Category: جرائم و حادثات

میہڑ،باغی ٹی وی (نامہ نگارمنظورعلی جوئیہ )سندھ میں اساتذہ کی بھرتیوں میں آئی بی اے ٹیسٹ میں 33 سے 39 فیصد مارک لینے والے امیدواروں کا بھرتیوں میں دوہری پالیسی،اقربا پروری کے خلاف گھنٹہ گھر چوک سے ریلی نکال کر میہڑ پریس کلب کے باہر احتجاجی مظاہرہ ،محکمہ تعلیم اور حکومت سندھ کے خلاف شدید نعرے بازی

تفصیل کے مطابق سندھ میں اساتذہ کی بھرتیوں میں آئی بی اے ٹیسٹ میں 33 سے 39 فیصد مارک حاصل کرنے والے امیدواروں کا مطالبات کے حصول کے لیے آصف کھوسو،عامر تنیو،اشفاق چانڈیو، ذولفقار چانڈیو کی قیادت میں گھنٹہ گھر چوک سے ریلی نکال کر میہڑ پریس کلب کے باہر احتجاجی مظاہرہ کیا گیا اور شدید نعرے بازی کی گئی

اس موقع پر امیدواروں نے کہا کہ پیپلز پارٹی کی سابق حکومت نے سندھ میں اساتذہ کی بھرتیوں میں دہرا نظام متعارف کرواکر نوجوان کو نظر انداز کیا ہے اور ہارڈ ایریا کے نام پر سندھ میں اقربا پروری کی گئی ہے۔ ہم 33 سے 39 نمبر لینے والے امیدوار دوسال سے احتجاج کر رہے ہیں ہم نگران وزیر اعلی سندھ سے اپیل کرتے ہیں کہ اساتذہ کی بھرتیوں میں دوہرا معیار ختم کیا جائے۔

سرگودھا،باغی ٹی وی (نامہ نگارشاہنوازجالپ) تھانہ مڈھ رانجھا اور کوٹمومن کی حدود میں 4 افراد قتل
سرگودھا کے نواحی علاقہ کوٹمومن کے گاؤں گھلہ پور اور مٹیلہ میں چار افراد قتل کر دیا ہے . آج صبح ایک نشہ کے عادی احمد شیر ہرل نے گھلہ پور میں اپنی خالہ، خالہ زاد بھائی، اور اسکی بیوی کو قتل کرنے کے بعد مٹیلہ میں اپنے جواں سالہ چچازاد بھائی کو قتل کردیا.

تھانہ مڈھ رانجھا اور کوٹمومن کی حدود میں 4 افراد کے قتل کا واقعہ ڈی پی او سرگودھا محمد فیصل کامران، ایس پی انوسٹی گیشن سرگودھا سمیت بھاری نفری کے ہمراہ موقع پر موجود،موقعہ سے تمام شواہد اکٹھے کیے جا رہے ہیں

مقتولین میں فیصل بعمر 30 سال، عرفہ بعمر 25 سال، مقصودہ بعمر 60 سال، سرفراز شامل ہیں ،ملزمان کی تعداد کا تعین کیا جا رہا ہے،ابتدائی تحقیقات کے مطابق مقتولین کو بذریعہ اسلحہ آتشیں گھریلو رنجش پر قتل کیا گیا

ڈی پی او سرگودھا تمام شواہد اکٹھے کرنے کے عمل کی نگرانی کر رہے ہیں،ملزمان کی گرفتاری کیلئے خصوصی ٹیمیں تشکیل دی گئی ہیں

آر پی او شارق کمال صدیقی کا نوٹس،وقوعہ کی تمام پہلوؤں کو مدنظر رکھتے ہوئے تفتیش کی جائے، آر پی او شارق کمال صدیقی کامزیدکہنا تھاکہ لوگوں کی جان و مال کی حفاظت کے لیے ہر ممکن اقدامات کیے جا رہے ہیں

ڈیرہ غازیخان باغی ٹی وی( نیوز رپورٹر شاہد خان )6 ڈاکوؤں سے مقابلہ,ڈولفن فورس کے 2 جوانوں سے آرپی او کی ملاقات
تفصیلات کے مطابق ریجنل پولیس آفیسر ڈی جی خان کیپٹن (ر) سجاد حسن خان نے ضلع ڈیرہ غازی خان علاقہ تھانہ بی ڈویژن میں کھاد کی دوکان پر ڈکیتی کر کے فرار ہونے والےچھ ڈاکوؤں سے مقابلہ کرنے والے ڈولفن فورس کے جوان محمد اسامہ اور محمد سجاد سے ریجنل آفس میں خصوصی ملاقات کی۔

آر پی او نے فرائض کی انجام دہی کے دوران دلیری و جوانمردی سے چھ ڈاکوؤں کا مقابلہ کرنے پرجوانوں کی حوصلہ افزائی کی اور انہیں تعریفی سرٹیفکیٹ اور نقد انعامات سے نوازا۔

آر پی او کا کہنا تھا کہ شہریوں کے جان ومال کے تحفظ کے لیے پولیس کے جوانوں نے اپنی جانوں کی پروا کیے بغیر مثالی کارکردگی کا مظاہرہ کیا ہے۔ جوانوں کی کارکردگی اور حوصلہ قابل ستائش ہے۔ اچھی کارکردگی کا مظاہرہ کرنے والے افسران و جوان محکمہ کا قیمتی سرمایہ ہیں۔

قانون کی بالادستی کو برقرار رکھنے کے لیے جرائم پیشہ عناصر سے آہنی ہاتھوں سے نمٹیں گے۔ گزشتہ روز چھ ڈکیت علاقہ تھانہ بی ڈویژن میں راشد اینڈ زبیر کھاد ڈیلر کی دوکان پر ڈکیتی کر کے فرار ہو رہے تھے کہ گشت پر مامور ڈولفن پولیس اہلکاران سے سامنا ہونے پر ڈاکوؤں نے اندھا دھند فائرنگ کی ۔

ڈولفن پولیس کے جوانوں نے حفاظت خود اختیاری کے تحت جوابی فائرنگ کی ۔مقابلہ کے دوران ساتھی ڈاکوؤں کی فائرنگ سے ایک ڈکیت عبدالغفار لشاری زخمی ہوکرگرفتار ہوا جبکہ دیگر فرار ہونے میں کامیاب ہوگئے تھے۔

سیالکوٹ ،باغی ٹی وی( سٹی رپورٹر شاہد ریاض)سموگ ایمرجنسی,9تا 12نومبر سمارٹ لاک ڈاؤن ہوگا،حکومت پنجاب نے نوٹیفکیشن جاری کر دیا

ڈپٹی کمشنر کیپٹن (ر) شاہ میر اقبال نے کہا ہے کہ 9تا 12نومبر سمارٹ لاک ڈاؤن ہوگا۔حکومت پنجاب نے نوٹیفکیشن جاری کر دیا۔ 9تا 12نومبر سرکاری و پرائیویٹ تعلیمی ادارے بند رہیں گے ،دفاتر، مارکیٹس، شاپنگ مالز، ریسٹورنٹس، سینماہالز، جمنزیم بند رہیں گے،تمام مارکیٹں، دکانیں، شاپنگ مالزبند رہیں گے،

لاک ڈاؤن کے دوران سرکاری و پرائیویٹ ہسپتال، فارمیسی، میڈیکل سٹور کھل سکیں گے۔ ویکسی نیشن سنٹرز، پٹرول پمپس، آئل ڈپو، تندور، بیکریاں، گروسری /کریانہ سٹورزکھولنے کی اجازت ہوگی۔ ڈیریز /ملک شاپس، سویٹس شاپس، سبزی و فروٹ شاپس، چکن/میٹ شاپس کھولنے کی اجازت ہوگی۔ ای کامرس، پوسٹل، کورئیر سروسز، یوٹیلٹی سروسز (بجلی، گیس، انٹر نیٹ، سیلولر نیٹ ورکس/ٹیلی کام کھل سکیں گی۔ میونسپل سروسز، ہوٹلوں سے ٹیک اوے، میرج ہالز میں پہلے سے طے شدہ شادی کے پروگرام کی اجازت ہوگی۔

محدود نقل و حمل کے سیکٹر شہریوں کی نقل و حمل، پبلک ٹرانسپورٹ کی محدود اجازت ہوگی۔ ۔ بڑے ڈیپارٹمنٹ سٹورز صرف گروسری اور فارمیسی سیکشن کھول سکیں گے۔

سرکاری محکمہ جات ، قانون نافذ کرنیوالے اداروں کے افسران، نوٹیفائیڈ محکموں کے ملازمین کو ڈیوٹی پر جانے کی اجازت، جوڈیشل افسران، عملہ، وکلا، ہیلتھ سروسز سے متعلقہ اہلکار فرائض سرانجام دینگے۔ ضروری خدمات کے محکمے، بیمار افراد معہ دو تیمار دار، گروسری، میڈیسن خریدنے کیلئے جانیوالے افراد کو اجازت ہوگی۔

لازمی اجتماعات نماز جنازہ، کفن دفن و متعلقہ اجتماعات کی اجازت ہوگی۔ ڈپٹی کمشنر سیالکوٹ

سیالکوٹ، باغی ٹی وی( سٹی رپورٹر شاہد ریاض)پولیس کی کاروائی، ایک کروڑ تاوان کیلئے اغواء کیا گیا مغوی بحفاظت بازیاب، 6ملزمان گرفتار۔
تفصیلات کے مطابق نوید مسیح نے اطلاع دی کہ اسکے بھائی شکیل مسیح ولد صدیق مسیح قوم عیسائی سکنہ چٹا سیالکوٹ 36سال کو نامعلوم ملزمان نے اغواء کرلیا ہے اور مغوی کے موبائل فون سے ہی کال کرکے مغوی کے بھائی نوید مسیح سے ملزمان نے ایک کروڑ روپے تاوان کا مطالبہ کیا ہے ۔ اور کہا کہ تاوان نہ دینے کی صورت میں مغوی کو قتل کردیا جائے گا۔

ڈی پی او سیالکوٹ محمد حسن اقبال نے اغواء ہونے والے شہری شکیل مسیح کی فوری بازیابی کی بابت ایس پی انویسٹی گیشن جواد اسحاق کو ہدایت جاری کیں ۔ جس پر ڈی ایس پی صدر سرکل کی زیر نگرانی ایس ایچ او تھانہ مراد پور انسپکٹر محمد رزاق نے اپنی ٹیم کے ہمراہ کارروائی کرتے ہوئے اورمغوی کی بحفاظت بازیابی پولیس کے لیے ایک بڑا چیلنج تھا ۔

جائے وقوعہ سے CCTVکیمرہ جات چیک کیے گئے جو مغوی کپورووالی سے جانب کالا گھمناں بسواری موٹر سائیکل جاتا نظر آیا ۔جو جدید ٹیکنالوجی اور Human Baseانفارمیشن کے ذریعے ملزمان کا سراغ لگایا گیا اور ملزمان کو ٹریس کر کے مغوی کو بحفاظت علاقہ تھانہ کینٹ کی حدود سے بازیاب کروایا گیا اور اغواء برائے تاوان میں ملوث 6ملزمان گرفتارکرلیا

گرفتارملزمان میں قمر شہزاد مسیح ولد یعقوب مسیح قوم عیسائی سکنہ چٹا تحصیل وضلع سیالکوٹ ،سنی مسیح ولد یعقوب مسیح قوم عیسائی سکنہ چٹا تحصیل وضلع سیالکوٹ،مرکس مسیح ولد یونس مسیح قوم عیسائی سکنہ چٹا تحصیل وضلع سیالکوٹ،پطرس مسیح ولد یونس مسیح قوم عیسائی سکنہ چٹا تحصیل وضلع سیالکوٹ،شاہ زیب مسیح ولد یونس مسیح قوم عیسائی سکنہ چٹا تحصیل وضلع سیالکوٹ،سلمان مسیح ولد عمانیوال مسیح قوم عیسائی سکنہ کپوروالی تحصیل وضلع سیالکوٹ شامل ہیں

گرفتار ملزمان کے قبضہ سے وقوعہ میں استعمال ہونے والی دو عدد موٹرسائیکلیں اور ایک عدد ویگنار کار اور دو عدد پسٹل برآمد کیے جا چکے ہیں ۔ گرفتار ملزمان سے مزید تفتیش جاری ہے۔

کوئٹہ ،باغی ٹی وی (نامہ نگارزبیرخان )کوئٹہ کانگو وائرس کی وجہ سے بلوچستان کی نگراں حکومت نے ہیلتھ ایمرجنسی نافذ کر دی۔
کانگو سے کوئٹہ سمیت بلوچستان بھر میں 18 افراد جاں بحق ہو چکے ہیں، کوئٹہ میں کانگو سے متاثرہ 60 افراد سامنے آئے ہیں جن میں سے 15متاثرین کا تعلق شعبہ صحت سےہے۔

10 ڈاکٹروں سمیت 15 افراد کو علاج کے لیے کراچی منتقل کیا گیا ہے، نگران وزیر صحت ڈاکٹر امیر محمد جوگیزئی کا کہنا تھا کہ کانگو وائرس جس وارڈ سے پھیلا اسے سیل کر دیا گیا ہے۔

ان کا کہنا تھا کہ کانگو کے پھیلاؤ کا سبب وارڈ آئندہ ہفتے تک سیل رہے گا، نگران وزیر صحت بلوچستان نے مزید کہا کہ زیر علاج مریضوں میں 2 کی حالت تشویشناک ہے۔

ڈاکٹر امیر محمد جوگیزئی کا کہنا تھا کہ کوئٹہ میں دو ہفتے کے لیے مذبح خانوں پر پابندی عائد ہے۔