Category: بہاولپور

اوچ شریف (باغی ٹی وی،نامہ نگارحبیب خان)تحصیل احمد پور شرقیہ ضلع بہاولپور کے مختلف علاقوں میں دو المناک حادثات نے فضاء کو سوگوار کر دیا۔ ایک جانب شالیمار ایکسپریس کی زد میں آ کر 12 سالہ بچہ جاں بحق ہو گیا، تو دوسری جانب چھت گرنے کے واقعے میں ماں اور بیٹی زخمی ہو گئیں۔

پہلا واقعہ اوچ شریف ریلوے پھاٹک پر پیش آیا، جہاں بہاولپور سے کراچی جانے والی شالیمار ایکسپریس کی زد میں آ کر 12 سالہ منیب ولد منیرجو کہ بستی کھور کا رہائشی تھا موقع پر ہی جاں بحق ہو گیا۔ عینی شاہدین کے مطابق منیب ریلوے لائن عبور کر رہا تھا کہ اچانک تیز رفتار ٹرین آ گئی اور وہ جان بچانے کا موقع نہ پا سکا۔ ریسکیو 1122 کی ٹیم فوری طور پر موقع پر پہنچی اور لاش کو تحصیل ہیڈکوارٹر ہسپتال منتقل کیا۔ واقعے کی اطلاع پر اہل علاقہ، رشتہ دار اور والدین جائے حادثہ پر پہنچے، جہاں کہرام برپا ہو گیا اور ہر آنکھ اشکبار نظر آئی۔

دوسرا واقعہ احمد پورشرقیہ کے علاقے "حمزہ ٹاؤن” میں پیش آیا، جہاں ایک گاڈر ٹی آر والے مکان کی کچی چھت پر کنسٹرکشن جاری تھی کہ اچانک وزن زیادہ ہونے سے چھت زمین بوس ہو گئی۔ ریسکیو 1122 کنٹرول روم کے مطابق اس حادثے میں 13 سالہ آمنہ بی بی دختر محمد اکبر کو سر پر چوٹ آئی جبکہ 46 سالہ زاہدہ بی بی زوجہ محمد اکبر کے منہ پر زخم آئے۔ اہل خانہ نے دونوں زخمیوں کو ملبے سے نکال کر ریسکیو ٹیم کے پہنچنے سے پہلے ابتدائی طبی امداد دلوائی۔ ریسکیو عملے نے دونوں زخمیوں کو ٹی ایچ کیو احمد پور منتقل کر دیا۔

شہریوں نے ان دونوں واقعات پر گہرے دکھ کا اظہار کرتے ہوئے انتظامیہ سے مطالبہ کیا ہے کہ ریلوے پھاٹکوں پر سیکیورٹی اور حفاظتی عملے کی تعیناتی کو یقینی بنایا جائے اور تعمیراتی کاموں میں حفاظتی اقدامات پر سختی سے عمل کرایا جائے تاکہ آئندہ ایسے دردناک حادثات سے بچا جا سکے۔

اوچ شریف (باغی ٹی وی نامہ نگار حبیب خان)باغی ٹی وی کی چشم کشا رپورٹ پر ضلعی انتظامیہ حرکت میں آ گئی، اوچ شریف کے نواحی علاقے خیرپور ڈاہا میں انسانی جانوں سے کھیلنے والے غیر قانونی پٹرول و گیس کاروبار کے خلاف اسسٹنٹ کمشنر نوید حیدر کی زیر قیادت فیصلہ کن کارروائی عمل میں لائی گئی۔ کارروائی کے دوران دو غیر قانونی گیس سلنڈر شاپس سیل کر دی گئیں جبکہ متعدد منی پٹرول پمپس بند کر دیے گئے۔

ذرائع کے مطابق یہ کارروائی خیرپور ڈاہا چوک بھٹہ پر کی گئی، جہاں غیر محفوظ پٹرول کی ترسیل، ناقص اسٹوریج اور کسی بھی حفاظتی انتظامات کی عدم موجودگی پر سخت تحفظات کا اظہار کیا گیا۔ اسسٹنٹ کمشنر نوید حیدر نے موقع پر موجود افراد کو متنبہ کیا کہ انسانی جانوں سے کھیلنے والے عناصر کسی رعایت کے مستحق نہیں، اور یہ مہلک کاروبار کسی صورت برداشت نہیں کیا جائے گا۔

انہوں نے مزید کہا کہ ضلع بھر میں غیر قانونی فیول ایجنسیاں اور گیس دکانیں بند کی جائیں گی، اور ایسی سرگرمیوں میں ملوث افراد کے خلاف بلا تفریق کارروائی کی جائے گی۔ سول ڈیفنس، ریسکیو 1122 اور فائر بریگیڈ کو بھی الرٹ کر دیا گیا ہے تاکہ ایسے دیگر خطرناک کاروباری مراکز کی نشاندہی کی جا سکے۔ اسسٹنٹ کمشنر کے مطابق مکمل سروے کیا جا رہا ہے، اور عنقریب دیگر علاقوں میں بھی اسی نوعیت کے کریک ڈاؤن کا آغاز کیا جائے گا۔

ضلعی انتظامیہ نے اعلان کیا ہے کہ تمام پٹرول ایجنسیوں اور گیس شاپس کا ریکارڈ مرتب کر کے رجسٹریشن، سیفٹی چیک اور لائسنسنگ کا عمل سخت کیا جائے گا۔ بغیر اجازت کاروبار کرنے والوں کو قانونی کارروائی کا سامنا کرنا پڑے گا۔

علاقہ مکینوں، سماجی حلقوں اور شہریوں نے انتظامیہ کی اس کارروائی کو سراہتے ہوئے باغی ٹی وی کا خصوصی شکریہ ادا کیا جس نے جرأت مندانہ رپورٹنگ کے ذریعے خطرناک مسائل کو اجاگر کیا۔ عوام نے امید ظاہر کی ہے کہ یہ اقدامات وقتی نہیں بلکہ پائیدار اور مسلسل جاری رہیں گے تاکہ قیمتی انسانی جانوں کا تحفظ ممکن بنایا جا سکے۔

اوچ شریف (باغی ٹی وی نامہ نگار حبیب خان)موضع اوچ گیلانی میں ایک المناک واقعہ پیش آیا جہاں مسلح افراد نے ایک گھریلو خاتون شبانہ بی بی زوجہ محمد طارق پر بہیمانہ تشدد کرتے ہوئے اس کے طلائی زیورات اور قیمتی موبائل فون لوٹ لیا، بعدازاں خاتون اور اس کے شوہر کو جان سے مارنے کی دھمکیاں دے کر فرار ہو گئے۔

متاثرہ خاتون نے تھانہ اوچ شریف میں دی گئی درخواست میں بتایا کہ محمد بلال نامی شخص کافی عرصے سے اسے ہراساں کر رہا تھا۔ شوہر محمد طارق کی جانب سے بلال کو روکنے پر اس نے ساتھیوں امیر بخش، احمد یار، اقبال اور دیگر کے ہمراہ شبانہ بی بی کے گھر پر حملہ کیا۔ ملزمان زبردستی گھر میں گھسے، خاتون کو تشدد کا نشانہ بنایا، اس کی انگلی سے طلائی انگوٹھی اتاری، قیمتی موبائل چھینا، اور جان سے مارنے کی دھمکیاں دیں۔

واقعے کے دوران شوہر محمد طارق جب بیوی کی چیخ و پکار سن کر پہنچے تو انہیں بھی ڈنڈوں اور لوہے کی سلاخوں سے شدید زد و کوب کیا گیا۔ اطلاع پر تھانہ اوچ شریف پولیس نے فوری کارروائی کرتے ہوئے مقدمہ نمبر 379/25 درج کر لیا جس میں دفعات 148، 149، 354، 337ف، 506، 457، اور 379 ت پ شامل کی گئی ہیں۔ پولیس ترجمان کے مطابق ملزمان کی گرفتاری کے لیے چھاپے مارے جا رہے ہیں اور انہیں جلد قانون کی گرفت میں لایا جائے گا۔

متاثرہ خاندان نے وزیراعلیٰ پنجاب، آر پی او بہاولپور اور ڈی پی او بہاولپور سے اپیل کی ہے کہ ملزمان کو فوری گرفتار کر کے سخت سزا دی جائے، لوٹا گیا سامان واپس دلوایا جائے اور ان کے خاندان کو مکمل تحفظ فراہم کیا جائے۔ ان کا کہنا تھا کہ وہ شدید خوف میں زندگی گزار رہے ہیں اور انصاف کے بغیر ان کی سلامتی خطرے میں ہے۔

علاقہ مکینوں نے بھی واقعے کی شدید مذمت کرتے ہوئے مطالبہ کیا ہے کہ قانون نافذ کرنے والے ادارے فوری اور سخت ایکشن لیں تاکہ آئندہ کسی کو ایسی جرأت نہ ہو۔ پولیس نے عوام سے بھی تعاون کی اپیل کی ہے تاکہ ملزمان کو جلد گرفتار کیا جا سکے۔

بہاولپور (باغی ٹی وی، نامہ نگار حبیب خان) تحصیل یزمان کے نواحی گاؤں 47/ڈی بی چک کُد والا میں افسوسناک واقعہ، 12 سالہ بچی رمشہ کرنٹ لگنے سے زندگی کی بازی ہار گئی۔ بچی گھر میں ٹی وی کا سوئچ لگانے کی کوشش کر رہی تھی کہ اچانک زور دار کرنٹ لگنے سے زمین پر گر گئی۔

عینی شاہدین کے مطابق واقعہ اس وقت پیش آیا جب رمشہ تنہا کمرے میں سوئچ بورڈ کے قریب کھڑی تھی۔ کرنٹ لگنے کے فوراً بعد ایک مقامی فرد، جو پیشے کے لحاظ سے ڈاکٹر ہے، نے فوری طور پر سی پی آر (Cardiopulmonary Resuscitation) دے کر بچی کی جان بچانے کی کوشش کی۔ اسی دوران ریسکیو 1122 کو اطلاع دی گئی، جو کچھ ہی دیر میں جائے وقوعہ پر پہنچ گئی۔

ریسکیو ذرائع کے مطابق بچی کو فوری طبی امداد کے ساتھ تحصیل ہیڈکوارٹر ہسپتال یزمان منتقل کیا گیا، جہاں ڈاکٹرز نے اس کی موت کی تصدیق کر دی۔ ریسکیو اہلکاروں کا کہنا ہے کہ جب بچی کو اٹھایا گیا تو اس کے وائیٹل سائنز موجود نہیں تھے، تاہم راستے میں بھی سی پی آر جاری رکھی گئی۔

اس دلخراش واقعے کے بعد گاؤں کی فضا سوگوار ہو گئی۔ بچی کی ناگہانی موت پر اہلِ خانہ اور اہلِ علاقہ شدت غم سے نڈھال ہیں اور ہر آنکھ اشکبار ہے۔ معصوم رمشہ کی رحلت نے پورے علاقے کو صدمے میں مبتلا کر دیا ہے، جب کہ مقامی افراد نے حادثے کی وجہ ممکنہ ناقص وائرنگ یا بجلی کے انتظامات میں کوتاہی کو قرار دیا ہے۔

علاقہ مکینوں نے مطالبہ کیا ہے کہ گھریلو بجلی کی تنصیبات کی فوری جانچ اور حفاظتی اقدامات کو یقینی بنایا جائے تاکہ آئندہ ایسے دل دہلا دینے والے سانحات سے بچا جا سکے۔

اوچ شریف (باغی ٹی وی، نامہ نگار حبیب خان)احمد پور شرقیہ کے نواحی علاقے بستی جھبیل اور موضع دائم والا کے قریب بہاول نہر میں 20 فٹ چوڑا شگاف پڑنے سے زبردست تباہی پھیل گئی۔ سینکڑوں ایکڑ پر محیط زرعی زمین زیرِ آب آ گئی، جب کہ نہری پانی کئی گھروں میں بھی داخل ہو گیا، جس سے مقامی آبادی میں شدید خوف و ہراس پھیل گیا۔ متاثرہ کسانوں اور رہائشیوں نے محکمہ آبپاشی اور ضلعی انتظامیہ کی غفلت کے خلاف شدید احتجاج کرتے ہوئے اسے مکمل تباہی کا ذمہ دار قرار دیا۔

عینی شاہدین کے مطابق شگاف رات تین بجے پڑا اور مقامی افراد نے فوری طور پر حکام کو اطلاع دی، مگر کئی گھنٹوں تک کوئی اہلکار موقع پر نہ پہنچا۔ کسان محمد رمضان نے بتایا کہ "ہم نے پوری رات فون کیے، لیکن کسی نے ہماری فریاد نہ سنی۔ اگر بروقت کارروائی ہوتی تو ہماری فصلیں بچائی جا سکتی تھیں۔” متاثرہ علاقوں میں کپاس، گنا اور دھان کی لاکھوں روپے مالیت کی فصلیں مکمل طور پر تباہ ہو چکی ہیں، جبکہ گھروں میں پانی داخل ہونے سے مال مویشی اور گھریلو سامان بچانے کی کوششیں جاری ہیں۔

مکینوں کا کہنا ہے کہ محکمہ آبپاشی کے پاس نہ کوئی پیشگی ہنگامی منصوبہ تھا، نہ ہی موقع پر موجودگی نظر آئی۔ ایک محکمہ ایریگیشن کے اہلکار نے نام ظاہر نہ کرنے کی شرط پر بتایا کہ "مرمتی ٹیمیں روانہ کر دی گئی ہیں، لیکن تیز بہاؤ کام میں رکاوٹ بن رہا ہے۔” تاہم، مقامی افراد کے مطابق یہ اقدامات بہت تاخیر سے کیے گئے ہیں اور اب ان کا کوئی فائدہ نہیں رہا۔

اہل علاقہ نے صوبائی حکومت سے مطالبہ کیا ہے کہ متاثرین کو فوری امداد فراہم کی جائے اور محکمانہ غفلت کے مرتکب افراد کے خلاف سخت قانونی کارروائی کی جائے تاکہ مستقبل میں اس نوعیت کے واقعات کا تدارک ممکن ہو۔ اس سانحے نے احمد پور شرقیہ میں ایریگیشن نظام کی کمزوریوں اور انتظامیہ کی لاپروائی کو ایک بار پھر بے نقاب کر دیا ہے۔

اوچ شریف (نامہ نگار، حبیب خان)احمد پور شرقیہ میں پانچ روز قبل پیش آنے والے طالبات کی وین آتشزدگی کے المناک واقعے میں جاں بحق ہونے والی طالبات کی تعداد تین ہو گئی ہے۔ نشتر ہسپتال ملتان میں زیر علاج 20 سالہ طالبہ ماریا بنت محمد اسلم زخموں کی تاب نہ لاتے ہوئے آج دم توڑ گئی۔ اس سے قبل دو طالبات، منازہ عرف طیبہ عباس اور اجالا بنت سلیم بھی جان کی بازی ہار چکی ہیں۔

یہ افسوسناک حادثہ پانچ روز قبل احمد پور شرقیہ ٹول پلازہ کے قریب اس وقت پیش آیا جب نجی کالج کی 19 طالبات امتحان دینے کے بعد احمد پور شرقیہ سے لیاقت پور واپس جا رہی تھیں۔ طالبات سے بھری ہائی ایس وین میں نصب ناقص ایل پی جی سلنڈر اچانک لیک ہونے کے بعد زور دار دھماکے سے پھٹ گیا اور دیکھتے ہی دیکھتے پوری وین شعلوں کی لپیٹ میں آ گئی۔ دھماکے اور آگ کے باعث موقع پر ہی ایک طالبہ جاں بحق ہو گئی تھی جبکہ دیگر 10 طالبات بری طرح جھلس گئی تھیں، جن میں سے دو مزید دوران علاج دم توڑ چکی ہیں۔

عینی شاہدین کے مطابق حادثے کے بعد وین سے بلند ہوتے شعلے دور سے نظر آ رہے تھے، طالبات مدد کے لیے چیختی چلاتی رہیں لیکن خوفناک آگ نے اُنہیں بری طرح اپنی لپیٹ میں لے لیا۔ قریبی شہریوں نے فوری طور پر امدادی کارروائیاں شروع کیں اور ریسکیو 1122 کو اطلاع دی۔ امدادی ٹیموں نے موقع پر پہنچ کر آگ پر قابو پایا اور جھلسنے والی طالبات کو شدید زخمی حالت میں ہسپتال منتقل کیا۔ جن طالبات کی حالت تشویشناک تھی، اُنہیں نشتر ہسپتال ملتان ریفر کر دیا گیا جہاں مزید دو طالبات جاں بحق ہو گئیں۔

جھلسنے والی طالبات میں ثنا بنت اللہ دتہ، ثنا بنت رمضان، تانیا بنت محمد بخش، مشعل بنت ظفر، امِ حبیبہ بنت طاہر، عائشہ بنت الٰہی بخش، راحت بی بی بنت غلام مرتضیٰ سمیت دیگر طالبات شامل ہیں جن کی عمریں 17 سے 25 سال کے درمیان بتائی جا رہی ہیں۔ واقعے کے بعد پولیس نے تین نجی کالجز کی انتظامیہ، وین کے مالک اور ڈرائیور کے خلاف غفلت، لاپرواہی اور انسانی جانوں کو خطرے میں ڈالنے کے الزامات کے تحت مقدمہ درج کر لیا ہے۔ پولیس نے فوری کارروائی کرتے ہوئے وین ڈرائیور سمیت دو افراد کو گرفتار کر لیا ہے جبکہ دیگر ذمہ داران کی تلاش جاری ہے۔

حادثے کے بعد علاقے کی فضا سوگوار ہے، جاں بحق طالبات کے گھروں میں صفِ ماتم بچھی ہوئی ہے اور والدین شدید صدمے سے دوچار ہیں۔ شہری حلقوں کی جانب سے حکومتِ پنجاب سے مطالبہ کیا جا رہا ہے کہ اس حادثے کے ذمہ دار تمام عناصر کو قانون کے کٹہرے میں لا کر قرار واقعی سزا دی جائے، تاکہ آئندہ کسی ماں کی گود نہ اجڑے اور ایسے اندوہناک واقعات کا تدارک ممکن ہو سکے۔