اسرائیلی میڈیا نے دعویٰ کیا ہے کہ ایران نے امریکا کی جانب سے اپنی جوہری تنصیبات پر کیے گئے حملوں کے جواب میں خلیجی ممالک میں موجود امریکی فوجی اڈوں پر میزائل حملے کیے ہیں۔
رپورٹس کے مطابق ایران نے قطر، بحرین، کویت اور عراق میں قائم امریکی تنصیبات کو میزائلوں کا نشانہ بنایا، جسے تہران کی جانب سے ایک جوابی کارروائی قرار دیا جا رہا ہے۔تاحال ان حملوں کے نتیجے میں ہونے والے ممکنہ نقصانات یا جانی نقصان سے متعلق کوئی تصدیق سامنے نہیں آئی۔ ایران نے امریکی فوجی تنصیبات کو نشانہ بناتے ہوئے 7 میزائل داغے، جن میں سے 6 قطر میں موجود امریکی اڈوں جبکہ ایک عراق میں قائم امریکی تنصیب کی جانب فائر کیا گیا۔
غیر ملکی میڈیا رپورٹس کے مطابق تمام میزائلوں کو بروقت کارروائی کرتے ہوئے امریکی دفاعی نظام نے کامیابی سے تباہ کر دیا، واقعے میں کسی جانی یا مالی نقصان کی اطلاع نہیں ملی۔ ایران نکے حملوں کے بعد دارالحکومت دوحہ میں متعدد دھماکوں کی آوازیں سنی گئی ہیں، جب کہ سیکیورٹی خدشات کے باعث قطر نے فضائی ٹریفک عارضی طور پر معطل کر دی ہے۔
رائٹرز نے رپورٹ کیا ہے کہ ایک اسرائیلی عہدیدار کے مطابق ایران کی جانب سے قطر میں امریکی تنصیبات کو نشانہ بناتے ہوئے 6 بیلسٹک میزائل فائر کیے گئے۔ اس سے قبل بھی ایکسئیوس نے رپورٹ کیا تھا کہ ایران ان اہداف پر میزائل داغنے کی تیاری کر رہا ہے۔برطانوی روزنامہ ٹیلی گراف کے مطابق مغربی حکام نے اس سے قبل بتایا تھا کہ دوحہ کے نواح میں واقع العدید (Al-Udeid) بیس کو ایک ’ قابلِ یقین خطرے’ کا سامنا ہے۔
یہ بیس امریکی سینٹکام (CENTCOM) کا صدر دفتر ہے، اور برطانوی فوجی اہلکار بھی یہاں باری باری خدمات انجام دیتے ہیں، تاہم، حالیہ ہفتوں میں متعدد طیارے اس بیس سے منتقل کیے جا چکے ہیں، جیسا کہ سیٹلائٹ تصاویر سے ظاہر ہوتا ہے۔
اے ایف پی کی رپورٹ کے مطابق، خطے میں کشیدہ صورتحال کے پیش نظر قطر نے احتیاطی تدبیر کے طور پر ملک بھر میں فضائی ٹریفک عارضی طور پر معطل کر دی ہے۔ قطری وزارت خارجہ کے مطابق، یہ اقدام عوام کی سلامتی کو یقینی بنانے کے لیے کیا گیا ہے اور صورتحال پر علاقائی و بین الاقوامی شراکت داروں کے ساتھ مل کر مسلسل نظر رکھی جا رہی ہے۔
قطر میں امریکی سفارت خانے اور دیگر مغربی سفارت خانوں نے اپنے شہریوں کو گھروں سے باہر نہ نکلنے کی ہدایت کی ہے۔ دوحہ میں دھماکوں کی آوازوں کے بعد سیکیورٹی مزید سخت کر دی گئی ہے۔یاد رہے کہ ایران نے یہ کارروائی امریکی حملوں کے جواب میں اپنی جوہری تنصیبات پر ممکنہ ردعمل کے تحت کی ہے، جو خطے میں کشیدگی کو مزید بڑھا سکتی ہے۔
ایران کا ’بشارت فتح‘ آپریشن، امریکی اڈوں پر جوابی میزائل حملہ
ایرانی خبر رساں ایجنسی تسنیم کے مطابق ایران نے امریکا کی جانب سے اپنی جوہری تنصیبات پر کیے گئے حملے کے جواب میں قطر اور عراق میں موجود امریکی فوجی اڈوں کے خلاف ایک میزائل آپریشن لانچ کیا ہے، جسے ’بشارت فتح‘ کا نام دیا گیا ہے، جب کہ اس آپریشن میں ’یا ابا عبداللہ‘ کا کوڈ استعمال کیا گیا۔
ایران کی مہر نیوز ایجنسی کے مطابق ایرانی سپریم نیشنل سیکیورٹی کونسل نے کہا ہے کہ اس آپریشن میں وہی تعداد میزائلوں کی استعمال کی گئی جو امریکا نے ایران پر بمباری کے دوران استعمال کیے تھے۔بیان کے مطابق ایرانی میزائل حملوں میں جس امریکی فوجی اڈے کو نشانہ بنایا گیا، وہ قطر میں شہری آبادی اور تنصیبات سے خاصے فاصلے پر واقع تھا تاکہ شہریوں کو کسی بھی ممکنہ نقصان سے بچایا جا سکے۔
ٹرمپ نے ہنگامی سیکیورٹی اجلاس طلب کرلیا
دوسری جانب امریکی ذرائع ابلاغ کے مطابق سابق صدر ڈونلڈ ٹرمپ نے ایران کے حملے کے بعد اپنی نیشنل سیکیورٹی ٹیم کو 45 منٹ کے اندر وائٹ ہاؤس پہنچنے کا حکم دیا ہے، اور صورتحال کا جائزہ لینے کے لیے فوری اجلاس طلب کر لیا گیا ہے۔تجزیہ کاروں کے مطابق ایران کا یہ حملہ نہ صرف ایک واضح پیغام ہے بلکہ خطے میں ایک بڑی جنگ کی جانب اشارہ بھی ہو سکتا ہے۔
قطر کی ایرانی حملے کی مذمت، خودمختاری کی خلاف ورزی قرار، جواب دینے کا انتباہ
قطر نے اپنے ملک میں موجود امریکی فوجی اڈے پر ایران کے میزائل حملے کی شدید مذمت کرتے ہوئے اسے ملکی خودمختاری کی کھلی خلاف ورزی قرار دیا ہے۔
قطری حکومت نے اپنے بیان میں کہا ہے کہ دوحہ ایسے کسی بھی حملے کو برداشت نہیں کرے گا اور اپنی خودمختاری کے تحفظ کے لیے براہِ راست جواب دینے کا حق محفوظ رکھتا ہے۔بیان میں مزید کہا گیا ہے کہ قطر خطے میں امن و استحکام کا خواہاں ہے، تاہم اپنے سرزمین پر کسی بھی جارحیت کو ہرگز نظر انداز نہیں کیا جا سکتا۔
ایرانی حملے کے بعد قطر میں سیکیورٹی مزید سخت کر دی گئی ہے اور فضائی حدود پہلے ہی عارضی طور پر بند کی جا چکی ہیں۔
ایرانی حملوں کے بعد یو اے ای نے بھی فضائی حدود بند کر دی
قطر میں امریکی فوجی اڈوں پر ایرانی میزائل حملے کے بعد خطے میں کشیدگی میں مزید اضافہ ہو گیا ہے، جس کے پیش نظر متحدہ عرب امارات (یو اے ای) نے بھی اپنی فضائی حدود عارضی طور پر بند کر دی ہے۔
عالمی خبر رساں ادارے ’رائٹرز‘ نے فلائٹ ریڈار کے ڈیٹا اور ایئر ٹریفک کنٹرول کی آڈیو کے حوالے سے رپورٹ کیا ہے کہ متحدہ عرب امارات کی فضائی حدود اس وقت بند ہے اور پروازوں کے راستے متاثر ہو چکے ہیں۔رپورٹ کے مطابق فلائٹ آپریشن کی معطلی کے باعث کئی بین الاقوامی پروازیں متبادل راستوں کی جانب موڑ دی گئی ہیں، جب کہ مقامی ایئرلائنز کو بھی ہدایت دی گئی ہے کہ وہ احتیاطی تدابیر اختیار کریں۔
واٹس ایپ پر بھی کمائی کا موقع، جلد مونیٹائزیشن پروگرام متعارف کرائے جانے کا امکان
قومی اسمبلی میں جمشید دستی کی انوکھی حرکت، ایوان کے فلور پر ناک رگڑتے رہے
خطے کی کشیدگی: قطر نے فضائی حدود عارضی طور پر بند کردی
