Category: بہاولپور

بہاولنگر (باغی ٹی وی، نامہ نگار محمد عرفان) ڈپٹی کمشنر ذوالفقار احمد بھون کی زیر صدارت وزیراعلیٰ پنجاب کے سی ایم انیشیٹو کے حوالے سے اہم اجلاس ڈپٹی کمشنر آفس میں منعقد ہوا۔

اجلاس میں تمام تحصیلوں کے اسسٹنٹ کمشنرز نے ویڈیو لنک کے ذریعے شرکت کی اور وزیراعلیٰ کے جاری ترقیاتی منصوبوں اور عوامی فلاحی اقدامات پر تفصیلی تبادلہ خیال کیا گیا۔

ڈپٹی کمشنر نے کہا کہ وزیراعلیٰ پنجاب مریم نواز شریف کے وژن کے مطابق تمام محکمے عوامی خدمت کو اولین ترجیح دیں۔ انہوں نے ہدایت کی کہ ضلعی سطح پر مقررہ اہداف مقررہ مدت میں مکمل کیے جائیں اور عوامی شکایات کے ازالے کے لیے موثر اقدامات کیے جائیں۔

اجلاس میں سی ایم انیشیٹو کے تحت جاری ترقیاتی اور اصلاحاتی منصوبوں پر پیش رفت کی رپورٹ بھی پیش کی گئی۔

بہاولنگر (باغی ٹی وی، نامہ نگار محمد عرفان) کمشنر بہاولپور ڈویژن مسرت جبیں نے ضلع بہاولنگر کا تفصیلی دورہ کیا، جہاں انہیں ڈپٹی کمشنر ذوالفقار احمد بھون کی جانب سے وزیراعلیٰ انیشیٹیوز اور جاری ترقیاتی منصوبوں پر تفصیلی بریفنگ دی گئی۔

اجلاس میں ریونیو ریکوری، ڈینگی کی صورتحال، ترقیاتی کاموں اور سیلاب متاثرین کے امدادی اقدامات پر تبادلہ خیال کیا گیا۔
کمشنر کو بتایا گیا کہ سیلاب سے متاثرہ علاقوں میں امدادی کیمپ قائم کیے گئے ہیں اور متاثرین میں امدادی چیکس کی تقسیم کا عمل جاری ہے۔

بعد ازاں کمشنر مسرت جبیں نے ٹیکنیکل کالج میں قائم سیلاب ریلیف کیمپ کا دورہ کیا، متاثرہ شہریوں سے ملاقات کی اور امدادی عمل کا خود جائزہ لیا۔ انہوں نے انتظامیہ کو ہدایت کی کہ متاثرین کی بحالی اور امداد کی فراہمی کے لیے مزید مؤثر اور تیز اقدامات کیے جائیں۔

اجلاس میں ایڈیشنل ڈپٹی کمشنر ریونیو جام آفتاب احمد، اے ڈی سی جی ظہور حسین اور دیگر افسران نے بھی شرکت کی۔

کمشنر نے کہا کہ سیلاب سے متاثرہ خاندانوں کو حکومتی پیکجز کے تحت ریلیف فراہم کیا جا رہا ہے، جبکہ وزیراعلیٰ پنجاب مریم نواز شریف کے ویژن کے مطابق ترقیاتی اہداف کے حصول کے لیے کام کی رفتار مزید تیز کی جا رہی ہے۔

بہاولنگر (باغی ٹی وی نامہ نگار محمد عرفان)پنجاب حکومت کے وژن اور وزیر اعلیٰ پنجاب مریم نواز شریف کی ہدایات کی روشنی میں ضلع بہاولنگر میں غیر منقولہ جائیداد کی قانونی ملکیت کے تحفظ اور قبضہ مافیا کے خاتمے کیلئے مؤثر اقدامات شروع کر دیے گئے ہیں۔ اس سلسلے میں ڈپٹی کمشنر ذوالفقار احمد بھون اور ڈسٹرکٹ پولیس آفیسر کامران اصغر کی زیر صدارت ایک اہم اجلاس منعقد ہوا جس میں ایڈیشنل ڈپٹی کمشنر ریونیو جام افتاب سمیت متعلقہ محکموں کے افسران اور قانون نافذ کرنے والے اداروں کے نمائندگان نے شرکت کی۔

اجلاس میں ناجائز قبضوں کی شکایات کے فوری حل، قانونی مالکان کے حقوق کے تحفظ اور تنازعات کے تیز ترین ازالے کیلئے ایک خصوصی کمیٹی کے قیام کا فیصلہ کیا گیا۔ ڈپٹی کمشنر ذوالفقار احمد بھون نے واضح کیا کہ حکومت پنجاب عوام کو ان کے جائز حقوق دلانے کیلئے پرعزم ہے اور کوئی بھی شخص قانون سے بالاتر نہیں۔

انہوں نے شہریوں سے اپیل کی کہ وہ اپنی زمین یا جائیداد پر کسی بھی غیر قانونی قبضے یا ونڈا کے مسئلے کی صورت میں براہِ راست ڈپٹی کمشنر آفس یا ایڈیشنل ڈپٹی کمشنر آفس سے رجوع کریں تاکہ انہیں فوری انصاف فراہم کیا جا سکے۔

ڈی سی بہاولنگر نے کہا کہ یہ تمام اقدامات وزیر اعلیٰ پنجاب مریم نواز شریف کے وژن کے مطابق شفافیت، انصاف اور عوامی خدمت کے جذبے کے تحت کیے جا رہے ہیں تاکہ ضلع بہاولنگر کو قبضہ مافیا سے مکمل طور پر پاک کیا جا سکے۔

بہاولنگر (باغی ٹی وی، محمد عرفان نامہ نگار)ضلع بہاولنگر میں ڈپٹی کمشنر ذوالفقار احمد بھون کی زیر صدارت وزیراعلیٰ پنجاب کے کلیدی کارکردگی اشاریوں (KPIs) پر اہم ویڈیو لنک اجلاس منعقد ہوا۔ اس میں تمام تحصیلوں کے اسسٹنٹ کمشنرز، ضلعی محکموں کے افسران، ڈپٹی ڈائریکٹرز اور متعلقہ شعبوں کے نمائندوں نے شرکت کی۔

اجلاس میں مختلف محکموں کی کارکردگی، جاری ترقیاتی منصوبوں کی پیش رفت، عوامی سہولیات، ریونیو کلیکشن، صفائی، صحت و تعلیم کے اہداف اور گڈ گورننس کے نفاذ کا تفصیلی جائزہ لیا گیا۔

ڈپٹی کمشنر نے ہدایت کی کہ وزیراعلیٰ مریم نواز شریف کے ویژن کے مطابق عوامی خدمت کے منصوبوں پر عملدرآمد تیز کیا جائے تاکہ بہاولنگر صوبے کے بہترین اضلاع میں شامل ہو۔ انہوں نے افسران کو تحصیلوں میں ترقیاتی اہداف کے حصول، شکایات کے فوری ازالے اور فیلڈ موجودگی یقینی بنانے کی تاکید کی، اور غفلت یا تاخیر برداشت نہ ہونے کی تنبیہ کی۔

اجلاس میں ڈپٹی ڈائریکٹر ڈویلپمنٹ، سی ای او ہیلتھ، سی ای او ایجوکیشن، ایکسین بلڈنگ، ایکسین ہائی ویز، اسسٹنٹ کمشنرز چیستان، فورٹ عباس، ہارون آباد اور منچن آباد نے اپنی رپورٹس پیش کیں۔ ڈی سی نے اطمینان کا اظہار کرتے ہوئے کہا کہ تمام محکمے لگن اور دیانتداری سے ذمہ داریاں نبھائیں تاکہ عوام کو حکومتی سہولیات مل سکیں۔

بہاولنگر (باغی ٹی وی، نامہ نگار محمد عرفان) گورنمنٹ پرائمری سکول جوڈانا بستی بدترین خستہ حالی کا شکار ہو چکا ہے، جہاں تعلیمی ماحول زبوں حالی کی تصویر بن گیا ہے۔ سکول کی عمارت جگہ جگہ سے ٹوٹ چکی ہے، چھتوں سے پلستر جھڑ رہا ہے اور کلاس رومز کی حالت نہایت ابتر ہو چکی ہے، جس سے بچوں کی تعلیم اور تحفظ دونوں شدید متاثر ہو رہے ہیں۔

اہلِ علاقہ کے مطابق سکول کے دروازے بھی ٹوٹ پھوٹ کا شکار ہیں، جبکہ عمارت کے اندر نصب لوہے کو بعض عناصر نے نشی اتار کر فروخت کر دیا ہے۔ اس افسوسناک صورتحال نے سکول کی سیکیورٹی اور بچوں کی حفاظت پر سنگین سوالات اٹھا دیے ہیں۔

مقامی افراد نے مطالبہ کیا ہے کہ متعلقہ حکام فوری طور پر سکول کی عمارت کی مرمت کروائیں، سیکیورٹی کے مؤثر انتظامات کیے جائیں اور تعلیمی ماحول کو بہتر بنانے کے لیے عملی اقدامات اٹھائے جائیں۔ بصورت دیگر، یہ خستہ حال عمارت کسی بڑے حادثے کا سبب بن سکتی ہے۔

بہاولنگر (باغی ٹی وی، نامہ نگار محمد عرفان)بہاولنگر شہر کے مختلف علاقوں بشمول منچن آباد روڈ، خادم آباد، نزیر کالونی اور رہائشی گلیوں میں کھلے مین ہول، ٹوٹی سڑکیں اور بیٹھتی لینیں شہریوں کی زندگیوں کو شدید خطرے میں ڈال رہی ہیں۔ گہرے مین ہولوں کے ڈھکن غائب یا ٹوٹے ہوئے ہیں، جبکہ اردگرد کی سڑکیں بیٹھ چکی ہیں، جو رات کے اندھیرے یا بارش میں بڑے حادثات کا باعث بن سکتے ہیں۔

منچن آباد روڈ پر تیز ٹریفک کے بیچ کھلے مین ہول موٹر سائیکل سواروں اور پیدل چلنے والوں کے لیے روزانہ اذیت ہیں۔ اندرونی محلوں میں بچے ان جان لیوا گڑھوں کے قریب کھیلتے نظر آتے ہیں۔ متعدد مقامات پر گاڑیاں پھنسنے اور موٹر سائیکل سواروں کے زخمی ہونے کے واقعات رپورٹ ہوئے، مگر متعلقہ اداروں کی جانب سے کوئی عملی قدم نہیں اٹھایا گیا۔

شہریوں کا الزام ہے کہ سیوریج اور صفائی کا نظام منسپل کمیٹی بلدیہ بہاولنگر کے زیر انتظام ہے، لیکن ادارے کی غفلت اور عدم توجہی عوام کی جانیں داؤ پر لگا رہی ہے۔ بارہا شکایات کے باوجود محکمہ صرف “نوٹس لینے” تک محدود رہا۔ قانونی ماہرین کے مطابق بغیر ڈھکن مین ہول چھوڑنا بلدیاتی قوانین، شہری حقوق اور عوامی تحفظ کی کھلی خلاف ورزی ہے۔

عوام نے ڈپٹی کمشنر بہاولنگر اور صوبائی حکومت سے فوری مطالبہ کیا ہے کہ خطرناک مقامات بند کیے جائیں، ٹوٹی سڑکوں کی مرمت ہو اور ذمہ دار افسران کے خلاف کارروائی کی جائے، تاکہ مزید سانحات سے بچا جا سکے۔