Category: بہاولپور

اوچ شریف (باغی ٹی وی، نامہ نگار حبیب خان) ڈیرہ نواب صاحب کے شہریوں کے لیے ایک خوش آئند پیشرفت سامنے آ گئی،علامہ اقبال ایکسپریس کا ڈیرہ نواب صاحب ریلوے اسٹیشن پر عارضی اسٹاپ اب مستقل طور پر جاری رکھنے کا فیصلہ کر لیا گیا ہے۔ ریلوے حکام نے اس فیصلے کو بہتر ریونیو، مسافروں کی بڑھتی ہوئی تعداد اور مقامی عوام کے پرزور مطالبے کے نتیجے میں کیا ہے۔

یاد رہے کہ دو ماہ قبل مقامی انجمن تاجران، سماجی تنظیموں اور شہریوں کی درخواست پر آزمائشی بنیادوں پر علامہ اقبال ایکسپریس کو ڈیرہ نواب صاحب اسٹیشن پر دوطرفہ اسٹاپ دیا گیا تھا۔ مختصر عرصے میں ہی ریلوے کو نہ صرف ریونیو میں واضح بہتری ملی بلکہ مسافروں کی تعداد میں بھی نمایاں اضافہ دیکھا گیا، جس نے اس فیصلے کی افادیت ثابت کر دی۔

ریلوے حکام نے اعلان کیا ہے کہ اس اسٹاپ کو تا حکمِ ثانی برقرار رکھا جائے گا تاکہ مسافروں کو سہولت فراہم کی جا سکے اور ریلوے کی آمدنی میں مزید بہتری آئے۔ اس فیصلے پر مقامی شہریوں، تاجروں اور سماجی رہنماؤں نے خوشی کا اظہار کیا ہے۔ ان کا کہنا ہے کہ یہ اقدام نہ صرف سفری سہولیات کو بہتر بنائے گا بلکہ علاقائی معاشی سرگرمیوں کو بھی فروغ دے گا، جس سے ڈیرہ نواب صاحب کی ترقی کی راہ ہموار ہو گی۔

شہریوں نے ریلوے حکام کا شکریہ ادا کرتے ہوئے امید ظاہر کی ہے کہ مستقبل میں بھی عوامی مفادات کو مقدم رکھتے ہوئے اس طرح کے فیصلے کیے جاتے رہیں گے۔

اوچ شریف (باغی ٹی وی، نامہ نگار حبیب خان) صدر بازار اوچ شریف میں پی سی نیوز ڈیجیٹل میڈیا اور متحدہ پریس کلب کے زیرِ اہتمام بھارت کے خلاف ایک زور دار احتجاجی مظاہرہ کیا گیا جس میں صحافیوں، تاجروں، سماجی کارکنوں، طلبہ اور شہریوں کی بڑی تعداد نے شرکت کی۔ مظاہرین نے ہاتھوں میں بینرز اور پلے کارڈز اٹھا رکھے تھے جن پر بھارت مخالف نعرے درج تھے، جبکہ "پاک فوج زندہ باد”، "ہمیں اپنی فوج پر فخر ہے”، اور "جنرل عاصم منیر قدم بڑھاؤ، ہم تمھارے ساتھ ہیں” کے فلک شگاف نعرے فضا میں گونجتے رہے۔

مرکزی انجمن تاجران کے نائب صدر میاں محمد عامر صدیقی نے مظاہرین سے خطاب کرتے ہوئے کہا کہ بھارت خطے کے امن کے لیے مسلسل خطرہ بن چکا ہے۔ انہوں نے واضح کیا کہ پوری قوم دشمن کے ناپاک عزائم کو ناکام بنانے کے لیے افواجِ پاکستان کے ساتھ کھڑی ہے اور وطن کی سالمیت پر کوئی سمجھوتہ نہیں کیا جائے گا۔

مظاہرین نے یک زبان ہو کر بھارتی مظالم کے خلاف آواز بلند کی اور عالمی برادری سے مطالبہ کیا کہ بھارتی ریاستی دہشتگردی اور انسانی حقوق کی خلاف ورزیوں کا فوری نوٹس لیا جائے۔ دیگر مقررین نے بھی بھارت کی جارحانہ پالیسیوں پر شدید تنقید کرتے ہوئے اقوام متحدہ اور عالمی ضمیر کو جھنجھوڑا۔

احتجاج کا اختتام ملک کی سلامتی اور افواجِ پاکستان کی کامیابی کے لیے خصوصی دعا کے ساتھ ہوا۔ مظاہرین نے پرامن طور پر منتشر ہوتے ہوئے اس عزم کا اظہار کیا کہ اگر بھارت نے جارحیت بند نہ کی تو پوری قوم متحد ہو کر منہ توڑ جواب دے گی۔
اس موقع پر سید خضر عباس، سید مجتہد رضوی، صدیق خان، چوہدری محمد ارشد، محمد یعقوب ککس، ماسٹر محمد انور، ملک زاہد سمیت دیگر شخصیات بھی شریک تھیں۔

اوچ شریف (باغی ٹی وی، نامہ نگار حبیب خان) چک نمبر 115 ڈی این بی میں ایک افسوسناک اور دلخراش واقعہ پیش آیا جہاں مقامی کسان محمد ارشد اپنے ہی ٹریکٹر کی زد میں آ کر جاں بحق ہو گئے۔ اطلاعات کے مطابق محمد ارشد رات گئے کھیتوں میں کام مکمل کر کے گھر پہنچے۔ گیٹ کھولنے کے لیے وہ ٹریکٹر سے نیچے اترے تو اچانک ٹریکٹر گیئر سے فری ہو کر چل پڑا اور انہیں کچل دیا، جس سے وہ موقع پر ہی جاں بحق ہو گئے۔

رات کا وقت ہونے کے باعث اہل خانہ کو فوری طور پر واقعے کا علم نہ ہو سکا تاہم کچھ دیر بعد جب اہلِ خانہ نے تلاش شروع کی تو محمد ارشد کی لاش ٹریکٹر کے نیچے سے ملی۔ اچانک سانحے پر گھر میں کہرام مچ گیا اور پورے علاقے کی فضا سوگوار ہو گئی۔

واقعے پر سیاسی و سماجی شخصیات نے گہرے دکھ اور افسوس کا اظہار کرتے ہوئے مرحوم کے درجات کی بلندی کے لیے دعا کی اور لواحقین سے دلی تعزیت کا اظہار کیا۔

اوچ شریف ،باغی ٹی وی (نامہ نگارحبیب خان)بھارت کی آبی جارحیت اور معروف پاکستانی صحافی مبشر لقمان کا یوٹیوب چینل بھارت میں بند کیے جانے کے خلاف اوچ شریف میں ایک ولولہ انگیز اور تاریخ ساز احتجاجی ریلی نکالی گئی، جس نے دشمن کو دوٹوک اور واضح پیغام دے دیا کہ پاکستانی قوم اپنی خودمختاری، صحافتی آزادی اور قدرتی وسائل کے تحفظ پر کسی قسم کی سودے بازی قبول نہیں کرے گی۔

یہ عظیم الشان احتجاجی ریلی سوشل سول سوسائٹی اوچ شریف کے زیر اہتمام منعقد ہوئی، جس کی قیادت رکن صوبائی اسمبلی مخدوم سید عامر علی شاہ نے کی۔ ریلی میں ہزاروں افراد نے شرکت کی اور میونسپل کمیٹی سے الشمس چوک تک مارچ کیا۔ شرکاء کے ہاتھوں میں قومی پرچم، پلے کارڈز اور بینرز تھے جن پر بھارت کی آبی دہشت گردی اور آزادی صحافت پر حملوں کے خلاف نعرے درج تھے۔ الشمس چوک "انڈیا مردہ باد” اور "پاکستان زندہ باد” کے فلک شگاف نعروں سے گونج اٹھا۔

ریلی کے اختتام پر ایم پی اے مخدوم عامر علی شاہ نے بھارتی پرچم نذر آتش کرتے ہوئے کہا کہ پاکستان دشمن کی کسی بھی آبی جارحیت یا معلوماتی جنگ کا بھرپور جواب دے گا۔ انہوں نے کہا: "ہم اپنی سرزمین، اپنے پانی اور اپنے میڈیا کی آزادی پر کوئی سمجھوتہ نہیں کریں گے۔ اگر دشمن نے جارحیت کی، تو ایسا منہ توڑ جواب دیں گے جو تاریخ یاد رکھے گی۔”

اس موقع پر شرکاء نے اس بات پر بھی شدید غم و غصے کا اظہار کیا کہ بھارتی حکومت نے سینئر صحافی مبشر لقمان کا یوٹیوب چینل بھارت میں بلاک کر دیا ہے، صرف اس لیے کہ انہوں نے اپنے پروگرام "کھرا سچ” میں بھارت کے زیرِ اثر پہلگام واقعے کو "ڈرامہ” قرار دیا تھا اور مودی سرکار پر تنقید کی تھی۔

صحافیوں، سیاسی و مذہبی رہنماؤں، سول سوسائٹی اور تاجر برادری نے اپنے مشترکہ بیان میں بھارتی حکومت کے اس اقدام کی سخت مذمت کرتے ہوئے کہا کہ سچ کو دبانے کی یہ کوشش آزادی اظہار رائے پر حملہ ہے، جسے پاکستان کا ہر شہری مسترد کرتا ہے۔ مقررین میں سید عادل شاہ، جام آصف جھبیل، راؤ فاروق، اکمل کاکھی، غلام یاسین سومرو، بابر علی صدیقی، حبیب خان، اظہر دانش، ذیشان مستوی اور دیگر نے خطاب کیا۔

یاد رہے کہ سینئر صحافی مبشر لقمان نے اپنے ردعمل میں کہا کہ "اگر سچ بولنے کی سزا چینل بند کرنا ہے تو یہ ہمیں قبول ہے، ہم پاکستان کے دفاع اور وقار کے لیے ہر قربانی دینے کو تیار ہیں۔” انہوں نے مزید کہا کہ مودی سرکار کے جھوٹ اور ڈرامے دنیا کے سامنے بے نقاب ہو چکے ہیں اور بھارت، کشمیر میں ظلم و ستم سے نظریں ہٹا کر پاکستان پر الزام تراشی کر رہا ہے۔

ریلی کے آخر میں وطن عزیز کی سلامتی، افواج پاکستان کی کامیابی اور دشمن کی بربادی کے لیے اجتماعی دعا کی گئی۔ عوام نے اتحاد، نظم اور حب الوطنی سے ثابت کیا کہ پاکستانی قوم آج بھی دشمن کے ہر محاذ پر متحد، بیدار اور پرعزم کھڑی ہے۔

اوچ شریف (باغی ٹی وی، نامہ نگار حبیب خان) پیٹرولنگ پولیس خیرپور ڈاہا نے سب انسپکٹر وحید کی قیادت میں کامیاب کارروائی کرتے ہوئے ایک مشکوک شخص کو گرفتار کر لیا، جس کے قبضے سے ناجائز اسلحہ، گولیاں، نقدی اور موبائل فون برآمد ہوا۔ گرفتار ملزم جنید محمود ولد جندوڈہ، سکنہ بکھری، کو اس وقت حراست میں لیا گیا جب وہ مشتبہ حرکات کر رہا تھا۔

تفصیلات کے مطابق سب انسپکٹر وحید بمعہ پولیس ٹیم معمول کے گشت پر تھا کہ دورانِ نگرانی ایک شخص کو مشکوک انداز میں گھومتے پایا گیا۔ مشتبہ شخص کو روک کر تلاشی لی گئی تو اس کے قبضے سے 30 بور پستول، پانچ زندہ گولیاں، ایک موبائل فون اور نقدی برآمد ہوئی۔ ملزم اسلحے کا کوئی قانونی لائسنس پیش نہ کر سکا، جس پر اسے موقع پر گرفتار کر کے تھانہ دھوڑکوٹ منتقل کر دیا گیا۔

ملزم کے خلاف آرمز ایکٹ کے تحت مقدمہ درج کر لیا گیا ہے، جبکہ مزید تفتیش جاری ہے۔ علاقے کے عوام نے پیٹرولنگ پولیس کی مستعدی اور بروقت کارروائی کو سراہا اور اسے علاقے میں امن و امان کے قیام کی جانب مثبت قدم قرار دیا۔