Category: ڈیرہ غازی خان

ڈیرہ غازی خان (باغی ٹی وی، نامہ نگارشہزاد خان) سول لائن پولیس نے جرائم پیشہ افراد کی سرکوبی کے لیے اپنے اقدامات مزید سخت کر دیے ہیں۔ حساس مقامات پر سفید لباس میں اہلکار تعینات کیے گئے ہیں، جبکہ منشیات فروشوں اور قبحہ خانوں کے خلاف بھی بھرپور کارروائیاں جاری ہیں۔

ایس ایچ او تھانہ سول لائن نے میڈیا سے بات کرتے ہوئے بتایا کہ یہ تمام کارروائیاں ڈی پی او سید علی کی خصوصی ہدایات پر کی جا رہی ہیں۔ انہوں نے کہا کہ علاقہ میں چوری اور ڈکیتی کی وارداتوں کی روک تھام کے لیے کچہری روڈ اور ٹیچنگ اسپتال جیسے حساس مقامات پر سفید لباس میں سیکیورٹی اہلکار تعینات کر دیے گئے ہیں تاکہ جرائم پیشہ عناصر پر کڑی نظر رکھی جا سکے۔

ایس ایچ او نے مزید بتایا کہ علاقے میں منشیات فروشوں اور قبحہ خانوں کے خلاف بھی کارروائیاں تیز کر دی گئی ہیں۔ ان کارروائیوں کا مقصد نہ صرف مجرموں کو قانون کے کٹہرے میں لانا ہے بلکہ عوام میں تحفظ کا احساس پیدا کرنا بھی ہے۔

انہوں نے واضح کیا کہ جرائم پیشہ عناصر کے لیے کوئی نرمی نہیں برتی جائے گی۔ ایسے افراد جو معصوم شہریوں کا نقصان کرتے ہیں، انہیں قانون کے مطابق سخت سزائیں دی جائیں گی۔ سول لائن پولیس عوام کی حفاظت اور امن و امان کی بحالی کے لیے دن رات سرگرم ہے اور اس مقصد کے حصول کے لیے ہر ممکن اقدام کیا جا رہا ہے۔

عوام نے پولیس کے ان اقدامات کو سراہتے ہوئے امید ظاہر کی ہے کہ ان کارروائیوں سے علاقے میں جرائم کی شرح میں کمی آئے گی اور شہری محفوظ ماحول میں اپنی زندگی بسر کر سکیں گے۔

ڈیرہ غازی خان(باغی ٹی وی،سٹی رپورٹرجواد اکبر) ایکسائز انسپکٹر کا مبینہ اغواء، پولیس کی تفتیش جاری، ترجمان

تفصیل کے مطابق ڈیرہ غازی خان پولیس کے مطابق ایکسائز انسپکٹر شیخ سکندر الزمان اہل خانہ سے رابطہ منقطع ہونے پر لاپتہ قرار دیے گئے ہیں، جس کے بعد ان کے اغواء کا خدشہ ظاہر کیا گیا ہے۔ اطلاع ملتے ہی پولیس نے فوری کارروائی کرتے ہوئے اغواء کا مقدمہ درج کیا اور تفتیش کا آغاز کر دیا ہے۔

ترجمان کے مطابق مغوی کی بازیابی کے لیے جدید تکنیکی وسائل کا استعمال کیا جا رہا ہے۔ CCTV کیمروں کی فوٹیج کا باریک بینی سے جائزہ لیا جا رہا ہے جبکہ مغوی کے موبائل فون کے CDRs اور لوکیشن ڈیٹا کا تجزیہ بھی جاری ہے۔ مختلف مقامات پر چھاپے مارے جا رہے ہیں اور مشتبہ افراد کو شاملِ تفتیش کیا گیا ہے۔

اس خبر کو بھی پڑھیں
ڈیرہ غازی خان: ایکسائز انسپکٹر شیخ سکندرزمان مبینہ اغواء، مقدمہ درج
پولیس ترجمان نے مزید کہا کہ ڈی پی او سید علی کی ہدایت پر ایس پی انویسٹیگیشن کی سربراہی میں خصوصی ٹیم تشکیل دی گئی ہے، جو مغوی کی تلاش میں مصروف عمل ہے۔ شہریوں کے جان و مال کا تحفظ پولیس کی اولین ترجیح ہے اور جلد مثبت نتائج کی امید ہے۔

ڈیرہ غازی خان(باغی ٹی وی ،سٹی رپورٹرجواد اکبر) ایکسائز انسپکٹر شیخ سکندرزمان مبینہ اغواء، مقدمہ درج

تفصیل کے مطابق ڈیرہ غازی خان کے تھانہ گدائی میں ایکسائز انسپکٹر شیخ سکندر الزمان کے اغواء کا مقدمہ درج کر لیا گیا ہے۔ ان کے بھائی مبشر الزمان کی درخواست پر پولیس نے کارروائی کا آغاز کیا۔ مبشر الزمان نے پولیس کو بتایا کہ ان کے بھائی، شیخ سکندر الزمان جو ڈیرہ غازی خان میں ایکسائز انسپکٹر کے طور پر کام کرتے ہیں، گزشتہ شب اپنی گاڑی ویگنار کار نمبر ANQ429 پر روانہ ہوئے تھے لیکن وہ واپس نہیں لوٹے۔

مبشر الزمان نے مزید بتایا کہ ان کے بھائی کا موبائل فون بند آ رہا تھا جس کی وجہ سے انہیں تشویش ہوئی۔ انہوں نے متعدد بار مختلف نمبروں سے رابطہ کیا لیکن کامیاب نہ ہو سکے۔ اس دوران ریحان اکبر اور جاوید ستار بھی ان کی مدد کے لیے آئے اور مل کر شیخ سکندر الزمان کی تلاش کی گئی مگر ابھی تک ان کا پتہ نہیں چل سکا۔

مبشر الزمان نے اس بات کا قومی شبہ ظاہر کیا کہ ان کے بھائی کو اغواء کیا گیا ہے اور ان کی گمشدگی کے پیچھے نامعلوم افراد کی سازش ہو سکتی ہے۔ ان کی درخواست پر پولیس نے مقدمہ درج کرکے تفتیش شروع کر دی ہے۔ ان کی درخواست میں یہ بھی کہا گیا ہے کہ قانونی کارروائی کے تحت مناسب اقدامات کیے جائیں۔

پولیس نے اس معاملے کی ابتدائی تفتیش کی اور مقدمہ 365 کے تحت درج کر لیا ہے، جس پر مزید تحقیقات جاری ہیں۔

پیرعادل(باغی ٹی وی،نامہ نگارباسط علی گاڈی)ڈیرہ غازی خان کے علاقے میں انڈس ہائی وے پر تیز رفتاری کے باعث ایک مسافر کوسٹر (LWN-1325) حادثے کا شکار ہو کر الٹ گئی۔ کوسٹر میں ایک ہی خاندان کے افراد سوار تھے جو پیر عادل سے وزیرستان میں شادی کی تقریب کے لیے جا رہے تھے۔ حادثے کے نتیجے میں 12 افراد زخمی ہو گئے جن میں سے 4 کی حالت تشویشناک بتائی جا رہی ہے۔

ریسکیو 1122 کنٹرول روم کو ایمرجنسی کال موصول ہونے پر فوری کارروائی عمل میں لائی گئی۔ قریبی موجود دو ایمبولینسز اور سینٹرل اسٹیشن سے دو مزید ایمبولینسز اور ایک ریسکیو وہیکل جائے حادثہ پر روانہ کی گئیں۔ ریسکیو ٹیم نے موقع پر زخمیوں کو ابتدائی طبی امداد فراہم کی اور انہیں علامہ اقبال ٹیچنگ ہسپتال ڈیرہ غازی خان منتقل کیا۔

ریسکیو ٹیم نے الٹی ہوئی کوسٹر کو سڑک سے ہٹا کر محفوظ مقام پر منتقل کر دیا۔ حادثہ کالا شہر کے قریب انڈس ہائی وے پر پیش آیا اور تمام زخمیوں کا تعلق پیر عادل سے ہے۔ حادثے کی اطلاع ڈی سی کنٹرول اور پولیس کو بھی فراہم کر دی گئی ہے۔

ڈیرہ غازیخان (باغی ٹی وی رپورٹ)سخی سرور میں اوقاف کی زمینوں پر قبضے، ہوشرباء کرپشن اسکینڈل

تفصیلات کے مطابق ڈیرہ غازی خان کے قریب سخی سرور میں محکمہ اوقاف کی اربوں روپے مالیت کی زمینوں پر بڑے پیمانے پر قبضے کا انکشاف ہوا ہے۔ اس غیر قانونی عمل میں محکمے کے اہلکاروں کے ملوث ہونے کے الزامات بھی سامنے آئے ہیں۔ قبضہ مافیا نے محکمے کے اہلکاروں کی مدد سے ایک منظم نیٹ ورک قائم کیا اور ہزاروں ایکڑ اراضی پر قبضہ کر لیا، جس سے نہ صرف حکومت کو مالی نقصان پہنچا بلکہ مقامی افراد کی زندگیوں پر بھی منفی اثرات مرتب ہوئے ہیں۔

سخی سرور میں محکمہ اوقاف کی ہزاروں ایکڑ زرعی زمینوں پر قبضہ کیا جا چکا ہے۔ یہ زمینیں نہ صرف حکومت کی آمدن کا ایک اہم ذریعہ تھیں بلکہ مقامی کمیونٹی کے لیے روزگار کا بھی وسیلہ تھیں۔ تحقیقات سے یہ بات سامنے آئی ہے کہ محکمہ اوقاف کے زونل ایڈمنسٹریٹر سمیت دیگر اہلکاروں نے قبضہ مافیا کو سرکاری زمینوں پر قبضہ کرنے میں مدد فراہم کی۔ ان اہلکاروں نے زمینوں کی نشاندہی کی اور قبضے کے عمل میں سہولت فراہم کی۔

ذرائع کے مطابق محکمے کے اہلکاروں نے ہر قبضے کے بدلے رشوت وصول کی۔ اس کے علاوہ، قبضہ مافیا نے زمینوں کی غیر قانونی خرید و فروخت سے اربوں روپے کا فائدہ اٹھایا۔ قبضہ شدہ اراضی کی وجہ سے مقامی افراد کے لیے روزگار کے مواقع کم ہو گئے ہیں اور زمینوں کی قیمتیں بھی غیر معمولی طور پر بڑھ گئی ہیں، جس سے ان کی زندگیوں میں مشکلات آئی ہیں۔

عوام اور سماجی حلقوں نے وزیر اعلیٰ پنجاب مریم نواز سے مطالبہ کیا ہے کہ وہ اس سنگین مسئلے کا نوٹس لیں اور ذمہ دار افسران کے خلاف سخت کارروائی کریں۔ محکمہ اوقاف نے موقف اختیار کیا ہے کہ ان کے پاس ناجائز تعمیرات کو مسمار کرنے کا اختیار اور وسائل موجود نہیں، اور وہ بارہا اعلی حکام کو تحریری طور پر آگاہ کر چکے ہیں، تاہم قبضہ مافیا دوبارہ زمینوں پر قابض ہو جاتا ہے۔

عوامی سطح پر اس معاملے کی مکمل تحقیقات کا مطالبہ کیا جا رہا ہے تاکہ ملوث افراد کے خلاف قانونی کارروائی کی جائے۔ قبضہ شدہ زمینوں کو فوراً واپس کیا جائے اور انہیں اپنے اصل مقصد کے لیے استعمال کیا جائے۔ محکمہ اوقاف کے تمام ریکارڈ کو آن لائن کرنے کی ضرورت ہے تاکہ عوامی نگرانی ممکن ہو سکے۔ مزید برآں، قانون نافذ کرنے والے اداروں کو اس معاملے میں فعال کردار ادا کرنا چاہیے اور قبضہ مافیا کے خلاف سخت کارروائی کرنی چاہیے۔

سخی سرور میں اوقافی زمینوں پر قبضہ ایک سنگین مسئلہ بن چکا ہے جس کے حل کے لیے فوری اقدامات کی ضرورت ہے۔ حکومت کو اس معاملے کی سنجیدگی کو سمجھتے ہوئے ملوث افراد کے خلاف سخت کارروائی کرنی چاہیے تاکہ اس قسم کی کرپشن کا خاتمہ کیا جا سکے اور مقامی افراد کو ان کی جائز زمینوں تک رسائی حاصل ہو سکے۔

ڈیرہ غازی خان (باغی ٹی وی،سٹی رپورٹر جواداکبر) آج صبح تھانہ کالا کی حدود میں فائرنگ کے ایک واقعے میں ایک شخص جاں بحق اور تین افراد زخمی ہوگئے۔ پولیس کو اطلاع ملتے ہی ڈی ایس پی صدر حماد نبی اور ایس ایچ او تھانہ کالا طاہر سلیم فوری طور پر موقع پر پہنچے۔

عینی شاہدین کے مطابق گاڑی میں سوار افراد ڈیرہ غازی خان جا رہے تھے کہ اچانک موٹر سائیکل سوار ملزمان نے ان پر فائرنگ کر دی۔ فائرنگ کے نتیجے میں محمد شہباز موقع پر ہی جاں بحق ہو گئے جبکہ تین دیگر افراد زخمی ہو گئے۔

پولیس کے مطابق واقعے کی وجہ پرانی دشمنی ہو سکتی ہے۔ ڈیرہ غازی خان پولیس نے ملزمان کی گرفتاری کے لیے چھاپے مارنے شروع کر دیے ہیں اور قانون کے مطابق مزید کارروائی جاری ہے۔

ڈی پی او ڈیرہ غازی خان سید علی نے واقعے کا نوٹس لیتے ہوئے فوری رپورٹ طلب کی ہے اور ملزمان کی جلد گرفتاری کی ہدایت کی ہے۔ پولیس کی کوشش ہے کہ ملزمان کو قانون کی گرفت میں لایا جائے تاکہ شہریوں کی جان و مال کا تحفظ کیا جا سکے۔

ڈیرہ غازی خان(باغی ٹی وی رپورٹ) پبلک ٹرانسپورٹ کی کھٹارہ گاڑیاں حادثات اور آلودگی کا باعث بن گئیں، شہریوں کا فوری ایکشن کا مطالبہ

تفصیل کے مطابق ڈیرہ غازی خان کی سڑکوں پر ناقص حالت میں چلنے والی پبلک ٹرانسپورٹ کی گاڑیاں شہریوں کے لیے سنگین مسائل پیدا کر رہی ہیں۔ رکشہ سے لے کر ہیوی ٹرکوں تک، اکثر گاڑیاں فٹنس کے معیارات پر پوری نہیں اترتیں، جس کے نتیجے میں روزانہ حادثات اور صوتی و فضائی آلودگی میں خطرناک حد تک اضافہ ہو چکا ہے۔

قانون کے مطابق، پنجاب موٹر وہیکل آرڈینینس 1965ء اور موٹر وہیکل رول 1969ء کے تحت پنجاب میں چلنے والی تمام اقسام کی پبلک سروس وہیکلز، چاہے وہ ہیوی ڈیوٹی ہوں، لائٹ ڈیوٹی، یا رکشہ وغیرہ، کے لیے ہر چھ ماہ بعد فٹنس سرٹیفکیٹ حاصل کرنا لازمی ہے۔ تاہم، ڈیرہ غازی خان میں یہ قانون عملاً نظرانداز کیا جا رہا ہے، اور متعلقہ محکمے جیسے وہیکل رجسٹریشن اور ایگزامنیشن پاسنگ ڈپارٹمنٹ کی غفلت اور نااہلی کی وجہ سے ہزاروں شہریوں کی زندگیوں کو خطرے میں ڈال دیا گیا ہے۔

حکومت پنجاب نے ڈیرہ غازی خان سمیت مختلف شہروں میں "وہیکل انسپیکشن اینڈ سرٹیفیکیشن سسٹم” (VICS) کے تحت گاڑیوں کی فٹنس چیک کرنے اور سرٹیفکیٹ جاری کرنے کے سنٹرز قائم کیے ہیں۔ مگر ڈیرہ غازی خان میں یہ عمل یا تو سست روی کا شکار ہے یا مکمل طور پر التوا میں ہے۔ ان سنٹرز میں فٹنس سرٹیفکیٹ جاری کرنے کا مقصد گاڑیوں کی معیاری فٹنس کو یقینی بنانا ہے تاکہ حادثات اور آلودگی کی شرح کم کی جا سکے، لیکن یہاں سہولت کا عدم انتظام شہریوں کو مزید مشکلات میں مبتلا کر رہا ہے۔

شہری حلقوں نے وزیر ٹرانسپورٹ اتھارٹی اور کمشنر ڈیرہ غازی خان سے مطالبہ کیا ہے کہ وہ فوری طور پر فٹنس چیکنگ کا نظام بحال کریں اور شہر کی سڑکوں پر دوڑنے والی گاڑیوں کی فٹنس چیکنگ کے لیے خصوصی مہم کا آغاز کریں۔ ان کا کہنا ہے کہ گاڑیوں کی فٹنس چیکنگ میں کوتاہی انسانی جانوں کے نقصان کا باعث بن سکتی ہے اور اس مسئلے کا فوری حل نکالا جانا چاہیے تاکہ سڑکوں پر محفوظ اور ماحول دوست سفر کو یقینی بنایا جا سکے۔