اسلام آباد کے علاقے ترنول میں سوشل میڈیا پر متنازع پوسٹ شیئر کرنے والے شہری کے خلاف پولیس نے مقدمہ درج کرکے اسے گرفتار کر لیا۔
پولیس کے مطابق تھانہ ترنول میں درج ابتدائی اطلاعی رپورٹ (ایف آئی آر) کے مطابق 21 اپریل 2026 کو ایس آئی شاہد اصغر کو سوشل میڈیا پر ایک پوسٹ کی اطلاع ملی، جس میں ترنول پھاٹک کو بند کرنے سے متعلق اشتعال انگیز بیان دیا گیا تھا۔ پوسٹ میں ترنول پھاٹک کو “آبنائے ہرمز” سے تشبیہ دیتے ہوئے اسے بند کرنے کو مسائل کا حل قرار دیا گیا تھا۔پولیس ٹیم فوری طور پر موقع پر پہنچی اور مختلف افراد سے تصدیق کے بعد معلوم ہوا کہ یہ پوسٹ خرم نذیر نامی شخص نے سوشل میڈیا پر شیئر کی۔ ملزم کو ترنول چوک سے گرفتار کر لیا گیا، جبکہ اس کے موبائل فون کی جانچ پڑتال کے دوران بھی مذکورہ پوسٹ کی تصدیق ہوئی۔
ایف آئی آر کے متن کے مطابق ملزم کے خلاف دفعہ 188، 341 اور 511 تعزیراتِ پاکستان کے تحت مقدمہ درج کیا گیا ہے، جو سرکاری احکامات کی خلاف ورزی اور عوام کو اشتعال دلانے سے متعلق ہیں۔ پولیس کا کہنا ہے کہ موجودہ سکیورٹی حالات کے پیش نظر دفعہ 144 نافذ ہے، جس کے تحت اس قسم کی سرگرمیاں قانوناً جرم ہیں۔پولیس نے بتایا کہ ملزم نے مجاز اتھارٹی کے احکامات کی خلاف ورزی کرتے ہوئے لوگوں کو ترنول پھاٹک بند کرنے پر اکسانے کی کوشش کی۔ مقدمہ درج ہونے کے بعد مزید تفتیش کا آغاز کر دیا گیا ہے