Category: اسلام آباد

معرکہ حق، عشرہ تشکر،مرکزی مسلم لیگ کے زیر اہتمام ملک بھر میں آل پارٹیز کانفرنسز،خواتین ریلیوں و دیگر تقریبات سے خطاب کرتے ہوئے مقررین نے کہا ہے کہ معرکہ حق کی کامیابی پر وزیراعظم پاکستان اور فیلڈ مارشل سید عاصم منیر کو خراج تحسین پیش کرتے ہیں، دفاع وطن کے لئے ہم متحد بھی ہیں، متفق بھی ہیں اور وطن کا دفاع بھی کریں گے،سندور کی ناکامی ،بنیان مرصوص کی کامیابی دنیا کیلئے پیغام ہے کہ پاکستان کا دفاع ناقابل تسخیر ہے، فاتح پاکستان امن کا علمبردار آج امریکہ و ایران کے مابین جنگ بندی معاہدہ کروا رہا ہے،

معرکہ حق،عشرہ تشکر کے سلسلہ میں مرکزی مسلم لیگ کے زیر اہتمام ساتویں روز لاہور، سیالکوٹ،فیصل آباد،خانیوال میں آل پارٹیز کانفرنسز،لاہور،شیخوپورہ،ملتان، سرگودھا، خوشاب، سیالکوٹ،چنیوٹ، ٹنڈوآدم، لودھراں، پشاور، چکوال، پتوکی، گجرات،ساہیوال ،بہاولنگرمیں مسلم ویمن لیگ کے زیر اہتمام بنیان مرصوص ریلیاں،کانفرنسیں،جبکہ دیگر شہروں میں مرکزی کسان لیگ، پاک لائرز فورم، مسلم یوتھ لیگ، مسلم اسٹوڈنٹس لیگ کی جانب سے بنیان مرصوص تقریبات منعقد کی گئیں،لاہور میں آل پارٹیز کانفرنس سے مرکزی مسلم لیگ کے مرکزی صدر خالد مسعود سندھو، جنرل سیکرٹری سیف اللہ قصوری، قاری محمد یعقوب شیخ، حافظ عبدالغفار روپڑی،ڈاکٹر عبدالغفور راشد، جاوید قصوری، قاسم ضیاء، پیر میاں جلیل شرقپوری، علامہ ناصر مدنی، حافظ عبد الرؤف،خالد نیک گجر، ڈاکٹر مزمل ہاشمی ، ڈاکٹر فرید احمد پراچہ،چوہدری شفیق الرحمان وڑائچ، حمید الحسن گجر، سمیت مختلف مذہبی، سیاسی، قائدین نے بڑی تعداد میں شرکت کی، کانفرنس کے شرکاء نے افواجِ پاکستان کی دفاعی کامیابیوں، دشمن کے غرور کو خاک میں ملانے، ملکی سلامتی کے تحفظ اور فیلڈ مارشل سید عاصم منیر کی قیادت کو بھرپور انداز میں خراجِ تحسین پیش کیا۔ مقررین نے کہا کہ پاکستان نے اپنے سے کئی گنا بڑے دشمن کو شکست دے کر ثابت کیا کہ قومی اتحاد، مضبوط قیادت اور بہادر افواج وطن کے دفاع کو ناقابلِ تسخیر بناتے ہیں۔سیالکوٹ میں اے پی سی سے ترجمان مرکزی مسلم لیگ ڈاکٹر مزمل اقبال ہاشمی، شیخ فیاض احمد ، امتیاز احمد بریار سمیت دیگر سیاسی و مذہبی جماعتوں کے رہنماؤں نے خطاب کیا،فیصل آباد، خانیوال ،لاڑکانہ میں آل پارٹیز کانفرنسز میں سیاسی و مذہبی جماعتوں کے قائدین نے مسلح افواج کو خراج تحسین پیش کیا،مسلم ویمن لیگ کے زیر اہتمام بنیان مرصوص کانفرنس سے مسلم ویمن لیگ کی سیکرٹری جنرل عفت سعید نے خطاب کرتے ہوئے کہا کہ پاکستان کی نظریاتی و قومی سلامتی کے لیے خواتین کا کردار ناگزیر ہے ،معرکۂ حق آپریشن بنیان مرصوص نے پوری قوم کو اتحاد، استقامت اور نظریاتی وابستگی کا پیغام دیا۔ دشمن بھارت کے خلاف حاصل ہونے والی کامیابی اس بات کا ثبوت ہے کہ پاکستانی قوم اپنے نظریے، سلامتی اور آزادی کے تحفظ کے لیے متحد ہے۔لاہور میں پنجاب اسمبلی سے پریس کلب تک بنیان مرصوص مارچ میں خواتین بڑی تعداد میں شریک ہوئیں،دیگر شہروں میں ہونے والی تقریبات میں خواتین، طلبا، وکلا کا جوش و خروش دیدنی تھا، شرکا بنیان مرصوص کے بینر اٹھائے افواج پاکستان کے حق میں‌نعرے لگا رہے تھے.

سینیٹ کی قائمہ کمیٹی برائے صحت کے اجلاس میں انکشاف ہوا ہےکہ گزشتہ دو سال کے دوران مختلف ادویات کی قیمتوں میں 100 فیصد تک اضافہ کیا گیا ہے۔

سینیٹ کی قائمہ کمیٹی برائے صحت کا اجلاس ہوا جس میں کمیٹی ارکان کی جانب سے ملک میں دواؤں کی قیتموں میں اضافے پر شدید تنقید کی گئی،بریفنگ میں بتایا گیا کہ 2024 میں نگراں حکومت کے دور میں دواؤں کی قیمتوں کو ڈی ریگولیٹ کیا گیا جب سے کمپنیاں قیتموں کا تعین خود کرتی ہیں، 2 سال کے دوران مختلف دواؤں کی قیمتوں میں 100فیصد تک اضافہ کیا گیا ہے،حکام نے بتایا کہ قانون کے مطابق ڈریپ صرف زندگی بچانے والی دواؤں کی قیمتوں کو ریگولیٹ کرسکتی ہے جب کہ وفاقی وزیر صحت مصفطیٰ کمال نے کہا کہ دواؤں کی قیمتوں کی کمی یا اضافے میں وزارت صحت کا کوئی کردار نہیں۔

کمیٹی نے ڈریپ سربراہ سے دواؤں کی قیمتوں کے تعین کا فارمولہ طےکرنے کے ساتھ ساتھ ادارہ شماریات حکام کو بھی آئندہ اجلاس میں طلب کرلیا۔کمیٹی نے کہا کہ اس سے پتا چلتا ہے پاکستان میں فارماسیوٹیکل کے کاروبار سے زیادہ منافع بخش کوئی کاروبار نہیں، یہ کسی صورت قابل قبول نہیں کہ فارماسیوٹیکل کمپنیوں کوکھلی چھٹی دے دی جائے، اس قانون پر نظر ثانی کی ضرورت ہے،ڈریپ کے سربراہ ڈاکٹر عبید اللہ نے قائمہ کمیٹی کو بریفنگ دیتے ہوئے بتایا کہ پاکستان میں 659 دوا ساز کمپنیاں ہیں، 394 ادارے بیرون ملک سے دوائیں اور ویکسین درآمد کرتے ہیں، پاکستانی ادویہ 51 ملکوں کو برآمد ہو رہی ہیں جب کہ گزشتہ سال پاکستان کی فارماسیوٹیکل انڈسٹری کی سیل ایک کھرب32کروڑ روپے رہی۔

اسلام آباد ہائیکورٹ،190 ملین پاؤنڈ کیس ،بانی پی ٹی آئی اور بشری بی بی کی سزا کیخلاف اپیلوں پر سماعت 20 مئی تک ملتوی کر دی گئی

عدالت نے اپیلوں پر دلائل کے لیے حتمی مہلت دے دی، نیب نے اپیلیں ملتوی کرنے کی مخالفت کی،بیرسٹر سلمان صفدر کے جونیئر عدالت میں پیش ہوئے،وکیل درخواست گزار نے کہا کہ آج ہم نے التواء دائر کررکھی ہے، نیب پراسیکیوٹر نے کہا کہ بانی پی ٹی آئی اور بشری بی بی کی اپیلوں پر سماعت، میری گزارش ہے کہ کس نے اپیل فائل کی ہے ،بار بار ملاقاتیں کرنا ہے کیا بات ہوئی، یہ بات میڈیا میں بھی آنی چاہیے ،وکیل شعیب شاہین نے کہا کہ کیس یہاں چلانا ہے یا میڈیا میں چلانا ہے ،چیف جسٹس اسلام آباد ہائیکورٹ نے ریمارکس دیتے ہوئے کہا کہ چلیں اس بہانے آج شعیب شاہین کی آواز بھی اس بہانے سنی ہے ،معاون وکیل نے کہا کہ درخواست گزاروں کی طرف سے التواء کی درخواست ہے، چیف جسٹس اسلام آباد ہائیکورٹ نے کہا کہ پڑھیں، التواء مانگنے کی کیا وجہ ہے؟وکیل معاون نے کہا کہ بانی اور بشریٰ بی بی سے اپیلوں پر دلائل کیلئے ہدایات نہ ہونے کی وجہ سے التواء کی درخواست ہے، نیب پراسیکیوٹر رافع مقصود نے کہا کہ یہ بار بار ملاقاتوں کی بات کرتے ہیں دیکھ لیں یہ التواء مانگ رہے ہیں،میڈیا پہ یہ بات بھی آنی چاہیے کہ نیب دلائل دینے کیلئے تیار ہے، وکیل پی ٹی آئی شعیب شاہین نے کہا کہ یہ میڈیا میں چلانا چاہتے ہیں یا اس عدالت میں؟چیف جسٹس اسلام آباد ہائیکورٹ سرفراز ڈوگر نے کہا کہ رافع صاحب آج آپ کی وجہ سے ہم نے شعیب شاہین کی بھی آواز سنی ہے،ہم کیس کی حساسیت کو مدنظر رکھتے ہوئے التواء کی درخواست منظور کر رہے ہیں، بانی اور بشریٰ بی بی کے وکلاء کو آخری موقع دے رہے ہیں،امید کرتے ہیں کہ آئندہ سماعت پر کیس کی کارروائی آگے بڑھے گی،

اسلام آباد: پاکستان کی وزارت خارجہ نے کہا ہے کہ امریکہ اور ایران کے درمیان جلد معاہدے کی توقع ہے جبکہ سندھ طاس معاہدے کے حوالے سے پاکستان کے تمام آپشنز زیر غور ہیں۔

ترجمان دفتر خارجہ طاہر حسین اندرابی نے ہفتہ وار پریس بریفنگ کے دوران کہا کہ آج “معرکہ حق” کی پہلی سالگرہ ہے اور پانچ مئی کو نائب وزیراعظم نے اس حوالے سے سفارتی کور کو بریفنگ بھی دی۔ترجمان دفتر خارجہ نے ایران اور امریکہ کے درمیان جاری رابطوں پر گفتگو کرتے ہوئے کہا کہ دونوں ممالک کے درمیان پیغامات کے تبادلے کی تفصیلات پر بات نہیں کریں گے، تاہم پاکستان کو امید ہے کہ دونوں فریق معاملات کے حل کی جانب بڑھ رہے ہیں۔ انہوں نے کہا کہ یہ کہنا قبل از وقت ہوگا کہ ممکنہ معاہدہ ایک صفحے پر مشتمل ہوگا یا کئی صفحات پر، لیکن معاہدے کے امکانات روشن ہیں۔

بریفنگ کے دوران ترجمان نے کہا کہ عالمی برادری کو جنوبی ایشیا میں امن و سلامتی کے حوالے سے تشویش لاحق ہے، تاہم پاکستان اپنے مفادات کے تحفظ کی مکمل صلاحیت رکھتا ہے۔ انہوں نے دوٹوک انداز میں کہا کہ “پاکستان کا ایک قطرہ پانی بھی کوئی چوری نہیں کرسکتا”۔دفتر خارجہ کے مطابق سندھ طاس معاہدے سے متعلق تمام ممکنہ آپشنز کا جائزہ لیا جا رہا ہے جبکہ انڈس واٹر کمشنر اور متعلقہ حکام دریاؤں کی صورتحال پر مسلسل نظر رکھے ہوئے ہیں۔ترجمان نے پاک افغان تعلقات پر بات کرتے ہوئے کہا کہ پاکستان اور افغانستان کے عوام امن چاہتے ہیں اور دونوں ممالک کے عوام کے درمیان کوئی تنازع نہیں۔ انہوں نے کہا کہ دونوں ممالک مذہبی اور ثقافتی رشتوں میں بندھے ہوئے ہیں، تاہم افغان سرزمین سے دہشت گردی کے واقعات تعلقات میں خرابی کا باعث بن رہے ہیں۔انہوں نے مزید کہا کہ طالبان حکومت کے تحت افغان سرزمین سے ہونے والی دہشت گردی خطے کے امن کے لیے خطرہ ہے، اس لیے سرحدی بندش جیسے اقدامات کے بجائے دہشت گردی کی بنیادی وجوہات کے خاتمے پر توجہ دینا ہوگی۔ ترجمان کے مطابق اگر دہشت گردی ختم ہو جائے تو باقی مسائل خود بخود حل ہوسکتے ہیں۔

وفاقی وزیر داخلہ محسن نقوی نے کہا ہے کہ معرکہ حق میں ہمیں اللہ کی مدد آئی اور میں ان لوگوں میں شامل تھا جو اُس مدد کے عینی شاہدین ہیں۔ ہماری آرمی، فضائیہ اور نیوی نے بہت اہم کردار ادا کیا۔ اس میں انٹیلیجنس ایجنسیز کا کردار بھی بہت اہم تھا،

پریس کانفرنس کرتے ہوئے محسن نقوی کا کہنا تھا کہ انڈیا کو وہی جواب دیا گیا جس کے وہ حق دار تھے، اور وہ تصاویر آپ کے سامنے ہیں جن میں انہیں ایل او سی پر خود سفید جھنڈا لہرانا پڑا۔معرکہ حق میں اللہ کی مدد سے پاکستان کو کامیابی ملی، معرکہ حق کے دوران ایڈوانس انفارمیشن کا ہمیں بھرپور فائدہ ہوا،معرکہ حق کے دوران بھارت کے 16 میں سے 15 میزائل حدف پر نہیں گرے، صرف ایک میزائل ہدف پر لگا، باقی میزائل تتر بتر ہوگئے، یہ اللہ کی مدد کے بغیر ممکن نہیں تھا، سائبر اٹیک میں بھارت ہمارے قریب بھی نہیں تھا،بھارت سے جنگ کے دوران ایئر چیف 15دن وار روم میں تھے ، گھر نہیں گئے ، وہیں میٹرس لگا کر سوتے تھے ۔بھارت سے جنگ کے دوران صدر زرداری کو بنکر میں جانے کا کہا گیا، اُنہوں نے کہا کہ اگر شہید ہوتا ہے تو ہو جائوں لیکن بنکر میں نہیں جائوں گا، بھارت نے بنیان المرصوص کے دوران ایک ملک نہیں کئی ممالک سے کئی مرتبہ رابطہ کیا، بھارت نے ترلے منتیں کیں کہ جنگ روکو، جو کچھ معرکہ حق میں ہوا اس کا راوی میں خود ہوں، بھارت کی جان بخشی امریکی صدر نے کرائی، ہمارا آپس میں اتحاد ضروری تھا قوم نے اتحاد دکھایا، دوسری سائیڈ سامنے ہے، لاہور پورٹ بنا دیا کراچی کچھ اور بنا دیا، میڈیا نے اس سب کو جوڑنے میں کردار ادا کیا، معرکہ حق کے دوران پاکستانی میڈیا نے جس طرح پوری قوم کو اکھٹا کیا اس کی مثال نہیں ملتی،معرکہ حق میں فیلڈ مارشل کو اللہ کی مدد حاصل تھی۔ایسے ہی انہیں ایران امریکا جنگ کے دوران مذاکرات کے لیے بھی اللہ کی مدد حاصل تھی۔ میں نے مذاکرات کو گھنٹوں میں ٹوٹتے اور جُڑتے دیکھا کیونکہ دونوں ممالک ایسی پوزیشن پر چلے گئے تھے کہ ان کو واپس لانا ناممکن تھا،

وزیرِ اعظم محمد شہباز شریف ایک روزہ دورہء گلگت بلتستان کیلئے گلگت پہنچ گئے.

گلگت پہنچنے پر گورنر سید مہدی شاہ اور نگران وزیرِ اعلی جسٹس (ر) یار محمد نے وزیرِ اعظم کا استقبال کیا.وفاقی وزراء احسن اقبال، سردار اویس احمد خان لغاری، عطاء اللہ تارڑ، انجینئیر امیر مقام، عبدالعلیم خان، ڈاکٹر خالد مقبول صدیقی، مشیر وزیرِ اعظم رانا ثناء اور معاون خصوصی طلحہ برکی بھی وزیرِ اعظم کے ہمراہ ہیں. وزیرِ اعظم کی گورنر گلگت بلتستان سید مہدی شاہ اور نگران وزیرِ اعلی گلگت بلتستان جسٹس (ر) یار محمد سے علیحدہ علیحدہ ملاقات ہوئی. ملاقاتوں میں گلگت بلتستان میں جاری ترقیاتی منصوبوں پر پیش رفت، صوبائی امن و امان کی صورتحال اور دیگر صوبائی امور پر گفتگو ہوئی.

حکومتِ پاکستان نے شہریوں کو گھر بیٹھے پاسپورٹ کے لیے درخواست دینے کی سہولت فراہم کرنے کا فیصلہ کر لیا ہے، جس کے تحت پاسپورٹ کے نظام کو جدید ڈیجیٹل تقاضوں سے ہم آہنگ بنایا جائے گا۔

ڈی جی پاسپورٹس محمد علی رندھاوا کی زیرِ صدارت ہونے والے اہم اجلاس میں نادرا کی ٹیکنیکل ٹیم نے شرکت کی، جہاں پاسپورٹ کے موجودہ نظام کا تفصیلی جائزہ لیا گیا اور مختلف اصلاحات کی منظوری دی گئی۔اجلاس کے دوران شہریوں کو آن لائن اور گھر بیٹھے پاسپورٹ اپلائی کرنے کی سہولت دینے کے فیصلے پر اتفاق کیا گیا، جس سے عوام کو دفاتر کے چکر لگانے سے نجات ملنے کی توقع ہے۔حکام کے مطابق وزیرِ داخلہ کے وژن کے تحت پاسپورٹ سسٹم میں نئی ٹیکنالوجی متعارف کروانے اور موجودہ پالیسیوں کو مکمل ڈیجیٹل نظام کے مطابق اپ ڈیٹ کرنے پر بھی بریفنگ دی گئی۔اجلاس میں اس بات پر زور دیا گیا کہ جدید اصلاحات کے ذریعے پاسپورٹ کے اجرا کے عمل کو مزید تیز، شفاف اور آسان بنایا جائے تاکہ شہریوں کو بہتر سہولیات فراہم کی جا سکیں۔