Category: ڈیرہ غازی خان

ڈیرہ غازی خان(تنویر احمد) سابق وزیر اعلیٰ پنجاب و پاکستان پیپلز پارٹی کے رہنما سرداردوست محمدخان کھوسہ نے کہا ہے کہ پاکستان کے تین صوبوں کو اس وقت وفاق چلانے کے باوجود بھی کرپشن اور لاقانونیت عروج پر ہے جبکہ آرٹیکل 149لاگو کرکے صوبہ سندھ کے اختیارات کووفاق کے کنٹرول میں لانے کوشش کی جارہی ہے جن حالات میں اس وقت پنجاب گزر رہا ہے آرٹیکل 149 یہاں پر بھی لاگو ہونا چائیے اور حالات کو کنٹرول نہ کیا گیا تو یہ سلیکٹڈ حکومت ملک کو لے ڈوبے گی ورآنے والے وقتوں میں پاکستان کو سنبھالنا مشکل ہوجائے گاجبکہ نیشنل سیکورٹی سے منسلک ادارے حالات کو مد نظر رکھتے ہوئے اپنا مثبت کردار ادا کریں وہ اپنی رہائش گاہ پر ایک پریس کانفرنس سے خطاب کررہے تھے انہوں نے کہا کہ حکومت ہوش کے ناخن لے جب اکتوبر میں طبل بجا تو تو لاک ڈاؤن صرف اسلام آباد تک نہیں بلکہ سندھ،جنوبی پنجاب،سنٹرل پنجاب اور اپر پنجاب تک ہوگا اور پھر یہ سلسلہ تھمے گا نہیں انہوں نے کہا کہ موجودہ حکومت تمام معاملات میں ناکام ہوچکی ہے کنٹینر سے لیکر وزیر اعظم کی کرسی تک عمران خان کی باتیں صرف ہوائی دعوؤں اور یو ٹرن کے گردد ہی گھومتی ہے عوام کو مہنگائی کے سونامی میں دھکیل کر خودکشیوں پر مجبور کردیا ہے ایک کروڑ نوکریوں کا جھانسہ دیکر اقتدار میں آنے والوں نے لاکھوں افراد کے منہ سے روٹی کا نوالہ تک چھین لیا وزیر اعظم کی وجہ سے کشمیر کا ایشو دنیا میں مضبوط طریقے سے سامنے نہیں لایا گیااور یہ کہتے ہیں کہ اگر بھارت نے آزاد کشمیر میں کوئی حرکت کی تو ہم اینٹ کا جواب پتھر سے دیں گے کیا مقبوضہ کشمیر سے ہمارا کوئی تعلق نہیں ہے جبکہ عمران خان کی کشمیر پالیسی صرف اتنی ہے کہ ہر جمعہ گھروں سے باہر نکل سڑک پر آدھا گھنٹہ انڈیا کے خلاف نعرے بازی کر کے سکون سے جاکر سو جائیں سردار دوست محمد خان کھوسہ نے کہا کہ پی ٹی آئی نے عام انتخابات سے قبل جنوبی پنجاب کو الگ شناخت دینے سمیت عوام سے کیا گیا کوئی ایک وعدہ بھی پورا نہیں کیا جبکہ جنرل الیکشن سے قبل ایلکٹیبلز کو جنوبی پنجاب صوبہ محاذ میں دھکیلا گیا اور پھر جنوبی پنجاب صوبہ محاذ کو کو پی ٹی آئی میں ضم کرکے جنوبی پنجاب الگ صوبہ بنانے کا وعدہ کیا گیالیکن صوبہ تو دور کی بات موجودہ حکومت جنوبی پنجاب کا الگ سیکرٹریٹ بھی نہ بنا سکی انہوں نے کہا کہ اقرباء پروری، کرپشن اور لوٹ مارکے اثرات وفاق سے لیکر تحصیل سطح پرواضح دکھائی دیتے ہیں سردار دوست محمد خان نے کہا کہ پسماندہ علاقے سے سلیکٹڈ وزیراعلی کے ضلع کا یہ حال ہے کہ ایک سال کے دوران تین کمشنر دو آر پی او اور پانچ ڈی پی اوز تبدیل کیے گئے کیا یہی پر فارمنس ہے ان کا مزید کہنا تھا کہ یہ کہتے تھے کہ جب تیل گیس چینی اور بجلی کے نرخوں میں اضافہ ہو تو سمجھیں کہ حکمران چور ہیں اب بتائیں کہ کون چور ہیں انہوں نے کہا کہ ڈی جی خان میں بر سر اقتدار ارکان اسمبلیوں کو نہ شہریوں کے مسائل نظر آتے ہیں نہ ہی ان کے پاس اتنا ٹائم ہے کہ عوام کے مسائل کو سمجھ سکیں پنجاب اس وقت لاوارث صوبہ بن چکا ہے سابق وزیر اعلی کا کہنا تھا کہ وفاق ہو یا پنجاب تمام جگہوں پر کرپشن اقرباء پروری اور کرپشن عروج پر ہے اپوزیشن ارکان کے ساتھ امتیازی سلوک برتا جارہا ہے جبکہ کروڑوں کی کرپشن میں ملوث حکومتی ارکان سے کوئی پوچھنے والا نہیں انہوں نے کہا کہ ڈی جی خان میں انکے دور کے سیوریج لائن پر ناقص کام کا الزام لگانے والوں یاد رکھناچاہئے کہ اسی پائپ لائن سے2010کے سیلابی پانی کو نکالا گیا جبکہ حکومت کی طرف سے دو ارب روپے سے زائد کا سیوریج کو منصوبہ محض حکومتی سرمائے کو ضائع کرنے کے مترادف ہے انکا کہنا تھا کہ موجود صورتحال میں صرف بیس فیصد سیوریج لائن خراب ہے جس کو ریپیئر کیا جاسکتا ہے انکا کہنا تھا سابقہ مئیر شاہد چانڈیہ نے اپنی کار کردگی سے خود کو نااہل ثابت کیا سردار دوست محمد کا کہنا تھا کہ ڈی جی خان کے عوام کے جنگ لڑنے کے لیے جاگ ڈیرہ جاگ مہم کا آغاز کیا جارہا ہے کیونکہ اس وقت شہرگندگی کے انبار میں ڈوب چکا ہے جبکہ ہماری مہم کا مقصد ڈیرہ کے ہر گلی میں جاکر عوامی مسائل کی نشاندہی کرنا اور عوام کو اپنے تعاون کا یقین دلایا ہے اس موقع پر پی پی پی رہنماء بہرام خان بزدار اور شبلی شب خیز غوری سمیت دیگر درجنوں کارکنان موجود تھے۔

ڈیرہ غازیخان(تنویر احمد) مسلم لیگ ن کے سابق ضلعی وائس چیئرمین سردار احمد خان لغاری نے کہا ہے کہ حکومت نے بے روزگاری اور بدامنی کے خلاف کوئی اقدام نہیں اٹھایاتین بار ملک کے وزیراعظم منتخب ہونے والے قائد نواز شریف کو جان بوجھ کر پابند سلاسل کیا گیا ہے ان خیالات کا اظہا ر انہوں نے صحافیوں سے خصوصی گفتگو کرتے ہوئے کیا انہوں نے کہا کہ تین بار ملک وزیر اعظم منتخب ہونے والے قائد نواز شریف کو جان بوجھ کر پابند سلاسل کیا گیا ہے موجودہ حکومت نے غریب بے روزگاری اور بدامنی کے خلاف ابھی تک کوئی اقدام نہیں اٹھایا تحریک انصاف صرف اپنی حکومت بچانے کیلئے تگ ودو کررہی ہے عمران خان اقتدار میں آنے کے بعد عوام کو صرف زبانی جمع خرچ کررہے ہیں عوام پر ٹیکسوں کا بوجھ ڈال کر غریب کا خون نچوڑ رہے ہیں حکمرانوں نے ناانصافیاں کرکے عوام سے حقیقی خوشیاں چھین لی ہیں انہوں نے مزید کہا کہ حکومت نے بے روزگاری اور بدامنی کے خلاف کوئی اقدام نہیں اٹھایا ریاست مدینہ بنانے کے دعویداروں نے ابھی تک ایک بھی فلاحی منصوبہ شروع نہیں کیا میاں برادران کی عوام کیلئے کاوشیں کسی سے ڈھکی چھپی نہیں ملک اور عوام کیلئے لازوال قربانیاں دیکر ملک کو ایشین ٹائیگر بنایا گیا۔

ڈیرہ غازیخان(تنویر احمد)وزیر اعلی پنجاب سردار عثمان احمد خان بزدار کی ہدایت پر ملتان، لاہور،فیصل آباد کی واسا ٹیم نے ڈیرہ غازیخان شہر کے سیوریج کے معاملات سنبھال لیے. ڈی جی خان واساکے قیام تک یہ ٹیم کام کرے گی. میونسپل کارپوریشن کی دکانوں کے کرایہ کی مد میں 27کروڑ روپے کے واجبات کی وصولی کیلئے کیس نیب کو بھیجا جائے گا. 101نادہندہ دکانداروں کو نوٹسز جاری کردیئے گئے ہیں. نقشہ او ر دیگر فیس ادا نہ کرنے والوں کی دکانیں اور دیگر 52کاروباری مراکز سربمہر کر دیئے گئے ہیں. آپریشن میں کسی بھی دباؤ کو خاطر میں نہیں لایا جارہا. یہ بات کمشنر ڈیرہ غازیخان ڈویژن مدثر ریاض ملک نے سرکٹ ہاوس میں اجلاس اور میڈیا بریفنگ میں کہی. انہوں نے کہاکہ واسا کی ٹیم پبلک ہیلتھ آفس میں کام کرے گی. ایک ماہ کے اندر ڈیرہ شہر میں صفائی اور سیوریج معاملات میں بہتری نظر آنا شروع ہو جائے گی. ڈی جی سیمنٹ فیکٹری کی طرف سے پانچ رکشے عطیہ کر دیئے گئے ہیں باقی بارہ رکشے ایک روز کے اندر پہنچا د یئے جائیں گے.. شہر سے روزانہ 210ٹن کوڑا کرکٹ اکٹھا ہوتا ہے جس کو ٹھکانے لگانے کیلئے بھاری مشینری او رافرادی قوت کی ضرور ت ہے ڈی جی سیمنٹ کی انتظامیہ شہر سے کوڑا اٹھانے میں معاونت کرے گی. وزیر اعلی پنجاب سردار عثمان احمد خ ان بزدار شہر کی صفائی اور سیوریج مسائل کے حل کیلئے ہنگامی بنیادو ں پر اقدامات کررہے ہیں. ضرورت پڑنے پر پنڈی او ردیگر شہروں سے بھی واسا ٹیموں کی خدمات حاصل کی جاسکتی ہیں. انہوں نے کہاکہ ڈیرہ غازیخان میں واسا ملتان کا سب آفس قائم کردیاگیاہے. انہوں نے بتایاکہ میونسپل کارپوریشن کے مسائل کے حل کیلئے 89ڈرائیورز کی خدمات قواعد و ضوابط پورے کرتے ہوئے ٹھیکیدار کے ذریعے لی جائیں گی. کمشنر نے بتایا کہ کارپوریشن نے چھ روز کے دوران غیر قانونی تعمیرات کے مالکان سے نقشہ او ردیگر فیس کی مد میں 24لاکھ روپے وصول کر لیے ہیں. انہوں نے بتایاکہ سٹی پارک کا ڈیزائن تیار کیاجارہا ہے. ڈیزائن کے مطابق کوئی بھی درخت کاٹنے نہیں دیا جائیگا.سٹی پارک کا نام کشمیر پارک میں تبدیل کر دیاگیاہے.کمشنر نے بتایا کہ بی ایم پی سرائے کو از سر نو تعمیر کیا جائے گا جس کیلئے ڈیڑھ کروڑ روپے کے فنڈز منظو رکر لیے گئے ہیں. سبزی منڈی کو شہر سے باہر تونسہ روڈ بائی پاس پر منتقل کیاجائے گا. انہوں نے بتایاکہ ڈیرہ غازیخان کی سو سے زائد ہاوسنگ کالونیوں کے مالکان کو نوٹسز جاری کر دیئے گئے ہیں. کمشنر نے بتایا کہ کارڈیالوجی انسٹی ٹیوٹ کیلئے پرانی سبزی منڈی اور دھوبی گھاٹ کی جگہ منتخب کر لی گئی ہے چالیس کنال رقبہ پر انسٹی ٹیوٹ قائم کیا جائیگا اور دس اکتوبر تک منصوبے کا سنگ بنیاد رکھ دیا جائے گا. کمشنر مدثر یاض ملک نے کہا کہ ریجنل ڈائریکٹر پبلک ریلیشنز آفس کیلئے مناسب جگہ دی جائے گی. اس موقع پر ڈائریکٹر پبلک ریلیشنز ریاض الحق بھٹی، چیف آفیسر کارپوریشن اقبال فرید، ایس ای پبلک ہیلتھ وسیم باجوہ، ملتان، لاہو راو رفیصل آباد واسا کے نمائندے موجو دتھے.

ڈیرہ غازیخان(تنویر احمد) ڈی پی او اسد سرفراز نے ضلع بھر کے درجہ چہارم کے ملازمین سے پولیس لائن میں میٹنگ، ملازمین کے مسائل دریافت کئے ترجمان پولیس کے مطابق ڈی پی او اسد سرفراز نے ضلع بھر کے درجہ چہارم کے ملازمین سے پولیس لائن میں میٹنگ کی دوران میٹنگ ڈی پی او اسد سرفراز نے کہا کہ آپ اپنی اپنی تعیناتی کی جگہ پر حاضری کو یقینی بنائیں اور جو جو کام آپ کے ذمہ ہے اس کو ایمانداری سے سر انجام دیں آپ تمام لوگ ہمارے محکمہ کا حصہ ہیں آپ کی ویلفیئر SOP کے مطابق کی جائے گی آخر میں ڈی پی او اسد سرفراز نے تمام ملازمین کے مسائل دریافت کئے اور حل طلب مسائل کو فی الفور حل کرنے کا حکم دیا۔

ڈیرہ غازی خان(تنویر احمد) وزیر اعلی پنجاب کے آبائی علاقے تونسہ میں مبینہ طور پر کانگو وائرس سے متاثر مریض سامنے آگیا۔کمشنر ڈیرہ غازی خان ڈویژن مدثر ریاض ملک نے تونسہ میں کانگو وائرس سے متاثرہ شخص کی اطلاع کا نوٹس لے لیا اور محکمہ صحت کو ضروری کارروائی اور علاج معالجہ کی ہدایات جاری کردیں اس سلسلہ میں مزید تفصیل کے مطابق گزشتہ روز تونسہ کے المرتضیٰ ٹاؤن کے رہائشی اللہ بخش ولد حامد کے ورثاء نے میڈیا کو بتایا کہ انکا مریض کانگو وائرس سے متاثر ہو کر کا فی روز سے بیمار ہے اسے سخت توجہ اور علاج کی ضرورت ہے جبکہ اسے معمول کی روایتی ادویات دی گئی جس سے کوئی افاقہ نہیں ہوااطلاع ملنے پر کمشنر مدثر ر یاض ملک نے فوری طور پر اسسٹنٹ کمشنر تونسہ نوید حسین کو ہدایت کی کہ مریض کا مکمل چیک اپ اور علاج معالجے کی بہترین سہولتیں فراہم کی جائے جس پر مریض کے گھر پر ابتدائی طبی امداد فراہم کرنے کے بعد نشتر ہسپتال ملتان منتقل کر دیا گیا ہے اس سلسلہ میں چیف ایگزیکٹو آفیسر ڈسٹرکٹ ہیلتھ اتھارٹی ڈاکٹر خلیل احمد سکھانی نے رابطہ کرنے پر وضاحت کی ہے کہ تونسہ کے علاقے مرتضیٰ ٹاؤن میں ساٹھ سالہ اللہ بخش میں ابتدائی طور پر کانگو وائرس کی تصدیق نہیں ہوئی ہے میڈیکل رپورٹس،ٹیسٹ اور علامات سے کانگو بخار معلوم نہیں ہوتا محکمہ صحت نے اطلاع پر فوری کاروائی کرتے ہوئے تحصیل صدر ہسپتال تونسہ سے میڈیکل آفیسر ڈاکٹر تحسین کی سربراہی میں میڈیکل ٹیم مریض کے گھر روانہ کی ضروری علاج معالجہ کے بعد مزید تحقیقات کے لیے مریض کو سرکاری ایمبولینس پر نشتر ہسپتال ملتان منتقل کردیا گیا ہے سی ای او ہیلتھ ڈاکٹر خلیل احمد نے مزید بتایا کہ مریض پہلے بھی نشتر ہسپتال ملتان میں زیر علاج رہا ہے میڈیکل رپورٹس میں بھی کانگو بخار کی تصدیق نہیں ہوئی ہے تاہم محکمہ صحت نے احتیاطی اقدامات شروع کردئیے ہیں مریض کے اٹنڈنٹس اور گھر کے نزدیک لوگوں کیلئے علاج معالجہ کے بھی اقدامات شروع کردئیے ہیں اور محکمہ لائیو سٹاک ڈیپارٹمنٹ کو بھی آگاہ کردیا گیا ہے۔

ڈیرہ غازیخان(تنویر احمد )رکن صوبائی اسمبلی ڈیرہ غازیخان ڈاکٹر شاہینہ نجیب کھوسہ نے کہا ہے کہ شاہراہوں پر بے ہنگم ٹریفک اور قوانین کی پاسداری نہ ہونے سے حادثات کی شرح خوفناک حد تک بڑھ رہی ہے جس کو روکنے کیلئے آگاہی مہم چلانے کی ضرور ت ہے. محکمے قانون کی خلاف ورزی کرنے والوں کو نشان عبرت بنائیں. کم عمر ڈرائیور اور تیز رفتاری پر موثر کارروائی کی جائے. انہوں نے یہ بات ای لائبریری میں سڑک حادثات سے متعلق آگاہی سیمینار سے بحیثیت مہمان خصوصی خطاب کرتے ہوئے کہی. انہوں نے کہاکہ ٹریفک پولیس فعال کردارادا کرے. ٹریفک قوانین کی پاسداری نہ کرنے پر گرفتاریاں عمل میں لائی جائیں. تقریب سے ڈی ایس پی ٹریفک مہر اسحاق سیال، ریسکیو اینڈ سیفٹی آفیسر محمداختربھٹہ، انچارج لائبریری شفقت رفیق او ردیگر نے خطاب کرتے ہوئے حادثات کی شرح، وجوہات او راقداما ت کے بارے میں روشنی ڈالی. دریں اثنا ای لائبیریری کے لان میں پودے بھی لگائے گئے.

ڈیرہ غازیخان(تنویراحمد) وزیراعلی کے مشیر برائے صحت محمد حنیف خان پتافی کی ایم ایس ٹیچنگ ہسپتال ڈاکٹر شاہد حسین مگسی اور پرنسپل میڈیکل کالج آصف قریشی کے ہمراہ سینئر ڈاکٹرز کے ساتھ میٹنگ.ایم ایس شاہد حسین مگسی اور پرنسپل آصف قریشی نے مشیر صحت کو ہسپتال میں دی جانے والی طبی سہولیات اور مسائل کے بارے میں بریفنگ دی اس موقع پر مشیر صحت نے ٹراما سینٹر، ایمرجنسی وارڈ میں مدد گار کاؤنٹر، اور مریضوں کو مہیا کی جانے والی سروسز کو بہتر کرنے کی کی ہدایت دی میٹنگ کے بعد مشیر صحت محمد حنیف خان پتافی طبی سہولیات کا جائزہ لینے آفیسران کے ہمراہ ڈی ایچ کیو ہسپتال کا دورہ کیاانہوں نے ہسپتال کے مختلف وارڈزکادورہ کرکے صفائی چیک کی اور مریضوں کی عیادت کی انہوں نے نیو گائنی وارڈ، لیبررومز،بچوں کے وارڈ، اور ڈینٹل وارڈ کا بھی دورہ کیا اس موقع پر حنیف خان پتافی نے کہا کہ پنجاب بھرکے سرکاری ہسپتالوں کے گائنی وارڈزکواپ گریڈکیاجارہا ہے وزیراعظم عمران خان کے ویژن مطابق عوام کوصحت کے شعبہ میں معیاری سہولیات دینے کیلئے کوشاں ہیں غریب مریضوں کو مفت علاج کی سہولیات مہیا کرنے کے لیے انصاف ہیلتھ کارڈز بھی دئیے جا رہے ہیں۔

ڈیرہ غازیخان(تنویر احمد)وزیر اعلیٰ پنجاب سردار عثمان احمد خان بزدار کی ہدایت تحصیل کوہ سلیمان میں ٹورسٹ سائٹ بنانے کا آغاز کردیا گیا۔مبارکی اور گلکی ٹاپ پر کام شروع کردیا گیا ڈیرہ غازی خان میں پانچ اور ضلع راجنپور کی دو پہاڑی مقامات سیاحتی مقامات بنائے جائیں گے۔کمشنر ڈیرہ غازی خان ڈویڑن مدثر ریاض ملک نے ٹی ڈی سی پی اور دیگر محکموں کا اجلاس منعقد کرکے کام کو تیز تر کرنے کی ہدایات جاری کردیں۔کمشنر ڈیرہ غازی خان ڈویڑن مدثر ریاض ملک نے کہا کہ قبائلی علاقوں میں سیاحتی مقامات بننے سے قبائلیوں کو روزگار کے مواقع فراہم ہوں گے۔ضلع ڈیرہ غازی خان میں مبارکی،گلکی، مٹ چانڈیہ،یک بائی اور بارتھی میں ٹورسٹ ریزارٹ بنیں گے ضلع راجنپور میں ماڑی اور ہڑند قلعہ کو ڈویلپ کیا جائیگا۔کمشنر نے کہا کہ مبارکی ٹورسٹ ریزارٹ کا پچیس ستمبر کو افتتاح کرایا جائیگا متعلقہ محکمے اپنے انتظامات مکمل کرلیں۔اس موقع پر ڈپٹی کمشنر وقاص رشید،ایڈیشنل کمشنر کوآرڈینیشن اظفر ضیاء،پی اے سید موسیٰ رضا،ایکسین ہمایوں مسرور، رسالدار وقار عزیز قیصرانی، ٹی ڈی سی پی ملتان کے اشعر اقبال،شیخ محمد اعجاز اور دیگر موجود تھے.

ڈیرہ غازیخان(تنویر احمد)انڈس ہائی وے پر خوفناک حادثہ، کوٹ چھٹہ بائی پاس پر ہیوی ٹرالر کی موٹر سائیکل سوار کوٹکر، میاں بیوی سمیت دو معصوم بیٹے موقع پر جاں بحق، تین سالہ بیٹی شدید زخمی، ریسکیو اہلکاروں نے نعشوں اور زخمی بچی کو ہسپتال منتقل کر دیا تھانہ کوٹ چھٹہ پولیس نے ٹرالر قبضہ میں لے کر کاروائی شروع کر دی تفصیلات کے مطابق انڈس ہائی وے کوٹ چھٹہ بائی پاس پر تیز رفتار 22 ویلر ٹرالر ڈرائیور نے تیز رفتاری کے باعث غفلت اور لاپرواہی کا مظاہرہ کرتے ہوئے سامنے سے آنے والے موٹر سائیکل سواروں کو ٹکر مار کر کچل دیا حادثہ کے نتیجہ میں موٹرسائیکل پر سوار بلاک 45 محلہ سادات کے 30 سالہ مجاہد عباس اسکی اہلیہ مسز مجاہد اس کے دوبیٹے آٹھ سالہ کاشان عباس اور چھ سالہ ذیشان عباس زخموں کی تاب نہ لاتے ہوئے موقع پر جاں بحق ہو گئے جبکہ انکی ایک تین سالہ بیٹی علیشباہ کی حالت انتہائی خطرناک بتائی جا رہی ہے ریسکیو اہلکاروں نے واقعہ کی اطلاع ملتے ہی جائے حادثہ پر پہنچ کرچاروں جاں بحق افراد سمیت زخمی بچی کو ٹیچنگ ہسپتال کے ٹراما سنٹر منتقل کر دیا ادھر کوٹ چھٹہ پولیس نے ٹرالر کو قبضہ میں لے کر کاروائی شروع کر دی ہے۔

ڈیرہ غازیخان(تنویر احمد) یوم عاشورہ دس محرم الحرام کو ضلع ڈیرہ غازیخان میں ماتمی جلوس کے دوران زنجیرزنی کرتے ہوئے کل 2529افراد زخمی ہوئے، ریسکیو اہلکاروں نے 2478 افراد کو طبی امداد دی جبکہ 51 شدید زخمیوں کو مختلف ہسپتالوں میں منتقل کیاگیا ریسکیو ذرائع کے مطابق یوم عاشورہ دس محرم الحرام کوتحصیل ڈیرہ غازیخان کے مختلف مقامات پر ماتم کرنے کے دوران زنجیر زنی کرتے ہوئے کل 1395 افراد زخمی ہونے کی اطلاع موصول ہوئی ریسکیو اہلکاروں نے 1373 افراد کو موقع پر طبی امداد مہیا کی جبکہ 22شدید زخمی افراد کو حالت خراب ہونے پر ٹیچنگ ہسپتال کے ایمرجنسی وارڈ میں منتقل کیا گیا اسی طرح تحصیل تونسہ شریف میں 592 افراد زخمی ہوئے 585افراد کو موقع پرطبی امداد فراہم کی گئی اور7 شدید زخمی ٹی ایچ کیو ہسپتال تونسہ شریف منتقل کیے جبکہ تحصیل کوٹ چھٹہ میں ماتم کے دوران زنجیر زنی کرتے ہوئے542 افراد زخمی ہوئے جن میں 520 افراد کو موقع پر ریسکیو اہلکاروں نے طبی امداد دی جبکہ 22افراد کی حالت خراب ہونے پر انہیں تحصیل ہیڈکوارٹر ہسپتال کوٹ چھٹہ منتقل کردیا گیا۔