Category: اہم خبریں

پاکستان نے بھارت کے وزیراعظم نریندر مودی کے بےبنیاد، اشتعال انگیز اور غیرذمہ دارانہ الزامات مسترد کر دیے۔

ترجمان دفتر خارجہ کی جانب سے جاری بیان میں کہا گیا ہے کہ بھارتی وزیرِاعظم کے بیانات علاقائی کشیدگی بڑھانے کی کوشش ہیں، جھوٹے الزامات اور عسکری دعوے یواین چارٹر اور عالمی قوانین کی خلاف ورزی ہیں،پاکستان عالمی دہشت گردی کے خلاف مسلسل اور مؤثر شراکت دار ہے، پاکستان کو دہشت گردی سے جوڑنے کی کوششیں گمراہ کن اور ناقابلِ قبول ہیں،بھارت کشمیریوں پر مظالم سے توجہ ہٹانے کے لیے پاکستان کو نشانہ بناتا ہے، مقبوضہ جموں و کشمیر میں بھارتی مظالم عالمی سطح پر بے نقاب ہو چکے ہیں،پاکستان نے بھارتی قیادت کو ذمہ داری اور ضبط کا مظاہرہ کرنے پر زور دیا ہے کیونکہ اشتعال انگیز بیانات سے خطے میں امن کو خطرہ لاحق ہوتا ہے۔

ترجمان کا کہنا ہے کہ پاکستان امن، استحکام اور تعمیری مکالمے کے لیے پرعزم ہے، امن کی خواہش کو کمزوری نہ سمجھا جائے، پاکستان اپنی خودمختاری کے تحفظ کی مکمل صلاحیت رکھتا ہے، کسی بھی جارحیت کا منہ توڑ جواب دیا جائے گا، عالمی برادری بھارت کے جنگی بیانیے اور نفرت انگیز رویے کا نوٹس لے۔

آرمی چیف جنرل سید عاصم منیرکو’’بیٹن آف فیلڈ مارشل‘‘دینےکی تقریب ایوان صدر میں‌ہوئی

تقریب میں صدرمملکت آصف علی زرداری،وزیراعظم شہبازشریف شریک تھے،وفاقی کابینہ کے ارکان،سروسز چیفس بھی تقریب میں موجود تھے،صدر ن لیگ نوازشریف اور چیئرمین پیپلزپارٹی بلاول بھٹو تقریب میں شریک تھے،تقریب میں گورنر پنجاب،گورنرسندھ ،گورنر خیبرپختونخوا اور گورنر بلوچستان بھی شریک تھے،وزیراعلیٰ پنجاب مریم نواز،وزیراعلیٰ سندھ مراد علی شاہ اور وزیراعلی بلوچستان سرفراز بگٹی بھی شریک تھے،وزرائے اعلیٰ مریم نواز،مراد علی شاہ بھی تقریب میں شامل تھے،تقریب میں‌ متعدد ممالک کے سفرا بھی شریک ہوئے،

صدر مملکت آصف علی زرداری،وزیراعظم شہبا زشریف نے ایوانِ صدر میں چیف آف آرمی اسٹاف، فیلڈ مارشل سید عاصم منیر، نشان امتیاز(ملٹری) کو بیٹن آف فیلڈ مارشل سے نواز ا

کورکمانڈرز کانفرنس نےکہا ہےکہ خضدار میں دہشت گرد حملہ بھارتی پشت پناہی سے چلنے والی پراکسیز کے ذریعےکیا گیا، شہدا کا خون رائیگاں نہیں جائےگا، پاکستان کے عوام کا تحفظ مسلح افواج کی اولین ترجیح رہےگا، بلوچستان اورکے پی میں متحرک بھارتی حمایت یافتہ دہشت گرد پراکسیز کی سرکوبی کے لیے تمام وسائل بروئے کار لانےکا اعادہ کیا گیا ہے۔

ڈی جی آئی ایس پی آر کے مطابق فیلڈ مارشل سید عاصم منیر کی زیر صدارت 270 ویں کور کمانڈرز کانفرنس ہوئی جس میں فورم نے اندرونی وبیرونی سلامتی کے درپیش چیلنجز اور مجموعی سکیورٹی صورتحال کا تفصیلی جائزہ لیا۔فورم نے معرکہ حق کے ایک اہم اور فیصلہ کن مرحلے آپریشن بنیان مرصوص کی کامیاب تکمیل کو سراہا۔ کانفرنس میں آپریشن بنیان مرصوص اور ضلع خضدار میں دہشت گرد حملے کے شہدا کے لیے ایصالِ ثواب کے لیے فاتحہ خوانی بھی کی گئی۔

شرکا کانفرنس کا کہنا تھا کہ خضدار میں یہ سفاکی بھارت کی پشت پناہی سے چلنے والی پراکسیز کے ذریعےکی گئی، دہشت گردی کے نتیجے میں 4 معصوم بچے اور 2 بےگناہ افراد شہید ہوئے۔ فورم نے اس عزم کا اعادہ کیا کہ شہدا کا خون رائیگاں نہیں جائےگا، پاکستان کے عوام کا تحفظ مسلح افواج کی اولین ترجیح رہےگا۔فیلڈ مارشل سید عاصم منیر نے پاکستان کے عوام کی غیرمتزلزل حمایت کو خراجِ تحسین پیش کیا اور کہا کہ پاکستان کے عوام ہماری طاقت کا سرچشمہ ہیں، بیرونی جارحیت، دہشت گردی اور انتہاپسندی کے خلاف مشترکہ جدوجہد میں عوام کے اعتماد پر پورا اترنےکے لیے پرعزم ہیں، پاکستان کے عوام ہماری طاقت کا سر چشمہ ہیں۔فورم کا کہنا تھا کہ نہتے شہریوں اور معصوم بچوں کودانستہ نشانہ بنانا انسانیت کے بنیادی اصولوں کی خلاف ورزی ہے، ایسا عمل بین الاقوامی قوانین کی صریحاً اور قابلِ مذمت خلاف ورزی ہے۔فورم نے اندرونی اور بیرونی سلامتی کے درپیش چیلنجز اور مجموعی سکیورٹی صورتحال کا تفصیلی جائزہ لیا۔فورم نے کشمیریوں کی حقِ خود ارادیت کے لیے جاری منصفانہ جدوجہد اور کشمیریوں کی سفارتی، سیاسی اور اخلاقی حمایت کے غیر متزلزل عزم کا اعادہ کیا۔

بلوچستان کے ضلع خضدار میں اسکول بس پر ہونے والے دہشت گرد حملے کے نتیجے میں ایک اور زخمی طالبہ چل بسی، جس کے بعد شہید طالبات کی تعداد چار ہو گئی ہے۔

اسپتال انتظامیہ کے مطابق، 12 سالہ طالبہ کو شدید زخمی حالت میں کوئٹہ منتقل کیا گیا تھا، جہاں وہ زخموں کی تاب نہ لاتے ہوئے دم توڑ گئی۔گزشتہ روز خضدار کے علاقے میں اسکول بس کو نشانہ بنایا گیا ،آج دم توڑنے والی طالبہ کی شناخت سحر سلیم کے نام سے ہوئی ہے جو آٹھویں جماعت کی طالبہ تھیں۔ ان کے ساتھ ساتھ تین اور طالبات اس بزدلانہ حملے میں شہید ہو چکی ہیں، یوں شہید ہونے والی طالبات کی مجموعی تعداد چار ہو چکی ہے۔

سیکیورٹی اداروں کے مطابق یہ حملہ بھارتی ایجنسیوں کی منصوبہ بندی کا شاخسانہ ہے، جسے بلوچستان میں موجود بھارتی اسپانسرڈ دہشت گرد گروہوں نے عملی جامہ پہنایا۔ذرائع کا کہنا ہے کہ بھارت، بلوچستان اور خیبرپختونخوا میں بدامنی پھیلانے کے لیے پراکسی نیٹ ورکس کا استعمال کر رہا ہے، تاکہ پاکستان کو اندرونی طور پر کمزور کیا جا سکے۔ذرائع نے مزید انکشاف کیا ہے کہ میدانِ جنگ میں مسلسل شکستوں کے بعد بھارت اب کمزور اور معصوم اہداف کو نشانہ بنانے جیسی بزدلانہ کارروائیوں پر اتر آیا ہے۔

واقعے کے بعد پورے ملک میں غم و غصے کی لہر دوڑ گئی ہے۔ سوشل میڈیا پر صارفین نے اس بزدلانہ حملے کی شدید مذمت کرتے ہوئے حکومت سے مطالبہ کیا ہے کہ دہشت گردوں اور ان کے سہولت کاروں کے خلاف فوری اور فیصلہ کن کارروائی کی جائے۔ پاکستانی قوم شہید بچیوں کو خراجِ عقیدت پیش کرتے ہوئے سوال کر رہی ہے کہ آخر کب تک معصوم جانیں دہشت گردی کی بھینٹ چڑھتی رہیں گی؟قوم مطالبہ کر رہی ہے کہ بھارت کی جانب سے پاکستان کے خلاف پراکسی جنگ کو عالمی سطح پر بے نقاب کیا جائے اور ان دہشت گردوں کو کیفرِ کردار تک پہنچایا جائے جو معصوم بچوں کو نشانہ بنا رہے ہیں۔

پاکستان نے بھارت کےجواب میں بھارتی ہائی کمیشن کے ایک اہلکار کو ناپسندیدہ شخصیت قرار دے دیا اور اسے 24 گھنٹوں کے اندر پاکستان چھوڑنے کی ہدایت کر دی۔ یہ فیصلہ بدھ کے روز کیا گیا، اور یہ اقدام اس وقت سامنے آیا جب بھارت نے پاکستانی ہائی کمیشن کے ایک اور اہلکار کو ناپسندیدہ شخصیت قرار دے کر ملک چھوڑنے کا حکم دیا تھا۔

پاکستانی وزارت خارجہ کے ترجمان کے مطابق، بھارتی ہائی کمیشن کے مذکورہ اہلکار کو ایسے اقدامات میں ملوث پایا گیا جو اس کے سفارتی استحقاق کے خلاف تھے۔ دفتر خارجہ نے یہ بھی بتایا کہ بھارت کے مذکورہ اہلکار کو پاکستان سے روانہ ہونے کے لئے 24 گھنٹے کی مہلت دی گئی ہے۔پاکستانی دفتر خارجہ نے اس فیصلے کے بارے میں بھارت کے ناظم الامور کو وزارت خارجہ طلب کر کے باضابطہ طور پر آگاہ کیا۔

پاکستان اور بھارت کے مابین اس قسم کے اقدامات پہلے بھی ہوتے رہے ہیں۔ گزشتہ ہفتے بھارت نے پاکستانی ہائی کمیشن کے ایک اہلکار کو ناپسندیدہ شخصیت قرار دے کر ملک چھوڑنے کا حکم دیا تھا۔ اس کے جواب میں پاکستان نے بھارتی سفارتی اہلکار کو بھی ناپسندیدہ شخصیت قرار دے کر پاکستان چھوڑنے کی ہدایت کی تھی۔

ترجمان پاک فوج نے کہا ہے کہ شمالی وزیرستان کے علاقے میر علی میں افسوسناک واقعے کے نتیجے میں بدقسمتی سے کچھ شہری جانوں کا ضیاع ہوا، سیکیورٹی فورسز پر بے بنیاد اور گمراہ کن الزامات سراسر جھوٹ پر مبنی ہیں، کارروائی فتنہ الخوارج نے کی،

ڈی جی آئی ایس پی آر کے مطابق 19 مئی 2025 کو شمالی وزیرستان کے عمومی علاقے میرعلی میں ایک افسوسناک واقعہ پیش آیا، جس کے نتیجے میں بعض بے گناہ شہری جاں بحق ہو گئے۔ اس سانحے کے بعد کچھ حلقوں کی جانب سے سیکیورٹی فورسز کے خلاف بے بنیاد اور گمراہ کن الزامات لگائے جا رہے ہیں، جن کا حقیقت سے کوئی تعلق نہیں۔

سیکیورٹی فورسز کے ترجمان نے ان الزامات کو سختی سے مسترد کرتے ہوئے واضح کیا ہے کہ یہ دعوے ایک منظم جھوٹ پر مبنی مہم کا حصہ ہیں، جس کا مقصد ملک کے خلاف جاری انسداد دہشت گردی کی کوششوں کو سبوتاژ کرنا اور عوام میں سیکیورٹی اداروں کے خلاف بداعتمادی پھیلانا ہے۔ترجمان کے مطابق، ان الزامات کے جواب میں فوری طور پر ایک جامع تحقیقات کا آغاز کیا گیا۔ ابتدائی تحقیقات سے یہ بات سامنے آئی ہے کہ اس بزدلانہ اور غیر انسانی حملے کے پیچھے بھارتی سرپرستی میں چلنے والی تنظیم "فتنہ الخوارج” کا ہاتھ ہے۔ یہ تنظیم نہ صرف پاکستان میں دہشت گردی کو فروغ دے رہی ہے بلکہ شہری آبادی کو ڈھال کے طور پر استعمال کر کے اپنے مکروہ عزائم کی تکمیل میں مصروف ہے۔ترجمان کا کہنا تھا کہ یہ عناصر اپنے "بھارتی آقاؤں” کے اشارے پر حرکت میں آتے ہیں اور دانستہ طور پر مقامی آبادی اور سیکیورٹی فورسز کے درمیان خلیج پیدا کرنے کی ناکام کوشش کر رہے ہیں۔ تاہم، مقامی عوام اور سیکیورٹی ادارے یکجا ہو کر دہشت گردی کے اس ناسور کو جڑ سے اکھاڑ پھینکنے کے لیے پرعزم ہیں۔

سیکیورٹی فورسز نے یقین دلایا ہے کہ اس سفاک حملے میں ملوث تمام عناصر کو انصاف کے کٹہرے میں لایا جائے گا اور ملک کے امن کو تباہ کرنے والے کسی رعایت کے مستحق نہیں۔حکام نے عوام سے اپیل کی ہے کہ وہ جھوٹی خبروں اور افواہوں سے گریز کریں اور صرف مصدقہ ذرائع سے معلومات حاصل کریں، تاکہ دشمن کی پروپیگنڈا مہم کو ناکام بنایا جا سکے۔ سیکیورٹی ادارے عوام کے تحفظ اور ملک کی سالمیت کے لیے دن رات کوشاں ہیں، اور ان کا مشن کسی صورت میں متاثر نہیں ہونے دیا جائے گا۔