Category: بہاولپور

اوچ شریف (باغی ٹی وی، نامہ نگار حبیب خان)تجاوزات کے خلاف آپریشن، شہری سہولیات کی نگرانی کا عزم

تفصیل کے مطابق اسسٹنٹ کمشنر احمد پور شرقیہ محمد نوید حیدر نے کہا ہے کہ وزیر اعلیٰ پنجاب کے گورننس بہتری انیشی ایٹوز کے تحت تجاوزات کے خاتمے اور دیگر اقدامات کی مستقل بنیادوں پر نگرانی جاری رہے گی۔ ڈپٹی کمشنر بہاول پور ڈاکٹر فرحان فاروق کی خصوصی ہدایات پر سی پیک سے منسلک مرکزی شاہراہوں کو غیر قانونی تجاوزات سے پاک کرنے کے لیے میونسپل انتظامیہ کو روزانہ کی بنیاد پر آپریشن کی ہدایت دی گئی ہے۔

گزشتہ روز اوچ شریف کے عباسیہ روڈ اور للووالی پل کے قریب غیر قانونی تجاوزات کے خلاف آپریشن کے دوران اسسٹنٹ کمشنر نے اینٹی انکروچمنٹ ٹیم کو ہدایات دیں۔ ان کے ہمراہ چیف آفیسر میونسپل کمیٹی اوچ شریف قاضی محمد نعیم بھی موجود تھے۔ اسسٹنٹ کمشنر نے کہا کہ صفائی ستھرائی، سیوریج لائنوں کی صفائی، آوارہ کتوں کی تلفی، عملے کی حاضری، اور واٹر فلٹریشن پلانٹس کے مکمل فعال ہونے سمیت دیگر امور کی نگرانی کی جائے گی۔

چیف آفیسر قاضی محمد نعیم نے کہا کہ تجاوزات کے خلاف مہم بلاتفریق روزانہ کی بنیاد پر چلائی جائے گی۔ دورانِ آپریشن عباسیہ روڈ اور للووالی پل کے وسط میں قائم تجاوزات کو ہٹا دیا گیا۔ شہریوں نے انتظامیہ کے اس اقدام کو سراہا اور امید ظاہر کی کہ یہ مہم تسلسل کے ساتھ جاری رکھی جائے گی۔

اوچ شریف،باغی ٹی وی(نامہ نگارحبیب خان) محکمہ لائیو اسٹاک کی غفلت، ویٹرنری ڈسپنسریاں خستہ حال، مویشی پال پریشان

تفصیل کے مطابق اوچ شریف وگردو نواح میں جانوروں کے علاج کے لئے قائم ہسپتالوں کی حالت انتہائی خراب ہے۔ محکمہ لائیو اسٹاک کی طرف سے اس اہم مسئلے پر کوئی سنجیدہ توجہ نہ دینے کی وجہ سے یہ ہسپتال بنیادی خدمات فراہم کرنے میں بھی ناکام ہیں۔

زیادہ تر ویٹرنری ہسپتالوں میں بنیادی سہولیات کی کمی ہے، جیسے کہ دوائیں، تشخیصی آلات اور عملہ۔ حیدر پور، چناب رسول پور اور دیگر علاقوں کے ویٹرنری ہسپتالوں کی عمارتیں خستہ حال ہیں اور وہاں بنیادی ضروریات فراہم نہیں کی جا رہی۔ مویشی پالوں کو اپنے جانوروں کا علاج کرنے کے لئے نان پروفیشنل افراد پر انحصار کرنا پڑ رہا ہے جو کہ جانوروں کی صحت کے لئے انتہائی خطرناک ثابت ہو رہا ہے۔ غیر پیشہ ور افراد کے غلط علاج کی وجہ سے کئی قیمتی جانور ہلاک ہوچکے ہیں۔ مویشی پالوں کو اپنے جانوروں کے علاج کے لئے شدید مشکلات کا سامنا ہے اور وہ مناسب سہولتوں کی کمی کی وجہ سے پریشانی میں ہیں۔

اوچ شریف اور اس کے اطراف میں روزانہ سینکڑوں جانور بیمار ہو جاتے ہیں لیکن ہسپتالوں میں ان کے علاج کے لئے مناسب دیکھ بھال کا انتظام نہیں۔ ہسپتالوں میں ویکسین کی کمی اور جانوروں کے علاج کے لئے کسی قسم کی سہولت دستیاب نہیں۔ دیہی علاقوں میں نان پروفیشنل افراد جانوروں کو ٹیکے لگا کر عوام کو گمراہ کر رہے ہیں۔مویشی پال کسانوں نے ارباب اختیار سے درخواست کی ہے کہ وہ فوری طور پر اس مسئلے پر نوٹس لیں اور ہسپتالوں میں ضروری سہولتیں فراہم کریں تاکہ وہ اپنے جانوروں کا مناسب علاج کرا سکیں.

اوچ شریف، باغی ٹی وی (نامہ نگار حبیب خان)سردی بڑھتے ہی فش مافیا نے مچھلی کی قیمت آسمان پر پہنچا دی

موسم سرما کے آغاز کے ساتھ ہی اوچ شریف اور گردونواح میں مچھلی کی قیمتوں میں ہوشربا اضافہ دیکھنے میں آیا ہے۔ فش مافیا نے دیسی مچھلی کے نام پر فارمی مچھلی مہنگے داموں فروخت کرنا شروع کر دی ہے جبکہ مضر صحت استعمال شدہ آئل میں پکانے کا سلسلہ بھی جاری ہے۔

شہریوں کا کہنا ہے کہ مچھلی کے نرخ ہزار روپے فی کلو تک پہنچ گئے ہیں، جس نے غریب اور متوسط طبقے کے لیے اس لذیذ خوراک کو ناقابل رسائی بنا دیا ہے۔ مقامی ہوٹلوں اور تلی ہوئی مچھلی کے اسٹالز پر قیمتوں میں غیر معمولی اضافہ دیکھنے میں آ رہا ہے جبکہ متعلقہ ادارے خاموش تماشائی بنے ہوئے ہیں۔

پرائس کنٹرول مجسٹریٹ مہر عمران سیال کا کہنا ہے کہ اشیائے خوردونوش کی قیمتوں پر زیرو ٹالرینس پالیسی ہے، عوام ایسے عناصر کی نشاندہی کریں تاکہ فوری کارروائی کی جا سکے۔

شہریوں نے مطالبہ کیا ہے کہ فش مافیا کے خلاف سخت کارروائی کی جائے اور مچھلی کی قیمتوں کو کنٹرول میں لایا جائے تاکہ عام عوام بھی سردیوں میں مچھلی کا لطف اٹھا سکیں۔

اوچ شریف، باغی ٹی وی (نامہ نگار حبیب خان)کھوجی کتوں کی نشاندہی پر معصوم ‘مجرم’ قرار، کئی خاندان دشمنیوں کی بھینٹ چڑھ گئے

ضلع بہاولپور میں کھوجی کتوں کے ذریعے جعلی سراغ رسانی کے نتیجے میں متعدد بے گناہ افراد مجرم قرار دیے جا چکے ہیں، جس سے کئی خاندان دشمنیوں اور تباہی کا شکار ہو چکے ہیں۔

تفصیلات کے مطابق مختلف شہروں میں ریٹائرڈ آرمی افسران کے نام پر قائم پرائیویٹ سراغ رساں کتوں کے دفاتر مبینہ طور پر معصوم لوگوں کے خلاف جھوٹے الزامات کے لیے کھوجی کتوں کا استعمال کر رہے ہیں۔ ان دفاتر کے ایجنٹ کسی بھی واردات کے بعد متاثرہ افراد سے رابطہ کر کے اپنی خدمات بیچنے کی کوشش کرتے ہیں۔

پولیس بھی ان ایجنٹوں کی حوصلہ افزائی کرتی ہے اور مدعیوں کو کھوجی کتوں کی خدمات حاصل کرنے کا مشورہ دیتی ہے۔ ذرائع کے مطابق سراغ رسانی کے لیے استعمال ہونے والے کتے اکثر "ایکسپائر” ہوتے ہیں اور ایجنٹوں کے اشاروں پر کسی بھی غریب کے گھر یا ویران جگہ پر بیٹھ جاتے ہیں۔

جہاں یہ کتے بیٹھتے ہیں، وہیں متاثرہ خاندان کو مجرم قرار دے دیا جاتا ہے اور پولیس اس شخص کے خلاف مقدمہ درج کر دیتی ہے۔ یہاں تک کہ بے گناہ افراد کے گھروں کا سامان تک اٹھا لیا جاتا ہے اور ان کے خلاف ایف آئی آر درج کی جاتی ہے۔

یہ واقعات نہ صرف بے گناہ افراد کے لیے ظلم و زیادتی کا سبب بن رہے ہیں بلکہ کئی خاندانوں کے درمیان دیرینہ دشمنیوں کو جنم دے رہے ہیں۔

عوام نے حکومت سے مطالبہ کیا ہے کہ ان پرائیویٹ سراغ رساں کتوں کے اداروں پر پابندی عائد کی جائے اور پولیس کو کھوجی کتوں کی نشاندہی پر ایف آئی آر کے اندراج سے روکا جائے تاکہ بے گناہ افراد کو انصاف فراہم کیا جا سکے اور ان کے خاندانوں کو تباہی سے بچایا جا سکے۔

اوچ شریف باغی ٹی وی (نامہ نگار حبیب خان)ایڈیشنل ڈپٹی کمشنر ہیڈ کوارٹر سمیرا ربانی کی زیر صدارت اجلاس منعقد ہوا جس میں تعلیمی اداروں میں سکیورٹی انتظامات کا جائزہ لیا گیا۔ ایڈیشنل ڈپٹی کمشنر نے ہدایت کی کہ تمام پبلک اور پرائیویٹ تعلیمی اداروں میں سکیورٹی کے فول پروف انتظامات کو یقینی بنایا جائے۔

انہوں نے کہا کہ تعلیمی اداروں میں چار دیواری کے ساتھ خاردار تار اور کلوز سرکٹ کیمرے نصب کرائے جائیں۔ اداروں کے داخلی اور خارجی راستوں پر بیرئیرز رکھے جائیں اور انٹری پوائنٹس پر انٹری رجسٹر بھی ترتیب دیا جائے۔ سمیرا ربانی نے مزید کہا کہ تمام تعلیمی اداروں میں سکیورٹی گارڈز تعینات کیے جائیں اور اداروں کے سربراہان اپنے اپنے اداروں کے سکیورٹی انتظامات کا تفصیلی معائنہ کریں۔

اجلاس میں اسسٹنٹ کمشنر بہاول پور سٹی، اسسٹنٹ کمشنر بہاول پور صدر اور تعلیمی اداروں کے سربراہان شریک تھے جبکہ دیگر تحصیلوں کے اسسٹنٹ کمشنرز نے ویڈیو لنک کے ذریعے اجلاس میں شرکت کی۔

اوچ شریف باغی ٹی وی (نامہ نگار حبیب خان) سانحہ اے پی ایس کی دلخراش یادیں آج بھی ہمارے ذہنوں پر نقش ہیں، اس سانحے میں معصوم طلبہ، اساتذہ اور عملے کو دہشت گردوں نے بربریت کا نشانہ بنایا۔ علم کے چراغ روشن کرتے ہوئے قربان ہونے والوں کو خراج عقیدت پیش کرتے ہیں۔

اوچ شریف میں تعلیم سمیت مختلف شعبہ ہائے زندگی سے تعلق رکھنے والی اہم شخصیات نے سانحہ اے پی ایس کی دسویں برسی کے موقع پر ایک سروے میں اظہار خیال کیا۔ ڈاکٹر محمد اجمل بھٹی نے کہا کہ ہم سانحہ اے پی ایس کے شہداء کے خاندانوں سے یکجہتی کا اظہار کرتے ہیں اور ملک کو امن کا گہوارہ بنانے کی جدوجہد میں شہداء کا بلند مقام ہے۔

محمد اکمل شیخ نے کہا کہ ہم اس دن کے موقع پر عہد کرتے ہیں کہ اے پی ایس کے شہداء کا خون رائیگاں نہیں جانے دیں گے اور دہشت گردی کے خلاف جنگ کو منطقی انجام تک پہنچائیں گے۔ محمد اسحاق جوئیہ نے کہا کہ پاکستانی قوم نے ثابت کیا ہے کہ ہم متحد ہو کر ہر چیلنج کا مقابلہ کر سکتے ہیں۔ دہشت گردی کے خاتمے کے لیے قومی یکجہتی اور جوانوں کی قربانیاں ہماری کامیابی کی ضمانت ہیں۔

ڈاکٹر فرحت عباس محسن نے کہا کہ 16 دسمبر 2014ء کا سانحہ آج بھی ترو تازہ ہے اور سید احمر رضا گیلانی نے اس دن کو یاد کرتے ہوئے کہا کہ 16 دسمبر 2014ء کو آرمی پبلک اسکول پشاور میں دہشت گردوں کے حملے میں تقریباً 149 افراد شہید ہوئے۔

زوار حسین بھٹہ نے کہا کہ سانحہ اے پی ایس پاکستان کی تاریخ کی سب سے بربریت بھری دہشت گردی کی کارروائیوں میں سے تھا۔ محمد اعجاز خان پٹھان، ملک ذوالفقار علی مکول، پروین عطا ملک (ایڈووکیٹ)، خواجہ نثار علی صدیقی، ارشاد احمد شاد، محمد عدنان تاتاری، جنید سیال، عمر خورشید سہمن، حبیب اللہ خان، ساجد بنوں اور دیگر شخصیات نے کہا کہ اے پی ایس پر حملہ پاک فوج کے آپریشن ضرب عضب کا ردعمل تھا، جو دہشت گردوں کے خلاف شروع کیا گیا تھا۔

یہ سانحہ نہ صرف قوم کو سوگوار کرتا ہے بلکہ ایک نیا عزم بھی دیتا ہے کہ دہشت گردی کے خلاف جنگ میں مزید استحکام اور عزم کے ساتھ لڑنا ہوگا۔ سانحہ اے پی ایس پاکستان کی قوم کو دہشت گردی کے خلاف یکجہتی کا پیغام دیتا ہے۔

اوچ شریف باغی ٹی وی (نامہ نگار حبیب خان) سب تحصیل اوچ شریف کا اکلوتا ڈاک خانہ عملے کی کمی کے باعث شدید مشکلات کا شکار ہے، جس کے نتیجے میں ڈاک کی ترسیل کا نظام درہم برہم ہو کر رہ گیا ہے۔ پوسٹ ماسٹر شہریوں کو فون کر کے انہیں ڈاک وصول کرنے کی اطلاع دیتے ہیں، کیونکہ پوسٹ مین نہ ہونے کی وجہ سے ڈاک کی تقسیم میں تاخیر ہو رہی ہے۔

تفصیلات کے مطابق، 45 سے زائد مواضعات پر مشتمل سب تحصیل اوچ شریف میں محکمہ ڈاک کی جانب سے عملے کی کمی کے باعث ڈاک خانہ کا دفتری نظام متاثر ہو رہا ہے۔ 25 برس قبل جب شہر کی آبادی چند ہزار افراد پر مشتمل تھی، یہاں پر چار ڈاکیے تعینات تھے، لیکن اب شہر کی آبادی کئی گنا بڑھ جانے کے باوجود محکمہ ڈاک نے عملے میں اضافہ کرنے کی بجائے کمی کر دی ہے۔

پوسٹ آفس اوچ شریف کا پوسٹ ماسٹر شہریوں کو خود فون کر کے انہیں ڈاک خانہ آ کر ڈاک وصول کرنے کی اطلاع دیتا ہے، جس کی وجہ سے کئی دنوں تک اہم ڈاک کی ترسیل متاثر ہو جاتی ہے۔ اس صورت حال میں شہریوں نے نجی کوریئر کمپنیوں کا رخ کر لیا ہے۔

عوامی و سماجی حلقوں نے حکومت سے مطالبہ کیا ہے کہ آبادی کے حساب سے پوسٹ آفس اوچ شریف میں عملے کی تعداد بڑھائی جائے اور پوسٹ مین کو بروقت ڈاک کی تقسیم کرنے کی ہدایت دی جائے تاکہ شہری ایک مرتبہ پھر سرکاری ادارے پر اعتماد کر سکیں۔