Category: جرائم و حادثات

مظفرگڑھ(باغی ٹی وی )تھانہ بیٹ میرہزار کی حدود میں افسوسناک واقعہ زمیندار نے گھر میں کام نہ کرنے رنجش پر غریب مزدور پر تشدد کیساتھ ساتھ اس کاکان بھی کاٹ دیا

تفصیلات کے مطابق تحصیل جتوئی ضلع مظفر گڑھ کے تھانہ بیٹ میر ہزار کی حدود میں افسوسناک واقعہ پیش آیا ہے ہیڈ بکائنی کے مقامی زمینداروں میاں پرویز ڈاہا نے ساتھیوں کیساتھ مل کر ظلم کی انتہاء کر دی ہے ،غریب ہمسائے مزدور ندیم ولد نبی بخش کو بیوی نوشین بی بی کے ہمراہ مقامی زمینداروں نے گھر میں کام نہ کرنے کی رنجش پر یرغمال بناکر بیوی نوشین کو زدوکوب کیا جبکہ مزدور ندیم کو تشدد کیساتھ ساتھ کان کاٹ دیا،

ندیم شدید مضروبی کی حالت میں تحصیل ہیڈکوارٹر ہسپتال جتوئی میں منتقل کر دیا گیا ہے جس کا علاج معالجہ جاری ہے جبکہ دوسری جانب بااثر مقامی زمینداروں نے کارروائی روکنے کے لئے پولیس اور ڈاکٹروں پر دباؤ ڈالنا بھی شروع کر دیا ہے

ترجمان پولیس کے مطابق تھانہ میر ہزار کے علاقے تشدد کے واقعہ پر پولیس کارروائی، پولیس نے فوری طور 4 نامزد ملزمان کو گرفتار کر لیا، ملزمان کے خلاف سنگین دفعہ کے تحت مقدمہ درج کیا جا رہا ہے

وقوعہ کی اطلاع پر ڈی پی او سید حسنین حیدر نے نوٹس لیا تھا، ایس ڈی پی او جتوئی مقدمہ کی میرٹ پر تفتیش کی نگرانی کرینگے-

سرگودھا ،باغی ٹی وی (نامہ نگارشاہنوازجالپ)پی ٹی آئی کے سابق رکن قومی اسمبلی امجد علی خان نیازی کے ریمانڈ میں مزید دو روز کی توسیع کر دی گئی،ت

انسداد دہشتگردی سرگودھا کی عدالت کے جج طاہر ندیم سید چھٹی پر ہونے کے باعث سابق رکن قومی اسمبلی امجد علی خان نیازی کو 11 روزہ ریمانڈ پورا ہونے پر ڈسٹرکٹ اینڈ سیشن جج محمد سلیمان مغل کی عدالت میں پیش کردیا گیا،

سماعت کے دوران پولیس کی جانب سے فاضل عدالت کومزید 30 روزہ ریمانڈ کی استدعا کی گئی،امجد علی خان کی جانب سے ملک جواد مظہر دھون ایڈووکیٹ نے عدالت میں دلائل پیش کئے،جس کے بعد فاضل عدالت نے 2 روز ریمانڈ منظور کرتے ہوئے انہیں دوبارہ عدالت پیش کرنے کا حکم صادر فرما دیا،

یادر ہے کہ سابق رکن اسمبلی امجد علی خان نیازی نے متذکرہ مقدمات میں 21 نومبر کو عدالت میں پیش ہو کر سرنڈر کیا تھا۔

ننکانہ صاحب ،باغی ٹی وی( نامہ نگاراحسان اللہ ایاز)ضلعی ہیڈ کوارٹرز پنجاب ایمرجنسی سروس ریسکیو1122 ننکانہ صاحب میں ماہانہ کارکردگی کے حوالے سے اجلاس منعقد ہوا جس کی صدارت ڈسٹرکٹ ایمرجنسی آ فیسر محمد اکرم پنوار نے کی جس میں کنٹرول روم انچارج محمد نوید، ریسکیو سیفٹی آفیسرعلی عمران،اسٹیشن کوارڈینیٹر کامران علی،میڈیا کوارڈینیٹر علی اکبر اور تمام ریسکیو آفیسرزنے شرکت کی۔

اجلاس میں کنٹرول روم انچارج محمد نوید نے ڈسٹرکٹ ایمرجنسی آفیسر محمد اکرم پنوار کو بریفنگ دیتے ہوئے بتایاپنجاب ایمرجنسی سروس ریسکیو 1122ننکانہ صاحب کونومبر میں 9272کالز موصول ہوئیں جن میں 2603ایمرجنسی کالز تھیں۔

2603 موصول ہونے والی ایمرجنسیز کالز میں سے586سڑک کے حادثات،1641میڈیکل ایمرجنسیز35,آگ لگنے کے واقعات،45لڑائی جھگڑوں کے واقعات اور296دیگر نوعیت کی ایمرجنسیز تھیں مزید براں ریسکیو 1122ننکانہ صاحب نے اوسطاََ7منٹس ریسپانس ٹائم برقرار رکھتے ہوئے2603ایمرجنسیز میں 2591متاثرین کو ریسکیو کیا جن میں 701زخمیوں کو موقع پر طبی امداد دی گئی جبکہ1825متاثرین کو طبی امداد دینے کے بعد مختلف ہسپتالوں میں منتقل کر دیا گیا اور ان حادثات کے دوران65متاثرین جان سے گئے۔

اس کے علاوہ ضلعی سطح پر علاج کی سہولیات میسر نہ ہونے کیوجہ سے ڈاکٹرز نے451مریضوں کو ریفر کر دیاجنہیں ریسکیو1122ننکانہ صاحب کی پیشنٹ ٹرانسفر سروس کے ذریعے لاہور اور فیصل آباد کے ہسپتالوں میں بلا معاوضہ اور بحفاظت منتقل کیا۔

اس موقع پر ڈسٹرکٹ ایمرجنسی آفیسر محمد اکرم پنوار نے کہا حالیہ موسم سرما میں زیادہ تر حادثات گیس لیکج کے باعث پیش آتے ہیں انہوں نے عوام الناس سے اپیل کی ہے کہ گیس سے متعلقہ آلات کے استعمال میں احتیاط برتیں اوررات کو سوتے ہوئے گیس ہیٹر کو لازمی بند کریں اور گیس کے حفاظتی والو کو offکر دیں گھر میں گیس لیکج محسوس ہونے پر تمام دروازے کھول دیں، بجلی سے چلنے والے پنکھے اور لائٹ کو ہرگز نہ چلائیں وگرنہ سپارک کیوجہ سے دھماکہ ہو گا اور خطرناک نتائج کا موجب بنے گا کسی بھی ایمرجنسی کیصورت میں فوری 1122پر رابطہ کریں

قصور،باغی ٹی وی(نامہ نگار طارق نوید سندھو سے)قصور تھانہ اے ڈویژن پولیس نے موٹر سائیکل چور گینگ کے سرغنہ کو گرفتار کر لیا۔ملزم کے قبضہ سے 4 عدد چوری شدہ موٹرسائیکلیں بھی برآمد کر لی گئیں

تفصیل کے مطابق ڈی پی او قصور طارق عزیز سندھو کی ہدایات پر عمل کرتے ہوئے ڈی ایس پی سٹی سیف اللہ کی سپرویژن میں ایس ایچ او تھانہ اے ڈویژن قصورآصف جاوید خاں نے جرائم پیشہ افراد کے خلاف کارروائیوں کے دوران ایک چور گینگ کے سرغنہ صدام ولد ہدایت سکنہ نشتر کالونی لاہور کو گرفتار کرکے اس کے قبضہ سے چار عدد چوری شدہ موٹرسائیکلیں برآمد کر لی ہیں۔

ملزم صدام سابقہ متعدد مقدمات میں ریکارڈ یافتہ ہے جو قصور سے موٹرسائیکلیں چوری کرکے لاہور لے جاکر فروخت کر دیتا تھا، ملزم کے قبضہ سے چار عددچوری شدہ موٹرسائیکلیں برآمد اور مقدمات کو ٹریس کرکے حوالات جوڈیشل بھجوا دیا گیا ہے.

موٹرسائیکل چور گینگ کے سرغنہ ملزم صدام سے مزید تفتیش کی جارہی ہے. علاقہ بھر میں جرائم پیشہ افراد کے خلاف کارروائیاں جاری ہیں اور جرائم پیشہ افراد کے ساتھ کسی قسم کی رعایت نہیں برتی جائے گی۔

ننکانہ صاحب ،باغی ٹی وی (نامہ نگاراحسان اللہ ایاز)پولیس تشدد سے حوالات میں جاں بحق ہونے والے ملزم کے قتل کامقدمہ درج
تفصیل کے مطابق ننکانہ صاحب تھانہ صدر میں زیر حراست نوجوان کی ہلاکت کا معاملہ درجنوں افراد کا موٹروے ایم تھری پر دھرنا مظاہرین نے لاش رکھ کر موٹروے ایم تھری کو بلاک کر دیا

مظاہرین کے احتجاج سے موٹروے ایم تھری ٹریفک کے لیے بند ہو گیا، پولیس کے مبینہ تشدد سے جاں بحق ہونےوالے جمیل کو پولیس تھانہ صدر ننکانہ نے 14 روز قبل چوری کے شعبے میں گرفتار کیا تھا

ڈی پی او نے تشدد میں ملوث ایس ایچ او ،تھانےدار اور محرر سمیت دو کانسٹیبل معطل کر دیے ملزمان کی گرفتاری تک احتجاج جاری رہے گا

مظاہرین کے موٹروے بند کرنے سے ٹریفک کی لمبی قطاریں لگ گئی مظاہرین کا مقدمہ میں دیگر ملزمان کو گرفتار کرنے کا مطالبہ جس کے بعد پولیس نے فوری طور پر ایک تھانیدار سمیت دو کانسٹیبل کے خلاف مقدمہ درج کر لیا

ڈی ایس پی کی انصاف کی یقین دہانی پر مظاہرین نے موٹروے کھول دیا

گو جرہ،باغی ٹی وی ( نا مہ نگار عبدالرحمان جٹ سے)تیز رفتار ٹرالر کی زد میں آکر موٹر سائیکل سوار میاں بیوی جاں بحق ہو گئے۔

معلوم ہواہے کہ چک نمبر281ج ب کارانا محمد ریاض اپنی اہلیہ ثمینہ بی بی کے ہمراہ موٹر سائیکل پر سوار جھنگ سے واپس اپنے گاؤں آرہے تھے کہ تھانہ صدر گوجرہ کے علاقہ چک نمبر357ج ب جھنگ روڈ پر رفتار ٹرالر نے انہیں بری طرح سے کچل ڈالا جو موقع پر ہی شدید زخموں کی تاب نہ لاتے ہو ئے جاں بحق ہو گئے

حادثہ کی اطلاع ملتے ہی تھانہ صدر پولیس گوجرہ موقع پر؎پہنچی اور نعشیں تحویل میں لے کر فوری طور پرتحصیل ہیڈ کوارٹر ہسپتال گوجرہ منتقل کیں اور ضروری کارروائی کے بعد ورثاء کے حوالے کر دیں۔جبکہ ڈرائیورموقع سے فرارہو گیاپولیس نے ٹرالہ قبضہ میں لے کر ڈرائیور کی تلاش شروع کر دی ہے۔

اوچ شریف ،باغی ٹی وی (نامہ نگارحبیب خان )جانوروں کیلئے ناقص خوراک کی فروخت،محکمہ لائیو سٹاک کاروائی کرنے سے گریزاں
کھل بنولہ, ممنی,چوکر,گولی ونڈا میں سے اکثریت کی کوالٹی ناقص،جانور بیمار ہونے لگے
اوچ شریف شہر وگردونواح میں مختلف رنگ اور اقسام کے ناقص ونڈوں کی فروخت عروج پر پہنچ گئی ہے ناقص ونڈا کھانے سے جانور مختلف بیماریوں کے شکار ہوگے مویشی پال حضرات پریشان جبکہ محکمہ لائیو سٹاک ونڈے کی کوالٹی بہتر بنانے میں مکمل طور پر ناکام دکھائی دے رہا ہے

تفصیلات کے مطابق اوچ شریف شہر وگردونواح میں کھل بنولہ, ممنی, چوکر, مکئی کی کھل اور گولی ونڈا سمیت دیگر کئی اقسام کے ونڈے فروخت ہورہے ہیں مویشی پال حضرات نے ان میں سے زیادہ تر ونڈوں کی کوالٹی کو ناقص قرار دیتے ہوئے بتایا ہے کہ ونڈے میں مٹی,پھپھوندی لگی خشک روٹیوں کے ٹکڑے, ہسپتالوں کی استعمال شدہ روئی, سسری لگی ہوئی بدبودار گندم و دیگر مضر صحت عناصر کا استعمال کیا جارہا ہے جس سے جانور بھوک کی کمی, جگالی نہ کرنا, جسم کی چمک ماند پڑ جانا, معدے کا بند ہوجانا, تھنوں میں ناڑ کا پیدا ہوجانا, منہ سری اور ذہر باد جیسی امراض کا شکار ہورہے ہیں اس طرح نہ صرف دودھ دینے والے جانوروں کے دودھ میں کمی پیدا ہورہی ہے بلکہ ان کی شرح اموات میں بھی غیر معمولی اضافہ ہوچکا ہے

جس سے مویشی پال حضرات کا لاکھوں روپے کا نقصان ہورہا ہے جبکہ محکمہ لائیو سٹاک اس ناقص ونڈے کی روک تھام پر کوئی واضع حکمت عملی اپنانے سے قاصر ہے ضرورت اس امر کی ہے کہ غیر معیاری ونڈہ فروخت کرنے والے مافیا کی سرکوبی کی جائے