے لیے بنائے گئے تھے، بدعنوانی، سیاسی مداخلت اور عدم دلچسپی کی وجہ سے اپنی ذمہ داریوں سے غافل ہو چکے ہیں۔

لیبر انسپکٹرز، سوشل سیکیورٹی افسران اور دیگر سرکاری اہلکار اکثر رشوت لے کر قانون شکنی پر آنکھیں بند کر لیتے ہیں۔
اس کے نتیجے میں فیکٹری مالکان اور ٹھیکیدار قوانین کی خلاف ورزی کرتے ہیں، اور جب مزدور آواز بلند کرتا ہے تو اس کی آواز کو دبا دیا جاتا ہے۔

پاکستان میں اگرچہ متعدد لیبر قوانین موجود ہیں، جیسے کہ کم از کم اجرت، کام کے اوقات اور کام کی جگہ پر تحفظ، مگر ان قوانین کا نفاذ نہایت سست اور غیر مؤثر ہے۔

مزدوروں کی اکثریت ان قوانین سے ناواقف ہے، اور جب ان کا استحصال ہوتا ہے تو وہ خوف یا مایوسی کی وجہ سے شکایت درج کروانے سے گریز کرتے ہیں۔

سیاسی مداخلت نے ریاستی اداروں کو کمزور اور بدعنوان بنا دیا ہے۔
مزدوروں کے حقوق کے لیے آواز بلند کرنے والے اکثر کارکنوں کو سیاسی بنیادوں پر نشانہ بنایا جاتا ہے اور ان کی شکایات کو نظرانداز کیا جاتا ہے۔

پاکستان میں مزدوروں کے حقوق کا تحفظ ایک سنگین قومی مسئلہ ہے جسے مزید نظرانداز نہیں کیا جا سکتا۔

مزدور کا حق ہے کہ اسے مناسب اجرت، محفوظ کام کا ماحول، اور سوشل سیکیورٹی کی سہولتیں فراہم کی جائیں۔
یہ وہ بنیادی حقوق ہیں جنہیں یقینی بنانا ریاست کی ذمہ داری ہے۔

مزدوروں کو اپنی یونینز بنانے کا مکمل حق دیا جانا چاہیے تاکہ وہ اجتماعی طور پر اپنے حقوق کے لیے آواز بلند کر سکیں۔
لیبر قوانین کو مزید مؤثر بنایا جائے اور ان پر سختی سے عملدرآمد یقینی بنایا جائے تاکہ مزدوروں کا استحصال روکا جا سکے۔

حکومتی اداروں میں سیاسی مداخلت ختم کی جائے تاکہ مزدوروں کو انصاف فراہم کیا جا سکے اور ان کے حقوق محفوظ ہوں۔

پاکستان کا مزدور طبقہ، اگرچہ ملک کی معیشت میں ریڑھ کی ہڈی کی حیثیت رکھتا ہے، مگر اس کا استحصال اتنی شدت سے ہو رہا ہے کہ اس کے حقوق و فلاح کے لیے بنائے گئے قوانین صرف کاغذوں تک محدود رہ گئے ہیں۔

حکومت کی خاموشی اور اداروں کی کرپشن نے مزدوروں کے لیے انصاف کے دروازے بند کر دیے ہیں۔
مزدور کا استحصال تب تک جاری رہے گا جب تک حکومت اور ادارے اس مسئلے کی سنگینی کو تسلیم کر کے مؤثر اقدامات نہیں کرتے۔

اگر یومِ مزدور کے حوالے سے ایک مختصر جائزہ لیا جائے تو پاکستان میں یومِ مئی کے دن "مزدور کام پر، اور افسر چھٹی پر” ہوتا ہے۔ یہ ایک کھلا تضاد ہے۔

پاکستان کے اکثر کارخانوں اور فیکٹریوں میں آج بھی مزدور 12 گھنٹے ڈیوٹی کے بدلے صرف 25,000 روپے ماہانہ پر کام کرنے پر مجبور ہے، جب کہ سرکاری سطح پر 8 گھنٹے کے عوض 37,000 روپے تنخواہ مقرر کی گئی ہے۔

زمینی حقائق کو دیکھا جائے تو لیبر قوانین کا جنازہ خود لیبر ڈیپارٹمنٹ بڑی دھوم سے نکال رہا ہے اور مزدور کی آواز دبانے کے بدلے "لفافہ ازم” کو ترجیح دیتا ہے۔

حکومتِ وقت کو اس بارے میں سنجیدگی سے غور کرنا ہوگا:
کیا مزدور کی پنشن دس ہزار روپے کافی ہے؟
کیا مزدور کو لیبر قوانین کے مطابق سہولیات فراہم کی جا رہی ہیں؟
کیا آئی ایل او (ILO) کے تحت مزدور اپنا حق حاصل کر رہا ہے؟
کیا لیبر ڈیپارٹمنٹ بغیر رشوت مزدوروں کو حقوق فراہم کر رہا ہے؟
کیا ای او بی آئی کے تمام حقوق واقعی سب کو مل رہے ہیں؟

زمینی حقائق یہی ہیں کہ لیبر ڈیپارٹمنٹ مزدوروں کا خون چوس رہا ہے، اور اس کی مثالیں اربوں روپے کی کرپشن سے جڑی کہانیوں کی صورت میں موجود ہیں۔

آئیں، آج ہم یہ عہد کریں کہ ہم مزدور کو وہ بنیادی حقوق دیں گے جو پاکستانی آئین اور قوانین کے مطابق اس کا حق ہیں۔
مگر یاد رکھیں، ہر حکومت اور اپوزیشن پارٹی لفظ "کریں گے” کے نام پر مزدور کو دہائیوں سے دھوکہ دیتی آئی ہے۔
اور یہی ہے آج کا یومِ مئی۔

یکم مئی مزدوروں کا عالمی دن
ضیاء الحق سرحدی، پشاور
ziaulhaqsarhadi@gmail.com
پاکستان میں مزدوروں کا عالمی دن یکم مئی کو منایا جاتا ہے۔ اس کا فیصلہ 1972ء کو کیا گیا تھا کہ اس دن کو منایا جائے اور عام تعطیل کی جائے۔ مختلف ممالک میں یہ دن دوسری تاریخوں میں بھی منایا جاتا ہے۔ مثلاً امریکہ اور کینیڈا میں ستمبر کے پہلے سوموار کو منایا جاتا ہے۔ اس کی بنیادی اہمیت اس تحریک میں ہے جس میں آٹھ گھنٹے کام، آٹھ گھنٹے تفریح اور آٹھ گھنٹے آرام کی پالیسی اپنانے کی استدعا کی گئی تھی۔ پاکستان میں یکم مئی کو عام تعطیل ہوتی ہے۔ اس دن کی مناسبت سے کوئی خاص نشان نہیں ہے بلکہ پوسٹرز اور دیگر جگہوں پر ہتھوڑے اور درانتی کے نشان کو علامت سمجھا جاتا ہے۔

پاکستان عالمی مزدوروں کی تنظیم آئی ایل او کا 1947ء سے ممبر ہے جو انصاف اور معاشرتی حقوق کے تحفظ کا پرچار کرتی ہے۔ اس وقت مزدوری کا تعین پندرہ سو روپے یومیہ تک ہے لیکن کام کروانے والے لوگ ہزار، بارہ سو سے اوپر نہیں دیتے۔ ان کی مجبوری اور اس بات کا احساس نہیں کیا جاتا کہ ان کا بھی خاندان ہے اور ضروریاتِ زندگی ہیں جن کو پورا کرنا ان کی ذمہ داری ہے۔ مغرب کی ترقی کا راز یہی ہے کہ انہوں نے ہنر اور کام کی قدر کی ہے۔ یہ نہیں دیکھا کہ کام کرنے والا کون ہے، کہاں رہتا ہے اور اس کی ذاتی حیثیت اور حالات کیسے ہیں۔ ایک مزدور کو بھی ہر وہ سہولت حاصل ہے جو دوسرے لوگوں کو ہے۔

طبقے تو ہر ملک اور معاشرے میں ہوتے ہیں لیکن مواقع فراہم کرنا کہ محنت کرنے والا اور ہنر مند بھی کسی مقام پر پہنچے اور اپنے خاندان کو بنیادی سہولت فراہم کرے، ضروری ہے۔ مزدور کو پسینہ خشک ہونے سے پہلے مزدوری دینے کا حکم ہے۔ اسی سے محنت اور مزدوری کی قدر و منزلت کا اندازہ ہوتا ہے۔

پاکستان عالمی ادارہ آئی ایل او کا باقاعدہ ممبر ہے اور ILO کی قراردادوں پر دستخط کرنے کے بعد پابند ہے کہ ملک بھر میں مزدوروں کی فلاح و بہبود، یونین سازی کا حق سمیت مزدوروں کی بہتری کے لیے قانون بنائے جو ILO قوانین کے متصادم نہ ہوں۔ یہی وجہ ہے کہ پاکستان میں وزارت محنت، سوشل سیکیورٹی، محکمہ لیبر کے تحت لیبر کورٹس، پیلنٹ لیبر ٹربیونلز، قومی صنعتی تعلقات کمیشن (NIRC) کے ادارے قائم ہیں۔

افسوس یہ ہے کہ یہ ادارے بھاری بھر کم مراعات لے کر بھی ذمہ داری پوری نہیں کر رہے ہیں۔ حالانکہ یکم مئی مزدور ڈے ہوتا ہے، ملک بھر کے سرکاری ادارے، عدلیہ، بیوروکریسی چھٹی مناتی ہے مگر مزدور طبقہ یا درجہ چہارم کے سرکاری ملازمین کو حقیر ترین مخلوق سمجھا جانے لگا ہے۔ ان کے لیے انصاف اور حقوق مشکل تو پہلے بھی تھے مگر اب ناممکن بنا دیے گئے ہیں۔

اس وقت ملک بھر سے 1600 سے زائد صنعتی ادارے بغیر قانونی تقاضے پورے کیے بند کر دیے گئے ہیں، جس سے ملک بھر کے مزدور بے روزگار ہو کر بے یار و مددگار، کسمپرسی کی زندگی بسر کرنے پر مجبور ہو چکے ہیں، جس کی بنا پر ان کے خاندان فاقوں کا شکار ہو گئے ہیں۔

لیبر قوانین آئی آر اے 2010ء کے تحت اگر کوئی صنعتی ادارہ بند کرنے کی معقول وجہ ہو تو پہلے 50 فیصد مزدوروں کو انڈسٹریل ریلیشن ایکٹ کے تحت حقوق دے کر فارغ کیا جاتا ہے اور کم از کم چھ ماہ کے اندر باقی 50 فیصد مزدوروں کو حقوق دیے جانے کے بعد صنعتی و سرکاری ادارہ بند کرنے کی اجازت ہوتی ہے۔

اس میں محکمہ محنت، پرائیڈنگ آفیسر اور ادارے کی CBA یونین شامل ہوتے ہیں۔ حیرانگی اور دکھ کی بات ہے کہ اس بارے میں اعلیٰ عدلیہ سمیت حکومتی اداروں نے کوئی اقدام کیا ہے، نہ ہی کوئی آواز سینیٹ، قومی یا صوبائی اسمبلیوں سے اٹھائی گئی ہے۔ جبکہ صدرِ مملکت نے حکومت کو انتخابات کے حوالے سے خط لکھا ہے اور عدالتِ عظمیٰ نے بھی انتخابات کے لیے حکم فرما دیا ہے اور کئی پٹیشنیں بھی دائر ہو چکی ہیں۔ ممکن ہے جب یہ تحریر شائع ہو، حالات یکسر بدل چکے ہوں۔

جن صنعتی اداروں کو بند کیا گیا ہے، اس بارے میں محکمہ لیبر اور لیبر عدالتیں بھی خاموش ہیں۔ عدالتِ عظمیٰ کو از خود نوٹس لینا چاہئے تھا۔ ملک بھر سے کسی ٹریڈ یونین یا کسی سیاسی جماعت کے لیبر ونگ نے بھی آواز نہیں اٹھائی۔ سب پر اسرار طور پر خاموش ہیں۔

ٹریڈ یونینز کو ختم کیا جا رہا ہے، حالانکہ مزدوروں کی ویلفیئر اور ٹریڈ یونینز کو تحفظ دینے والے ادارے اور عدالتیں بدستور قائم و دائم ہیں۔ اس کے باوجود مزدوروں کو نہ حقوق ملتے ہیں، نہ ہی مزدوروں اور یونین کے عہدیداروں کی عزتِ نفس کا خیال رکھا جاتا ہے۔

اس بارے میں صدرِ مملکت، وزیرِاعظم اور نہ ہی پی ٹی آئی کی قیادت کروڑوں بے روزگار ہونے والے مزدوروں سے ناانصافی پر آواز اٹھاتے ہیں کیونکہ مزدوروں کو حقوق سے محروم کرنے والوں کی اکثریت خود اسمبلیوں میں بیٹھی ہے۔

اور تو اور، سرکاری و نیم سرکاری اداروں میں بعض اعلیٰ افسران بھی صرف رجسٹرڈ ٹریڈ یونینز کے خلاف ہی سوچتے ہیں، جبکہ ایسوسی ایشنز جن کا ہڑتال، جلسے، جلوس، تالہ بندی کا حق ہی نہیں، وہ آئے روز ہڑتالیں، تالہ بندیاں، جلسے جلوس کرتے رہتے ہیں، انہیں پوچھا تک نہیں جاتا۔

صنعتی و سرکاری اداروں میں درجہ چہارم کے ملازمین کے ساتھ ہونے والی انتقامی کارروائیوں، افسران اور مالکان کے ستائے مزدور و یونین کے عہدیدار جب مزدوروں کو تحفظ دینے کے لیے قائم اداروں کے پاس جاتے ہیں تو انہیں دھتکارا جاتا ہے اور مزدوروں کو حقیر سمجھتے ہوئے نفرت و حقارت کا نشانہ بناتے ہوئے ان کی عزتِ نفس مجروح کی جاتی ہے۔

جس کا ثبوت یہ ہے کہ مزدوروں کے حقوق کے لیے قائم اداروں کی ماہانہ کارکردگی کا جائزہ لیا جائے تو 30 دنوں میں 30 مزدوروں کو بھی حقوق نہیں دلائے گئے ہوں گے۔

حکومت وقت، خصوصاً وزرائے قانون و انسانی حقوق سے پُرزور اپیل ہے کہ مزدوروں کی بہتری کے لیے قومی صنعتی تعلقات کمیشن (NIRC)، لیبر کورٹس، محکمہ لیبر کو جدید تقاضوں کے مطابق فعال کیا جائے۔

اس وقت مزدوروں کے خلاف انتقامی کارروائی عروج پر ہے مگر ظالم و جابر کا ہاتھ روکنے والا کوئی مؤثر ادارہ نہیں ہے۔ سروسز ٹربیونلز کے ممبران کو بھی درجہ چہارم کے ملازمین کے خلاف انتقامی کارروائی پر حکمِ امتناعی اور آرڈر معطل کرنے کا اختیار دیا جائے اور ادارے سے اپیل کو ضروری نہ سمجھا جائے، کیونکہ ادارے کے سینئر آفیسر نے بھی وہی کرنا ہوتا ہے جو نچلے افسر نے کیا ہوتا ہے۔

اس سے کئی ماہ ملازم انتظار کرنے پر مجبور رہتا ہے۔ انصاف میں تاخیر ہی ناانصافی ہے۔ وزارتِ انصاف، انسانی حقوق اس بار نوٹس لے۔ مزدوروں کو انصاف فراہم کرنے والے اداروں کی ماہانہ کارکردگی کا جائزہ لیا جائے تاکہ حقائق سامنے آ سکیں۔

جبکہ یوم مئی جو کہ مزدوروں کا دن ہے، بہتر تو یہ ہوتا کہ اس دن پر ان مزدوروں کی بات کی جاتی جو کہ مزدور ہوتے ہوئے بھی مزدور نہیں۔

حکومت پر دباؤ ڈالا جاتا کہ غیر رسمی مزدور طبقہ کو حکومتی ریکارڈ کا حصہ بنایا جائے، کیونکہ مزدوروں کی اتنی بڑی تعداد کو حکومتی ریکارڈ میں لائے بغیر قانون سازی اور حقوق کی باتیں کرنا ہوا میں قلعے بنانے جیسا ہے۔

اس کا یہ مطلب ہرگز نہیں کہ رسمی مزدور طبقہ کے معاملات پر بات نہ کی جائے، ضرور کی جائے مگر غیر رسمی مزدور طبقہ کے مسئلہ کو زیرِ بحث لائے بغیر مزدور حقوق کی بات کرنا ہے تو اس دن کا نام بھی "رسمی یومِ مزدور” رکھ لیا جائے۔

مزدوروں کا عالمی دن منانے کا مقصد یہی ہے کہ ہر سطح پر مزدوروں کے حقوق کا تحفظ کرنے کا تجدیدِ عہد کیا جائے، انہیں ان کا جائز حق دیا جائے اور انہیں بھی دوسروں کی طرح مواقع فراہم کیے جائیں کہ وہ زندگی میں آگے بڑھیں اور ملک و قوم کی ترقی و خوشحالی میں شامل ہوں۔