Category: اہم خبریں

وزیراعظم محمد شہباز شریف کی زیر صدارت ایکسپورٹ ڈویلپمنٹ فنڈ کے حوالے سے اعلی سطح اجلاس منعقد ہوا. وزیراعظم نے ایکسپورٹ ڈویلپمنٹ فنڈ اور ایکسپورٹ امپورٹ بینک آف پاکستان (EXIM Bank of Pakistan) کی جانب سے بالخصوص چھوٹے اور درمیانے درجے کے کاروباری اداروں (SMEs) کے لیے برآمدی انشورنس کوریج فراہم کرنے کا خیرمقدم کیا.

گفتگو کرتے ہوئے وزیرِ اعظم نے کہا کہ 3 ارب روپے کا رسک پول (Risk Pool) بالخصوص چھوٹے اور درمیانے درجے کے کاروباری اداروں (SMEs) کے لیے ایکسپورٹ کریڈٹ انشورنس تک رسائی کو وسعت دیتا ہے. اس فیصلے سے کاروباری برادری کو برآمدات کا حجم بڑھانے میں سہولت ملے گی. ملک میں چھوٹے اور درمیانے درجے کے کاروباری اداروں کے فروغ کے لیے یہ انتہائی خوش آئند اقدام ہے.وزیراعظم نے ملکی معیشت کو تقویت دینے کے لیے اصلاحات پر ایکسپورٹ ڈویلپمنٹ فنڈ کی ٹیم کی پزیرائی کی. وزیرِ اعظم نے مزید کہا کہ تنظیم نو اور اصلاحات کے بعد ای ڈی ایف کی قیادت نجی شعبے کے ماہرین کے سپرد کر دی گئی ہے. ای ڈی ایف کے پاس موجود تمام سرمایہ کاروباری برادری کی سہولت کے لیے بروئے کار لایا جا رہا ہے. یہ اقدامات حکومت پاکستان کے ملکی معیشت کو فروغ دینے اور برآمدات میں اضافے کے عزم کے عکاس ہیں. ان اقدامات کے ذریعے پاکستان عالمی سطح پر سرمایہ کاری کا مرکز بنے گا. یہ تمام اقدامات برآمدات پر مبنی معیشت کو فروغ دینے کے عزم کی تکمیل کے لیے لیے جا رہے ہیں.

اجلاس میں وزیراعظم کو ای ڈی ایف کی تنظیم نو اور اصلاحات کے حوالے سے بریفنگ دی گئی. بریفنگ میں بتایا گیا کہ ای ڈی ایف کے پاس موجود 24 ارب روپے مکمل طور پر کاروباری برادری کی سہولت کے لیے سرمایہ کاری کے لیے مختص کر دیے گئے ہیں. مزید انفراسٹرکچر کی مد میں کسی قسم کا خرچہ نہیں کیا جائے گا. ای ڈی ایف میں ملکی معیشت کی ترقی اور کاروباری برادری کی سہولت کے لیے تحقیق، اسکلز ڈویلپمنٹ اور مسابقت میں اضافے کے اقدامات کیے جا رہے ہیں.پاکستان کی یورپی مارکیٹ تک رسائی کے لیے خصوصی مراعاتی تجارتی نظام (GSP Plus Status) میں توسیع کے حوالے سے اقدامات کیے جا رہے ہیں.

اجلاس میں نائب وزیراعظم و وزیر خارجہ محمد اسحاق ڈار، وفاقی وزراء محمد اورنگزیب، رانا تنویر حسین، جام کمال خان، احد خان چیمہ، وزیر مملکت برائے خزانہ بلال اظہر کیانی، وزیراعظم کے مشیر ہارون اختر، ای ڈی ایف بورڈ کے چیئرمین عمر سعید اور متعلقہ اداروں کے اعلیٰ افسران شریک تھے۔

آزاد جموں و کشمیر میں شرپسندوں کا سیکیورٹی فورسز پر حملہ، ایف سی اہلکار شہید، جوابی کارروائی میں ایک حملہ آور ہلاک

ضلع باغ میں چھترہ ٹوپی روڈ پر قائم کوپرہ پولیس چوکی اور تراڑکھل ایکسز پر شرپسندوں نے اندھا دھند فائرنگ کر دی، جس کے نتیجے میں ایف سی اہلکار رحیم گل شہید اور پاکستان رینجرز کا ایک جوان زخمی ہو گیا۔ سیکیورٹی فورسز نے فوری اور مؤثر جوابی کارروائی کرتے ہوئے ایک حملہ آور کو موقع پر ہی ہلاک کر دیا، جس کے قبضے سے کلاشنکوف، ہینڈ گرنیڈ اور دیگر اسلحہ برآمد ہوا ہے۔ قانون نافذ کرنے والے اداروں نے پورے علاقے کا محاصرہ کر کے فرار ملزمان کی تلاش شروع کر دی ہے۔

ریاست کی بالادستی اور امن و امان کے قیام کے لیے پرتشدد عناصر اور سیکیورٹی فورسز پر حملہ کرنے والوں کے خلاف بلاامتیاز سخت ترین قانونی کارروائی کی جائے گی

وفاقی وزیر داخلہ محسن نقوی نے کہا ہے کہ نئے صوبوں کا فیصلہ عوام کی مرضی سے ہوگا، یہ صرف اس صورت میں ہوگا جب عوام چاہیں گے، آپ کی رائے کی اہمیت نہیں، عوام کی رائے کی اہمیت ہے۔ اگر اس معاملے میں عوام کی مرضی ہے تو اسے ہونے دینا چاہیے

تقریب سے خطاب کرتے ہوئے محسن نقوی کا کہنا تھا کہ 79سال بعد بھی مطلوبہ نتائج حاصل نہیں کرپا رہے، نظام کو ری سیٹ کرنا ضروری ہے، ہم نے اپنے ملک کے نظام کو دیکھنا ہے اور ہمیں واضح ہونا چاہیے کہ نظام کو ری سیٹ کرنے کی بات کا اصل مقصد کیا ہے، نظام کو ری سیٹ کرنے کی بات کی مختلف تشریحات کی گئیں، بعض لوگوں نے نظام کی ری سیٹنگ کو موجودہ حکومت سے جوڑا، بعض لوگوں نے نظام کی ری سیٹنگ کو موجودہ سیاسی بندوبست سے تعبیر کیا لیکن نظام کو ری سیٹ کرنے کی بات کسی ایک حکومت یا سیاسی جماعت کی طرف اشارہ نہیں تھی،پاکستان کو بھی اپنے نظام کا جائزہ لینا ہوگا، ہمارا مقصد حکومت یا کسی سیاسی جماعت کو تبدیل کرنا نہیں، ہمارا مقصد نظام میں موجود خامیوں کو دور کرنا ہے، 79 سال میں بہت سے منصوبے بنے لیکن عوام کو مطلوبہ نتائج نہیں مل سکے، تعلیم، صحت، صاف پانی اور صفائی بنیادی سہولیات ہر شہری کو ملنی چاہئیں، نظام میں بہتری اور بہتر ڈیلیوری سے عوام کے مسائل حل ہوں گے

محسن نقوی کا مزید کہنا تھا کہ انتظامی ڈھانچہ اپنا اثر بالکل ختم کر چُکا ہے۔ اِس بات کو ہم سب کو ماننا پڑے گا ہم ناکام ہو چکے ہیں،انتظامی یونٹس تو بن کر رہیں گے۔ نہ کوئی فرد واحد نہ کوئی سیاسی جماعت اور نہ کوئی نمائندے اس کو روک سکتے ہیں،اگر پاکستانی عوام یہ چاہتی ہے کہ نئے انتظامی یونٹ بنیں تو ہر صورت بننا چاہئے، اگر عوام چاہتی ہے کہ نہ بنیں تو کوئی صورت نہیں ہونی چاہئے کہ یہ انتظامی یونٹ بنیں، آئین نے جو حق عوام کو دیا ہے، پلیز اُس رائے کا احترام کریں،میں صوبہ اسلام آباد کا سب سے بڑا حامی ہوں،نظام کو ری سیٹ کرنا ضروری ہے، اسکا مقصد حکومت یا کسی سیاسی جماعت کو تبدیل کرنا نہیں،یہ کام آئین کے اندر رہ کر کرنا ہے، اسی آئین نے کرنا ہے جس کے تحفظ کا حلف اٹھاتے ہیں، اس کو جمہوری طریقے سے سیاسی اتفاق رائے سے کرنا ہے، یہ بھی ڈسکشن ہورہی ہے کہ ہمارا نام تقسیم ہوجائے گا،اگر میں کے پی کا رہنے والا ہوں تو وہ نارتھ کے پی یا ساؤتھ کے پی ہوسکتا ہے،اگر سندھ ہے تو سندھی تو وہ پھر بھی رہے گا،سندھی کا اسٹیٹس کوئی نہیں لینے والا، کیا بلوچستان میں کوئٹہ اور خیبرپختونخوا میں پشاور جیسا کوئی اور شہر ہے؟ کیا پنجاب میں لاہور اور سندھ میں کراچی جیسا کوئی شہر ہے؟

آئی ایس پی آر کے مطابق بلوچستان میں دہشتگردوں کے خلاف سیکیورٹی فورسز کی کارروائیوں میں گزشتہ 12 سے 24 گھنٹوں کے دوران مستونگ، کوئٹہ، قلات اور سبی کے اضلاع میں 36 بھارتی سرپرستی میں دہشتگرد ہلاک کردیئے گئے۔

آئی ایس پی آر کے مطابق 4 ستمبر کو مستونگ میں دہشتگردوں کی نقل و حرکت کی اطلاع پر کارروائی کی گئی، شدید فائرنگ کے تبادلے میں 6 دہشتگرد مارے گئے جبکہ بڑی مقدار میں اسلحہ و گولہ بارود اور دیسی ساختہ بم بھی موقع پر تباہ کردیئے گئے۔

کوئٹہ کے علاقے شعبان میں انٹیلی جنس بیسڈ آپریشن کے دوران سیکیورٹی فورسز نے دہشتگردوں کے 4 ٹھکانے تلاش کیے۔ فائرنگ کے تبادلے میں 26 خوارج ہلاک ہوگئے۔

آئی ایس پی آر کے مطابق قلات میں بھی دہشتگردوں کے ٹھکانے پر کارروائی کی گئی، جہاں 2 بھارتی سرپرستی میں دہشتگرد مارے گئے۔

ضلع سبی کے علاقے بھاگ میں سیکیورٹی فورسز نے مقامی آبادی کے تعاون سے پولیس اسٹیشن پر دہشتگردوں کا حملہ ناکام بنا دیا۔ فائرنگ کے تبادلے میں مزید 2 بھارتی سرپرستی میں دہشتگرد ہلاک ہوئے۔

آئی ایس پی آر کے مطابق گزشتہ 48 سے 72 گھنٹوں کے دوران بلوچستان میں بھارتی پراکسی تنظیموں، فتنۃ الہندوستان اور فتنۃ الخوارج سے تعلق رکھنے والے مجموعی طور پر 48 دہشتگردوں کو ہلاک کیا جا چکا ہے۔

علاقے میں دیگر دہشتگردوں کی موجودگی کے خاتمے کے لیے کلیئرنس اور سرچ آپریشن جاری ہے۔ آئی ایس پی آر کا کہنا ہے کہ ’’عزمِ استحکام‘‘ کے تحت سیکیورٹی فورسز اور قانون نافذ کرنے والے اداروں کی دہشتگردی کے خلاف کارروائیاں بھرپور انداز میں جاری رہیں گی۔

وزیراعظم شہباز شریف نے کہا ہے کہ حکومت طویل المدتی معاشی تبدیلی کے لیے پُرعزم ہے اور معیشت میں پائیدار ترقی کے لیے اصلاحات کا عمل جاری رکھا جائے گا۔

وزیراعظم شہباز شریف نے ایشیائی ترقیاتی بینک (اے ڈی بی) کے جنوبی، وسطی اور مغربی ایشیا کے نائب صدر ینگ منگ یانگ کے اعزاز میں ناشتے کا اہتمام کیا، جس میں پاکستان اور اے ڈی بی کے درمیان کئی دہائیوں پر محیط ترقیاتی شراکت داری کا جائزہ لیا گیا۔ملاقات کے دوران وزیراعظم نے کہا کہ سخت مالیاتی اصلاحات کے ذریعے معاشی بحالی کا مرحلہ کامیابی سے عبور کیا گیا، جس کے نتیجے میں ملکی معیشت میں استحکام آیا اور سرمایہ کاروں کا اعتماد بحال ہوا۔ انہوں نے کہا کہ عالمی کریڈٹ ریٹنگ ایجنسیوں نے بھی پاکستان کے معاشی منظرنامے کو مستحکم قرار دیا ہے۔

شہباز شریف نے کہا کہ طویل المدتی معاشی تبدیلی کے لیے حکومت کا عزم مضبوط ہے جبکہ انتظامی رکاوٹوں کے خاتمے کے لیے مؤثر اقدامات کیے جا رہے ہیں۔وزیراعظم نے ایم ایل ون ریلوے کوریڈور کی جدید خطوط پر اپ گریڈیشن کو قومی بنیادی ڈھانچے کی اہم ترجیح قرار دیتے ہوئے کہا کہ منصوبے پر جلد عملی کام کا آغاز ضروری ہے۔ملاقات میں پاکستان اور اے ڈی بی کے درمیان تعاون کو مزید فروغ دینے، معاشی اصلاحات اور ترقیاتی منصوبوں پر بھی تبادلہ خیال کیا گیا۔

بلوچستان کے ضلع قلات میں سکیورٹی فورسز نے انٹیلیجنس بنیاد پر کارروائی کرتے ہوئے فتنہ الہندوستان کے 12 دہشتگردوں کو ہلاک کردیا۔

پاک فوج کے شعبہ تعلقات عامہ (آئی ایس پی آر) کے مطابق سکیورٹی فورسز کو علاقے میں دہشتگردوں کی موجودگی سے متعلق مصدقہ انٹیلیجنس اطلاع موصول ہوئی تھی، جس پر فوری کارروائی کرتے ہوئے دہشتگردوں کے ٹھکانے کی نشاندہی کی گئی۔آئی ایس پی آر کے مطابق نگرانی کے بعد سکیورٹی فورسز نے بروقت آپریشن کیا اور فتنہ الہندوستان کے 12 دہشتگردوں کو ہلاک کردیا۔ کارروائی کے دوران دہشتگردوں کے قبضے سے برآمد ہونے والا اسلحہ، گولہ بارود اور آئی ای ڈیز بھی موقع پر ہی تباہ کردی گئیں۔ترجمان کے مطابق علاقے میں بھارتی سرپرستی میں سرگرم دہشتگرد عناصر کے مکمل خاتمے کے لیے کلیئرنس آپریشن جاری ہے۔

آئی ایس پی آر نے اپنے بیان میں کہا کہ عزمِ استحکام کے وژن کے تحت سکیورٹی فورسز ملک سے دہشتگردی کے خاتمے کے لیے بلاامتیاز کارروائیاں جاری رکھیں گی اور دہشتگردی کے ناسور کے مکمل خاتمے تک یہ کارروائیاں جاری رہیں گی۔

کوئٹہ: بلوچستان کے ضلع کچھی کی تحصیل بھاگ ناڑی میں پولیس اور سیکیورٹی فورسز نے دہشت گردوں کا بڑا اور مربوط حملہ ناکام بنا دیا۔ کارروائی کے دوران متعدد دہشت گرد ہلاک ہوئے جبکہ علاقے میں کلیئرنس آپریشن جاری ہے۔

ذرائع کے مطابق دہشت گردوں نے صبح تقریباً 6 بجے بھاگ شہر میں پولیس اسٹیشن، نیشنل بینک اور اسسٹنٹ کمشنر آفس سمیت مختلف سرکاری تنصیبات کو بھاری ہتھیاروں، راکٹ لانچرز، مشین گنز، اسنائپرز اور دستی بموں سے نشانہ بنانے کی کوشش کی۔معاون وزیر اعلیٰ بلوچستان شاہد رند کے مطابق تقریباً 40 دہشت گرد حملے میں شریک تھے، جن کا مقصد بھاگ پولیس اسٹیشن پر قبضہ کرکے اسلحہ چھیننا تھا۔ تاہم پولیس اہلکاروں نے تقریباً دو گھنٹے تک جوانمردی سے مقابلہ کیا اور دہشت گردوں کو پسپا ہونے پر مجبور کردیا۔انہوں نے بتایا کہ پولیس اسٹیشن کی مضبوط حفاظتی دیوار نے دفاع میں اہم کردار ادا کیا جبکہ پولیس کی مؤثر جوابی کارروائی کے باعث دہشت گرد اپنے مقاصد حاصل کیے بغیر فرار ہوگئے۔

حکام کے مطابق سیکیورٹی فورسز کی کارروائی میں 3 سے 4 دہشت گرد ہلاک ہوئے ہیں، تاہم حتمی تعداد کلیئرنس آپریشن مکمل ہونے کے بعد سامنے آئے گی۔

شاہد رند کے مطابق دہشت گرد نیشنل بینک سے کوئی رقم لوٹنے میں بھی کامیاب نہیں ہوسکے۔ بینک میں نصب کی گئی آئی ای ڈی کو اسپیشل برانچ کے بم ڈسپوزل یونٹ نے بروقت کارروائی کرتے ہوئے ناکارہ بنا دیا۔حملے کے دوران دہشت گردوں کی فائرنگ سے دو پولیس اہلکار معمولی زخمی ہوئے جبکہ تین شہری بھی زخمی ہوئے، جنہیں طبی امداد فراہم کی جا رہی ہے۔

واقعے کے بعد بھاگ کے شہریوں نے پولیس اور سیکیورٹی فورسز کے ساتھ بھرپور یکجہتی کا اظہار کیا اور دہشت گردی کے خلاف نعرے لگائے۔ مقامی افراد نے پاکستان زندہ باد اور سیکیورٹی فورسز کے حق میں نعرے بھی بلند کیے۔حکام کا کہنا ہے کہ آپریشن ردالفتنہ 3 کے تحت دہشت گردوں کے خلاف کارروائیاں جاری رہیں گی اور علاقے میں امن و امان برقرار رکھنے کے لیے سیکیورٹی مزید سخت کردی گئی ہے۔ بھاگ کے عوام اور سیکیورٹی فورسز کا اتحاد دہشت گردوں کے لیے واضح پیغام ہے کہ بلوچستان میں امن کو سبوتاژ کرنے کی کوششیں کامیاب نہیں ہونے دی جائیں گی۔

وزیراعظم محمد شہبازشریف نے کہا ہے پاکستان کثیرالجہتی نظام اور عالمی امور میں اقوام متحدہ کے مؤثر کردار کی بھرپور اور مستقل حمایت جاری رکھے گا

اسلام آباد میں اقوام متحدہ کے سیکرٹری جنرل کے امیدوار ۔ اولارا ۔اوتونو ۔(OLARA OTUNNU) سے گفتگو کرتے ہوئےوزیراعظم نے اقوام متحدہ کے منشور اور مقاصد سے پاکستان کی پختہ وابستگی کا اعادہ کیا۔ انہوں نے بین الاقوامی قانون اورمعاہدوں کااحترام یقینی بنانے کی ضرورت پر بھی زور دیا۔ محمدشہبازشریف نے کہا کہ موجودہ عالمی چیلنجز سے نمٹنے کیلئےاقوام متحدہ کے پلیٹ فارم سےکثیرالجہتی تعاون مزید مضبوط بنانا ضروری ہے۔انہوں نے امید ظاہر کی کہ اقوام متحدہ کے آئندہ سیکرٹری جنرل ادارےکے تین بنیادی ستونوں ۔۔امن و سلامتی، ترقی اور انسانی حقوق پر مربوط اور متوازن انداز میں توجہ مرکوز رکھیں گے۔

اولارا اوتونو نے بین الاقوامی امن و سلامتی کے لیے جاری کوششوں میں پاکستان کی قیادت اور اہم کردار کو سراہا۔انہوں نے کہا کہ کثیرالجہتی نظام کے فروغ اور اقوام متحدہ کے تینوں بنیادی ستونوں کے لیے پاکستان کی دیرینہ اور نمایاں خدمات پر مشکور ہیں۔

پاکستان نے نارووال کے اڈہ سراج میں ہندو مندر توڑنے سے متعلق بھارتی وزارت خارجہ کے دعوے مسترد کر دیے۔

ترجمان دفتر خارجہ سجاد حیدر خان کے مطابق اڈہ سراج میں ہندو مندر کی عمارت 21 جولائی کو شدید بارشوں سے متاثر ہوئی، نارووال میں مقامی حکام نے مندر میں بارش سے ہونے والے نقصان کا جائزہ لیا اور مندر کی عمارت کی بحالی کے لیے اقدامات شروع کر دیے گئے ہیں، مندر سے متعلق بھارتی وزارت خارجہ کے دعوے جھوٹے اور سیاسی مقاصد پر مبنی ہیں، بھارت حقائق مسخ اور سستی چالوں کا سہارا لے رہا ہے، حقائق مسخ کرنے سے بھارت میں اقلیتوں پر مظالم سے توجہ نہیں ہٹ سکتی، بھارت میں اقلیتوں اور ان کی عبادت گاہوں پر حملوں کا انتہائی خراب ریکارڈ ہے، دنیا ہندوتوا نظریے کو اقلیتوں کے خلاف ہتھیار بنانے سے آگاہ ہے، بھارتی قیادت کو مسلمانوں، سکھوں اور عیسائیوں پر ظلم کا جوابدہ ٹھہرایا جائے۔

آئی ایس پی آر سمر انٹرن شپ پروگرام 2026 میں شریک طلبہ و طالبات نے پاکستان ملٹری اکیڈمی کاکول کا مطالعاتی دورہ کیا، جہاں انہوں نے کیڈٹس کی پریڈ، تربیتی سرگرمیوں اور اکیڈمی کے مختلف شعبہ جات کا مشاہدہ کیا۔

طلبہ و طالبات نے پاکستان ملٹری اکیڈمی کاکول میں کیڈٹس کی شاندار پریڈ دیکھی اور ان کی پیشہ ورانہ تربیت، نظم و ضبط اور طرزِ عمل کو سراہا۔ دورے کے دوران طلبہ کی کمانڈنٹ پاکستان ملٹری اکیڈمی کاکول سے خصوصی نشست بھی ہوئی، جس میں انہیں اکیڈمی کے تربیتی نظام اور مختلف سرگرمیوں سے متعلق آگاہ کیا گیا۔

طلبہ و طالبات نے جینٹل مین کیڈٹس اور لیڈی کیڈٹس سے براہِ راست ملاقات کی اور ان کے ساتھ تبادلۂ خیال بھی کیا۔ اس موقع پر انہوں نے اکیڈمی میں کیڈٹس کی تعلیم، تربیت، نظم و ضبط اور پیشہ ورانہ تیاری کے مختلف مراحل کا قریب سے مشاہدہ کیا۔

طلبہ و طالبات نے پاکستان ملٹری اکیڈمی کاکول کے دورے کو اپنے لیے باعثِ فخر اور اعزاز قرار دیتے ہوئے کہا کہ کیڈٹس کی تعلیم و تربیت اور پیشہ ورانہ تیاری کو قریب سے دیکھنا ان کے لیے ایک منفرد اور یادگار تجربہ رہا۔

انہوں نے دورے کو انتہائی معلوماتی قرار دیتے ہوئے پاک فوج کے افسران کی تربیت کے مختلف مراحل کا مشاہدہ کرنے کا موقع فراہم کرنے پر بھی سراہا۔