سرگودہا(نمائندہ باغی ٹی وی )سرگودھا میڈیکل کالج کو میڈیکل یونیورسٹی کا درجہ دیا جائے۔ میڈیکل کالج کو کسی صورت میں بھی فیصل آباد نہیں جانے دیا جائے گا۔ میڈیکل کالج کو منتقل کیا گیا تو بھرپور احتجاج اور مکمل ہڑتال کی جائے گی۔ ان خیالات کا اظہار پی ایم اے کے صدر ڈاکٹر سکندر حیات وڑائچ نے اپنے ایک بیان میں کیا۔ انہوں نے کہا کہ سرگودھا میڈیکل کالج کے قیام کیلئے ڈاکٹر کے ساتھ سول سوسائٹی نے بھرپور انداز میں کردا ادا کیا تھا اور اب اس کالج کا الگ ہسپتال بنانے کے بجائے اسکو فیصل آباد میڈیکل یونیورسٹی کے تحت کیا جارہا ہے۔ جو کسی صورت بھی قابل قبول نہیں ہے۔ انہوں نے کہا کہ یونیورسٹی آف سرگودھا کی انتظامیہ اپنی نااہلی کی سزا یہاں کے شہریوں کو دے رہی ہے۔ دس سال سے زائد عرصہ میں الگ ٹیچنگ ہسپتال نہیں بنا سکی اور اب میڈیکل کالج کو بھی ختم کرنے کی کوشش کر رہی ہے۔ ڈاکٹر سکندر حیات وڑائچ نے کہا کہ پی ایم اے اور ڈاکٹرز کمیونٹی سرگودھا میڈیکل یونیورسٹی کے قیام کے حق میں ہے اور اگر میڈیکل کالج کو یہاں سے منتقل کرنے کی کوشش کی گئی اور ہسپتال نہیں بنایا گیا تو بھرپور احتجاج کے ساتھ ساتھ مکمل ہڑتال بھی کی جائے گی۔

سرگودھا(نمائندہ باغی ٹی وی)صدر مملکت عارف علوی نے بنکنگ محتسب کے فیصلہ کی توثیق کرتے ہوئے سرگودھا یونیورسٹی کے حق میں فیصلہ دیدیا۔تفصیل کے مطابق بنکنگ محتسب نے نومبر2018 ء میں سرگودھا یونیورسٹی میں قائم نجی بنک کی برانچ کو منافع کے شیئر کی رقم یونیورسٹی خزانے میں جمع کرانے کا حکم دیا تھا اور بنکنگ محتسب کے اس حکم پر نجی بنک نے صدر پاکستان سے اپیل کی جس پر صدر پاکستان نے بھی سرگودھا یونیورسٹی کے حق میں فیصلہ دیتے ہوئے بنک کو منافع کے شیئر کی رقم فوری جمع کرانے کا حکم دیا ہے۔ یونیورسٹی آف سرگودھا نے کیمپس میں قائم نجی بنک کی برانچ کی طرف سے دی جانے والی منافع کی رقم کا کم شیئر دینے کی تین مختلف سرماریہ کاری کےمتعلق شکایت کی جس میں بتایا گیا کہ 2015ء میں سابق وائس چانسلر ڈاکٹر اکرم چوہدری کے دور میں یونیورسٹی آف سرگودھا نے بنک میں 40کروڑ کی سرمایہ کاری کی جبکہ سب سے زیادہ منافع دینے والے بنک میں رقم کی سرمایہ کاری کی گئی جوکہ 10.5فیصد تھا اور اس پر بنک نے چار کروڑ 21لاکھ15ہزار 68روپے کی بجائے 3کروڑ8لاکھ 84 ہزار3 سو 84روپے منافع ادا کیا اس طرح 1کروڑ 12لاکھ 30ہزار 6سو 84روپے کم ادا کئے گئے۔اسی طرح 27کروڑ50لاکھ کی ایک اور سرمایہ کاری پر زیادہ منافع کی شرح کے شیئر میں بنک نے 2کروڑ62لاکھ پچاس ہزار منافع کی رقم کی بجائے2کروڑ11لاکھ 25ہزار کی ادائیگی کی اور یونیورسٹی خزانہ کواس مد میں 51لاکھ 25ہزار کا نقصان اٹھانا پڑا اسی طرح2015کے دوران تیسری 12کروڑ 50لاکھ کی سرمایہ کاری کی رقم پر 88لاکھ 99ہزار تین سو 15روپے کی بجائے 82لاکھ72ہزار 6سو 2 روپے ادا کئے گئے اور یونیورسٹی خزانہ کو مجموعی طور پر ایک کروڑ69لاکھ82ہزار3سو 97 روپے منافع کی کم ادائیگی کی گئی۔یونیورسٹی آف سرگودھا کی موجودہ انتظامیہ نے معاملہ کو فوری طور پر بنکنگ محتسب کے پاس اٹھایا جس پر بنکنگ محتسب نے سماعت کے بعد نجی بینک کو یونیورسٹی آف سرگودھا کے خزانہ میں ایک کروڑ69لاکھ82ہزار3سو 97 روپے کی رقم بطور منافع اکاؤنٹ میں ادائیگی کا حکم دیا۔ یہاں یہ امر قابل ذکر ہے کہ 2015کے دوران اُس وقت کے سابق وائس چانسلر ڈاکٹر اکرم چوہدری ودیگر نے اُس وقت کی بنک انتظامیہ کے ساتھ مبینہ ملی بھگت کرکے یونیورسٹی خزانے کو نقصان پہنچایا جس کا انکشاف ہائر ایجوکیشن کمیشن کی آڈٹ رپورٹ میں کیا گیا۔یاد رہے کہ نیب لاہور نے کچھ روز قبل ہی یونیورسٹی کو پرائیویٹ سب کیمپس لاہور اور منڈی بہاؤالدین کیس میں ملزمان سے پلی بارگین کے بعد ریکوری کی مد میں 9کروڑ41لاکھ روپے کے چیک رجسٹرار کے حوالے کیے جو کہ یونیورسٹی خزانے میں جمع کرا دیئے گئے ہیں جس میں سے سب کیمپس لاہور اور منڈی بہاؤالدین کے طلبہ کو زائد فیسوں کی مد میں وصول کیے گئے 5کروڑ روپے سے زائد واپس کیے جائیں گے جبکہ دیگر ریکوریوں میں سابق پرائیویٹ سب کیمپسز گوجرانوالہ، فیصل آباد سے بھی 15لاکھ کی رقم شامل ہے جبکہ متذکرہ تین کیمپسز سے92لاکھ کی مزیدریکوری بھی متوقع ہے جو کہ سرگودھا یونیورسٹی کی موجودہ انتظامیہ کی شبانہ روز کاوشوں کا نتیجہ ہے اور اس سے یونیورسٹی خزانے کو مجموعی طور پر کروڑوں کا فائدہ ہو گا جبکہ یونیورسٹی انتظامیہ کرپٹ عناصر کی بیخ کنی اور ان کیخلاف مسلسل جاری رکھ کر ان کو کیفر کردار تک پہنچانے کا عزم کیے ہوئے ہے۔

سرگودھا۔ 29 جولائی (اے پی پی) زرعی کالج جامعہ سرگودھا کے ماہرین نے آؤٹ ریچ پروگرام کے تحت کسانوں کو شعبہ زراعت سے متعلق مختلف امور کی رہنمائی فراہم کرنے کیلئے سرگودھا کے نواحی علاقہ چک نمبر 52شمالی لڈے والا کادورہ کیا۔دورہ میں کالج کے زرعی ماہرین نے کسانوں اور زمینداروں کو مختلف فصلوں،سبزیوں،پھلداراور سایہ دار درختوں کی باقاعدہ بوائی سے لے کر کٹائی تک فصلوں کی حفاظت اورمارکیٹنگ کے حوالے سے خصوصی مشورے دیے۔ کسانوں کو جانوروں کی افزائش،گوشت اوردودھ کی پیداوار میں اضافہ کیلئے جدید تحقیق کی روشنی میں مفید مشورے اور لائحہ عمل دیا۔زررعی ماہرین نے اس موقع پر باقاعدہ فصلوں میں جا کرپودوں اور زمینوں کا معائنہ کیا۔اس موقع پر پرنسپل زرعی کالج ڈاکٹر اعجاز رسول نورکانے کہا کہ ہمارے کالج کے اساتذہ اور زرعی ماہرین کسانوں کے بچوں کو زرعی تعلیم اور کسانوں کو کاشتکاری کے جدید علم و تحقیق کے بارے میں آگہی فراہم کرتے ہیں تا کہ ملکی زرعی پیداوار میں اضافہ ہو اور ہمارا محنتی کسان خوشحال ہو۔شعبہ توسیع زراعت کے چیئر مین ڈاکٹر اعجاز اشرف نے کہا کہ ہماری زرعی ماہرین کی ٹیم ہر اس علاقہ کا با قاعدہ دورہ کرتی ہے جہاں کے افراد زراعت اور لائیو سٹاک سے وابستہ ہیں۔اس میں ہمارے نہری اور بارانی علاقے شامل ہیں۔کسانوں کے نمائندہ مہر فاروق نے کاشتکاری کے جدید طریقہ کار کے بارے میں آگاہی فراہم کرنے پر زرعی کالج کے وفد کا شکریہ ادا کیا اور نیک خواہشات کا اظہار کیا۔