Category: بہاولپور

اوچ شریف (باغی ٹی وی، نامہ نگار حبیب خان) عید قربان جیسے پرمسرت موقع پر بھی اوچ شریف کے بازار مہنگائی کے سائے میں ویران نظر آ رہے ہیں۔ اشیائے ضروریہ، قربانی کے جانوروں اور قصابوں کی بڑھتی قیمتوں نے عوام کی قوت خرید کو مفلوج کر دیا ہے، جس سے عید کی روایتی رونقیں ماند پڑ گئی ہیں۔

شہر کی مارکیٹیں سنسان ہو چکی ہیں، خریدار نہ ہونے سے دکاندار پریشان اور کاروباری طبقہ بدترین مالی دباؤ کا شکار ہے۔ مقامی تاجروں عمر خورشید، اکرم، شوکت اور دیگر نے حکومت سے مطالبہ کیا ہے کہ اگر فوری ریلیف نہ دیا گیا تو مقامی معیشت تباہ ہو جائے گی اور عوام غربت کی لکیر سے بھی نیچے جا گریں گے۔

شہریوں کا کہنا ہے کہ موجودہ مہنگائی نے زندگی اجیرن کر دی ہے، دو وقت کی روٹی کا بندوبست بھی مشکل ہو گیا ہے جبکہ کاشتکار گندم کی کم قیمتوں سے شدید متاثر ہیں۔ تاجر اور عوام دونوں نے حکومت سے ہنگامی معاشی پالیسیوں اور ریلیف پیکج کا مطالبہ کرتے ہوئے کہا ہے کہ اگر فوری اقدامات نہ کیے گئے تو عید کی خوشیاں صرف خواب بن کر رہ جائیں گی۔

اوچ شریف (باغی ٹی وی، نامہ نگار حبیب خان)ذوالحج کا چاند نظر آتے ہی اوچ شریف میں موسمی قصابوں کی سرگرمیاں تیز ہو گئیں، جو گھر گھر جا کر ایڈوانس بکنگ کی کوششوں میں مصروف ہیں، تاہم ماضی کے خراب تجربات کے باعث شہری ان کی خدمات لینے سے کترانے لگے ہیں۔

اس کے برعکس پروفیشنل اور تربیت یافتہ قصابوں کی مانگ میں نمایاں اضافہ ہوا ہے اور وہ قربانی کے عمل میں وی وی آئی پی حیثیت اختیار کر چکے ہیں۔ شہریوں کا کہنا ہے کہ وہ اب صرف انہی قصابوں پر اعتماد کریں گے جو تجربہ اور مہارت رکھتے ہوں تاکہ قربانی کا عمل شرعی تقاضوں کے مطابق بخوبی انجام پائے۔

پروفیشنل قصابوں نے بھی بکنگ شروع کر دی ہے، بعض جانور کی جسامت اور قیمت دیکھ کر اجرت طے کر رہے ہیں تاکہ دونوں طرف شفافیت برقرار رہے۔ شہریوں کے مطابق گزشتہ برس سوشل میڈیا پر موسمی قصابوں کی ناقص کارکردگی کی ویڈیوز وائرل ہوئیں، جس کے بعد اب وہ کسی قسم کا رسک لینے کو تیار نہیں۔

اوچ شریف کے عوام قربانی کے اس مقدس فریضے کے لیے مہارت رکھنے والے قصابوں کو ترجیح دے رہے ہیں، چاہے اس کے لیے انہیں قربانی کے عمل میں تاخیر ہی کیوں نہ برداشت کرنا پڑے۔

اوچ شریف(باغی ٹی وی،نامہ نگارحبیب خان) یومِ تکبیر 2025 کے موقع پر ڈیرہ نواب صاحب میں گورنمنٹ صادق عباس گریجویٹ کالج میں ایک پُرجوش ریلی کا انعقاد کیا گیا۔ یہ تقریب ڈائریکٹر کالجز ڈویژن بہاولپور، ڈپٹی ڈائریکٹر کالجز بہاولپور اور کالج کے پرنسپل پروفیسر شاہد حسین مغل کی خصوصی ہدایات پر منعقد ہوئی۔

ریلی میں طلباء، اساتذہ اور عملے کی بڑی تعداد نے شرکت کی۔ صدر شعبہ سرائیکی پروفیسر ڈاکٹر محمد الطاف ڈاھر جلالوی، جو اس موقع پر انچارج سیکیورٹی آفیسر و کنٹرولر امتحانات بھی تھے ، نے خطاب کرتے ہوئے کہا:

"آج کا دن یومِ تجدیدِ عہد ہے۔ نعرہ تکبیر، اللہ اکبر! پاکستان کا مطلب کیا؟ لا الہ الا اللہ محمد رسول اللہ.یہی ہمارے نظریے کی بنیاد ہے۔”

انہوں نے مزید کہا کہ پاکستان اسلامی دنیا کا پہلا اور دنیا کا ساتواں ایٹمی ملک ہے، جو ہماری مسلح افواج اور قومی اتحاد کی بدولت ممکن ہوا۔ انہوں نے کہا کہ اگر دشمن نے دوبارہ میلی آنکھ سے دیکھا تو ہم اس کی آنکھیں نکال دیں گے۔

ڈاکٹر الطاف نے آپریشن "بنیان مرصوص” کا حوالہ دیتے ہوئے کہا کہ مودی سرکار کے ناپاک عزائم کو خاک میں ملا دیا گیا اور پاکستانی قوم پاک فوج کے ساتھ سیسہ پلائی دیوار کی مانند کھڑی ہے۔

تقریب میں پروفیسر احمد نواز بھٹو، محمد عمران ملک اور طلباء و طالبات نے وطن سے تجدیدِ عہد کیا اور قومی یکجہتی کا مظاہرہ کیا۔ ریلی کا اختتام قومی ترانے اور افواج پاکستان سے اظہارِ یکجہتی کے ساتھ ہوا۔

اوچ شریف (باغی ٹی وی نامہ نگار حبیب خان): صحرائے چولستان، جو 66 لاکھ ایکڑ رقبے پر پھیلا ہوا ہے، اس وقت شدید خشک سالی کی لپیٹ میں ہے۔ کئی ماہ سے بارشیں نہ ہونے کے باعث پانی کے قدرتی ذخائر (ٹوبھے) خشک ہو چکے ہیں، جس کے نتیجے میں انسان اور جانور دونوں پانی کی بوند بوند کو ترس رہے ہیں۔ اگر حکومت نے بروقت اقدامات نہ کیے تو خشک سالی کی شدت میں مزید اضافہ ہو سکتا ہے۔

چولستان کے باشندوں کی ایک بڑی تعداد اپنے لاکھوں جانوروں (جن کی سرکاری تعداد 16 لاکھ سے زائد ہے) کے ہمراہ چکوک اور سرکاری پانی کی پائپ لائنوں پر منتقل ہو چکی ہے۔ ڈیراوڑ، ٹوبہ سلطان شاہ، لنگاہ والا، رکن پور، کاڈو والا، طوفانہ، مروٹ، اور جگیت پیر کے علاقوں میں واقع تقریباً 1100 ٹوبوں میں سے 95 فیصد خشک ہو چکے ہیں۔ ان میں چڈھڑا والا، دولو جمال، نواں پرھاڑاں، ٹوبہ سراں، باہو والا، عام والا، شیر خان، کالے پاڑ ٹھنڈی کھوئی، جام سر، قائم سر، نور سر بلوچاں، حیدر والا، سکندر والا، اسلام گڑھ کے نواب والا سوڑیاں، پنچ کوہی، شیخ والا، ٹوبیاں والا، کنڈیرا، آلے والا، ٹوبہ کھارڑی، پچھال، بوہڑ والا، بھانے والا، دانڈ والا، رینال، سیاہی والا، جانو والا، گڈلہ، مٹھو والا، کرم والا، دینے والا، اچل والا، گلو والا، قطب والی، بھمبھے والا، پنجکوٹ، ڈاک والا، اور دین گڑھ شامل ہیں۔

خشک سالی بڑھنے کی وجہ سے جانوروں کے لیے چارہ بھی ناپید ہو گیا ہے، اور جنگلی جڑی بوٹیاں تک سوکھنے لگی ہیں۔ چولستان کے باسی اپنے جانوروں کے لیے چارہ اور پانی نہ ہونے کے باعث آبادیوں کی طرف ہجرت کرنے پر مجبور ہیں۔ واضح رہے کہ چولستان میں تین لاکھ سے زائد چولستانی بستے ہیں جو زیادہ تر مال مویشی پر انحصار کرتے ہیں۔

چولستانی ذرائع کے مطابق، ٹوبہ کٹانے والا، ٹوبہ قصائی والا، گورکن، لاکھن، پتھانی والا، باڑی والا، بوہڑ والا ڈھوری، ونجو والا، جیاء والا، تلوے والا، پنج کوٹ، گونجراں والا، اور بھالے والا پر پائپ لائنوں کے واٹر پوائٹس پر اپنے جانوروں کے ہمراہ رہائش پذیر محمد وریام، عبدالمجید، اقبال مٹھو، عبدالحمید، محمود نواز، سچو خان، بشیر احمد و دیگر نے حکومت سے اپیل کی ہے کہ آنے والے بجٹ میں چولستان میں نئی پائپ لائنز، نئے ٹوبوں کی تعمیر، پرانے ٹوبوں کی بحالی اور نئے پانی کے کنڈز بنائے جائیں، اور پائپ لائنوں کو سولر پر منتقل کیا جائے۔

اس حوالے سے جب ایم ڈی چولستان ترقیاتی ادارہ طارق بخاری سے رابطہ کیا گیا تو انہوں نے بتایا کہ پائپ لائنوں پر 24 گھنٹے پانی کی فراہمی کی جا رہی ہے۔ انہوں نے مزید کہا کہ ایسی آبادیاں جو پائپ لائنوں سے دور ہیں، انہیں بائوزر کے ذریعے پانی فراہم کیا جا رہا ہے۔

اوچ شریف (باغی ٹی وی، نامہ نگار حبیب خان)چیئرمین نادرا لیفٹیننٹ جنرل محمد منیر افسر (ہلال امتیاز ملٹری) نے بہاولپور چیمبر آف کامرس اینڈ انڈسٹری میں نادرا آفس کھولنے کی منظوری دے دی ہے۔ اس آفس میں شناختی کارڈ، برتھ سرٹیفکیٹ، فیملی رجسٹریشن سرٹیفکیٹ سمیت تمام ضروری سہولیات فراہم کی جائیں گی۔ اس اقدام پر چیمبر کے ممبران نے چیئرمین نادرا اور صدر چیمبر سید ظفر شریف کو خراج تحسین پیش کیا ہے۔

بہاولپور چیمبر آف کامرس اینڈ انڈسٹری کے ایک وفد نے صدر سید ظفر شریف کی قیادت میں نادرا ہیڈ کوارٹر اسلام آباد میں چیئرمین نادرا لیفٹیننٹ جنرل محمد منیر افسر سے ملاقات کی۔ وفد میں چیمبر کے نائب صدر محمد اعظم قریشی، ایگزیکٹو ممبر انس اشتیاق بسراء اور سیکرٹری جنرل چیمبر سید عبیر حیدر شامل تھے۔

ملاقات کے دوران صدر چیمبر نے چیمبر میں نادرا سب آفس کے قیام کی منظوری پر چیئرمین نادرا کا شکریہ ادا کیا۔ انہوں نے کہا کہ چیمبر میں نادرا آفس کے قیام سے اراکین چیمبر کو یقیناً سہولیات دستیاب ہوں گی۔

چیئرمین نادرا نے چیمبر وفد کا خیرمقدم کرتے ہوئے بتایا کہ بہاولپور میں قائم دیگر نادرا آفسز کی طرح بہاولپور چیمبر میں بھی نادرا آفس مکمل طور پر فعال کیا جائے گا اور اراکین چیمبر کو تمام سروسز کی فراہمی کو یقینی بنایا جائے گا۔ انہوں نے یہ بھی کہا کہ وہ ذاتی طور پر اس آفس کے قیام اور نادرا سروسز کو مانیٹر کریں گے۔ انہوں نے نادرا کی جانب سے دی جانے والی سروسز میں مزید بہتری، آن لائن شناختی کارڈ اپلائی، شناختی کارڈ کی تجدید اور دیگر سروسز کے بارے میں بھی وفد کو آگاہ کیا۔ انہوں نے صدر چیمبر کو نادرا ہیڈ کوارٹر کی مکمل سروسز کی فراہمی کے بارے میں بھی آگاہ کیا۔

ملاقات کے آخر میں صدر چیمبر کی جانب سے چیئرمین نادرا کو بہاولپور کی مقامی اجرک اور سوینئیر پیش کیا گیا، جبکہ چیئرمین نادرا نے بھی چیمبر وفد کے اعزاز میں شیلڈز پیش کیں۔

چیئرمین نادرا سے ملاقات کے بعد صحافیوں سے گفتگو کرتے ہوئے صدر چیمبر سید ظفر شریف نے کہا کہ بہاولپور چیمبر کو مثالی چیمبر بنانا ان کا مشن ہے۔ انہوں نے مزید کہا کہ کاروباری مسائل کے حل اور ممبران چیمبر کو دیگر سہولیات کی فراہمی کے لیے اپنی تمام تر صلاحیتوں کو بروئے کار لایا جائے گا۔

اوچ شریف (باغی ٹی وی، نامہ نگار حبیب خان)عید قربان کی رونقیں عروج پر، مہنگائی نے غریب طبقے کی قربانی کو خواب بنا دیا

عیدالاضحیٰ کی آمد کے ساتھ ہی اوچ شریف اور گردونواح کی مویشی منڈیوں میں رونقیں عروج پر پہنچ گئی ہیں۔ شہر کے باسی سنتِ ابراہیمی کی ادائیگی کے لیے بھرپور تیاریوں میں مصروف ہیں۔ مویشی منڈیوں میں بکرے، بچھڑے، گائیں، بیل اور بھینسیں خریدنے کے لیے ہر عمر اور طبقے کے افراد کا رش لگنا شروع ہو گیا ہے۔

بچوں کا جوش دیدنی ہے، جو اپنے پسندیدہ جانوروں کے ساتھ تصویریں بنوانے اور ان کا خیال رکھنے میں پیش پیش ہیں۔ خریداروں کے چہروں پر سنتِ ابراہیمی کی ادائیگی کی خوشی عیاں ہے، وہیں بیوپاری بھی اپنی محنت کے ثمر سے مطمئن نظر آتے ہیں۔

تاہم ایک طرف جہاں عید کی خوشیاں ہیں، وہیں دوسری طرف مہنگائی نے متوسط اور غریب طبقے کی کمر توڑ رکھی ہے۔ مویشیوں کی قیمتیں آسمان سے باتیں کر رہی ہیں، جس کے باعث کئی افراد اس سال قربانی کی سنت ادا کرنے سے قاصر ہیں۔ ایک مقامی شہری محمد اشرف نے بتایا، "پچھلے سال میں نے دو بکرے لیے تھے، اس سال ایک بھی لینا مشکل ہو گیا ہے۔ مہنگائی نے سب کچھ بدل دیا ہے۔”

اسی طرح ایک رکشہ ڈرائیور رمضان بلوچ کا کہنا تھا، "سنتِ ابراہیمی ہر مسلمان کا جذبہ ہے، مگر اس بار صرف دیکھنے آیا تھا، خریدنے کی سکت نہیں رہی۔”

دوسری جانب اوچ شریف کے سماجی حلقوں اور فلاحی اداروں نے اجتماعی قربانی کی مہمات کا آغاز کر دیا ہے، تاکہ وہ افراد جو انفرادی قربانی کی استطاعت نہیں رکھتے، اجتماعی قربانی کے ذریعے اپنا حصہ ڈال سکیں۔ عید قربان کی تیاریوں کے ساتھ ساتھ امید ہے کہ صاحب استطاعت افراد اپنے کمزور بھائیوں کا بھی خیال رکھیں گے، تاکہ خوشیوں کا یہ تہوار سب کے لیے یکساں خوشی کا پیغام بن سکے۔