Category: بہاولپور

اوچ شریف(نامہ نگارحبیب خان )ایران میں شہید 8 پاکستانیوں کی میتیں بہاولپور پہنچ گئیں، نماز جنازہ آج ادا ہوگی،ایران میں شہید ہونے والے 8 پاکستانیوں کی میتیں بہاولپور پہنچا دی گئی ہیں، جنہیں مقامی انتظامیہ نے لواحقین کے حوالے کر دیا ہے۔

ان میں سے 5 شہیدوں کی نماز جنازہ آج صبح 9 بجے خانقاہ شریف بوائز ہائی سکول میں ادا کی جائے گی، جبکہ بقیہ 3 شہیدوں کے جنازے احمد پور شرقیہ اور رنگپور میں ان کے آبائی دیہات میں ادا کیے جائیں گے۔

ایران میں قتل کیے گئے 8 پاکستانی شہریوں کی میتیں پاکستان پہنچا دی گئیں۔ ان افراد کو 12 اپریل کو ایران کے سرحدی صوبے سیستان کے علاقے مہرستان میں مسلح افراد نے ایک ورک شاپ میں فائرنگ کر کے قتل کر دیا تھا۔

جاں بحق ہونے والوں میں سے 7 کا تعلق بہاولپور کے علاقے خانقاہ شریف سے تھا جبکہ ایک کا تعلق ملتان کے نواحی علاقے شجاع آباد سے تھا۔ ان میتوں کو رات گئے ایک خصوصی طیارے کے ذریعے ایران سے اسلام آباد منتقل کیا گیا اور پھر وہاں سے بہاولپور پہنچایا گیا۔ بعد ازاں ایمبولینسوں کے ذریعے میتیں ان کے آبائی علاقوں کی جانب روانہ کر دی گئیں۔

یہ بدقسمت افراد موٹر مکینک تھے اور ایرانی صوبے سیستان میں ایک ورک شاپ پر کام کرتے تھے۔ پاکستانی سفیر نے جاں بحق ہونے والوں کی شناخت محمد عامر، محمد دلشاد، محمد ناصر، ملک جمشید، محمد دانش، محمد نعیم، غلام جعفر اور محمد خالد کے ناموں سے کی تھی۔

وزیراعظم شہباز شریف نے اس واقعے پر گہرے دکھ اور تشویش کا اظہار کرتے ہوئے ایرانی حکومت سے مطالبہ کیا تھا کہ ملزمان کو فوری طور پر گرفتار کر کے قرار واقعی سزا دی جائے۔

دوسری جانب ایرانی وزارت خارجہ کے ترجمان اسماعیل بقائی نے اس دہشت گرد حملے کی سخت مذمت کرتے ہوئے اسے مجرمانہ فعل اور اسلامی تعلیمات، قانون اور انسانی اقدار کے منافی قرار دیا۔ انہوں نے مزید کہا کہ ایران اس جرم کے مرتکب افراد کی شناخت اور انہیں انصاف کے کٹہرے میں لانے کے لیے ہر ممکن کوشش کرے گا۔

اوچ شریف (نامہ نگارحبیب خان) اوچ شریف کے نواحی علاقے چکی مراد میں گندم کی کٹائی کے دوران ایک افسوسناک واقعہ پیش آیا، جہاں اکرم خان ولد شریف خان کی چھ ایکڑ پر کھڑی گندم کی فصل آگ کی لپیٹ میں آ کر مکمل طور پر جل گئی۔ ابتدائی اطلاعات کے مطابق، آگ ٹریکٹر کے فرنٹ پر نصب ریپر سے نکلنے والی ایک چنگاری کے باعث بھڑکی، جس نے دیکھتے ہی دیکھتے پوری فصل کو اپنی لپیٹ میں لے لیا۔

واقعے کی اطلاع ملتے ہی ریسکیو ٹیمیں فوری طور پر جائے حادثہ پر پہنچیں اور اپنی بروقت کارروائی سے تقریبا ً40 ایکڑ پر محیط مزید فصل کو بڑے نقصان سے بچا لیا۔ اس مشکل گھڑی میں مقامی کسانوں اور دیگر افراد نے بھی ریسکیو ٹیموں کے ساتھ مل کر آگ بجھانے میں بھرپور تعاون کیا۔

ماہرین زراعت کے مطابق، گندم کی کٹائی کے دوران استعمال ہونے والی مشینری کی مناسب دیکھ بھال اور احتیاطی تدابیر اختیار کرنا انتہائی ضروری ہے۔ اس افسوسناک واقعے نے ایک بار پھر اس حقیقت کو اجاگر کیا ہے کہ معمولی سی غفلت بھی بعض اوقات ناقابل تلافی نقصان کا سبب بن سکتی ہے۔ متاثرہ کسان مالی امداد کے لیے حکومتی توجہ کے منتظر ہیں۔

اوچ شریف (باغی ٹی وی، نامہ نگار حبیب خان)سابق وفاقی وزیر اور سینیٹر محمد علی درانی نے ایران میں دہشت گردی کا نشانہ بننے والے مزدوروں کے لواحقین سے ملاقات کی اور ان کے غم میں شریک ہو کر متاثرہ خاندانوں کو دلی تسلی دی۔ شہداء کا تعلق احمد پور شرقیہ کے نواحی علاقوں محراب والا، چکی موڑ، بستی حاجی ربنواز آرائیں اور خانقاہ شریف کی مختلف بستیوں سے تھا۔

محمد علی درانی نے متاثرہ خاندانوں کے گھروں میں جا کر فرداً فرداً تعزیت کی، خواتین کے سروں پر چادریں رکھیں اور ان کے صبر و حوصلے کو سراہا۔ ان کا کہنا تھا کہ ایران جانے والے یہ محنت کش صرف روزگار کی تلاش میں تھے اور اُن کا خون رائیگاں نہیں جانا چاہیے۔ انہوں نے حکومت پاکستان سے مطالبہ کیا کہ شہداء کے ہر لواحق کی کفالت کے لیے فوری طور پر ایک کروڑ روپے فی کس معاوضہ ادا کیا جائے۔

سابق وفاقی وزیر نے یہ بھی کہا کہ وہ خود ایرانی سفارتخانے اور قونصل خانے سے رابطہ کر کے اس واقعے پر بات کریں گے تاکہ ایران کی حکومت بھی متاثرہ خاندانوں کے لیے ہمدردانہ اور عملی اقدام کرے۔ انہوں نے زور دیا کہ پاکستان میں دہشت گردی ایک سنگین ناسور بن چکی ہے، جس کا خاتمہ صرف قومی یکجہتی، سنجیدہ سیاسی مکالمے اور ریاستی اداروں کی مکمل ہم آہنگی سے ہی ممکن ہے۔

محمد علی درانی کا کہنا تھا کہ پاک فوج اور حکومت دہشت گردی کے خلاف دن رات برسرِپیکار ہیں، لیکن اس مسئلے کا پائیدار حل قومی اتفاقِ رائے کے بغیر ممکن نہیں۔ انہوں نے قوم سے اپیل کی کہ وہ ان شہداء کو نہ صرف یاد رکھے بلکہ ان کے پسماندگان کے ساتھ کھڑی ہو کر انسانیت کا عملی مظاہرہ کرے۔

اوچ شریف (نامہ نگار حبیب خان) اوچ شریف اور اس کے گرد و نواح میں آج دو افسوسناک واقعات پیش آئے، جس سے علاقے میں غم و اندوہ کی فضا چھا گئی۔ ایک طرف تیز رفتار کاروں کی ریس نے ایک نوجوان کی قیمتی جان لے لی تو دوسری جانب غفلت کے باعث گندم کا ایک بڑا کھیت آتشزدگی کا شکار ہو گیا۔

پہلا دلخراش واقعہ اوچ شریف میں پیش آیا جہاں ریش لگاتی دو تیز رفتار کاروں کی زد میں آ کر اوچ موغلہ کا رہائشی نوجوان محمد ذیشان جاں بحق ہو گیا۔ متوفی جو مرکزی الشمس چوک میں واقع مغل موبائل شاپ پر ملازمت کرتا تھا، شام کے وقت ڈیوٹی سے فارغ ہو کر پیدل اپنے گھر جا رہا تھا کہ اچانک دو بے قابو کاریں اس سے ٹکرا گئیں۔ عینی شاہدین کے مطابق دونوں کاریں آپس میں ریس لگا رہی تھیں اور ان کی رفتار اس قدر زیادہ تھی کہ محمد ذیشان کو سنبھلنے کا موقع بھی نہ مل سکا اور وہ موقع پر ہی دم توڑ گیا۔

حادثے کی اطلاع ملتے ہی ریسکیو 1122 اور پولیس فوری طور پر جائے وقوعہ پر پہنچ گئیں لیکن تب تک محمد ذیشان کی زندگی کی ڈور ٹوٹ چکی تھی۔ موقع پر موجود ہر شخص غمزدہ تھا اور پورے علاقے میں سوگ کی فضا تھی۔ مرحوم کی نماز جنازہ اوچ موغلہ کے استانہ کافی والا گراؤنڈ میں ادا کی گئی، جس میں بڑی تعداد میں اہل علاقہ، عزیز و اقارب اور سیاسی و سماجی شخصیات نے شرکت کی۔ پولیس نے تحقیقات شروع کر دی ہیں اور گاڑیوں کا سراغ لگانے کے لیے سی سی ٹی وی فوٹیج حاصل کی جا رہی ہیں۔

اسی دوران اوچ شریف کے نواحی علاقے اڈا سلطان واہ، اوچ شریف روڈ پر ایک اور افسوسناک واقعہ پیش آیا جہاں ایک گندم کے کھیت میں اچانک آگ بھڑک اٹھی۔ تیز ہواؤں کے باعث آگ نے دیکھتے ہی دیکھتے پوری کھڑی فصل کو اپنی لپیٹ میں لے لیا۔ ریسکیو 1122 بہاولپور کنٹرول روم کو اطلاع ملتے ہی ایک فائر وہیکل اور ایمبولینس فوری طور پر روانہ کی گئیں۔ ریسکیو ذرائع کے مطابق ابتدائی تحقیقات سے معلوم ہوا ہے کہ مقامی افراد نے گندم کی کٹائی کے بعد کھیت میں بچ جانے والی فصل کی باقیات کو آگ لگا دی تھی۔ تیز ہوا کے باعث شعلے بے قابو ہو کر قریبی کھڑی فصل تک پہنچ گئے، جس سے صورتحال خطرناک ہو گئی۔ تاہم ریسکیو ٹیم نے بروقت پہنچ کر پیشہ ورانہ مہارت سے آگ پر قابو پا لیا اور اسے مزید پھیلنے سے روک دیا۔ ریسکیو حکام نے عوام سے اپیل کی ہے کہ فصل کی باقیات کو آگ لگانے جیسی غیر ذمہ دارانہ حرکت سے پرہیز کریں، جو نہ صرف خطرناک بلکہ قانوناً بھی جرم ہے۔ ان دو المناک واقعات نے اوچ شریف کے علاقے میں گہرے غم اور افسوس کی لہر دوڑا دی ہے۔

اوچ شریف،باغی ٹی وی (نامہ نگارحبیب خان) ایران کے صوبہ سیستان و بلوچستان میں ایک ہولناک واقعے نے انسانیت کو شرما سار کر دیا، جہاں ضلع بہاولپور اور احمد پور شرقیہ سے تعلق رکھنے والے آٹھ غریب محنت کشوں کو انتہائی بے دردی سے قتل کر دیا گیا۔ یہ دلخراش سانحہ ایرانی شہر مہرستان کے نواحی گاؤں "ہیزآباد پایین” میں پیش آیا، جو پاک ایران سرحد سے تقریباً 100 کلومیٹر دور واقع ہے۔

موصولہ اطلاعات کے مطابق یہ تمام مزدور ایک چھوٹی سی آٹو ورکشاپ پر اپنی روزی روٹی کے لیے کام کر رہے تھے، جب سفاک حملہ آوروں نے ان پر اچانک دھاوا بول دیا۔ نہتے اور بے گناہ مزدوروں کو پہلے وحشیانہ تشدد کا نشانہ بنایا گیا اور پھر ان کے ہاتھ پاؤں باندھ کر انتہائی قریب سے گولیاں مار کر موت کے گھاٹ اتار دیا گیا۔

اس سفاکانہ حملے میں شہید ہونے والے بدقسمت افراد کی شناخت درج ذیل ہے:

1. دلشاد ولد جندوڈا قوم سیال، گلی نمبر 8، خانقاہ شریف، سمہ سٹہ
2. دانش ولد دلشاد قوم سیال، خانقاہ شریف، سمہ سٹہ
3. جعفر ولد محمد رمضان قوم سیال، خانقاہ شریف، سمہ سٹہ
4. ناصر ولد محمد قوم کھیڑا، موضع رنگ پور
5. نعیم ولد غلام فرید قوم ساندھی، محلہ سردار آباد، خانقاہ شریف
6. عامر ولد محمد لیاقت قوم ساندھی، محلہ سردار آباد، خانقاہ شریف
7. محمد خالد قوم بھٹی، سکنہ مہراب والا، احمد پور شرقیہ
8. محمد جمشید ولد محمد صادق قوم آرائیں، چکی موڑ، احمد پور شرقیہ

اس المناک خبر کے بہاولپور، سمہ سٹہ، خانقاہ شریف اور احمد پور شرقیہ پہنچتے ہی ہر طرف کہرام مچ گیا۔ شہداء کے گھروں میں قیامت کا منظر ہے، جہاں بوڑھے والدین، بے سہارا بیوائیں اور معصوم یتیم بچوں کی دلدوز سسکیاں فضا کو سوگوار بنا رہی ہیں۔ غم سے نڈھال رشتہ داروں نے اپنی فریاد میں کہا، "ہمارے جگر گوشے دو وقت کی روٹی کمانے پردیس گئے تھے، مگر اب ان کی بے جان لاشیں واپس آ رہی ہیں. آخر ان کا کیا قصور تھا؟”

غم و اندوہ کی اس گھڑی میں مقامی تاجروں نے از خود اپنے کاروبار بند کر دیے ہیں اور مساجد میں شہداء کی روح کے ایصال ثواب کے لیے خصوصی دعاؤں اور قرآن خوانی کا اہتمام کیا جا رہا ہے۔ سیاسی، سماجی اور مذہبی رہنماؤں نے اس وحشیانہ واقعے کی سخت ترین الفاظ میں مذمت کرتے ہوئے حکومت پاکستان سے پرزور مطالبہ کیا ہے کہ فوری طور پر ایرانی حکام سے رابطہ کر کے ان سفاک قاتلوں کو کیفر کردار تک پہنچایا جائے۔

اہل علاقہ اور سوگوار خاندانوں نے حکومت پاکستان اور وزارت خارجہ سے فوری اور مؤثر کارروائی کا مطالبہ کیا ہے تاکہ شہداء کے جسد خاکی جلد از جلد وطن واپس لائے جا سکیں اور انہیں انصاف مل سکے۔ اس المناک سانحے نے پورے علاقے کو گہرے صدمے میں مبتلا کر دیا ہے۔

بی بی سی اردو کی رپورٹ کے مطابق ایران کے سیستان بلوچستان کے ضلع مہرستان میں آٹھ پاکستانی شہریوں کو ہلاک کرنے کی ذمہ داری کا دعویٰ ایک غیر معروف تنظیم کالعدم بی این اے یعنی بلوچ نیشنلسٹ آرمی کی جانب سے کیا گیا ہے۔

سرکاری سطح پر اس واقعے کی ذمہ داری قبول کرنے کے حوالے سے دعوے کی تاحال تصدیق نہیں ہوئی ہے تاہم ایران کے کسی علاقے سے پاکستانی شہریوں کی ہلاکت کے حوالے اس تنظیم کی ذمہ داری قبول کرنے کا غالباً یہ پہلا واقعہ ہے۔

تاہم بلوچستان میں ماضی میں اس تنظیم کی جانب سے بعض واقعات کی ذمہ داری قبول کرنے کے حوالے سے دعوے سامنے آتے رہے ہیں۔

میڈیا رپورٹس کے مطابق اس تنظیم کے نام سے آخری مرتبہ تشدد کے کسی بڑے واقعے کے حوالے سے ذمہ داری قبول کرنے کا جو دعویٰ سامنے آیا تھا وہ پاکستان کے شہر لاہور کے گنجان آباد اور مصروف انارکلی بازار میں جنوری 2022 میں دھماکے کا تھا جس میں تین افراد ہلاک اور 26 زخمی ہوئے تھے۔