Category: کراچی

وفاقی وزیر توانائی حماد اظہر کا کہنا ہے کہ کراچی کے شہریوں کی لوڈشیڈنگ سے نجات کیلئےمزید 200میگاواٹ بڑھادی گئی ہے۔

تفصیلات کے مطابق وفاقی وزیر توانائی حماد اظہر نے سماجی رابطے کی ویب سائٹ ٹوئٹر پر اپنے بیان میں کہا ہے کہ کراچی الیکٹرک کو پہلے 350میگا واٹ اضافی بجلی فراہم کی جا رہی تھی، اب کراچی کے شہریوں کی لوڈشیڈنگ سے نجات کیلئےمزید 200میگاواٹ بڑھادی گئی ہے۔

گذشتہ روز وزیر اعظم کی خصوصی ہدایت پر گورنر سندھ عمران اسماعیل نے کراچی شہر ‏میں جاری طویل اور غیر اعلانیہ لوڈشیڈنگ کے معاملے پر وفاقی وزیر برائے توانائی محمد حماد ‏اظہر سےاسلام آباد میں ملاقات کی تھی ۔

رنر سندھ نے کہا کہ کے ای کراچی کو بلا تعطل بجلی فراہمی کو یقینی بنائے، کے الیکٹرک کو ‏وارننگ بھی جاری کی گئی ہے کہ کراچی کے لوگ اگر بجلی کے حوالے سے مزید تنگ اور پریشان ‏ہوئے تو وفاق اس معاملہ میں انتہائی اقدامات کر سکتا ہے۔

گورنر سندھ نے بیان میں بتایا کہ وفاقی وزیر برائے توانائی محمد حماد ‏اظہر کی جانب سے کے الیکٹرک کو مزید 400 میگا واٹ اضافی بجلی فراہم کرنے کا فیصلہ کیا گیا ‏ہے۔

گورنر سندھ کا کہنا تھا کہ کے الیکٹرک کو اگلے دس دن تک بلاتعطل بجلی کی فراہمی کے معاملات کو درست کرنے ‏کے لئے ہدایات بھی جاری کی گئی ہیں

اولاد اللہ کی نعمت ہے،اسے قتل نہ کریں،چھیپا کے جھولے میں ڈالیں،بے اولادوں کی گود بھریں، خادِم اِنسانیت محمد رمضان چھیپاکی اپیل۔

آج کراچی میں ایک اور نومولود بچی کی نعش ملنے پر خادِم اِنسانیت محمد رمضان چھیپا کااظہار تشویش۔

منگھوپیرنہرمیں سے ایک اور نومولود بچی کی نعش ملنا انسانیت سوز فعل ہے،خداکے واسطے، معصوم بچوں کوقتل نہ کریں، نالے اور کچرا کنڈیوں میں پھینک کرانہیں خونخوار درندوں کے رحم و کرم پر نہ چھوڑیں۔نومولودبچوں کوکچرا کنڈی اور نالوں میں پھینکنے کے بجائے، انہیں چھیپا سینٹرز پر نصب چھیپا جْھولے میں ڈال دیں،

کراچی کے علاقہ کلاکوٹ سے گرفتارملزم پولیس کسٹڈی میں مبینہ طورپرجاں بحق ہوگیا،ملزم کوعدالت میں پیشی کے بعد جیل منتقل کیا جارہا تھا کہ طبیعت بگڑگئی۔

تفصیلات کے مطابق کلاکوٹ سے گرفتارملزم علی رضا پولیس کی حراست میں جاں بحق ہوگیا، جیل منتقلی کے دوران ملزم کی طبیعت خراب ہو گئی، جس پر ملزم کو فورا ہسپتال لے جایا گیا، لیکن ہسپتال جاتے ہوئے راستے میں ہی ملزم انتقال کر گیا۔

بتایا جاتا ہے کہ ملزم نشے کا عادی تھا،ملزم کومنشیات کے کیس میں گرفتارکیا گیا تھا۔ ملزم کی لاش سرد خانے منتقل کردی گئی ہے اورپوسٹ مارٹم کے بعد ورثا کے حوالے کی جائے گی۔

پولیس حکام کا کہنا ہے کہ وجہ موت جاننے کے لیے مجسٹریٹ کی زیرنگرانی پوسٹ مارٹم کیا جائے گا۔

عزیز آباد پولیس نے بروقت کارروائی کرتے ہوئے اسٹریٹ کرائم کی واردات ناکام بنادی، کارروائی میں 2 اسٹریٹ کرمنلز کو چھینی ہوئی نقد رقم چھینے ہوئے موبائل موبائل فونز و موٹر سائیکلوں سمیت رنگے ہاتھوں گرفتار کرلیا۔

ملزمان کے قبضے سے غیر قانونی اسلحہ ایمونیشن بھی برآمد ہوا۔تین موٹر سائیکل پر سوار 5 مسلح ملزمان نے عزیز آباد نمبر2 کے قریب واردات کی.

ملزمان شہری سے اسلحے کے زور پر نقد رقم، موبائیل فون چھین کر فرار ہوۓ تھے۔ گشت پر مامور تھانہ عزیز آباد کی پولیس موبائل نے تعاقب کے بعد ملزمان کو گرفتار کیا۔

ملزمان کی شناخت غلام عباس اور اشرف کے نام سے ہوئی۔ گرفتار ملزمان نے دوران انٹروگیشن ڈسٹرکٹ ویسٹ اور سینٹرل کے مختلف علاقوں میں اسٹریٹ کرائم کی متعدد وارداتوں کا اعتراف کیا

رات گئے پاکستان کیٹرز ڈیکوریٹرز ایسوسی ایشن کے وفد نے وزیربلدیات سندھ ناصر شاہ سے ملاقات کی اور انہیں بتایا کہ شادی ہالز بند ش سے کئی افراد بے روزگارہوگئے، جس کے باعث ہزاروں افراد کے گھروں کے چولہے ٹھنڈے پڑ گئے ہیں۔

اس موقع پر ناصر حسین شاہ نے گفتگو کرتے ہوئے کہا کہ شادی ہالز کی بندش کا سخت فیصلہ مجبوری میں کیاتھے، حکومت سندھ کو آپ کی تکالیف کا احساس ہے۔

ملاقات میں چیئرمین بینکوئٹ ہال ایسوسی ایشن نے صوبائی وزیر سے مطالبہ کیا کہ شادی ہالزکو ایس او پیز کےساتھ کھولنےکی اجازت دی جائے، جس پر ناصر حسین شاہ نے چھ جون سےشادی ہال کھولنےکی یقین دہانی کرائی۔

گذشتہ روز ہی صدر آل سٹی تاجراتحاد حمادپونا والا کی سربراہی میں وفد نے صوبائی وزیر ناصر شاہ سے ملاقات کی اور سندھ حکومت سے کاروباری اوقات کار شام چھ کے بجائے رات آٹھ بجےتک کرنے کی اپیل کی، ملاقات میں حمادپونا والا نےمطالبہ کیا کہ سیل کیے گئے شاپنگ مالز، دکانوں،شادی ہالز کو بھی ڈی سیل کیاجائے۔

دوسری جانب کراچی ریسٹورنٹ ایسوسی ایشن نے ریسٹورنٹس بندش اور ملازمین کی گرفتاریوں کیخلاف احتجاج کیا، ریسٹورنٹ ایسوسی ایشن نے الزام عائد کیا کہ لاک ڈاؤن کے دوران انتظامیہ اور پولیس کا رویہ انتہائی غیرمہذب ہے، ہمارا مطالبہ ہے کہ سیل کئے گئے ریسٹورنٹس کھولے جائیں اور گرفتار ملازمین کو فوری طور پر رہاکیا جائے۔

ریسٹورنٹ ایسوسی ایشن سندھ حکومت سےڈائننگ کی اجازت دینےکا مطالبہ کیا۔

شہر قائد میں اسٹریٹ کرائم کی وارداتیں کم نہ ہوسکیں اور رواں سال کے آغاز سے اب تک وارداتوں میں واضح اضافہ دیکھا گیا ہے۔ موٹرسائیکل لفٹنگ، منشیات فروشی اور دیگر جرائم سے شہریوں کی زندگی اجیرن ہوگئی۔

کراچی کے علاقے شیرشاہ پولیس نے خفیہ اطلاع پر کامیاب کارروائیاں کرکے7ملزمان کو گرفتار کرلیا، مذکورہ ملزمان اسٹریٹ کرائم، موٹرسائیکل لفٹنگ اور منشیات فروشی کی وارداتوں میں ملوث ہیں۔

اس حوالے سے پولیس حکام کا کہنا ہے کہ موٹرسائیکل لفٹرز کے قبضے سے10موٹرسائیکلیں برآمد ہوئی ہیں، ملزمان نے یہ موٹرسائیکلیں پراچہ قبرستان میں چھپائی تھیں۔

پولیس کے مطابق گرفتار ہونے والے 3اسٹریٹ کرمنلز سے چھینے گئے موبائل فون جبکہ منشیات فروشی میں ملوث ملزم سے ایک کلو سے زائد چرس برآمد ہوئی ہے، ملزمان کے خلاف مقدمات درج کرکے مزید تفتیش کی جارہی ہے۔

واضح رہے کہ رواں سال کی اسٹریٹ کرائمز میں اس سال اب تک کراچی کے شہری 41کروڑ سے زائد مالیت کی اشیاء سے محروم کردیے گئے، یعنی صرف 14 ماہ میں پونے تین ارب روپے سے زائد کی اشیاء سےشہری محروم ہوئے۔

کراچی میں دہشتگردی، ٹارگٹ کلنگ کا عفریت تھما تو اسٹریٹ کرائم جیسے قابو سے ہی باہر ہو گیا اور متفقہ طور پر شہر کا سب سے بڑا چیلنج اس وقت اسٹریٹ کرائم ہے۔

گزشتہ سال 194گاڑیاں چھینی گئیں اور 1527چوری ہوئیں، چھینی گئی گاڑی کی کم سے کم قیمت 10لاکھ اور چوری کی گئی گاڑی کی اگر 3لاکھ تصور کر لی جائے تو صرف اس مد میں 67کروڑ 20 لاکھ سے زائد روپوں سے شہریوں کو محروم کردیا گیا۔

کورونا لاک ڈاؤن کے باعث سکھر میں درجنوں اسکولز مستقل طور پر بند کر دیے گئے۔

سکھر میں کورونا وائرس کے باعث مسلسل تدریسی عمل معطل رہنے اور فیسوں کی عدم ادائیگی پرگلی محلوں کے 50 سے زائد اسکولز مالی اخراجات کا بوجھ برداشت نا کرسکے جس کے باعث پریشان حال مالکان نے مجبوراً اپنے اسکولز مکمل طور پر بند کردیے۔

چیئرمین آل پاکستان پرائیویٹ اسکول ایکشن کمیٹی بشیر چناکا جیو نیوز سے گفتگو کرتے ہوئے کہنا تھا کہ کم از کم 50 سے 100 کے درمیان اسکولز ایسے ہیں جو بند ہوچکے ہیں۔

انہوں نے کہا کہ ان اسکولوں کے جو اساتذہ بیروزگار ہوئے وہ الگ ہیں جب کہ ان کے ساتھ جڑے بہت سے کاروبار بھی بند ہوگئے ہیں۔

آل پاکستان پرائیویٹ اسکول ایکشن کمیٹی نے حکومت سے اپیل کی ہے کہ نئے آنے والے بجٹ میں پرائیوٹ اسکولز کے 25 فیصد طلبا کو اسکالر شپ دینے کا اعلان کرے تاکہ غریب طلباء تعلیم کے زیور سے آراستہ ہوسکیں۔

وزیر اعلیٰ سندھ مراد علی شاہ نے محکمہ خزانہ کو ہدایت کی ہے کہ جو سرکاری ملازم کورونا کی ویکسین نہ لگائے اس کی تنخواہ روک لی جائے۔

وزیراعلیٰ سندھ مراد علی شاہ ک سربراہی میں کورونا وائرس ٹاسک فورس کا اجلاس ہوا۔ جس میں صوبے میں کورونا کی صورت حال اور دیگر امور تبادلہ خیال کیا گیا۔

سیکریٹری صحت ڈاکٹر کاظم جتوئی کی اجلاس کو بریفنگ کے دوران بتایا کہ 27 مئی سے 2 جون تک باہر سے آنے والے 26812 مسافروں کے ٹیسٹ کیے گئے.

جن میں سے 55 کے کورونا ٹیسٹ مثبت آئے، 29 مئی کو 4 مسافروں میں کورونا کی انڈین قسم کی تشخیص ہوئی.

چاروں کو آئیسولیشن میں رکھا گیا ہے، یہ مریض جن 14 لوگوں سے رابطے میں آئے ان کے بھی ٹیسٹ کیے جارہے ہیں۔ گزشتہ 30 روز میں سندھ میں 392 اموات ہوئی ہیں، 392 اموات میں سے 238 وینٹی لیٹرز پر تھے، 73 افراد کا ان کے گھروں میں انتقال ہوا.

اس وقت 77 مریض وینٹی لیٹرز پر ہیں جن میں سے 74 کراچی میں ہیں۔ 27 مئی سے 2 جون تک کراچی شرقی میں 21 فیصد نئے کیسز اور 20 اموات ہوئیں.

کراچی وسطی میں 12 فیصد کیسز اور 15 اموات ہوئیں، کراچی جنوبی میں 9 فیصد، کراچی غربی میں 8 فیصد اور 7 اموات ہوئیں، 27 مئی سے 2 جون تک کراچی شرقی میں 21 فیصد نئے کیسز اور 20 اموات ہوئیں۔

بریفنگ کے دوران بتایا گیا کہ 2 جون کو 57541 کو ویکسین لگائی گئیں، ابھی تک سندھ میں کوویڈ ویکسین کے 15 لاکھ 50 ہزار 553 ڈوز لگائی جاچکی ہیں۔ وزیراعلیٰ سندھ نے محکمہ خزانہ کو ہدایت کی کہ جو سرکاری ملازم ویکسین نہیں لگوائے گا اس کی جولائی سے تنخواہ بند کی جائے۔

وزیراعلیٰ سندھ نے عوام سے اپیل کی کہ شناختی کارڈ لے کر ویکسینیشن سینٹرز پر ویکسین لگوائیں، وزیراعلیٰ سندھ نے صوبے بھر کے 300 بنیادی صحت مراکز کو ویکسینیشن سینٹر قائم کرنے کی ہدایت دے دی.

بنیادی صحت مراکز میں روزانہ 30000 ڈوز، موبائل ویکسینیشن ٹیم کو یومیہ 60000 جب کہ 90 نجی اسپتالوں کو روزانہ 10000 ڈوز لگانے کا ٹارگٹ دے دیا گیا۔

پاکستان عوامی تحریک کے قائدین ماہرین تعلیم محمد الیاس مغل،راؤ محمد طیب،راؤ اشتیاق احمد نے وزراء تعلیم کی کانفرنس کے مضحکہ خیز علامیئے پر تبصرہ کرتے ہوئے کہا ہے کہ جب نا اہل لوگوں کو تعلیم کے وزیر بنایا جائے گا تو اسی طرح کے فیصلے آئیں گے۔وفاقی اورصوبائی وزرا تعلیم کا آئے روز امتحانوں کی تاریخوں میں تبدیلی سے جگ ہنسائی ہو رہی ہے۔

وزراتعلیم خود کنفیوز ہیں انہیں سمجھ نہیں آرہی وہ کیا کریں تعلیم کو مذاق بنا رکھا ہے۔ملک میں کاروبار کھلے ہیں۔مارکیٹوں میں پبلک رش ہے صرف تعلیمی اداروں میں حکمرانوں کو کورونا نظر آتا ہے۔ان قائدین نے کہا جان بوجھ کر تعلیمی اداروں اور شادی ہالز کو بند کیا گیا ہے جسکی وجہ سے پرائیوٹ اسکولز اور شادی ہالز سے وابستہ لوگوں کے گھروں میں فاقے ہو رہے ہیں۔ان قائدین نےکہا کورونا جلسے،جلوسوں، الیکشنوں کے دوران چھٹی پر ہوتا ہے اور وہ صرف شادی ہالز اور اسکولوں میں پایا جاتا ہےحکمرانوں کی ناکام پالیسیاں عوام اور تعلیم دشمن ہیں۔ صوبائی اور وفاقی حکومتوں کی نا اہلی کا اندازہ اس بات سے لگایا جائے کورونا کو دوسال ہونے کو ہیں مگر انہوں نے کوئی منصوبہ بندی نہیں کی سوائے اجلاسوں کے اور قوم کے بچوں کو کنفیوز کرنے کے کوئی کام نہیں ہوا جو کہ لمحہ فکریہ ہے۔ان قائدین نےکہا حکمران بچوں کے مستقبل سے نہ کھیلیں بلکہ فی الفور تعلیمی ادارے کھولے جائیں۔

چیمبر کی مداخلت پر 6 روز سے بند بازار فیصل ڈی سیل تاجروں کا دھرناواحتجاج
موتی والا اور مجید میمن کے مشکور ہیں ظلم و زیادتیوں کیخلاف 3 جون کو دھرنا ہوگامحمود حامد
کراچی ال پاکستان آرگنائزیشن آف اسمال ٹریڈرز اینڈ کاٹیج انڈسٹریز کراچی کے صدر محمود حامد نے چھہ روز سے بند بازار فیصل اور عدیل سنٹر کریم آباد کو ڈی سیل کروانے پر بی ایم جی گروپ کے چیئرمین زبیر موتی والا کراچی چیمبر کے صدر شارق وھرہ اسمال ٹریڈرزکمیٹی کے چیئرمین مجید میمن اور تنویر باری کا شکریہ ادا کیا ہے واضح رہے کہ ایس او پیز کی خلاف ورزی کی بنیاد پر بازار فیصل کریم آباد اور عدیل سینٹر کو اے سی ڈسٹرکٹ سنٹرل نے چھ روز قبل سیل کر دیا تھا اور تاجروں کی کوششوں کے باوجود اسے ڈی سی نہیں کیا گیا اور تاجروں سے بھاری رقمیں طلب کی جا رہی تھی نیز انہیں مجبور کیا جا رہا تھا کہ وہ ای پورٹل ٹیکس کی فوری ادائیگی کریں آج متاثرہ تاجروں نے کراچی چیمبر آف کامرس سے رابطہ کیا تو چیمبر کی قیادت نے ڈی سی سینٹرل سے رابطہ کیا اور ڈسٹرکٹ سینٹرل کے تاجروں کے ساتھ ہونے والی زیادتی پر شدید غم و غصے کا اظہار کیا اس دوران بازار فیصل اور عدیل سنٹر کے مشتعل تاجر سڑکوں پر آگئے اور انہوں نے کریم آباد پر شاہراہِ پاکستان کو بلاک کردیا جس کی اطلاع پر اسمال ٹریڈرز کراچی کے صدر محمود حامد، محمد اختر، کاشف احمد، محمد اکبر اور دیگر تاجر راہنماؤں نے جا کر امن و امان کی صورتحال کو کنٹرول کیا اور تاجروں کو چھہ روز سے بند مارکیٹ کو کھلوانے کی یقین دھانی کرائی کراچی چیمبر کی کوششوں کے نتیجے میں شام پانچ بجے ڈی سی سینٹرل نے باذار فیصل اور عدیل سینٹر کو ڈی سیل کرنے کے احکامات جاری کر دیئے اس موقع پر اسمال ٹریڈرز کے صدر محمود حامد نے متاثرہ تاجروں سے خطاب کرتے ہوئے کراچی چیمبر آف کامرس کا شکریہ ادا کیا انہوں نے کہا کہ چیمبر نے تاجروں کی نمائندگی کا حق اداکر دیا انہوں نے کراچی میں میں تاجروں کے ساتھ ظالمانہ رویے کی بھرپور مذمت کی اور سوال کیا کہ ملک کے خزانے میں 70 فیصد ریونیو دینے والے شہر کے تاجروں کے ساتھ یہ ظلم کیوں روا رکھا جارہا ہے انہوں نے مطالبہ کیا کہ پولیس کی رشوت ستانی جرمانے بند کیے جائیں ھفتہ میں دو دن کی تعطیل کا خاتمہ کیا جائے اور کاروباری اوقات رات 10 بجے تک بڑھائے جائیں محمود حامد نے کہا کہ جب پورے ملک میں کاروباری اوقات بڑھا دیئے گئے ہیں اور کرونا وبا کے کیسز میں واضح کمی آئی ہے تو پھر کراچی کی تجارت اور معیشت کو کیوں تباہ کیا جا رہا ہے انہوں نے کہا کہ کراچی کے تاجر اس ظلم و زیادتی کے خلاف اور اپنے روزگار کو بچانے کے لئے 3 جون کو تین بجے ایم اے جناح روڈ پر احتجاجی دھرنا دینگے اسمال ٹریڈرز کے صدر نے تاجر برادری سے اپیل کی کہ وہ اس دھرنے میں بھرپور شرکت کریں۔