Category: بہاولپور

اوچ شریف (باغی ٹی وی نامہ نگار حبیب خان)تھانہ اوچ شریف سے چند فرلانگ کے فاصلے پر احمد پور شرقیہ روڈ پر واقع خواجہ دلاور میڈیکل اسٹور اینڈ کلینک میں رات کے وقت چوری کی واردات پیش آئی، جس میں نامعلوم ملزمان لاکھوں روپے مالیت کی ادویات اٹھا کر فرار ہوگئے۔

متاثرہ دکاندار کے مطابق اوچ شریف میں چوری اور نقب زنی کی وارداتیں بڑھتی جا رہی ہیں اور شہری شدید عدم تحفظ کا شکار ہیں۔ دکاندار نے آئی جی پنجاب اور ڈی پی او بہاولپور سے مطالبہ کیا ہے کہ چوروں کو فوری گرفتار کر کے علاقے میں بڑھتے ہوئے جرائم کے سلسلے کو روکا جائے۔

تھانہ اوچ شریف کے مہتمم فیصل امین نے بتایا کہ واقعے کی تحقیقات شروع کر دی گئی ہیں اور جلد ملوث ملزمان کو قانون کے کٹہرے میں لایا جائے گا۔
واقعے کے بعد شہریوں میں تشویش کی لہر دوڑ گئی ہے اور عوام نے تجارتی علاقوں کی سیکیورٹی مزید سخت کرنے کا مطالبہ کیا ہے۔

اوچ شریف (باغی ٹی وی نامہ نگار حبیب خان) اڈا ظاہر پیر ماماے والا نیشنل ہائی وے پر موٹر سائیکل اور ٹریلر کے درمیان خوفناک تصادم کے نتیجے میں ایک خاتون موقع پر جاں بحق جبکہ ایک شخص زخمی ہو گیا۔

ریسکیو ذرائع کے مطابق حادثہ تیز رفتاری کی وجہ سے پیش آیا۔ زخمی شخص کی شناخت محمود ولد حاجی حبیب (عمر 30 سال، سکونت موضع ممو آرائیں احمدپور شرقیہ) کے نام سے ہوئی ہے۔ اسے معمولی خراشیں آئیں اور ریسکیو اہلکاروں نے موقع پر ہی ابتدائی طبی امداد فراہم کر دی۔

ریسکیو سٹاف کے مطابق جاں بحق ہونے والی خاتون کو لواحقین ریسکیو ٹیم کے پہنچنے سے قبل ہی اپنے گھر منتقل کر گئے، ان کا گھر اڈا ظاہر پیر کے قریب واقع بتایا جاتا ہے۔

حادثے کی اطلاع ملتے ہی موٹر وے پولیس موقع پر پہنچ گئی اور ٹریلر ڈرائیور سمیت واقعے کی قانونی کارروائی شروع کر دی۔

اوچ شریف (باغی ٹی وی نامہ نگار حبیب خان)اوچ شریف کے نواحی علاقے چوک بھٹہ میں منشیات فروشوں کی گرفتاری کے لیے جانے والی پولیس پارٹی پر فائرنگ کے نتیجے میں دو سب انسپیکٹرز زخمی جبکہ ایک منشیات فروش ہلاک ہو گیا۔

تفصیلات کے مطابق، صدر پولیس اسٹیشن احمدپور کی ٹیم منشیات فروشوں کے خلاف کارروائی کے لیے چوک بھٹہ پہنچی تو ملزمان نے اچانک پولیس پر فائرنگ کر دی۔ فائرنگ کے نتیجے میں سب انسپیکٹر افتخار (عمر 53 سال) ٹانگ پر گولی لگنے سے زخمی ہو گئے جبکہ ایلیٹ فورس کے سب انسپیکٹر نذیر احمد بھی فائرنگ کی زد میں آ کر زخمی ہوئے۔

ریسکیو 1122 نے دونوں زخمی اہلکاروں کو جہانگیر رشید آباد کوٹلہ موسیٰ خان روڈ سے فوری طور پر تحصیل ہیڈ کوارٹر ہسپتال احمدپور منتقل کیا، جہاں انہیں ابتدائی طبی امداد فراہم کر کے مزید علاج کے لیے داخل کر لیا گیا۔

دوسری جانب پولیس کی جوابی فائرنگ میں منشیات فروش منظور موقع پر ہلاک ہو گیا۔ پولیس نے علاقے کو گھیرے میں لے کر مزید کارروائی شروع کر دی ہے۔

اوچ شریف (باغی ٹی وی،نامہ نگارحبیب خان) ریسکیو 1122 کنٹرول روم کے مطابق اوچ شریف کے علاقے بوہڑ واہ، تحصیل احمدپور میں دو موٹرسائیکلوں کے آمنے سامنے ٹکرانے کے بعد پیچھے سے آنے والا ٹریلر ان پر چڑھ گیا، جس کے نتیجے میں ایک شخص موقع پر ہی جاں بحق جبکہ دو افراد شدید زخمی ہوگئے۔

ریسکیو ٹیمیں کال سائن BPA-34 اور BPA-27 کے ذریعے 10 منٹ میں موقع پر پہنچ گئیں۔ ریسکیو اور پولیس کے مطابق حادثہ سنگل روڈ پر پیش آیا جو ترنڈا محمد پناہ سے اوچ شریف کی جانب جاتا ہے۔

ریسکیو اہلکار زخمیوں کو طبی امداد فراہم کر رہے ہیں جبکہ حادثے کی مزید تحقیقات پولیس کر رہی ہے۔

اوچ شریف(باغی ٹی وی،نامہ نگارحبیب خان) آئل ٹینکر اور خالی ٹرک میں ٹکر، ڈرائیور شدید زخمی،ریسکیو 1122 کی بروقت کارروائی

تفصیلات کے مطابق ریسکیو 1122 کنٹرول روم بہاولپور کے مطابق آج صبح 02:15 بجے ہیڈ پنج نند پٹرولنگ چیک پوسٹ کے قریب خوفناک ٹریفک حادثہ پیش آیا، جس میں آئل ٹینکر اور خالی ٹرک میں ٹکر کے نتیجے میں ایک شخص زخمی ہو گیا۔

مظفرگڑھ سے اوچ کی جانب جانے والا آئل ٹینکر، جس میں 15 ہزار لیٹر پٹرول موجود تھا، سڑک پر کھڑے ایک خالی ٹرک کے پچھلے حصے سے ٹکرا گیا۔ حادثے کے باعث ٹینکر کا ڈرائیور زخمی ہو گیا۔
ریسکیو 1122 کی دو ایمبولینسز،ای سی 385783 (علی پور)ای سی 782664 (اوچ شریف)حادثہ کی کال موصول ہوتے ہی روانہ ہوئیں جبکہ ریسپانس ٹائم 16 منٹ رہا۔

ریسکیو اہلکاروں نے موقع پر پہنچ کر زخمی ڈرائیور عبدالرحمن ولد محمد رفیق، عمر 42 سال ساکن جھگی والا، تحصیل علی پور، ضلع مظفرگڑھ کو ابتدائی طبی امداد فراہم کی۔ زخمی کے دائیں پاؤں کی ٹِبیا میں کلوز فریکچر جبکہ بائیں پاؤں میں اوپن فریکچر کی تصدیق ہوئی۔ مریض کو حالت کے پیشِ نظر آر ایچ سی اوچ شریف منتقل کر دیا گیا۔

آئل ٹینکر میں بڑی مقدار میں پٹرول موجود ہونے کے باعث ریسکیو ٹیم نے علاقہ کارڈن آف کر دیا جبکہ کسی بھی ممکنہ خطرے کے پیش نظر احمد پور سے بی ایف-06 فائر وہیکل کو موقع پر الرٹ رکھا گیا۔ پٹرولنگ پولیس بھی جائے حادثہ پر موجود رہی۔

ریسکیو حکام نے شہریوں سے اپیل کی ہے کہ حادثات کی صورت میں ہجوم سے گریز کریں اور ریسکیو عملے کے ساتھ تعاون کو یقینی بنائیں۔

اوچ شریف (باغی ٹی وی نامہ نگار حبیب خان)اوچ شریف کے نواحی علاقے چوک بھٹہ کوٹلہ موسیٰ خان روڈ پر ایک خوفناک حادثہ پیش آیا، جس میں 25 سالہ عمران ولد خادم حسین سکنہ کوٹلہ سلطان احمدپور موقع پر جاں بحق ہو گیا۔

تفصیلات کے مطابق، عمران اپنی CD 70 موٹرسائیکل پر جا رہا تھا کہ سامنے سے آنے والے ٹریکٹر کے پیچھے لگے ہل سے ٹکرانے کے بعد حادثہ پیش آیا۔ عینی شاہدین کے مطابق، عمران نے جب ٹریکٹر کو اوور ٹیک کرنے کی کوشش کی تو موٹر سائیکل بے قابو ہو گئی اور سیدھا ہل سے ٹکرا گئی، جس کے نتیجے میں اسے شدید ہیڈ انجری آئی اور وہ موقع پر دم توڑ گیا۔

حادثے کے بعد علاقے میں افسوس اور غم کی فضا قائم ہو گئی، اور لواحقین نے ڈیڈ باڈی کو شفٹ کرنے سے انکار کر دیا۔ اطلاع ملتے ہی مقامی پولیس اور ریسکیو ٹیمیں جائے حادثہ پہنچ گئیں۔

اوچ شریف (باغی ٹی وی نامہ نگار حبیب خان)اوچ شریف شہر میں غیر قانونی لاؤڈ اسپیکروں کا استعمال تیزی سے بڑھ رہا ہے، جس سے شہریوں کی زندگی مشکلات کا شکار ہے۔ شہر کے مختلف علاقوں میں سبزی فروش، ریڑھی بان، پھیری فروش اور فقیروں نے میگا فون اور اسپیکر کے ذریعے شور مچایا ہوا ہے، جس سے شہری اذیت میں مبتلا ہیں۔

مرکزی چوک الشمس، ٹینکی چوک، حسینی چوک، صدر بازار اور گلی محلوں میں صبح سے شام تک اونچی آواز میں اشیاء فروخت کی ریکارڈنگز چلائی جاتی ہیں۔ یہ صورتحال نہ صرف ایمپلی فائر ایکٹ کی صریح خلاف ورزی ہے بلکہ شہریوں کی نجی زندگی اور سکون بھی متاثر ہو رہا ہے۔

شہریوں کا کہنا ہے کہ مریض، طلباء اور بزرگ سب سے زیادہ متاثر ہو رہے ہیں، گھروں میں بزرگ اور بیمار آرام نہیں کر سکتے، اور بچوں کی تعلیم میں خلل پڑ رہا ہے۔
شہر کے اکثر علاقوں میں کباڑیہ، فروٹ فروش، آئس کریم فروش اور بھکاری مافیا نے لاؤڈ اسپیکروں کا استعمال معمول بنا رکھا ہے۔

عوامی و سماجی تنظیموں کے نمائندگان نے بتایا کہ پولیس اور ضلعی انتظامیہ کی خاموشی اس غیر قانونی عمل کی حوصلہ افزائی کے مترادف ہے۔
شہریوں نے ڈپٹی کمشنر بہاولپور، اسسٹنٹ کمشنر احمد پور شرقیہ، اور ڈی پی او بہاولپور سے مطالبہ کیا ہے کہ ایمپلی فائر ایکٹ پر سختی سے عمل درآمد کرایا جائے، تاکہ شہر کے باسی سکون سے زندگی گزار سکیں۔

اوچ شریف (باغی ٹی وی نامہ نگار حبیب خان)بینظیر انکم سپورٹ پروگرام میں مستحق خواتین کی رقوم میں مبینہ کرپشن اور ناجائز کٹوتیوں کے انکشافات کے باوجود متعلقہ اداروں کی خاموشی نے عوامی حلقوں میں شدید غم و غصہ پیدا کر دیا ہے۔ذرائع کے مطابق گذشتہ رپورٹس کے باوجود ایف آئی اے، انٹی کرپشن اور ضلعی انتظامیہ نے ابھی تک کسی باقاعدہ انکوائری یا کارروائی کا آغاز نہیں کیا۔

مقامی شہریوں اور سماجی کارکنوں کا کہنا ہے کہ اس معاملے میں ملوث فرانچائزی اسحاق مزاور اور بی آئی ایس پی کے اسسٹنٹ ڈائریکٹر عامر شہزاد کلاچی کے خلاف الزامات کے باوجود تحقیقات کا آغاز نہیں ہوا، اور بدعنوانی کا سلسلہ بدستور جاری ہے۔
مستحق خواتین سے ہر قسط میں 1000 سے 1500 روپے تک غیر قانونی کٹوتیاں کی جا رہی ہیں۔ خواتین کا کہنا ہے کہ وہ اپنی حق کی رقم لینے جاتی ہیں تو سسٹم بند یا اکاؤنٹ بلاک کا بہانہ بنایا جاتا ہے، لیکن اصل میں ان کی رقوم سے کئی جیبیں بھری جا رہی ہیں۔

سماجی تنظیموں نے الزام لگایا کہ بعض بااثر عناصر اس اسکینڈل کو دبانے کے لیے دباؤ ڈال رہے ہیں۔ دوسری جانب ضلعی انتظامیہ اور ایف آئی اے ذرائع اس معاملے پر خاموش ہیں، جس سے شکوک و شبہات مزید بڑھ گئے ہیں۔

عوامی نمائندوں اور سول سوسائٹی نے چیئرپرسن بنظیر انکم سپورٹ پروگرام محترمہ روبینہ خالد اور وزیر اعلیٰ پنجاب سے فوری ایکشن لینے کا مطالبہ کیا تاکہ مستحق خواتین کے حقوق محفوظ رہیں اور کرپشن میں ملوث عناصر کو نشان عبرت بنایا جا سکے۔
سماجی مبصرین کا کہنا ہے کہ اگر اس میں شفاف تحقیقات نہ ہوئیں تو یہ مالی بدعنوانی کے ساتھ عوامی اعتماد کے قتل کے مترادف ہوگا۔