معروف صحافی و اینکر پرسن غریدہ فاروقی نے سوشل میڈیا پلیٹ فارم ایکس پر اپنے بیان میں انکشاف کیا ہے کہ ان کی تصویر اور لباس کے حوالے سے نازیبا اور ہراسانی پر مبنی مہم چلانے والوں کے خلاف کارروائی شروع کر دی گئی ہے۔
غریدہ فاروقی کے مطابق 11 اپریل 2026 سے ان کے خلاف “جینڈر بیسڈ ڈیجیٹل وائلنس” اور سائبر کرائم کی ایک منظم مہم جاری تھی، جس پر انہوں نے فوری طور پر نیشنل سائبر کرائم انویسٹی گیشن ایجنسی میں شکایت درج کروائی۔انہوں نے بتایا کہ نیشنل سائبر کرائم انویسٹی گیشن ایجنسی نے بروقت اور مؤثر کارروائی کرتے ہوئے ملزمان کے خلاف آپریشن شروع کر دیا ہے، جس کے نتیجے میں ایک ملزم کو چنیوٹ سے گرفتار کر لیا گیا ہے۔ خاتون صحافی کے مطابق ملزم کی جانب سے بنائی گئی نازیبا ویڈیو کے شواہد ان کے پاس اور ادارے کے پاس محفوظ ہیں، جبکہ دیگر ملزمان کی گرفتاری بھی جلد متوقع ہے۔
غریدہ فاروقی نے خبردار کیا کہ سوشل میڈیا پوسٹس یا ٹویٹس حذف کرنے سے کوئی فائدہ نہیں ہوگا کیونکہ تمام شواہد محفوظ کر لیے گئے ہیں اور کسی بھی ملزم کو نہیں چھوڑا جائے گا۔
غریدہ فاروقی کا کہنا تھا کہ یہ حملہ صرف ایک خاتون پر نہیں بلکہ معاشرے کی تمام خواتین کو خوفزدہ کرنے کی کوشش ہے۔ نیشنل سائبر کرائم انویسٹی گیشن ایجنسی کی مؤثر کارروائی سے نہ صرف خواتین میں احساسِ تحفظ بڑھے گا بلکہ قانون کے نفاذ اور اداروں پر اعتماد بھی مضبوط ہوگا۔
