بشریٰ بی بی کی رہائی کیلئے کوششیں تیز، بیرسٹر گوہر نے رابطے شروع کر دیے

چیئرمین پی ٹی آئی بیرسٹر گوہر نے بشریٰ بی بی کی رہائی کیلئے کوششیں تیز کر دی ہیں، جبکہ بانی پی ٹی آئی عمران خان کی فیملی کو مذاکرات اور لچک کا مظاہرہ کرنے پر بھی قائل کر لیا گیا ہے۔

ذرائع کے مطابق بیرسٹر گوہر نے گزشتہ روز کوٹ لکھپت جیل میں پہلے پی ٹی آئی کے اسیر رہنماؤں سے ملاقات کی، جس کے بعد انہوں نے عمران خان کی بہن نورین نیازی سے بھی اہم ملاقات کی۔ذرائع کا کہنا ہے کہ عمران خان کی فیملی جیل کے باہر کسی بھی متنازع گفتگو سے گریز کرنے پر آمادہ ہو گئی ہے۔ اس کے علاوہ بشریٰ بی بی کی فیملی نے بھی ان سے متعلق سوشل میڈیا پر بیانات یا پیغامات جاری نہ کرنے کا فیصلہ کیا ہے۔مزید بتایا گیا ہے کہ پارٹی قیادت بشریٰ بی بی کے معاملے پر کوئی متنازع پریس کانفرنس بھی نہیں کرے گی، تاکہ قانونی اور سیاسی حکمت عملی کو مؤثر انداز میں آگے بڑھایا جا سکے۔ذرائع کے مطابق اگلے ہفتے بیرسٹر گوہر، محمود اچکزئی اور علامہ ناصر عباس کے ہمراہ بانی پی ٹی آئی کی فیملی سے دوبارہ ملاقات کریں گے اور انہیں اعتماد میں لیا جائے گا۔

ذرائع نے مزید دعویٰ کیا ہے کہ بشریٰ بی بی کی رہائی قانونی طریقہ کار کے تحت ممکن بنائی جائے گی، جبکہ کوٹ لکھپت جیل میں قید رہنماؤں کی اپیلوں پر جلد سماعت متوقع ہے۔