Category: اسلام آباد

پاکستان علما کونسل کے چیئرمین علامہ طاہر اشرفی نے کہا ہے کہ پاکستان کی فوج کا ساتھ دینا پوری اُمت اور قوم کا فرض ہے، یہ (افغان طالبان) ظالم معصوم لوگوں کو قتل کرتے ہیں

نجی ٹی وی سے گفتگو کرتے ہوئے علامہ طاہر اشرفی کا کہنا تھاکہ ان ظالموں ے عورتوں،بچوں معصوم لوگوں کا قتل کیا، ان لوگوں کے خلاف پاکستانی فوج کا ساتھ دینا ایک جہادہے، فرض ہے، دنیا بھر کے علماء مشائخ ہمارے ساتھ رابطے میں ہیں اور پاکستان کے ساتھ کھڑے ہیں،رمضان کے بعد دنیا بھر کے علماو مشائخ کو اسلام آباد میں دعوت دیں گے اور لائحہ عمل کا اعلان کریں گے،پاکستان علما کونسل نے فیصلہ کیا ہے کہ آج خطبات جمعہ یوم عزم استحکام پاکستان کے عنوان پر ہوں گے، برادر اسلامی ممالک نے افغان قیادت کو کہا آپ دشمن کے آلہ کار نہ بنیں، دشمن ہماری فوج کا میدان میں مقابلہ نہیں کرسکتا اسلیے ملک میں دہشت گردی کروا رہا ہے،طالبان نے دہشت گردوں کے خلاف کارروائی نہیں کی لیکن اب پاکستان کرے گا، پاکستان اب فیصلہ کرچکا کہ ملک میں مزید خون اب نہیں بہنے دیں گے۔

پاک افغان سرحد پر باجوڑ سیکٹر کےقریب فتنہ الخوارج کےدہشتگرد کی دراندازی کی کوشش ناکام بنا دی گئی

سیکیورٹی فورسز نے بارڈر کراس کرنے والے فتنہ الخوارج کے دہشتگرد کوزندہ پکڑلیا، سیکیورٹی ذرائع کے مطابق پکڑے جانے والے فتنہ الخوارج کے دہشتگرد نے اپنا نام عبداللہ بتایا ہے،سیکیورٹی فورسز کسی بھی جارحیت اور دراندازی کیخلاف مکمل الرٹ ہیں،

افغان طالبان رجیم کی سرحدی دراندازی کی گھناؤنی کوشش ناکام بنا دی گئی اور پاکستان نے امن دشمنوں کے خلاف آپریشن غضب للحق کا آغاز کر دیا ہے۔سیکیورٹی فورسز نے پاک افغان سرحد پر بلااشتعال جارحیت کا بھرپور اور منہ توڑ جواب دیا سیکیورٹی فورسز کی چھوٹے اور بڑے ہتھیاروں سے گولہ باری جاری ہے۔کواڈ کاپٹر سے پاکستانی چیک پوسٹوں پر حملے کی کوشش بھی ناکام بنا دی گئی اور سیکیورٹی فورسز نے بروقت کارروائی کرتے ہوئے تمام کواڈ کاپٹرز مار گرائے۔ڈرونز کے ذریعے چن چن کر افغان طالبان رجیم کی پوسٹوں کو بھی نشانہ بنایا جا رہا ہے۔پاک فوج کی جوابی کارروائی میں افغان طالبان کے متعدد ٹھکانے تباہ ہو گئے اور خوارج بھاگ گئے۔پاک وطن کے محافظوں نے ناوگئی ، باجوڑ ، تیراہ ، خیبر ، مہمند اور ارندو سیکٹر پر دندان شکن جواب دیا ، جوابی ایکشن میں باجوڑ اور چترال سیکٹرپرافغان طالبان کی چوکیاں تباہ کر دی گئیں۔

پاک افغان سرحد پر افغان طالبان کی بلا اشتعال جارحیت کیخلاف فیصلہ کن جوابی کاروائی جاری ہے

جنوبی وزیرستان میں پاک فوج کی بھرپور جوابی کارروائی میں افغان طالبان کی داؤد پوسٹ تباہ کر دی گئی،پاک فوج کی جانب سے مؤثر انداز میں افغان طالبان کی داؤد پوسٹ کو نشانہ بناتے ہوئے دیکھا جا سکتا ہے،

سیکیورٹی فورسز کی نواپاس سیکٹر کےقریب دہشتگردوں کے ٹھکانوں پرمؤثر کارروائی،پاک فوج کی افغان جارحیت کے خلاف کارروائی سے متعدافغان طالبان جہنم واصل، مورچے مکمل تباہ ہوگئے،پاکستان کی مسلح افواج ملکی سلامتی کے لیے ہمہ وقت تیار ہیں،

چیئرمین تحریک انصاف بیرسٹر گوہر علی خان نے افغان اشتعال انگیزی پر ردعمل دیا ہے

ایکس پر پوسٹ کرتے ہوئے بیرسٹر گوہر کا کہنا تھا کہ اللہ پاکستان کو ہمیشہ محفوظ رکھے۔ ہم جہاں بھی ہو سکےاپنے پڑوسیوں سے امن قائم کریں گے لیکن انکی طرف سے پاکستان کو درپیش خطرات کا مقابلہ کرنے سے ہرگز دریغ نہیں کریں گے۔ ہر دشمن کو انجام تک پہنچائیں گے۔ پاکستان کے خلاف افغانستان کی اشتعال انگیزی کا بھر پور جواب دیاجائیگا۔ پاکستان کی سیکورٹی فورسز انشاء اللّٰہ قوم کی دعاؤں سے اپنے ملک کا دفاع کرینگے- ہماری دعائیں اور حمایت انکے ساتھ ہیں-پاکستان زندہ باد

افغان طالبان کی جانب سے مبینہ بلااشتعال جارحیت کے بعد پاکستانی سیکیورٹی فورسز نے بروقت اور بھرپور جوابی کارروائی کرتے ہوئے دشمن کے عزائم کو ناکام بنا دیا۔

سیکیورٹی ذرائع کے مطابق پاک فوج کی مؤثر حکمتِ عملی اور بھرپور ردعمل کے نتیجے میں افغان طالبان کے اہلکار تورخم بارڈر سے پسپا ہونے پر مجبور ہوگئے۔ذرائع کا کہنا ہے کہ سرحدی علاقے میں کشیدگی اس وقت پیدا ہوئی جب افغان طالبان کی جانب سے اشتعال انگیز اقدامات دیکھنے میں آئے، جس کے بعد پاکستانی افواج نے نہایت پیشہ ورانہ انداز میں صورتحال کو سنبھالا اور دشمن کو واضح پیغام دیا کہ ملکی سرحدوں کے تحفظ پر کوئی سمجھوتہ نہیں کیا جائے گا۔سیکیورٹی حکام کے مطابق پاک فوج کی جوابی کارروائی کے بعد افغان طالبان کے جنگجو تورخم بارڈر پر اپنی پوزیشنیں چھوڑ کر ٹرکوں میں سامان لوڈ کر کے فرار ہوگئے۔ عینی شاہدین کا کہنا ہے کہ سرحدی علاقے میں افغان اہلکاروں کو جلدی میں مورچے خالی کرتے دیکھا گیا۔

دفاعی ماہرین کا کہنا ہے کہ پاکستانی فورسز کی بروقت اور فیصلہ کن کارروائی نے نہ صرف دشمن کی پیش قدمی کو روکا بلکہ سرحدی علاقوں میں امن و استحکام کو بھی یقینی بنایا۔ ان کا کہنا ہے کہ پاکستان کی مسلح افواج کسی بھی قسم کی جارحیت کا منہ توڑ جواب دینے کی مکمل صلاحیت رکھتی ہیں۔سیکیورٹی ذرائع نے اس عزم کا اعادہ کیا ہے کہ سرحدوں کے دفاع کے لیے پاک فوج ہمہ وقت تیار ہے اور کسی بھی جارحیت کا بھرپور اور مؤثر جواب دیا جاتا رہے گا۔

وفاقی وزیر ڈاکٹر مصدق ملک نے پاک افغان سرحد پر کشیدگی پر ردعمل دیتے ہوئے کہا ہے کہ ہمارا ایک اور ہمسایہ بھی یہ ہتھکنڈے استعمال کرکے منہ کی کھا چکا ہے، افغان طالبان رجیم اس پراکسی وار میں بھی منہ کی کھائیں گے۔

پاک افغان سرحد پر کشیدگی پر وفاقی وزیر ڈاکٹر مصدق ملک نے اپنے بیان میں کہا ہے کہ جب تک امن سے بات ہو رہی تھی تو ہم امن سے بات کر رہے تھے ، اب وہ بندوق سے بات کرنا چاہتے ہیں تو آگے سے گولے سے بات ہوگی،ہمارا ایک اور ہمسایہ بھی یہ ہتھکنڈے استعمال کرکے منہ کی کھا چکا ہے ، افغانستان میں کٹھ پتلی معاملہ چل رہا ہے ہم جانتے ہیں اس کے پیچھے کون ہے،افغان طالبان رجیم اس پراکسی وار میں بھی منہ کی کھائیں گے،گولی چلے گی اور جہاں سے گولی چلے گی تو جنگ وہاں ہوگی، ہم امن پسند قوم ہیں امن سے رہنا چاہتے ہیں یہ شاید اس کو کمزوری سمجھتے ہیں،دشمن کی طرف سے فیک ویڈیوز چلائی جارہی ہیں یہ جنگ اب سوشل میڈیا پر تو نہیں ہوگی۔

واضح رہے کہ پاک افغان سرحد پر افغان طالبان رجیم کی بلااشتعال کارروائیوں کے خلاف پاکستان نے آپریشن غضب للحق شروع کردیا ہے۔سکیورٹی ذرائع کے مطابق پاکستانی سکیورٹی فورسز کی جوابی کارروائی سے افغان طالبان کے متعدد ٹھکانے تباہ ہوگئے اور خوارج بھاگ کھڑے ہوئے۔

پاک فوج کی افغان طالبان کی بلااشتعال جارحیت پر مؤثر کارروائی جاری ہے،

سیکیورٹی ذرائع کے مطابق پاک فوج نےچترال سیکٹر کے قریب افغان طالبان کی بریکوٹ بیس کو کامیابی سے نشانہ بنا کرتباہ کردیا ،پاکستان اپنی سرحدوں اور شہریوں کی حفاظت کو ہرصورت یقینی بنائے گا ،

افغان طالبان کی بلا اشتعال جارحیت، مسجد کو نشانہ بنا ڈالا،افغان طالبان کی اسلام دشمنی کھل کر سامنے آگئی باجوڑ میں مسجد کو بھی نشانہ بنا ڈالا،افغان طالبان کی شیلنگ سے مسجد کی چھت اور دیگر حصے بری طرح متاثرہوئے ہیں،پاک فوج افغان طالبان کی بلااشتعال جارحیت کا منہ توڑ جواب دے رہی ہے، پاکستان کی سیکیورٹی فورسز کسی بھی سرحدی جارحیت کا منہ توڑ اور موثر جواب دینے کیلئے ہمہ وقت تیار ہیں

پاک افغان سرحد پر مہمند میں گرسال سیکٹر میں پاک فوج کی بھرپور جوابی کاروائی جاری ہے،

گرسال سیکٹر میں پاکستان سیکیورٹی فورسز نے افغان طالبان کی چیک پوسٹیں تباہ کر دیں، مزید 3 طالبان جہنم واصل ہو گئے،، سیکیورٹی ذرائع کے مطابق مصدقہ اطلاعات کے مطابق ہلاک ہونے والے افغان طالبان کی تعداد 30 کے لگ بھگ ہو گئی، پاکستان کی سیکیورٹی فورسز سرحد کی حفاظت اور کسی بھی جارحیت کیخلاف سخت اور فوری جواب دینے کے لیے مکمل طور پر تیار ہیں

افغان طالبان حکومت کی پاک-افغان سرحد پر بلا اشتعال کارروائی کا پاکستان کی جانب سے فوری اور موثر جواب دے دیا گیا۔ افغان طالبان نے سنگین خوش فہمی کا شکار ہوئے خیبر پختونخوا میں پاکستان افغانستان سرحد پر متعدد مقامات پر بلا اشتعال فائرنگ کی حماقت کی جس کا پاکستان کی سیکیورٹی فورسز کی جانب سے فوری اور موثر جواب دیا جا رہا ہے۔ چترال، خیبر، مہمند، کرم اور باجوڑ سیکٹرز میں طالبان حکومت کی افواج کو دھول چٹاتے ہوئے بھرپور جواب دیا جارہا ہے۔ ابتدائی رپورٹوں میں افغانستان کے بھاری جانی نقصان کی تصدیق ہوئی ہے جس میں متعدد چوکیاں اور سازوسامان و آلات تباہ ہو گئے ہیں۔ پاکستان اپنی علاقائی سالمیت اور اپنے شہریوں کے تحفظ کو یقینی بنانے کے لیے تمام ضروری اقدامات کرے گا۔

سوشل میڈیا پر افغان، مبینہ آر ڈبلیو اے (RWA) اور پشتون تحفظ موومنٹ (پی ٹی ایم) سے منسلک پروپیگنڈا اکاؤنٹس کی جانب سے یہ دعویٰ گردش کر رہا ہے کہ افغانستان نے پاکستان آرمی کی 15 چوکیوں پر قبضہ کر لیا ہے، متعدد فوجیوں کو شہید کر دیا گیا ہے جبکہ کئی اہلکاروں کو زندہ گرفتار بھی کر لیا گیا ہے۔ ان پوسٹس میں اس مبینہ کارروائی کو ایک بڑی جنگی فتح کے طور پر پیش کیا جا رہا ہے۔

تاہم دستیاب حقائق اور زمینی ذرائع اس دعوے کو مکمل طور پر بے بنیاد، من گھڑت اور گمراہ کن قرار دیتے ہیں۔

حقیقت کیا ہے؟
سیکیورٹی اور سرکاری ذرائع کے مطابق پاکستان آرمی کی کسی بھی چوکی پر قبضے کی کوئی آزاد، غیر جانبدار یا بین الاقوامی تصدیق موجود نہیں۔ دعویٰ کرنے والے اکاؤنٹس کی جانب سے کسی قسم کی آپریشنل تفصیلات، جغرافیائی محلِ وقوع (geolocation) ڈیٹا، مستند ویڈیو یا تصویر، یا کسی تیسرے فریق کی توثیق فراہم نہیں کی گئی۔ سرکاری اور زمینی سطح کے ذرائع نے واضح طور پر ایسے کسی واقعے کی سختی سے تردید کی ہے۔ ماضی میں بھی کشیدگی کے ادوار کے دوران اسی نوعیت کے مبالغہ آمیز اور نفسیاتی جنگ پر مبنی بیانیے پھیلائے جاتے رہے ہیں، جن کا مقصد عوامی جذبات کو بھڑکانا اور خوف و ہراس پیدا کرنا ہوتا ہے۔

ماہرین کے مطابق اس طرح کی خبریں دراصل "انفارمیشن وارفیئر” یا اطلاعاتی جنگ کا حصہ ہوتی ہیں۔ ان کا مقصد میدانِ جنگ میں کسی حقیقی پیش رفت کی عکاسی کرنا نہیں بلکہ سوشل میڈیا کے ذریعے رائے عامہ کو متاثر کرنا، عوام میں بے چینی پیدا کرنا اور ریاستی اداروں کے خلاف شکوک و شبہات کو ہوا دینا ہوتا ہے۔حالیہ دعویٰ بھی اسی حکمت عملی کا تسلسل معلوم ہوتا ہے، جس میں بغیر کسی ثبوت کے بڑے پیمانے پر کامیابی کا تاثر دیا گیا تاکہ داخلی اور خارجی سطح پر نفسیاتی برتری حاصل کی جا سکے۔

پاکستان آرمی کی 15 چوکیوں پر قبضے، فوجیوں کی شہادت یا گرفتاری سے متعلق دعویٰ مکمل طور پر جعلی اور منظم پروپیگنڈا مہم کا حصہ ہے۔ ان الزامات کی تائید میں کوئی قابلِ اعتماد، آزاد یا مستند ثبوت موجود نہیں۔عوام سے اپیل ہے کہ غیر مصدقہ خبروں پر یقین کرنے سے گریز کریں اور معلومات کی تصدیق مستند ذرائع سے ضرور کریں۔

باجوڑ، بھرپور فوجی جواب کے بعد بزدل افغان طالبان حکومت کی جانب سے سول آبادی پر فائرنگ،بچوں،خواتین سمیت 5 افراد زخمی، مسجد پر گولہ باری سے مسجد بھی شہید ہو گئی

سرحدی ضلع باجوڑ میں پاکستان اور افغانستان کی سرحد پر کشیدگی ایک بار پھر شدت اختیار کرگئی، جہاں مقامی ذرائع کے مطابق افغان طالبان حکومت کی جانب سے مبینہ طور پر سول آبادی کو نشانہ بنایا گیا، جس کے نتیجے میں بچوں اور خواتین سمیت پانچ افراد زخمی ہوگئے۔سیکیورٹی ذرائع کے مطابق افغانستان کی جانب سے برہ لغڑئی اور گردونواح کے علاقوں میں بھاری ہتھیاروں سے فائرنگ کی گئی۔ فائرنگ کے دوران ایک مسجد کو بھی نقصان پہنچنے کی اطلاعات ہیں، جبکہ رہائشی آبادی میں خوف و ہراس پھیل گیا۔ زخمیوں میں تین خواتین اور دو بچے شامل ہیں، جنہیں فوری طور پر قریبی ہسپتال منتقل کردیا گیا جہاں انہیں طبی امداد فراہم کی جارہی ہے۔

ذرائع کا کہنا ہے کہ فائرنگ کا آغاز افغان حدود سے ہوا، جس کے بعد پاکستانی سیکیورٹی فورسز نے مؤثر اور بھرپور جوابی کارروائی کی۔ سیکیورٹی حکام کے مطابق پاکستانی فورسز نے دشمن کی فائرنگ کا نہ صرف منہ توڑ جواب دیا بلکہ سرحد پار موجود ٹھکانوں کو بھی نشانہ بنایا۔مقامی اطلاعات کے مطابق شدید دباؤ کے بعد افغان طالبان کے اہلکار اپنی ایک سرحدی پوسٹ چھوڑ کر فرار ہوگئے، جس پر بعد ازاں پاکستانی سیکیورٹی فورسز نے کنٹرول سنبھال لیا۔ ذرائع کا دعویٰ ہے کہ جوابی کارروائی کے دوران متعدد حملہ آور ہلاک بھی ہوئے،علاقے میں سیکیورٹی فورسز ہائی الرٹ پر ہیں۔ سرحدی علاقوں میں نگرانی مزید سخت کردی گئی ہے تاکہ کسی بھی ممکنہ دراندازی یا جارحیت کا بروقت اور مؤثر جواب دیا جاسکے۔