Category: اہم خبریں

وزارت اطلاعات ونشریات نے کہا ہے کہ افغان حکومت کی جانب سے کے پی اوربلوچستان میں مبینہ داعش کیمپس کو ڈرونز سےنشانہ بنانےکا پروپیگنڈا سامنے آیا ہے۔

وزارت اطلاعات کے مطابق افغان طالبان حکومت اپنے پروپیگنڈا ذرائع اور سرکاری بیانات کے ذریعے دعویٰ کررہی ہے اور یہ دعویٰ ہمیشہ کی طرح غلط ہے۔وزارت کے مطابق داعش سمیت درجنوں دہشتگرد تنظیموں کےکیمپس افغان حکومت کے زیرِکنٹرول علاقوں میں ہیں، ان کیمپس سے دہشتگرد تنظیموں کو چلایا اور معاونت فراہم کی جاتی ہے، اپنی سرپرستی میں دہشتگردی کو چھپانے کے لیے طالبان حکومت جھوٹے گمراہ کن بیانات دیتی ہے۔وزارت اطلاعات کے مطابق طالبان حکومت کا ایک کم درجےکا ڈرون شِنکو خیبر کےقریب پاکستانی فضائی حدود میں داخل ہوا، اسےفوری شناخت کرکے پاک فضائیہ کے چوکنا فضائی دفاعی نظام نے کامیابی سے ناکارہ بنا دیا، سچ ہمیشہ جھوٹ پر غالب آتا ہے۔

قومی اسمبلی کا اجلاس سپیکر قومی اسمبلی ایاز صادق کی زیر صدارت ہوا

اجلاس میں وزیراعظم شہباز شریف سمیت دیگر اراکین اسمبلی شریک ہوئے،اجلاس میں بجٹ پر بحث ہوئی،اسپیکر ایاز صادق نے کہا کہ جناب وزیراعظم ایران امریکہ معاہدے کی دستاویزات پر بطور ثالث دستخط کرکے آپ نے ہمارے اور اس ایوان کے سر فخر سے بلند کردئیے ہیں ۔سپیکر قومی اسمبلی سردار ایاز صادق نےوزیر اعظم شہباز شریف،فیلڈ مارشل سید عاصم منیر اور وزیر خارجہ اسحاق ڈار کو خراج تحسین پیش کیا،

وزیراعظم نے ایوان میں اظہار خیال کرتے ہوئے کہا کہ عالمی منڈی میں تیل کی قیمتوں میں کمی ہو رہی ہے آج جمعہ ہے اور اس مبارک دن سے ہم پیٹرولیم مصنوعات کی قیمتوں میں خاطر خواہ کمی کرنے جا رہے ہیں۔جو وعدہ کیا تھا وہ پورا کر رہے ہیں،تیل کی قیمتیں تیزی سے نیچے آ رہی ہیں، مزید کمی آئے گی۔ 128 ارب روپے منہگائی سے بچانے پر خرچ کیے۔ ہم نے تیل کی آج ہفتہ وار قیمتوں کا اعلان کرنا ہے، تیل کی قیمتوں میں خاطر خواہ کمی کی جائے گی۔ جنگ بندی سے خطہ معاشی خوشحالی کا دور آئے گا۔ آج ساری دنیا میں پاکستان کا نام عزت و وقار سے گونج رہا ہے، دنیا کے ہر خطے میں پاکستان کا وقار بلند ہوا ہے۔ کل شام ایران کے صدر سے بات ہوئی، ایران کے صدر نے بار بار پاکستان کا شکریہ ادا کیا، انہوں نے کہا کہ پاکستان آکر وہاں کے عوام کا شکریہ ادا کرونگا۔

وزیراعظم شہباز شریف کا کہنا تھا کہ فیلڈ مارشل عاصم منیر نے قیام امن کیلئے انتھک محنت کی، پاکستان کی کامیابی پر متفقہ قرارداد منظور ہونی چاہیے۔ ہمارے سیاسی اختلافات اپنی جگہ قومی وحدت کے لیے ایک ہیں امن کے قیام میں سب سے زیادہ کلیدی کردار فیلڈ مارشل عاصم منیر کا ہے نائب وزیراعظم نے بھی اس کارِخیر میں اپنا بھر پور حصہ ڈالا۔محسن نقوی نے پورا کردار ادا کیا۔

وزیراعظم شہباز شریف کا کہنا تھا کہ3 اور 4 جولائی کو سپریم لیڈرعلی خامنہ ای کی آخری رسومات ادا کی جائیں گی، ایران کے صدر نے ہمیں اس میں شرکت کی دعوت دی، میں نے کہا کہ یہ ہمارا فرض ہے اور پاکستان کا وفد وہاں موجود ہوگا، ہم دو ایسے بھائی ہیں جو آئندہ آنے والے وقتوں میں انتہائی قربت کے ساتھ تعاون کریں گے۔

ایران امریکہ امن معاہدہ ناکام بنانے کیلئے یہود وہنود کا گٹھ جوڑپھرسامنے آگیا

بھارت اور اسرائیل پاکستان کی دنیا کو جنگ کے شعلوں سے بچانے کی کوششوں کو ناکام بنانے کے لیے سرگرم ہیں،بھارت میں تعینات اسرائیلی سفیر کی حالیہ گفتگو نے بھارت اوراسرائیل کے مذموم عزائم کو بے نقاب کردیا،اسرائیلی سفیر کا کہنا ہے کہ پاکستان ہمارا دوست نہیں ہے،ہم اسے کسی مثبت مذاکراتی فریق کے طور پرنہیں دیکھتے، ہم یہ دیکھنا چاہتے ہیں کہ دوسرے ممالک آگے بڑھیں، نہ کہ پاکستان جیسا کوئی ملک، ہم پاکستان کوان ممالک میں شمار نہیں کرتے جنہیں ہم اس عمل کا حصہ بنانا چاہتے ہیں،

ماہرین کا کہناہے کہ پاکستان نے دونوں ممالک کے درمیان پیغام رسانی میں مرکزی کردارادا کیا اورانہیں مذاکرات کی میزپرلے کرآیا،پاکستان کی سول وعسکری قیادت نے شاندارسفارت کاری سے دنیا کو تباہ کن جنگ سے بچایا جوبھارت اوراسرائیل کو ہضم نہیں ہورہا،

ایران کے سپریم لیڈر مجتبیٰ خامنہ ای نے امریکا اور ایران کے درمیان جنگ کے خاتمے کے لیے طے پانے والی مفاہمتی یادداشت کے حوالے سے اہم پیغام جاری کرتے ہوئے کہا ہے کہ اس معاہدے کے بارے میں ان کا ذاتی نقطۂ نظر مختلف تھا، تاہم صدر مسعود پزشکیان اور سپریم نیشنل سکیورٹی کونسل کے اتفاقِ رائے کے بعد انہوں نے اس کی منظوری دی۔

اپنے بیان میں مجتبیٰ خامنہ ای نے کہا کہ مستقبل میں امریکا کے ساتھ انفرادی سطح پر مذاکرات کا سلسلہ جاری رہ سکتا ہے، لیکن اس کا ہرگز یہ مطلب نہیں کہ ایران نے دشمن کے مؤقف یا مطالبات کو قبول کر لیا ہے۔ انہوں نے واضح کیا کہ اگر امریکی فریق غیر معمولی یا حد سے زیادہ مطالبات پیش کرے گا تو ایران انہیں تسلیم نہیں کرے گا۔ایرانی سپریم لیڈر کا کہنا تھا کہ صدر پزشکیان اور دیگر اعلیٰ حکام نے انہیں یقین دہانی کرائی ہے کہ ایرانی قوم کے حقوق، قومی مفادات اور مزاحمتی محاذ کے تحفظ کی ذمہ داری پوری طرح نبھائی جائے گی۔ ان یقین دہانیوں کے بعد ہی انہوں نے مفاہمتی یادداشت پر دستخط کی اجازت دی۔

دوسری جانب ایرانی صدر مسعود پزشکیان اور وزیراعظم پاکستان کے درمیان بھی رابطہ ہوا، جس میں وزیراعظم نے ایرانی صدر کو تاریخی امن دستاویز پر دستخط کرنے پر مبارک باد دی اور خطے میں امن و استحکام کے لیے اس پیش رفت کو خوش آئند قرار دیا۔

دعوتِ اسلامی کے وفد نے رہنما دعوتِ اسلامی رضوان عطاری کی قیادت میں سینئر صحافی اور اینکر پرسن مبشر لقمان کی لندن کے ایک مقامی ہسپتال میں عیادت کی اور ان کی جلد صحتیابی کے لیے خصوصی دعا کی۔

دعوت اسلامی کے رہنمارضوان عطاری کی سربراہی میں دعوت اسلامی کا وفد ہسپتال پہنچا جہاں انہوں نے مبشر لقمان کی خیریت دریافت کی اور ان کی صحت کے حوالے سے نیک تمناؤں کا اظہار کیا۔اس موقع پر گفتگو کرتے ہوئے رضوان عطاری نے کہا کہ بیماروں کی عیادت کرنا اور ان کی خیریت دریافت کرنا سنتِ نبوی ﷺ اور باعثِ اجر و ثواب عمل ہے۔ انہوں نے بتایا کہ ملاقات کے دوران مختلف امور پر مفید تبادلۂ خیال ہوا اور مبشر لقمان کو برطانیہ میں دعوتِ اسلامی کی دینی، تعلیمی اور فلاحی سرگرمیوں کے بارے میں آگاہ کیا گیا۔رضوان عطاری کے مطابق مبشر لقمان نے دنیا بھر میں دعوتِ اسلامی کی خدمات کو قابلِ ستائش قرار دیتے ہوئے ان کی تعریف کی۔ وفد نے مبشر لقمان کی مکمل اور جلد صحتیابی کے لیے دعا بھی کی۔ سینئر صحافی و اینکر پرسن مبشر لقمان نے وفد کی آمد پر شکریہ ادا کرتے ہوئے دعوتِ اسلامی کی دینی اور فلاحی خدمات کو سراہا۔

واضح رہے کہ مبشر لقمان لندن پہنچنے کے بعد اگلے روز علیل ہو گئے اور ابھی وہ مقامی ہسپتال میں زیر علاج ہیں، گزشتہ روز ایک ویڈیو پیٍغام میں انہوں نے صحت کے لئے دعائیں کرنے والے احباب کا شکریہ ادا کیا ہے.

پیپلز پارٹی چیئرمین بلاول بھٹو نے قومی اسمبلی میں خطاب کرتے ہوئے کہا ہے کہ آج دنیا جب امن کی طرف بڑھ رہی ہے تو پاکستان کو ترقی کی طرف بڑھنا ہوگا۔ فیلڈ مارشل سید عاصم مُنیر کی خدمات نے پاکستان کا سر فخر سے بلند کر دیا،

بلاول زرداری کا کہنا تھا کہ ہمارا خطہ مکمل طور پر پرسکون نہیں ہوا۔ امریکہ اور ایران کے معاہدے کےباوجود ایسے عناصر موجود ہیں جو بدامنی پھیلا رہے ہیں۔ بیرونی قوتیں دہشتگردی کو سپورٹ کرکے پاکستان کو نقصان پہنچا رہے ہیں۔ وفاق نے صوبوں سے مل کر فیصلہ کیا ہے کہ مل کر حالات کا مقابلہ کیا جائے گا۔ آئین صوبوں کو اختیار دیتا ہے کہ وہ وفاق کو گرانٹ دے۔ مشکلات کا مقابلہ کرنے کے لیے ہم نے اصولی فیصلہ کیا ہے۔2010کے سیلاب میں پٹرولیم لیوی متعارف کرائی گئی ،پٹرولیم لیوی سیلاب زدگان کی مدد کے لئے لاگو کی گئی ،2010سےآج تک صوبوں کو پٹرولیم لیوی سے حصہ نہیں دیا جارہا،18 ویں ترمیم کے خاتمے کے حوالے سے بہت سی افواہیں گردش کر رہی تھیں،بینظیر انکم سپورٹ کے خاتمے کے حوالے سے بھی باتیں ہوئیں ،میں وزیر اعظم، نائب وزیر اعظم اور وزیر خزانہ کا شکر گزار ہوں،ہم نے سیاسی اتفاق رائے سے جمہوری حل نکالا ،حکومت کے ساتھ طے کیا کہ قومی دفاع کیلئے اپنا حصہ ڈالیں گے ،قومی مفاد میں سب کو متحد ہو کر کام کرنا پڑے گا پھر سب مسئلے حل ہو جائیں گے

بلاول زرداری کا مزید کہنا تھا کہ وفاقی حکومت کو اور صوبائی حکومتوں کو ملکر کام کرنا چاہئے،ایسا منصوبہ سامنے آنا چاہئے جو لانگ ٹرم ہو تا کہ ملک میں ترقی لے کر آئیں، پاکستان کی معیشت ترقی کرے،جس طرح بینظیر انکم سپورٹ پروگرام کو ٹارگٹ کیا گیا یہ افسوسناک اور شرمناک ہے،بینظیر انکم سپورٹ پروگرام کو عالمی دنیا مانتی ہے، آئی ایم ایف ،ورلڈ بینک مانتے ہیں کہ یہ ادارہ کام کر رہا ہے اور کامیاب منصوبہ ہے،یہ اس منصوبے کا فنڈ کم کرنے یا ختم کرنے کی بات نہیں کرتے،پاکستان میں غربت کا مقابلہ کرنا ہے تو بینظیر انکم سپورٹ پروگرام کو ختم نہیں بلکہ بڑھانا چاہئے،بینظیر انکم سپورٹ پروگرام نے لاکھوں گھرانوں کی مدد کی ہے، ماؤں، بچوں کو سہارا دیا،

محدود دفاعی بجٹ کے باوجود پاکستان نے معرکۂ حق میں عسکری برتری اور پیشہ ورانہ مہارت کا لوہا منوایا

بڑے دفاعی بجٹ اور اخراجات کے باوجود آپریشن سندور میں پاکستان کے ہاتھوں بدترین شکست نے بھارت کو عالمی سطح پر رسوائی کا شکار کر دیا ،عالمی تحقیقاتی ادارہ سٹاک ہوم انٹرنیشنل پیس ریسرچ انسٹیٹیوٹ (SIPRI) کے مطابق؛سال 2025 میں بھارت دنیا کا پانچواں بڑا دفاعی اخراجات کرنے والا ملک رہا،2025 میں بھارت کے فوجی اخراجات 8.9 فیصد اضافے کے بعد 92.1 ارب ڈالر تک پہنچ گئے،بھارت سے جنگ کے باوجود 2025 میں پاکستان کے فوجی اخراجات 11 فیصد اضافے کے بعد صرف 11.9 ارب ڈالر رہے،بھارتی حکام کے مطابق؛ بھارت نے 27-2026 میں دفاعی بجٹ کو تقریباً 15 فیصد اضافہ کیساتھ 80 ارب ڈالر(7.85 لاکھ کروڑ روپے) تک مختص کر دیا

بھارت جیسے دشمن کے باوجود بھی حکومت پاکستان نے 27-2026 میں دفاعی بجٹ 10.8 ارب ڈالر (3 ہزار ارب روپے) تک محدود رکھا .ماہرین کے مطابق 2025 میں کئی گنا زیادہ دفاعی بجٹ اور فوجی اخراجات بھی بھارت کو میدان جنگ میں جیت نہ دلا سکے.جدید جنگی تقاضوں اور انسدادِ دہشتگردی کی ضروریات کے باعث پاکستان کےدفاعی بجٹ میں اضافہ ناگزیر ہے

کوئٹہ: بلوچستان میں سرگرم کالعدم تنظیم بی ایل اے بلوچ عوام کے حقوق کے نام پر ایسی کارروائیوں میں ملوث ہے جن کے باعث مقامی آبادی کی معاشی سرگرمیاں متاثر ہو رہی ہیں۔

مبصرین کے مطابق سپلائی گاڑیوں، ریلوے نظام اور مواصلاتی ڈھانچے پر حملوں سے نہ صرف تجارتی راہداریوں میں رکاوٹ پیدا ہوتی ہے بلکہ روزگار کے مواقع بھی محدود ہوتے ہیں، جس کا براہِ راست اثر عام شہریوں پر پڑتا ہے۔بین الاقوامی ذرائع ابلاغ میں شائع ہونے والی رپورٹس کے مطابق مختلف ممالک نے بی ایل اے کو دہشت گرد تنظیم قرار دیا ہے۔ اطلاعات کے مطابق امریکا نے اگست 2025 میں جبکہ آسٹریلیا اور برطانیہ نے 2026 میں بی ایل اے کو دہشت گرد تنظیموں کی فہرست میں شامل کیا۔

عالمی نشریاتی ادارے ٹی آر ٹی ورلڈ سمیت متعدد بین الاقوامی پلیٹ فارمز پر بھی بلوچستان میں دہشت گردی اور تخریب کاری کے پس منظر پر رپورٹس سامنے آ رہی ہیں۔ ان تجزیوں میں یہ مؤقف اختیار کیا گیا ہے کہ خطے میں سرگرم بعض شدت پسند گروہوں کے بیرونی روابط اور معاونت کے پہلوؤں کا بھی جائزہ لیا جا رہا ہے۔سکیورٹی اور علاقائی امور کے ماہرین کا کہنا ہے کہ بنیادی ڈھانچے، ٹرانسپورٹ نیٹ ورک اور تجارتی سرگرمیوں کو نشانہ بنانے سے سب سے زیادہ نقصان مقامی آبادی اور کاروباری طبقے کو پہنچتا ہے۔ ان کے مطابق بلوچستان کی پائیدار ترقی، سرمایہ کاری اور روزگار کے فروغ کے لیے امن و استحکام ناگزیر ہے۔

دوسری جانب حکومتی حلقوں کا کہنا ہے کہ بلوچستان میں ترقیاتی منصوبوں، مواصلاتی رابطوں اور اقتصادی سرگرمیوں کے تحفظ کے لیے اقدامات جاری ہیں تاکہ صوبے کے عوام کو معاشی ثمرات پہنچ سکیں اور خطے میں پائیدار امن کو یقینی بنایا جا سکے۔

اسلام آباد: معرکۂ حق میں بھارت کو درپیش ناکامی کے اثرات عالمی سطح پر نمایاں ہونا شروع ہوگئے ہیں۔ دفاعی اور سفارتی حلقوں میں جاری بحث کے مطابق امریکی محکمہ دفاع نے انڈو پیسیفک کمانڈ کے نام میں تبدیلی کرتے ہوئے دوبارہ "یو ایس پیسیفک کمانڈ” کی اصطلاح کو اہمیت دینا شروع کر دی ہے، جسے خطے میں بدلتی ہوئی جغرافیائی اور تزویراتی ترجیحات کے تناظر میں دیکھا جا رہا ہے۔

ماہرین کا کہنا ہے کہ جنوبی ایشیا میں چین اور پاکستان کا بڑھتا ہوا جغرافیائی، معاشی اور عسکری کردار عالمی طاقتوں کی توجہ کا مرکز بنتا جا رہا ہے۔ ان کے مطابق خطے میں طاقت کے توازن میں تبدیلی کے باعث پاکستان کی سفارتی اہمیت میں اضافہ ہو رہا ہے جبکہ چین کے ساتھ اس کی شراکت داری بھی مزید مضبوط ہو رہی ہے۔تجزیہ کاروں کے مطابق بھارت اور امریکا کے تعلقات میں بھی بعض معاملات پر سرد مہری کے آثار دیکھنے میں آ رہے ہیں۔ امریکی صدر ڈونلڈ ٹرمپ کی جانب سے بھارتی مصنوعات پر بھاری ٹیرف عائد کیے جانے کے فیصلے کو بھی دونوں ممالک کے تعلقات میں پیدا ہونے والی نئی پیچیدگیوں سے جوڑا جا رہا ہے۔

ماہرین کا کہنا ہے کہ حالیہ علاقائی صورتحال نے عالمی برادری کو یہ پیغام دیا ہے کہ بھارت اب خطے میں اپنی مرضی کے فیصلے مسلط کرنے یا پاکستان پر دباؤ ڈالنے کی پوزیشن میں نہیں رہا۔ ان کے مطابق پاکستان نے دفاعی، سفارتی اور معاشی میدان میں اپنی صلاحیتوں کا مؤثر اظہار کیا ہے، جس کے باعث عالمی سطح پر اس کے مؤقف کو زیادہ توجہ مل رہی ہے۔دفاعی مبصرین کا مزید کہنا ہے کہ آنے والے برسوں میں جنوبی ایشیا میں نئی صف بندیاں اور تزویراتی شراکت داریاں جنم لے سکتی ہیں، جن میں پاکستان اور چین کا کردار مزید اہم ہونے کا امکان ہے۔