بلاگ: پاکستان میں نفاذ اردو، اس کام کے لئے کتنی ذہانت کی ضرورت ہے؟
پروفیسر محمد سلیم ہاشمی، فاطمہ قمر پاکستان قومی زبان تحریک

دنیا بھر میں جو جس ملک کی زبان ہے وہی اس کی قومی اور سرکاری زبان ہے۔ یہ کرنے کے لئے کسی ذہانت، سوچ بچار، تدبیر یا ترکیب لڑانے کی ضرورت نہیں۔ غلاموں یا غلام رہوں کی بات چھوڑ دیں، آپ ازاد، خود مختار، با وقار اور ترقی یافتہ ملکوں کے نام لیتے جائیں یہی حقیقت سامنے آئے گی۔ کچھ ملکوں کے نام میں لے دیتا ہوں باقی دنیا کے بارے میں آپ خود غور فرما لیں۔
امریکہ، برطانیہ، روس چین، جاپان، آسٹریلیا، نیوزی لینڈ، اسٹریا، فرانس، جرمنی، ہالینڈ، سپین، ترکی، ایران، بیلجیم، برازیل، ارجنٹائن وغیرہ وغیرہ۔
میں نے کچھ دن پہلے ایک جگہ سوال کیا کہ یہاں موجود کتنے لوگ ایسے ہیں جنہوں نے ادب کے علاوہ اعلی’ تعلیم حاصل کرنے کے دوران میں اپنی کوئی ایک نصابی کتاب مکمل پڑھی یو، آج تک اس سوال کے جواب سے محروم ہوں۔
پاکستانی حکمرانوں کی ذہانت کس معیار کی ہے اس کا اندازہ اس بات سے لگا لیں کہ ان کو یہ معمولی ترین بات بھی سمجھ میں نہ آ سکی کہ جب یہ ملک پاکستانیوں کا ہے تو یہاں پاکستانی زبان نافذ کی جائے۔ بڑی معذرت کے ساتھ اس میں بہت بڑا ہاتھ ان لوگوں کا بھی تھا جو اردو کے نام پر قائم اداروں میں بڑی بڑی کرسیوں پر براجمان تھے اور جو نفاذ اردو کی ہر کوشش کو چند باتوں سے ناکام بناتے رہے۔
یہ ملغوبہ زبان ہے
اس میں اصطلاحات نہیں ہیں
اس میں کتابیں نہیں ہیں
اس میں سائنس اور ٹیکنالوجی کے بارے میں مواد نہیں ہے۔ اور پھر مشکل مشکل عربی اور فارسی میں لتھڑی ہوئی اصطلاحات پیش کر کے ثابت کر دیتے تھے کہ یہ بہت مشکل زبان ہے۔
برباد ہوں یہ لوگ جو جامعہ عثمانیہ اور دیگر علمی اداروں کے تجربات سے فائدہ اٹھانے کے بجائے چیزوں کو از سر نو کرنے کی کوشش کرتے رہے اور اس طرح نفاذ اردو کا راستہ مسدود کرنے میں اپنا کردار ادا کیا۔
پاکستان کی بدقسمتی کہ یہاں پر عرصہ دراز تک حکومتوں پر ان لوگوں کا قبضہ رہا جو انگریزوں سے تربیت یافتہ اور ان کے محکوم رہے تھے اور ان کی ثقافت، تہذیب، بودوباش اور زبان سے اپنے جسم کے خلیوں تک میں مرعوب تھے۔

کیا کیا جائے؟
ہمیں اس طلسم کو توڑنا یوگا اور اس اثر سے باہر نکلنا ہوگا کہ ہم اردو میں کام نہیں چلا سکتے اور یہ کہ ہمارے لئے انگریزی بہت ضروری ہے۔
کیا اس طرح کی سوچ، فرانس، جرمنی، جاپان، چین، روس یا ترکی کے افراد سوچ سکتے ہیں۔ اگر ہمارے لئے انگریزی کسی بھی حوالے سے ضروری ہے تو اتنی اتنی رکھ لیں جتنی ان ملکوں میں ہے، باقی جیسے ان ملکوں میں ان کی زبان نافذ ہے اردو نافذ کر دیں۔

ہم انگریزی میں بہت زیادہ بھیگے ہوئے ہیں؟
کوئی بات نہیں انگریزی کو باہر نکالیں ہماری روح اور جسم ہلکا پھلکا ہو جائے گا، ہم۔حیران ہو ہو کر ایک دوسرے سے پوچھتے رہیں گے کہ اتنے سال ہم یہ غلاظت اپنے اوپر مل کر کیوں پھرتے رہے۔
افسوس ہے پچھلے حکمرانوں پر جن کے دور میں عدالت عظمیٰ نے نفاذ اردو کے لئے انتہائی واضح اور دو ٹوک حکم صادر فرمایا۔ ان کی ذہنی مفلسی کا یہ عالم کہ ان کو یہ ادراک تک نہ ہوا کہ ان کے ہاتھ میں الہ دین کا چراغ رکھ دیا گیا ہے۔ وہ عدالت عظمیٰ کے فیصلے، آئین پاکستان اور پاکستان کے عوام کی توہین کرتے رہے اور قدرت نے ان سے اس توہین کا کھل کر بدلہ لیا۔
یہ بڑی سیدھی سادی بات ہے، ایک جمع ایک دو جیسی، جو ملک جو اس کی زبان وہ اس کی قومی اور سرکاری زبان، یہ بات جاننے کے لئے کسی اعلیٰ ذہانت کی ضرورت نہیں ہے، اور اس پر عمل کرنے کے لئے کسی بہت بڑے تبدیلی کی ضرورت نہیں ہے۔ یہ تو اپنے گھر میں رہنے بسنے زندگی گزارنے جیسی بات ہے۔ آدمی کب تک ہوٹلوں میں رہ سکتا ہے، وہاں کا کھانا کھا سکتا ہے ہر شخص کو اپنے گھر میں رہنے کی وہاں بسنے کی خواہش ہوتی ہے۔
خیال رہے انگریزی کسی پاکستانی کی زبان نہیں ہے، پاکستان کی زبان نہیں ہے، اس سے جس قدر جلد چھٹکارا حاصل کر لیا جائے یہ پاکستان اور اس میں بسنے والے عوام کے لئے اتنا ہی ضروری ہے

حکومت نے کشمیر کا سودا کر دیا؟ ….آصف محمود
بشکریہ روزنامہ 92

تو کیا حکومت نے کشمیر کا سودا کر لیا ؟ کچھ ساکنان ِ کوچہِ دلدار اپنے روایتی اہتمام کے ساتھ اس کا جواب اثبات میں دے رہے ہیں اور کچھ اپنی دائمی سادہ لوحی میں اس پروپیگنڈے سے متاثر ہو رہے ہیں ۔ بہت سارے معاملات میں حکومت کا ناقد ہونے کے باوجود میرے نزدیک البتہ اس سوال کا جواب نفی میں ہے۔ ایسا ممکن ہی نہیں ۔

دشمن باہر سے حملہ آور ہے اور کچھ لوگ اندر سے ۔ یہ جو اندر سے حملہ آور ہیں یہ دشمن سے کم خطرناک نہیں ۔ یہ منصوبہ بندی سے وار کرتے ہیں ، افواہیں پھیلاتے ہیں ، مایوسی کو فروغ دیتے ہیں ، ریاست اور ریاستی اداروں کا تمسخر اڑاتے ہیں اور قوم کو اندر سے توڑنے کی کوشش کرتے ہیں ۔ حالت امن ہو یا جنگ ، یہ ہمیشہ اپنے محاذ پر پائے جاتے ہیں ۔ ان کی اصلیت اور طریق واردات کو سمجھنا بہت ضروری ہے۔

ملیحہ لودھی ہی کو لے لیجیے۔ اچانک ان کے خلاف ایک مہم چل پڑی ۔ اتفاق دیکھیے کہ وہ حضرات جو عشروں سے اپنی روشن خیالی کا سارا زور لگا کر یہ کہتے پھرتے تھے کہ مذہبی معاملات سے ان کا کچھ لینا دینا نہیں کیونکہ ان کا مذہب تو انسانیت ہے وہ اچانک ہمیں باور کرانے لگ گئے کہ دیکھو دیکھو یہ ملیحہ لودھی تو ہندوئوں کی رشتہ دار نکلی ، یہ ملک کی خیر خواہ کیسے ہو سکتی ہے ، یہ تو کشمیر بیچ کر آئے گی ۔ سادہ لوح تو وطن عزیز میں تھوک کے حساب سے ملتے ہیں لیکن معلوم تو کیجیے یہ ملیحہ لودھی کی ہندو ئوں سے رشتہ داری کو مہم بنانے میں کون کون شامل ہے ۔ روشن خیالی کے یخ بستہ آنگن میں یہ اچانک مذہب دوستی کا الائو کیسے بھڑک اٹھا ؟ ذرا سوچیے تو ، ملیحہ لودھی کی یہ رشتہ داری انہیں اب ہی کیوں یاد آئی جب وہ پاکستان کا مقدمہ پیش کرنے جا رہی تھیں ۔ کیا یہ ولیمہ کل ہوا ہے جو یہ اتنا بھائو کھائے بیٹھے ہیں؟

حکومت بھی نا معتبر ، اس کے ادارے بھی تمسخر کے نشانے پر اور اس کے منجھے ہوئے سفارت کاروں کی بھی کردار کشی ، یہ لوگ آخر چاہتے کیا ہیں اور اصل واردات کیا ہے ؟ ایک سال پہلے یہی ملیحہ لودھی ہی تو تھیں جب اقوام متحدہ نے کشمیر میں انسانی حقوق کی صورت حال پر غیر معمولی رپورٹ پیش کی تھی اور روانڈا کی طرز پر ایک انکوائری کمیشن بنانے کی سفارش کی تھی ۔ ہمارے ہاں یہ رپورٹ زیر بحث نہ آ سکی یہ الگ بات ہے ورنہ بوڑھے اور تجربہ کار سفارتکاروں کا توکہنا ہے کہ یہ رپورٹ گذشتہ پچاس سالوں میں کشمیر پر ہماری سب سے بڑی کامیابی ہے ۔ اب پاکستان کو ایک تجربہ کار سفارت کار سے محروم کرنے کی کوشش تو نہیں کی جا رہی ؟

حکومت کی غلطیاں بہت ہوں گی لیکن حکومت کشمیر کا سودا کیوں کرے گی ؟ اتنی بے اعتباری کیوں ؟ غالب امکان یہی ہے کہ ہماری کمزور معیشت اور عرب دنیا سے بھارت کے غیر معمولی معاشی روابط کو دیکھتے ہوئے مودی نے یہ ایڈونچر کر دیا ہے۔ اب حکومت نے اس سے نبٹنا ہے ۔ وہ اپنے انداز سے کوششیں کر رہی ہے۔ ان میں بہتری کی گنجائش ہو سکتی ہے لیکن حکومت پر کشمیر فروشی کا الزام عائد کر کے یہ لوگ کس کی خدمت کر رہے ہیں ؟ پاکستان کی یا دشمن کی؟ ہمیں یکسوئی اور وحدت فکر کی ضرورت ہے ۔ سازشی تھیوری ہی کی بنیاد پر فیصلے کرنے ہیں تو پھر ہر دوسرا بندہ غدار ہو گا ۔ اس بیمار سوچ کے ساتھ ہم نے دشمن کا مقابلہ تو کیا کرنا ہمیں شاید دشمن کی حاجت ہی نہ رہے۔

سلامتی کونسل میں معاملہ گیا توکہا گیا یہ ہنگامی اجلاس نہیں مشاورتی اجلاس ہے ۔ سوال یہ ہے کہ پھر کیا ہو گیا ؟ سلامتی کونسل میں بات تو پہنچی ، کیا عجب ہنگامی اجلاس بھی طلب کر لیا جائے۔ یہ بھی ہو سکتا ہے کہ ہمیں ناکامی ہو جائے اور ہمیں جنرل اسمبلی جانا پڑے ۔ ویٹو بھی ہو سکتا ہے ۔ مسعود اظہر کے لیے ویٹو ہوتا آیا ہے تو یہاں دنیا کے بھارت سے کھربوں کے مفادات بھی کسی ایک سے ویٹو کروا سکتے ہیں ۔ ہمیں اس کے لیے بھی تیار رہنا چاہیے۔ قوموں کی جدوجہد میں اتار چڑھائو آتے رہتے ہیں ۔ ہمت اور مضبوط اعصاب کے ساتھ آگے بڑھنا چاہیے ، بیمار ذہنیت کے لوگوں کے ساتھ مل کر قدم قدم پر سینہ کوبی اور اپنے ہی اداروں کو سینگوں پر لیے رکھنے سے کچھ نہیں ہو گا ۔ یہ ایک طویل جدوجہد ہے اور اس میں ہر قدم پر کامیابی نہیں ملے گی۔

ایک اعتراض یہ ہوا کہ سلامتی کونسل کا یہ اجلاس ہمارے کہنے پر نہیں چین کے کہنے پر بلایا گیا ۔ چلیں چین کے کہنے پر بلایا گیا پھر کیا فرق پڑا ۔ دوست ہوتے ہی کس لیے ہیں ۔ دل چسپ بات ہے کہ یہ وہی معترضین تھے جو کل تک دہائی دے رہے تھے کہ چین تو پاکستان سے ناراض ہو چکااور عمران خان نے سی پیک کا سودا کر لیا ۔ آج وقت پڑا تو معلوم ہوا یہ چین ہی ہے جو ساتھ کھڑا ہے۔

فوج کو طعنے دیے جا رہے ہیں ۔ وہ لبرلزجو کل تک امن کی آشا پر اچھلتے تھے اچانک نسیم حجازی کے گھوڑے کی طرح ہنہنا رہے ہیں ۔ سوال یہ ہے کہ ایک عام آدمی اس بے ہودگی کا حصہ کیوں بنے؟ کیا اس فوج نے کشمیر کے لیے اس سے قبل متعدد جنگیں نہیں لڑیں ؟ جنگ کل لڑی جا سکتی ہے تو اب بھی لڑ لی جائے گی۔اور میرا خیال ہے ایک جنگ لڑنا ہی پڑے گی ۔ لیکن جو یہ جنگیں لڑتے آئے ہیں اور جنہوں نے یہ جنگ لڑنی ہے اور جو اس وقت بھی لائن آف کنٹرول پر جانیں قربان کر رہے ہیں انہی کو سینگوں پر لیے رکھنا کہاں کی معقولیت ہے؟

جنگ کی بات ہو تو انہیں تکلیف ہوتی ہے ، امن کے وقفے کو ترجیح بنایا جائے تو یہ ایک بار پھر تکلیف سے چیخنا شروع کر دیتے ہیں ، تلخی بڑھ رہی ہو تو یہ سفارت کاری کا لیکچر دیتے ہیں ، سفارت کاری پر کام شروع ہو جائے تو یہ سینہ کوبی شروع کر دیتے ہیں کہ کبھی جنگ کی بجائے کبھی سفارت کاری سے بھی کامیابی ملی ۔ ریاست اور ریاستی اداروں پر کیچڑ اچھالتے رہنا شاید ان کے فرائض منصبی کا حصہ ہے ۔ لیکن ایک عام آدمی کو یاد رکھنا چاہیے: اندر کا دشمن باہر کے دشمن سے کم خطرناک نہیں ہوتا ۔

اسرائیل، مکڑی کے جالے سے زیادہ کمزور تحریر:صابر ابو مریم سیکرٹری جنرل فلسطین فاؤنڈیشن پاکستان
پی ایچ ڈی اسکالر، شعبہ سیاسیات جامعہ کراچی
یہ سنہ2000ء کی بات ہے کہ جب اٹھارہ سال کی مسلسل جدوجہد اور مزاحمت کے نتیجہ میں اسرائیل لبنان کی سرزمین سے اپنا قبضہ ختم کر کے فرار اختیار کر رہا تھا۔یہ فرار کسی معاہدے یا عالمی طاقتوں کی ضمانت کے نتیجہ میں ہر گز نہیں تھا بلکہ یہ فلسطین ولبنان مشترکہ جد وجہد آزادی کی جنگ لڑنے والے گوریلا مجاہدین کی مزاحمت کا ثمر تھا جو نہ صرف لبنان میں اسرائیلی قابض افواج کے خلاف جدوجہد کرتے تھے بلکہ موقع ملتے ہی سرحد کے دوسری طرف مقبوضہ فلسطین میں جا کر بھی مزاحمت کے جوہر دکھاتے تھے۔اس مزاحمت کی بہترین بات یہ تھی کہ اس میں جہاں مسلمانوں کے شیعہ و سنہ فرقہ کے نوجوان موجود تھے وہاں لبنان و فلسطین کے عیسائی اور دروز سمیت دیگر مذاہب و مسالک بھی شریک تھے جن میں لیلیٰ خالد، جارج حبش،سمیر قنطار اور بہت سے دیگر افراد تھے جنہوں نے تحریک آزادی فلسطین او رلبنان پر صہیونی افواج کے تسلط کے خلاف جدوجہد میں قربانیاں دیں، اسیر ہوئے بعد ازاں رہا ہوئے او ر پھر شہادت کے درجہ پر فائز ہوئے۔سنہ2000ء میں جب اسرائیل لبنان سے اپنا تسلط ختم کر کے اس حال میں فرار ہوا کہ اپنا سارا فوجی ساز و سامان تک جنوبی لبنان کے علاقوں میں چھوڑ گیا۔اس عظیم الشا ن فتح کا جشن مناتے ہوئے اس وقت لبنان میں اسلامی مزاحمت کی تحریک حزب اللہ کے سربراہ سید حسن نصر اللہ نے کہا تھا کہ’’خدا کی قسم! اسرائیل کا وجود مکڑی کے جالے سے بھی زیادہ کمزور ہے“۔یہ خود اسرائیل سمیت دنیا میں اسرائیل کی حامی حکومتوں کے لئے پہلا موقع تھاکہ جب دنیا کے سامنے غاصب اسرائیل کے ناقابل تسخیر ہونے کا بھرم مٹھی بھر جوانوں کی مزاحمت نے خاک میں ملا کر رکھ دیا تھا اور دنیا کو بتا رہے تھے کہ اسرائیل کا وجود مکڑی کے جالے سے زیادہ کمزور ہے۔
اسی طرح کا ایک موقع تاریخ میں سنہ2006ء میں دہرایا گیا جب اسرائیل نے اپنے دو قید کئے گئے فوجیوں کی بازیابی کے نام پر لبنان پر جنگ مسلط کر دی اور یہ جنگ امریکہ و اسرائیل کے اعلانات کے مطابق فقط ایک سے دو روز میں امریکہ اور اسرائیل کے طے کردہ مقاصد کے حصول پر ختم ہونا تھی، ان مقاصد میں سرفہرست حزب اللہ کی قید سے دو صہیونی فوجیوں کی بازیابی کے ساتھ ساتھ لبنان میں حزب اللہ کو مکمل طور پر نیست ونابود کرنا تھا تا کہ آئندہ حزب اللہ کا کوئی وجود باقی نہ رہے۔یہ جنگ امریکی واسرائیلی طے کردہ اہداف اور وقت سے کہیں آگے نکل گئی اور 33روز تک جاری رہنے کے بعد بالآخر اسرائیل خود گھٹنے ٹیکنے پر مجبور ہو گیا اور پسپائی کا فیصلہ کیا گیا یقینا اس فیصلہ میں اسرائیل کی ہزیمت کے ساتھ ساتھ امریکہ اور ان تمامشیطانی مغربی قوتو ں کی شکست تھی جو اسرائیل کی پشت پناہی میں مصروف تھیں۔ یہ وہ دوسرا موقع تھا کہ جب سید حسن نصر اللہ کی اس بات کو کہ اسرائیل کا وجود مکڑی کے جالے سے زیادہ کمزور ہے کو خود صہیونی غاصب ریاست کے ماہرین اور فوجی جرنیلوں نے ادراک کیا اور دنیا نے بھی اس صداقت کو جانچ لیا۔
اسرائیل مکڑی کے جالے سے زیادہ کمزور کی متعدد مثالیں ان واقعا ت کے بعد غزہ اور مقبوضہ فلسطین میں بھی دیکھنے کو ملتی رہی ہیں کہ مختلف اوقات میں فلسطین پر مسلط کی جانے والی یک طرف صہیونی جنگوں میں حماس کے مجاہدین کی پائیدار استقامت و مزاحمت نے نہ صرف حسن نصر اللہ کے اس قول کو صادق کر دکھایابلکہ اسرائیل کابھرم خاک میں ملا کر رکھ دیا۔
گذشتہ دنوں جنوبی لبنان کے علاقوں میں اسرائیل کے خلاف حاصل ہونے والی حزب اللہ کی فتح کے عنوان سے سالانہ تقریب کا انعقاد ہوا اور یہ وہ علاقہ تھا کہ جہاں سنہ2006ء میں گھمسان کی لڑائی ہوئی تھی اور یہاں پرمنعقدہ عالی شان تقریب سے اسلامی مزاحمت کی تحریک حزب اللہ کے سربراہ سید حسن نصر اللہ نے خطاب کیا اور آغاز میں ہی دنیا کو باور کروادیا کہ آج اس علاقہ میں کہ جہاں اسرائیل قابض ہوا کرتا تھا لوگوں کے جم غفیر کا ہونا اس بات کی واضح دلیل ہے کہ لبنان سمیت فلسطین کے لوگ اب غاصب صہیونی ریاست اسرائیل سے ڈرتے نہیں ہیں اور اب اسرائیل کا ناقابل تسخیر ہونے کا بھرم کبھی سر اٹھا نہیں پائے گا کیونکہ فلسطین ولبنان سے شام و عراق تک اسلامی مزاحمت اس قدر مضبوط اور مستحکم ہو چکی ہے کہ اسرائیل کے ساتھ کسی بھی قسم کی جنگ کو اپنی مرضی کے نتائج پر موڑ سکتی ہے۔یہ ایک نعمت الہی ہے اور ا س میں نہ تو علاقے کے کسی عرب ممالک کا کوئی کردار ہے اور نہ ہی سلامتی کونسل کی کسی قرار داد کی وجہ سے ایسا ہوا ہے۔یہ سب اسلامی مزاحمت کے فرزندوں کی قربانیوں کا نتیجہ ہے اس پرہمیں شکر ادا کرنا چاہئیے۔
سید حسن نصر اللہ نے اپنی تقریر میں بہت سے پہلوؤں پر روشنی ڈالی لیکن دو پہلو بہت اہم ہیں،پہلا یہ کہ سنہ2006ء میں ہونے والی جنگ میں اسرائیل فقط ایک دن کا حملہ کرنا چاہتا تھا اور اپنے طے کردہ اہداف کو حاصل کرنا چاہتا تھالیکن امریکہ نے اس کو اکسایا کہ جنگ کو جاری رکھا جائے۔اس کے بعد 33روز تک جنگ جاری رہنے کے بعد امریکہ اور اسرائیل کو جب اپنی شکست کا مکمل یقین ہوگیا تو یہ بات جنگ بندی کا سبب بنی،اگر وہ مزید جنگ جاری رکھتے تو ان کو تباہ کن نتائج کا سامنا کرنا پڑتا اس لئے انہوں نے جنگ روک دی۔سید حسن نصر اللہ نے کسی عرب شخصیت کا نام لئے بغیر ایک واقعہ بیان کیا اور کہا کہ ایک عرب معروف شخصیت جنگ کے زمانے میں امریکہ گئی او ر جان بولٹن سے ملاقات کی، بولٹن نے کہا کیا کرنے آئے ہو؟اس نے کہا جنگ کو روکنا ہے تو بولٹن نے جواب دیا کہ یہ جنگ جاری رہے گی حزب اللہ کو ختم کرنا ہے۔لیکن آخری دنوں میں ایک اسرائیلی نمائندے نے عرب شخصیت کو آدھی رات کو کہا کہ جنگ روکنا ہے او پھر جان بولٹن نے بھی یہی کہا۔اس عرب شخصیت نے بولٹن سے پوچھا کہ کیا حزب اللہ کوختم کر دیا گیا ہے؟جان بولٹن نے کہا نہیں! اسرائیل میں دم نہیں ہے۔
حسن نصر اللہ نے ایک مرتبہ پھر اپنی اسی بات کی طرف اشارہ کیا اور کہا جیسا کہ میں نے ماضی میں کہا تھا کہ اسرائیل کا وجود مکڑی کے جالے سے زیادہ کمزور ہے تو یہ عقیدہ مزید پختہ ہو گیا ہے۔آج تیرہ سال گزرنے کے بعدبھی اسرائیل مکڑی کے جالے سے زیادہ کمزور ہے اور یہ بات اسرائیل کے دل ودماغ میں بیٹھ چکی ہے۔آج پھر اسرائیل سے کہتا ہوں اگر کسی بھی طرح کی جنگ کرنے کی کوشش کی تو دنیا کے ٹی وی چینلز پر تمھاری تباہی کا تماشہ دکھایا جائے گا۔سید حسن نصر اللہ نے بتایا کہ غزہ ہمیشہ عزیز رہے گا اور ہم فلسطین کی حمایت اور اس کی آزادی کی جدوجہد سے ایک انچ بھی پیچھے نہیں ہٹیں گے انہوں نے حالیہ دنوں غزہ میں ایک صہیونی فوجی کو گرفتار کرنے کی کوشش کو سراہا۔
خلاصہ یہ ہے کہ حزب اللہ کے سربراہ نے سنہ2000ء میں اور پھر گذشتہ دنوں ایک ٹی وی چینل کو دئیے گئے خصوصی انٹر ویو میں اور پھر اب فتح کے جشن کی تقریب میں مسلسل اسرائیل کے وجود کو مکڑی کے جالے سے زیادہ کمزور کہاہے اور اس بات پر خود اسرائیلی فوج کے جرنل اور ماہرین اور محقق تحقیق میں ہیں اور پریشان کن حالت میں ہیں اور صہیونی فوجی جرنیلوں کا اعتراف جس میں وہ کہتے ہیں کہ حزب اللہ کی قوت اور گائیڈڈ میزائلوں کے سامنے اسرائیلی فوج انتہائی کمزور ہے۔اسی طرح ایک اور اسرائیلی جنرل نے کہا تھا کہ سارا اسرائیل حزب اللہ کے میزائلوں کے نشانے پر ہے۔پس خود صہیونی ذرائع اس تحقیق میں مصروف ہیں کہ اسرائیل کا وجود مکڑی کے جالے سے زیادہ کمزور ہے اور حقیقت یہی ہے کہ اسرائیل کا وجود مکڑی کے جالے سے زیادہ کمزور ہے ضرور ت صرف اس امر کی ہے کہ عرب دنیا کے وہ مسلمان حکمران جو امریکی وصہیونی کاسہ لیسی میں مصروف ہیں اپنی حمیت و عز ت کے دفاع او ر مظلو م ملت فلسطین کے دفاع و قبلہ اول بیت المقدس کی بازیابی کے لئے متحد ہو جائیں اور دنیا کے نقشہ سے صہیونی جرثومہ کو اکھاڑ پھینکیں جو نہ صرف فلسطین و مغربی ایشیاء کے لئے مصیبت و خطرہ ہے بلکہ پاکستان سمیت دنیا کے امن و سلامتی کے لئے سنگین خطرہ ہے۔