Category: جرائم و حادثات

گوجرہ ،باغی ٹی وی (نامہ نگار عبدالرحمن جٹ سے) گوجرہ میں آتشیں اسلحہ سے مسلح ڈاکوؤں کی لوٹ مار کا سلسلہ جاری رہا۔تاجر سمیت متعددافراد مال وزر سے محروم ہو گئے۔پولیس وارداتوں پر قابو پانے میں بری طرح سے ناکام ہو گئی،عوام عدم تحفظ کاشکار ہو گئے۔عوامی حلقوں نے پولیس کے اعلی حکام سے نوٹس لینے کا مطالبہ کر دیا۔

معلوم ہواہے کہ نیشنل بنک والی گلی کاتاجروصحافی شیخ محمود احمد اپنی دکان کریانہ پر موجود تھاکہ موٹر سائیکل سوار تین نامعلوم ماسک پہنے ڈاکو دکان میں گھس گئے اور تمام افراد کو اسلحہ کی نوک پر یرغمال بنا لیا اوردکان میں موجود پونے چار لاکھ روپے نقدی و موبائل مالیت70ہزارروپے چھین لئے۔علاوہ ازیں تھانہ نواں لاہور کے چک نمبر348ج ب مقبول پورکے نزدیک سیم پل پردو نامعلوم ڈاکوؤں نے راگیروں رمضان سے 10ہزارریال،11ہزارروپے نقدی،موبائل فون،محمدآصف سے پانچ ہزارروپے،ممتاز بی بی سے طلائی بالیاں اور20ہزارروپے نقدی،محمد عمر سے6ہزارروپے نقدی وقیمتی موبائل فون،ظہیر احمد سے 5ہزارروپے نقدی وموبائل فون،عمران سے 12ہزارروپے نقدی،سفیان سے ہزاروں روپے نقدی وموبائل فون اور عمر ولد محمد امین سے21ہزارورپے نقدی وموبائل فون چھین لیا۔

جبکہ چک نمبر160گ ب کے طاہر سے موٹر سائیکل پر سوار جاتے ہو ئے چک نمبر179گ ب کے قریب روک کر اس سے گن پوائنٹ پرسینکڑوں روپے نقدی وموبائل فون چھین لیا۔اور ڈاکوکامیاب وارداتوں کے بعد فرارہو گئے۔وارداتوں کی اطلاع تھانہ سٹی،صدر اور نواں لاہور پولیس کو دے دی گئی ہے تاحال کسی مقدمہ کے اندراج کی اطلاع موصول نہیں ہو سکی۔

نامعلوم چور مختلف وارداتوں میں مال وزچوری کر کے فرارہو گئے۔۔معلوم ہواہے کہ چک نمبر297ج ب کے آصف علی کے اہل خانہ کی غیر موجود گی میں نامعلوم چور گھرمیں داخل ہو گئے اور کمرے کا تالہ توڑ کرالماری سے1لاکھ 84ہزارروپے نقدی چوری کرلی۔

علاوہ ازیں شریف پورہ کے جاویدپیغانی نے اپنے سروس اسٹیشن پر 35ہزارروپے مالیت کا لال پمپ نصب کیا ہو اتھاکہ جسے نامعلوم چوروں نے چوری کر لیا۔دریں اثناچک نمبر364ج ب کا عبدالباسط اپنے موٹر سائیکل پر سوار ہو کر شاپنگ کیلئے شہر آیا اورموٹر سائیکل دکان کے باہر کھڑاکر کے اندر چلا گیا جس کی عدم موجود گی کا فائدہ اٹھاتے ہو ئے نامعلوم چور نے اس کی موٹر سائیکل چوری کر لی۔

اطلاع ملنے پر تھانہ سٹی پولیس نے نامعلوم چوروں کے خلاف الگ الگ مقدمہ درج کر کے تلاش شروع کر دی ہے۔

سیالکوٹ(نمائندہ باغی ٹی وی شاہدریاض ) خواجہ صفدر روڈ پر نامعلوم افراد نے فائرنگ کر کے تیس سالہ شخص کو قتل کر دیا۔مقتول کم سن بیٹے کے ساتھ موٹرسائیکل پر سوار تھا

سیالکوٹ کی مصروف ترین شاہراہ خواجہ صفدر روڈ پر تیس سالہ تعظیم اپنے کم سن بیٹے کے ساتھ موٹرسائیکل پر سوار تھا کہ موٹرسائیکل پر سوار تین افراد نے اسے روک کر فائرنگ کر کے قتل کر دیا اور فرار ہو گئے

پولیس نے نعش قبضہ میں لے کر پوسٹ مارٹم کے لئے ڈیڈ ہائوس منتقل کر دی ہے پولیس کا کہنا ہے کہ واقعہ دشمنی کا شاخسانہ لگتا ہے

ڈیرہ غازیخان (باغی ٹی وی )وزیر اعلی پنجاب محسن نقوی کیطرف ڈیرہ غازیخان کے شہید مزدوروں کے ورثا کیلئے مالی امداد،کمشنر ڈی جی خان ڈویژن ڈاکٹر ناصر محمود بشیر،ڈپٹی کمشنر مہر شاہد زمان لک اور ڈی پی او احمد محی الدین کی چھابری زیریں آمد،

کمشنر ڈاکٹر ناصر محمود بشیر نے شمالی وزیرستان میں شہید ہونیوالے مزدوروں کے ورثاء میں امدادی چیک تقسیم کئے۔وزیر اعلی پنجاب کیطرف سے 6شہید مزدوروں کے ورثاء کو15لاکھ روپے مالیت کےچیک دیئے گئے۔

کمشنر ڈاکٹر ناصر محمود بشیر،ڈپٹی کمشنر مہر شاہد زمان لک نے پسماندگان سے اظہار تعزیت کیا اور شہداء کی مغفرت اور بلند مراتب کے لئے فاتحہ خوانی بھی کی۔کمشنر ڈاکٹر ناصر محمود بشیر نے گفتگو کرتے ہوئے کہا کہ متاثرہ خاندانوں کے دکھ و غم میں برابر کے شریک ہیں،ہماری ہمدردیاں شمالی وزیر ستان کے شہداء کے پسماندگان کیساتھ ہیں،

انہوں نے کہا کہ ہم محنت کشوں کیساتھ ہونیوالی دہشت گردی کی مذمت کرتے ہیں، حکومت پنجاب نے اپنے شہریوں کیساتھ ہونیوالی دہشتگردی واقعہ کا نوٹس لیا ہے،ہماری ایجنسیاں اور ادارے دہشتگردوں کو کیفرِ کردار تک ضرور پہنچائیں گے۔

ڈپٹی کمشنر مہر شاہد زمان لک نے کہا کہ متاثرین کے دکھ کو اپنا دکھ سمجھتےہیں،وہ خود کو تنہا نہ سمجھیں۔ڈی پی او احمد محی الدین نے کہا عوام کی جان و مال کے تحفظ کیلئے تمام وسائل بروئے کار لائے جا
رہے ہیں۔

اوچ شریف باغی ٹی وی (نامہ نگار حبیب خان) "500 روپے فی گھر دو اور گیس کمپریسر کا آزادانہ استعمال کرو ” محکمہ سوئی گیس ملازمین نے سرکاری احکامات کی دھجیاں اڑا دیں، دونوں ہاتھوں سے کمائی مہم جاری، غریبوں کے بچے ناشتہ اور دوپہر کے کھانے کو ترس گئے، جھولیاں اٹھا کر محکمہ کو بددعائیں دینے لگے، چئیرمین سوئی سدرن گیس صورتحال کا فوری نوٹس لیں، شہری

تفصیلات کے مطابق سردی میں اضافہ ہوتے ہی جہاں سوئی گیس لوڈ شیڈنگ نے شدت پکڑ لی ہے وہیں کمپریسر مشینوں کے ذریعے گیس کھینچنے کا عمل بھی زوروں پر ہے، جبکہ سرکاری سطح پر اس ممنوعہ مجرمانہ فعل سے باز رہنے کی بار بار تشہیر کے باوجود بااثر اور پیسے والے گیس صارفین اور محکمہ کے ملازمین کے مبینہ گٹھ جوڑ نے غریبوں کے چولہے ٹھنڈے کرڈالے ہیں اور گیس کنکشن ہولڈرز کی بڑی تعداد مہنگی اور نمی سے گیلی لکڑیوں کے دھوئیں کو پھونکنے پر مجبور ہوچکے ہیں،

باوثوق ذرائع نے انکشاف کیا ہے کہ محلہ شمس باغ، محلہ گیلانی، اکبر ٹاؤن، شمس کالونی، محلہ سودھگان، محلہ خواجگان، عید گاہ روڈ، ٹینکی چوک، امیر آباد، محلہ بخاری، اختر کالونی، جمال درویش محلہ ڈوڈیاں، ریسٹ ہاؤس ایریا، ملاح محلہ، ہاتھی گیٹ بازار سمیت دیگر کئی ایریاز کی بولیاں لگا کر آفیسرز اور ملازمین ٹاسک کے طور پر کام کررہے ہیں اور ممنوعہ گیس کمپریسر پمپ کا مبینہ طور پر پانچ سو روپے فی گھرانہ کے عوض دھڑلے سے استعمال جاری کرا رکھا ہے جس کی وجہ سے قانون کی پاسداری کرنے والے شہری گیس چولہوں کا منہ تکتے رہتے ہیں اور اکثر اوقات بنا کھانا کھاۓ گھروں سے کام پر روانہ ہوجاتے ہیں،

جبکہ گیس کمپریسر پمپ لگانے والوں کے گھروں میں گیزر اور ہر وقت ہیٹرز چلتے رہتے ہیں جن کے بارے میں محکمہ کے مقامی ملازمین کو بھی مکمل انفارمیشن ہوتی ہے، شہریوں طارق، محمد اسحاق، اجمل، احمد علی و دیگر نے احتجاج کرتے ہوئے یہ بھی بتایا ہے کہ ہم سوئی گیس والوں کو شکایت بھی کر چکے ہیں لیکن کوئی ایکشن نہیں ہوا، انہوں نے مطالبہ کیا ہے کہ اس ضمن میں فی الفور آپریشن کیا جائے اور گھروں میں کمپریسر پمپ والے میٹرز اتارے جائیں اور بھاری جرمانے لگاۓ جائیں تاکہ انکی وجہ سے عام عوام گیس سے محروم نہ ہو ں اور وقت پر بچوں کو کھانا دودھ وغیرہ مل سکے،