Category: اسلام آباد

‎اسلام آباد: وزیر اعظم کے مشیر برائے سیاسی امور رانا ثنا اللہ نے کہا ہے کہ اگر امریکا اور ایران کے درمیان ممکنہ معاہدہ طے پا جاتا ہے تو اس کی دستخطی تقریب پاکستان میں ہونے کا امکان ہے، جس میں دونوں ممالک کے صدور کی شرکت متوقع ہو سکتی ہے۔
‎نجی ٹی وی پروگرام میں گفتگو کرتے ہوئے رانا ثنا اللہ کا کہنا تھا کہ دنیا میں کسی بھی تنازع کا آخری حل مذاکرات ہی ہوتے ہیں، اور امریکا و ایران کے درمیان جاری بات چیت جلد مثبت نتیجے تک پہنچ سکتی ہے۔ انہوں نے اشارہ دیا کہ آنے والے دنوں میں یہ پیش رفت تیزی سے آگے بڑھ سکتی ہے۔
‎ان کے مطابق اس وقت وزیر اعظم شہباز شریف اور آرمی چیف فیلڈ مارشل عاصم منیر بیرون ملک موجود ہیں اور پس پردہ سفارتی کوششیں جاری ہیں تاکہ دونوں ممالک کے درمیان معاملات کو خوش اسلوبی سے حل کیا جا سکے۔ انہوں نے امید ظاہر کی کہ اگلا ہفتہ اس حوالے سے انتہائی اہم ثابت ہو سکتا ہے اور ممکن ہے کہ اسی دوران معاہدے پر دستخط بھی ہو جائیں۔
‎رانا ثنا اللہ نے مزید کہا کہ اگر دستخطی تقریب منعقد ہوئی تو ایران کے صدر مسعود پزشکیان اور امریکا کے صدر ڈونلڈ ٹرمپ کی پاکستان آمد بھی متوقع ہے، جو ملک کے لیے ایک بڑی سفارتی کامیابی ہوگی۔
‎انہوں نے اس پیش رفت پر خطے کے دیگر ممالک کے ردعمل کا بھی ذکر کیا اور کہا کہ کچھ ممالک، خاص طور پر بھارت، اس صورتحال پر تشویش کا اظہار کر رہے ہیں۔ اسی طرح افغانستان میں بھی بعض حلقے اس ممکنہ پیش رفت سے ناخوش دکھائی دیتے ہیں۔

وزیراعظم شہباز شریف نے عوام کو بڑا ریلیف دیتے ہوئے ڈیزل کی قیمت میں 32 روپے 12 پیسے فی لیٹر کمی کی منظوری دے دی ہے، جس کے بعد ڈیزل کی قیمت 385.54 روپے سے کم ہو کر 353.43 روپے کی سطح پر آ گئی ہے۔ وزیراعظم نے متعلقہ حکام کو ہدایت کی ہے کہ عالمی منڈی میں تیل کی قیمتوں میں ہونے والی اس کمی کے ثمرات فوری طور پر عوام تک پہنچائے جائیں، جبکہ وفاقی وزیر اویس لغاری نے بھی پیٹرول اور ڈیزل کی قیمتوں میں جلد مزید کمی کا اشارہ دیا ہے۔
عالمی سطح پر تیل کی قیمتوں میں یہ گراوٹ ایران کی جانب سے آبنائے ہرمز کھولنے کے اعلان کے بعد آئی ہے، جس کے باعث عالمی مارکیٹ میں خام تیل کی قیمتوں میں کمی کا رجحان برقرار ہے۔ حالیہ اعداد و شمار کے مطابق برینٹ کروڈ اور امریکی خام تیل کی قیمتیں 13 فیصد تک گرنے کے بعد 81 ڈالر فی بیرل تک پہنچ گئی ہیں۔ اگرچہ گزشتہ ڈیڑھ ماہ کے دوران پیٹرولیم مصنوعات پر 180 ارب روپے کی اضافی لیوی وصول کی گئی ہے، تاہم اب عالمی منڈی کے بدلتے حالات کے پیشِ نظر حکومت نے قیمتوں میں اس بڑی کمی کا فیصلہ کیا ہے۔

‎وزیر اعلیٰ خیبر پختونخوا سہیل آفریدی نے اڈیالہ جیل میں قید سابق وزیر اعظم عمران خان سے ملاقات کی اجازت نہ ملنے پر شدید ردعمل دیا ہے۔
‎آل پاکستان وکلا جرگہ سے خطاب کرتے ہوئے انہوں نے کہا کہ وہ تین مرتبہ عدالتی احکامات لے کر گئے مگر انہیں اپنے قائد سے ملنے کی اجازت نہیں دی گئی۔ ان کا کہنا تھا کہ جیل حکام عدلیہ کے احکامات کو نظر انداز کر رہے ہیں۔
‎سہیل آفریدی نے کہا کہ وہ کسی قسم کی طاقت کا استعمال نہیں کریں گے بلکہ آئین اور قانون کے دائرے میں رہتے ہوئے جدوجہد جاری رکھیں گے۔ انہوں نے مزید کہا کہ عدالتی احکامات پر عملدرآمد کرانا خود عدلیہ کی ذمہ داری ہے۔
‎انہوں نے الزام لگایا کہ عمران خان کے کیسز کو سماعت کے لیے مقرر نہیں کیا جا رہا اور عدلیہ میں کچھ افراد اس حوالے سے آواز اٹھانا چاہتے ہیں مگر انہیں مکمل حمایت نہیں مل رہی۔
‎وزیر اعلیٰ کا کہنا تھا کہ عمران خان اور ان کی جماعت کے ساتھ ناانصافی ہو رہی ہے اور اگر یہ سلسلہ جاری رہا تو کل کسی اور کے ساتھ بھی ایسا ہو سکتا ہے۔ انہوں نے اعلان کیا کہ اگر 5 مئی تک کیسز سماعت کے لیے مقرر نہ ہوئے تو 6 مئی کو ملک گیر قلم چھوڑ ہڑتال کی جائے گی۔
‎سہیل آفریدی نے وکلا برادری سے اپیل کی کہ وہ اس معاملے میں ساتھ دیں کیونکہ پوری قوم انصاف کے حصول کے لیے ان کی جانب دیکھ رہی ہے۔
‎انہوں نے بشریٰ بی بی کے حوالے سے کہا کہ وہ ایک غیر سیاسی خاتون ہیں اور بیماری کے باوجود انہیں کوئی رعایت نہیں دی جا رہی۔

امریکا اور ایران کے درمیان مذاکرات کا دوسرا دور اسلام آباد میں اتوار کو ہونے کا امکان ہے، جہاں دونوں ممالک ایک ممکنہ معاہدے پر بات چیت کریں گے۔
‎امریکی میڈیا کے مطابق امریکا ایران کے ساتھ 20 ارب ڈالر کے بدلے یورینیم معاہدے پر غور کر رہا ہے۔ اس معاہدے کے تحت امریکا ایران کے منجمد اثاثے جاری کرے گا جبکہ ایران افزودہ یورینیم کے ذخیرے سے دستبردار ہوگا۔
‎رپورٹس کے مطابق دونوں ممالک کے درمیان جنگ کے خاتمے کے لیے تین صفحات پر مشتمل ایک معاہدے پر بھی مذاکرات جاری ہیں۔ ابتدائی مرحلے میں امریکا 6 ارب ڈالر خوراک اور ادویات کی خریداری کے لیے جاری کرنے پر تیار تھا۔
‎امریکی نیوز ویب سائٹ کے مطابق ایران نے 27 ارب ڈالر کے اثاثے جاری کرنے کا مطالبہ کیا تھا جسے امریکا نے مسترد کر دیا۔ دوسری جانب امریکا کا مطالبہ تھا کہ ایران اپنا تمام جوہری مواد امریکا منتقل کرے، تاہم ایران نے اس شرط کو بھی قبول نہیں کیا۔
‎ذرائع کے مطابق ایران نے ملک کے اندر ہی یورینیم کی کم افزودگی پر آمادگی ظاہر کی ہے جبکہ اسے طبی مقاصد کے لیے نیوکلیئر ریسرچ ری ایکٹر رکھنے کی اجازت دی جا سکتی ہے۔
‎مزید یہ کہ امریکا نے ایران کی تمام جوہری تنصیبات کو زمین کے اوپر رکھنے کی شرط بھی رکھی ہے، جس پر بات چیت جاری ہے۔

‎پاکستان میں بینکوں کی جانب سے صارفین سے ایس ایم ایس سروس چارجز کی مد میں اضافی رقم وصول کرنے کا انکشاف سامنے آیا ہے، جس پر عوامی حلقوں میں شدید تشویش پائی جا رہی ہے۔ صارفین کا کہنا ہے کہ جس سروس کی اصل قیمت تقریباً 2 روپے بنتی ہے، اسی کے لیے بینک 10 سے 12 روپے تک چارج کر رہے ہیں، جو سراسر زیادتی ہے۔
ذرائع کے مطابق بینکوں کی جانب سے یہ چارجز مختلف سروسز جیسے ٹرانزیکشن الرٹس، او ٹی پی کوڈز اور اکاؤنٹ اپڈیٹس کے نام پر لیے جا رہے ہیں۔ صارفین کا مؤقف ہے کہ انہیں ان اضافی اخراجات کے بارے میں واضح طور پر آگاہ نہیں کیا جاتا، جس کی وجہ سے وہ ہر ماہ غیر محسوس طریقے سے زیادہ رقم ادا کرنے پر مجبور ہو جاتے ہیں۔
مالیاتی ماہرین کا کہنا ہے کہ ڈیجیٹل بینکنگ کے دور میں جہاں سہولیات بڑھ رہی ہیں، وہیں اس قسم کے غیر شفاف چارجز صارفین کے اعتماد کو متاثر کر سکتے ہیں۔ ان کے مطابق اس معاملے پر اسٹیٹ بینک آف پاکستان کو نوٹس لینا چاہیے اور بینکوں کو شفافیت یقینی بنانے کی ہدایت دینی چاہیے۔
دوسری جانب بعض بینک حکام کا مؤقف ہے کہ یہ چارجز مختلف سروس پرووائیڈرز اور آپریشنل اخراجات کی بنیاد پر مقرر کیے جاتے ہیں، تاہم اس کی مکمل تفصیل صارفین کے سامنے لانا ضروری ہے تاکہ کسی قسم کا ابہام نہ رہے۔
عوامی حلقوں نے مطالبہ کیا ہے کہ بینکنگ چارجز کو فوری طور پر ریگولیٹ کیا جائے اور صارفین کو غیر ضروری مالی بوجھ سے بچایا جائے۔

اسلام آباد: ملکی تاریخ میں پہلی بار پاور سیکٹر کے ملازمین کو دی جانے والی مفت بجلی یونٹس کی سہولت ختم کر دی گئی،

یہ اقدام برسوں سے زیرِ بحث تھا اور صارفین کی جانب سے مسلسل مطالبہ کیا جا رہا تھا کہ قومی وسائل کو منصفانہ انداز میں استعمال کیا جائے۔وفاقی وزیر برائے پاور ڈویژن سردار اویس لغاری نے لاہور ہائیکورٹ کے فیصلے کا خیر مقدم کرتے ہوئے کہا کہ فری یونٹس کا خاتمہ عوام کا سب سے پرانا مطالبہ تھا، جسے موجودہ حکومت نے عملی طور پر پورا کر دیا ہے۔ انہوں نے کہا کہ یہ فیصلہ قومی وسائل کے تحفظ، شفافیت کے فروغ اور انصاف کے تقاضوں کو پورا کرنے کی جانب ایک بڑا قدم ہے۔

اویس لغاری نے کہا کہ اللّٰہ تعالیٰ نے اس اہم اقدام کا اعزاز موجودہ حکومت کو عطا کیا ہے اور وزیراعظم شہباز شریف کی قیادت میں پہلی مرتبہ اس فیصلے کو عملی جامہ پہنایا گیا۔ ان کا کہنا تھا کہ حکومت ہر وہ اقدام کرے گی جو ملک و قوم کی بہتری، ادارہ جاتی اصلاحات اور عوامی ریلیف کے لیے ضروری ہو۔وفاقی وزیر نے مزید کہا کہ یہ فیصلہ صرف ایک انتظامی تبدیلی نہیں بلکہ توانائی کے شعبے میں اصلاحات کے نئے دور کا آغاز ہے، جس سے قومی خزانے پر بوجھ کم ہوگا اور وسائل کو زیادہ مؤثر انداز میں استعمال کیا جا سکے گا۔

وفاقی آئینی عدالت نے بھارت اور اسرائیل سے کتابوں سمیت دیگر اشیاء کی درآمد پر عائد پابندی درست قرار دیدی۔

لاہور ہائیکورٹ کی جانب سے حکومت کو دی گئی تمام ہدایات کالعدم قرار دیدی گئیں، ہائیکورٹ کا حکم "سوموٹو” قرار دیکر ختم کردیا گیا۔وفاقی آئینی عدالت نے بھارت اور اسرائیل سے درآمد پر پابندی درست قرار دیدی، جسٹس عامر فاروق کا تحریر کردہ فیصلہ جاری کردیا گیا، جسٹس علی باقر نجفی کا اضافی نوٹ بھی فیصلے میں شامل ہے۔عدالت نے اپنے فیصلے میں لاہور ہائیکورٹ کی حکومت کو دی گئی تمام ہدایات کالعدم قرار دیتے ہوئے لاہور ہائیکورٹ کا حکم ’’سوموٹو‘‘ قرار دے کر ختم کردیا گیا۔

لاہور ہائیکورٹ نے وفاقی حکومت کو نظرثانی کیلئے افسر مقرر کرنے کا حکم دیا تھا۔ وفاقی آئینی عدالت نے کہا کہ لاہور ہائیکورٹ کے پاس اپنے طور پر کارروائی کا اختیار نہیں، خارجہ پالیسی، قومی سلامتی ایگزیکٹو کا اختیار ہیں، عدلیہ مداخلت نہیں کرسکتی۔فیصلے میں کہا گیا ہے کہ کن ممالک سے تجارتی تعلقات رکھنے ہیں؟، یہ حکومت کی صوابدید ہے، نجی درخواست گزار شکایات کے حل کیلئے حکومت سے رجوع کرنے میں آزاد ہیں، اگر عدلیہ تجارت سے متعلق احکامات دے گی تو یہ اختیارات سے تجاوز ہوگا۔

وفاقی دارالحکومت اسلام آباد میں فول پروف سکیورٹی انتظامات۔ آئی جی اسلام آباد سید علی ناصر رضوی کے احکامات پر اسلام آباد کے مختلف علاقوں میں بڑے پیمانے پر مشترکہ گرینڈ کومبنگ سرچ آپریشنز جاری ہے

اسلام آباد تھانہ کرپا، سمبل، سکریٹریٹ، کھنہ، انڈسٹریل ایریا، بنی گالہ اور تھانہ ترنول کے علاقوں میں سرچ آپریشنز کئے گئے۔سرچ آپریشنز ایس ایس پی آپریشنز اسلام آباد قاضی علی رضا کی سپرویژن اور زونل ایس پیز کی زیرِ نگرانی کیے گئے جس میں لیڈیز پولیس نے حصہ لیا۔سرچ آپریشن کے دوران 712 افراد، 1108 گھرانوں، 182 دکانوں، 32 ہوٹلز، 381 موٹر سائیکلز اور 141 گاڑیوں کی مکمل جانچ پڑتال کی گئی۔20 افغانی، 56 مشکوک افراد، 02 گاڑیاں اور 47 موٹر سائیکلز کو مزید جانچ پڑتال کے لیے متعلقہ تھانوں میں منتقل کیا گیا۔ غیر قانونی اسلحہ رکھنے والے ملزمان کو گرفتار کر کے مختلف بور کے 04 عدد پستول معہ ایمونیشن برآمد کیے۔ترجمان اسلام آباد پولیس کے مطابق شہر کے داخلی و خارجی راستوں پر مؤثر چیکنگ کے لیے خصوصی چیکنگ پوائنٹس قائم کئے گئے ہیں۔ تمام پٹرولنگ یونٹس اور خصوصی سکواڈ شہر بھر میں گشت کر رہے ہیں۔سینئر افسران فیلڈ میں موجود رہتے ہوئے سکیورٹی انتظامات کا ازخود جائزہ لے رہے ہیں، شہری چیکنگ کے دوران پولیس سے تعاون کریں اور کسی بھی مشکوک سرگرمی کی فوری اطلاع دیں۔ اسلام آباد پولیس شہریوں کے جان و مال کے تحفظ کے لیے ہر ممکن اقدامات یقینی بنا رہی ہے۔

بانی چیئرمین تحریک انصاف عمران خان کی اہلیہ بشریٰ بی بی کی آنکھ کی سرجری کے حوالے سے سپرنٹینڈنٹ اڈیالہ جیل نے باضابط اعلامیہ جاری کیا ہے

اعلامیہ کے مطابق بشری بی بی نے دائیں آنکھ کی بینائی متاثر ہونے کی شکایت کی،جیل انتظامیہ نے فوری نوٹس لیتے ہوئے ماہرین چشم سے معائنہ کرایا،دائیں آنکھ میں ریٹینل ڈیٹچمنٹ (Retinal Detachment)تشخیص ہوا، تشخیص کے پیش نظر ڈاکٹرز نے سرجری کا مشورہ دیا،16 اپریل کی شام مریضہ کو راولپنڈی کے نجی ہسپتال منتقل کیا گیا، سرجری سے قبل ضروری ٹیسٹ اور طبی معائنہ مکمل کیا گیا،مریضہ نے آپریشن کی رضامندی دی، سرجری پروفیسر ڈاکٹر ندیم قریشی اور پینل نے انجام دی، سرجری اور ایک رات ہسپتال قیام کے بعد مطمئن حالت میں مریضہ کو ڈسچارج کر دیا گیا، مریضہ کو واپس اڈیالہ جیل منتقل کر دیا گیا ہے،آپریشن کے بعد کے معائنے اور فالو اپ ڈاکٹرز کے مشورے مطابق کیے جائیں گے،