Category: اہم خبریں

پنجگور: بلوچستان کے ضلع پنجگور میں سیکیورٹی فورسز نے خفیہ اطلاعات کی بنیاد پر بروقت کارروائی کرتے ہوئے دہشت گردی کی ایک بڑی سازش ناکام بنا دی۔

سیکیورٹی ذرائع کے مطابق فورسز نے ایک کامیاب آپریشن کے دوران بھاری مقدار میں اسلحہ، دھماکہ خیز مواد اور مواصلاتی سامان برآمد کر لیا۔ کارروائی کے دوران ایک گاڑی سے چار راکٹ فیوز، متعدد دیسی ساختہ بم (آئی ای ڈیز) اور دیگر حساس مواد قبضے میں لیا گیا۔ذرائع کا کہنا ہے کہ برآمد ہونے والا دھماکہ خیز مواد کسی بڑے دہشت گرد حملے میں استعمال کیے جانے کا خدشہ تھا، تاہم سیکیورٹی فورسز کی بروقت اور مؤثر کارروائی نے دہشت گردوں کے مذموم عزائم کو ناکام بنا دیا۔

سیکیورٹی ذرائع کے مطابق آپریشن کے نتیجے میں علاقے کو ممکنہ بڑی تباہی اور جانی نقصان سے محفوظ بنا لیا گیا۔ فورسز نے برآمد شدہ مواد کو تحویل میں لے کر مزید تحقیقات کا آغاز کر دیا ہے تاکہ دہشت گرد نیٹ ورک اور اس کے سہولت کاروں تک رسائی حاصل کی جا سکے۔علاقے کے مکینوں نے سیکیورٹی فورسز کی کامیاب کارروائی کو سراہتے ہوئے اسے امن و استحکام کے لیے اہم پیش رفت قرار دیا ہے۔ ذرائع کا کہنا ہے کہ ملک دشمن عناصر کے خلاف کارروائیاں بلا تعطل جاری رہیں گی اور عوام کے جان و مال کے تحفظ کے لیے ہر ممکن اقدامات کیے جائیں گے۔

وزیراعظم شہباز شریف نے کہا ہے کہ الحمداللہ، اسلام آبادایم اویوکے تحت اعلیٰ سطح کمیٹی کاپہلااجلاس کامیابی سے اختتام پذیرہوا.مذاکرات مثبت اورتعمیری ماحول میں ہوئے،حوصلہ افزاء پیشرفت سامنے آئی.

وزیراعظم شہباز شریف کا کہنا تھا کہ60دن کے اندرحتمی معاہدے تک پہنچنے کےلئے روڈمیپ پراتفاق ہوا.روڈمیپ کے تحت سیاسی نگرانی کےلئے اعلیٰ سطح کمیٹی کاقیام عمل میں لایاگیا.روڈ میپ کے تحت مزید تکنیکی سطح کے مذاکرات کاآغاز ہوگا. امریکہ اور ایران کی قیادت کو تعمیری روابط برقرار رکھنے کے عزم پر خراجِ تحسین پیش کرتا ہوں. تاریخی عمل کو آگے بڑھانے میں تعاون کرنے والے تمام برادر اور دوست ممالک کا شکریہ ادا کرتا ہوں. برادر ملک قطر نے مذاکرات کے لیے ضروری سازگار ماحول پیدا کرنے میں نہایت اہم کردار ادا کیا، مذاکرات کی میزبانی اور سہولت کاری پر سوئس حکومت کا بھی شکریہ ادا کرتا ہوں. فیلڈ مارشل عاصم منیر کی انتھک کاوشوں نے مذاکرات کو کامیابی سے ہمکنار کیا.فیلڈمارشل کی لگن، عزم اور ثابت قدمی قابلِ ستائش ہیں. نائب وزیرِاعظم اسحاق ڈار اور ان کی ٹیم کی سفارتی کاوشوں پرمبارکباد پیش کرتا ہوں. وزیرِ داخلہ محسن نقوی کی محنت اور کردار کو سراہتا ہوں جنہوں نے مذاکرات کی کامیابی میں نمایاں حصہ ڈالا.پاکستان پائیدار امن کیلئے مکالمے اور سفارت کاری کو فروغ دینے میں اپنا مخلصانہ کردار ادا کرتا رہے گا.

ایف سی اہلکار شبیر بلوچ قتل کیس میں ماہرنگ بلوچ کو عمر قید کی سزا سنا دی گئی

بی وائے سی کے 2024 کے احتجاج میں گوادر میں ایف سی کے جوان بشیر بلوچ کو شہید کرنے اور لاش کی بے حرمتی کرنے کے کیس میں ماہرنگ لانگو اور اس کے ساتھی صبغت اللہ کو عمر قید کی سزا سنا دی گئی،نسداد دہشت گردی عدالت نے فیصلہ سنایا۔فروری 2024 میں ماہرنگ بلوچ کی قیادت میں "راجی مچھی” مارچ کے دوران گوادر میں مارچ کے شرکا نے ایف سی اہلکار شبیر بلوچ کو گھیر کر پتھراؤ کیا، جس سے ان کی موت ہو گئی۔ دو سال کی قانونی کارروائی کے بعد عدالت نے دونوں ملزمان کو قصوروار قرار دیا اور سزا سنائی

فروری 2024 کا وہ بھیانک دن جب ماہرنگ اور اس کے حواریوں نے راجی مچھی کے نام سے ایک انتشار بھرا مارچ نکالا۔ کوئٹہ سے شروع ہونے والے مارچ میں ماہرنگ نے ہر موڑ ہر راستے پر انتشار پھیلایا اور اس کے قافلے میں شامل دہشتگردوں نے سکیورٹی فورسز پر بے شمار حملے کئے۔جب اس کا مارچ گوادر کے پرامن علاقے میں پہنچا تو ماہرنگ اور صبغت اللہ شاہ کی قیادت میں حیوانیت کی ایک نئی داستان لکھی گئی۔ جب ڈیوٹی پر معمور ایف سی کے جوان شبیر بلوچ کو انتشاریوں نے گھیرا اور پتھروں کے وار سے اس کی جان لے لی۔ اس کے بعد اس کی لاش کی بے حرمتی بھی کی۔دو سال کی طویل قانونی جنگ کے بعد، جس میں ماہرنگ اور اس کے حواریوں نے ججوں کو دھمکایا اور کیس میں خلل ڈالنے کی بے پناہ کوشش کی، آج کوئٹہ کی انسداد دہشتگردی کی عدالت نے فتنہ الہندستان کی ریکروٹمنٹ ایجنٹ ماہرنگ بلوچ اور صبغت اللہ شاہ کو عمر قید کی سزا سنا دی۔

انسدادِ دہشت گردی عدالت (اے ٹی سی) نے فتنہ الہندوستان سے منسلک کالعدم تنظیموں کے سہولت کار ساجد احمد کو جرم ثابت ہونے پر 14 سال قید کی سزا سنا دی۔

سیکیورٹی فورسز نے ساجد احمد کو ضلع پنجگور میں ایک کارروائی کے دوران گرفتار کیا تھا۔ گرفتاری کے وقت اس کے قبضے سے اسلحہ اور دھماکا خیز مواد بھی برآمد ہوا تھا۔ تحقیقات کے دوران ملزم کے کالعدم تنظیموں کے ساتھ روابط اور دہشت گرد سرگرمیوں میں معاونت کے شواہد سامنے آئے۔تحقیقات کے مطابق ساجد احمد طلبہ کو کالعدم تنظیموں میں بھرتی کرنے، انہیں ریاست مخالف سرگرمیوں پر اکسانے اور دہشت گرد نیٹ ورکس کے لیے افرادی قوت فراہم کرنے میں ملوث رہا۔ سیکیورٹی اداروں نے یہ بھی انکشاف کیا کہ ملزم فتنہ الہندوستان کی پراکسی نیٹ ورکس کے ذریعے نوجوانوں کو گمراہ کرنے کی سرگرمیوں میں سرگرم تھا۔حکام کے مطابق تفتیش کے دوران ملزم کے بھارتی اسپانسرڈ نیٹ ورکس سے روابط بھی سامنے آئے۔ مزید برآں اسے ایک خودکش حملے کے لیے گاڑی تیار کرنے کا ٹاسک بھی سونپا گیا تھا، جس کے شواہد تفتیشی ریکارڈ کا حصہ بنے۔

عدالت نے جرم ثابت ہونے پر ساجد احمد کو 14 سال قید کی سزا سنائی، سیکیورٹی ذرائع کا کہنا ہے کہ دہشت گردی کے سہولت کاروں کے خلاف کارروائیاں بلاامتیاز جاری رہیں گی تاکہ امن و استحکام کو یقینی بنایا جا سکے۔

سوئٹزر لینڈ میں ایران امریکا مذاکرات کے بعد قطر اور پاکستان کا مشترکہ اعلامیہ جاری کردیا گیا۔

دفتر خارجہ کے مطابق اسلام آباد مفاہمتی یادداشت کے فریم ورک کے تحت مذاکرات کا پہلا دور مکمل ہوگیا،تکنیکی مذاکرات ہفتے کے باقی دنوں میں برگن اسٹاک ریزورٹ میں جاری رہیں گے، ایران امریکا کے درمیان تکنیکی مذاکرات فوری شروع ہوں گے،دفتر خارجہ کے مطابق فریقین نے مذاکرات کی نگرانی کے لیے اعلیٰ سطح کی کمیٹی کے قیام پر اتفاق کرلیا،حتمی معاہدے کے لیے 60 روزہ روڈمیپ منظور کرلیا گیا،آبنائے ہرمز میں تجارتی جہازوں کی آمدورفت کے لیے رابطہ لائن قائم کر دی گئی،لبنان جنگ بندی پر عملدرآمد کے لیے ڈی کنفلیکشن سیل قائم کرنے پر اتفاق کیا گیا ہے۔ ڈی کنفلیکشن سیل میں لبنان اور ثالث ممالک شامل ہوں گے،ثالث ممالک مذاکرات تعمیری ماحول میں آگے بڑھانےکے لیے کوششیں جاری رکھیں گے۔

علاوہ ازیں قطری وزارت خارجہ کے بیان میں یہ کہا گیا ہے کہ ایٹمی پروگرام، پابندیوں سےمتعلق ورکنگ گروپس تشکیل دیے جائیں گے

انسدادِ دہشتگردی عدالت نے 9 مئی کے واقعات سے متعلق ایک اور اہم مقدمے کا فیصلہ سناتے ہوئے پاکستان تحریکِ انصاف (پی ٹی آئی) کے متعدد مرکزی رہنماؤں کو 10،10 سال قید کی سزا سنا دی، جبکہ شاہ محمود قریشی کو مقدمے سے بری کر دیا گیا۔

تفصیلات کے مطابق لاہور کی انسدادِ دہشتگردی عدالت کے جج منظر علی گل نے کوٹ لکھپت جیل میں محفوظ کیا گیا فیصلہ سنایا۔ مقدمہ 9 مئی 2023 کے دوران پولیس کی گاڑیوں کو نذرِ آتش کرنے کے الزام میں درج کیا گیا تھا۔عدالت نے پی ٹی آئی کے سینئر رہنماؤں محمود الرشید، عمر چیمہ، اعجاز چوہدری اور ڈاکٹر یاسمین راشد کو جرم ثابت ہونے پر 10،10 سال قید کی سزا سنائی۔دوسری جانب عدالت نے کیس میں نامزد پی ٹی آئی کے نائب چیئرمین اور سابق وزیر خارجہ شاہ محمود قریشی کو شواہد کی بنیاد پر بری کرنے کا حکم دیا۔

دفاعی اور سفارتی محاذ پر حالیہ کامیابیوں کے بعد پاکستان عالمی سطح پر ایک اہم اور مؤثر ملک کے طور پر ابھر کر سامنے آیا ہے، جبکہ بھارت کی خارجہ پالیسی اور سفارتی حکمتِ عملی پر سوالات اٹھنے لگے ہیں۔

بین الاقوامی میڈیا رپورٹس کے مطابق معرکۂ حق میں بھارت کے خلاف دفاعی کامیابی اور ایران و امریکا کے درمیان کشیدگی کم کرنے کے لیے پاکستان کی نتیجہ خیز سفارتی کوششوں نے دنیا بھر میں پاکستان کی ساکھ کو مزید مضبوط کیا ہے۔امریکی نشریاتی ادارے فوکس نیوز کے مطابق بھارت اس وقت واشنگٹن کے ساتھ اپنے تعلقات کو دوبارہ مضبوط بنانے کی کوششوں میں مصروف ہے، جبکہ پاکستان پہلے ہی عالمی سفارتی حلقوں میں اپنی اہمیت اور اثر و رسوخ منوا چکا ہے۔ رپورٹ میں کہا گیا ہے کہ پاکستان خطے اور عالمی سطح پر ایک اہم ترین ملک بن کر ابھرا ہے۔

دوسری جانب امریکی میڈیا نے جی 7 سربراہی اجلاس کے دوران امریکی صدر اور بھارتی وزیراعظم نریندر مودی کی ملاقات کو بھی غیر معمولی قرار دیا۔ رپورٹس کے مطابق یہ ملاقات روایتی گرمجوشی کے بجائے محض مصافحے تک محدود رہی، جسے بعض مبصرین نے دونوں ممالک کے تعلقات میں سرد مہری کی علامت قرار دیا۔

بھارتی صحافیوں اور تجزیہ کاروں کا بھی کہنا ہے کہ عالمی برادری اب امن اور تنازعات کے حل کے لیے بھارت کے بجائے پاکستان کی جانب دیکھ رہی ہے، جو مودی حکومت کی خارجہ پالیسی کے لیے ایک بڑا چیلنج ہے۔بھارتی تجزیہ کاروں کے مطابق نئی دہلی اپنی کھوئی ہوئی سفارتی حیثیت بحال کرنے کی کوشش کر رہا ہے، تاہم اس مقصد کے لیے بھارت کو اپنی موجودہ پالیسیوں پر نظرثانی اور علاقائی معاملات میں زیادہ متوازن حکمتِ عملی اپنانے کی ضرورت ہوگی۔ماہرین کا کہنا ہے کہ پاکستان کی حالیہ سفارتی سرگرمیوں اور عالمی سطح پر بڑھتے ہوئے کردار نے نہ صرف خطے میں اس کی اہمیت میں اضافہ کیا ہے بلکہ اسے بین الاقوامی امن و استحکام کے لیے ایک مؤثر شراکت دار کے طور پر بھی نمایاں کیا ہے۔