لٹیری دلہن نویں شادی پر پکڑی گئی

بھارتی ریاست مہاراشٹراکے ضلع بیڈ میں ایک حیران کن اور سنگین نوعیت کا فراڈ سامنے آیا ہے، جہاں جعلی شادیوں کے ذریعے لوگوں کو لوٹنے والے ایک منظم گروہ کا انکشاف ہوا ہے۔ اس گروہ کی مرکزی کردار ایک ایسی خاتون نکلی ہے جسے مقامی میڈیا نے "لٹیری دلہن” کا نام دیا ہے۔

پولیس کے مطابق یہ خاتون پہلے ہی آٹھ مختلف مردوں سے شادی کر کے انہیں مالی طور پر لوٹ چکی تھی، اور اس کا نواں شکار ضلع بیڑ کے گاؤں اومپور کا رہائشی ایک شخص بنا۔ اس پورے نیٹ ورک میں کئی ایجنٹس شامل تھے جو شادی کے خواہشمند افراد کو نشانہ بناتے اور انہیں فرضی رشتوں کے جال میں پھنسا دیتے تھے۔ متاثرہ شخص کو بھی اسی طریقے سے شادی کے جال میں لایا گیا، جس کے بعد مختلف بہانوں سے اس سے لاکھوں روپے وصول کیے گئے۔شادی کے کچھ عرصے بعد دلہن کے مشکوک رویے پر شک گہرا ہوا، جس کے بعد تحقیقات شروع کی گئیں۔ معلوم ہوا کہ یہ خاتون اس سے پہلے بھی اسی طرز کی آٹھ جعلی شادیاں کر چکی ہے اور ہر بار دولہے کو مالی نقصان پہنچا چکی ہے۔

معاملہ سامنے آنے کے بعد متاثرہ شخص نے ضلعی پولیس سپرنٹنڈنٹ سے رابطہ کیا اور باضابطہ شکایت درج کروائی۔ پولیس نے فوری کارروائی کرتے ہوئے مقدمہ درج کر لیا ہے اور پورے نیٹ ورک کی تفتیش شروع کر دی گئی ہے۔حکام کے مطابق اس گروہ کے دیگر ارکان کی تلاش جاری ہے اور امکان ہے کہ آنے والے دنوں میں مزید گرفتاریاں عمل میں آئیں گی۔