Category: کراچی

وزیرِ اعلیٰ سندھ مراد علی شاہ نے کہا ہے کہ جرائم میں کمی اور امن و امان کی بہتری سندھ پولیس کی کامیابی ہے، حکومت سندھ پولیس کی بہتری اور فلاح کے لیے اقدامات کر رہی ہے۔

کراچی میں شاہد حیات پولیس ٹریننگ کالج سعیدآباد میں پولیس کے ریکروٹ ٹریننگ کورس کی 131ویں پاسنگ آؤٹ پریڈ میں وزیرِ اعلیٰ سندھ مراد علی شاہ بطور مہمان خصوصی شریک ہوئے،انسپکٹر جنرل سندھ اور دیگر اعلیٰ پولیس حکام نے وزیرِ اعلیٰ سندھ مراد علی شاہ کا استقبال کیا۔ آئی جی پولیس جاوید عالم اڈھو نے مہمانِ خصوصی کو یادگاری شیلڈ پیش کی،پولیس کے 889 اہلکاروں نے ریکروٹ ٹریننگ کورس مکمل کیا ہے، وزیرِ اعلیٰ سندھ نے نمایاں کارکردگی دکھانے والے اہلکاروں میں انعامات تقسیم کیے۔تقریب سے خطاب کرتے ہوئے وزیراعلیٰ سندھ سید مراد علی شاہ کا کہنا تھا کہ پاسنگ آؤٹ ہونے والوں کو مبارکباد پیش کرتا ہوں، پولیس ٹریننگ سعید آباد میں جدید تربیت دی جا رہی ہے، آپ عوام کے جان و مال کے محافظ ہیں، سندھ پولیس سے عوام کو بڑی توقعات ہیں، موجودہ حالات میں دہشت گردی اور جرائم کے خلاف سندھ پولیس نے بھرپور کارروائیاں کی ہیں،ہ سندھ حکومت پولیس کی بہتری اور حوصلہ افزائی کے لیے مسلسل اقدامات کر رہی ہے، پولیس ٹریننگ میں جدید سہولتیں فراہم کی گئی ہیں، سندھ پولیس کے بہادر افسران و جوانوں کی وجہ سے صوبے میں امن قائم ہوا۔

وزیراعلیٰ سندھ مراد علی شاہ کا مزید کہنا تھا کہ کچھ روز پہلے دادو میں 3 بہادر سپاہیوں نے شہادت کا رتبہ حاصل کیا، صوبے میں چند ماہ میں پولیس کے افسران و جوانوں نے بہادری کی شاندار مثال قائم کی، کراچی میں سی ٹی ڈی کے ڈی ایس پی علی رضا کو شہید کر دیا گیا۔ کراچی میں جب کچھ سال پہلے دہشت گردوں نے چینی قونصلیٹ پر حملہ کیا تو کانسٹیبل شہید ہوئے، پچھلے سال جنوری سے دسمبر تک 1325 پولیس مقابلے ہوئے، 207 ڈاکوؤں کو ہلاک کیا۔ پولیس نے 418 ڈاکوؤں کو زخمی کیا، 1138 ڈاکوؤں کو گرفتار کیا جبکہ 114 ڈاکوؤں نے سرنڈر کیا، اس سال یکم جنوری سے آج تک 115 پولیس مقابلے ہوئے،27 ڈاکوؤں کو ہلاک کیا گیا جبکہ 82 زخمی ہوئے، پولیس نے 81 ڈاکوؤں کو گرفتار کیا اور 153 ڈاکوؤں نے سرنڈر کیا،امید کرتا ہوں کہ سندھ پولیس ایسے ہی بہادری سے کام کرتے ہوئے کچے کے ڈاکوؤں کا خاتمہ کرے گی، ایک وقت تھا کہ دہشت گرد روزانہ کئی لوگوں کو شہید کر دیتے تھے، یہاں بم دھماکے ہوتے تھے، ٹارگٹ کلنگ ہوتی تھی،ہم دہشت گردی سے چھٹکارہ حاصل کر چکے ہیں، بلوچستان اور خیبر پختون خوا میں دہشت گردی کے واقعات ہو رہے ہیں، سندھ پولیس نے دہشت گردی اور جرائم کے خلاف مؤثر کارروائیاں کی ہیں۔ نئے جوان جذبے اور لگن کے ساتھ فرائض انجام دیں گے۔

سندھ کے سینئر صوبائی وزیر، وزیر اطلاعات شرجیل میمن نے کہا ہے کہ میڈیا کی توجہ اصل معاملات سے ہٹ گئی ہے، میڈیا اور ٹی وی چینلز صرف سیاسی موضوعات پر بات کرتے ہیں، غیر نتیجہ خیز مسائل کو پیش کرتے ہیں اور عوام کے اصل مسائل کو نظر انداز کر دیتے ہیں

کراچی میں ایسوسی ایشن آف کنسلٹنگ انجینئرز پاکستان کی کانفرنس میں سینئر وزیر شرجیل انعام میمن کا پرتپاک استقبال کیا گیا۔ کانفرنس میں سندھ کے ترقیاتی منصوبوں اور انفراسٹرکچر کے مواقع پر اہم تبادلہ خیال ہوا۔شرجیل میمن نے تقریب سے خطاب کرتے ہوئے کہا کہ سانحہ گل پلازہ پر کمیٹی بنائی گئی۔ وزیر اعلی سندھ کمیٹی کے سربراہ تھے، سانحہ گل پلازہ رپورٹ نیک نیتی اور ایمانداری سے شائع کی گئی، سانحہ گل پلازہ پر سندھ حکومت نے جوڈیشل کمیشن بنایا۔ گل پلازہ میں آگ بجھانے کے آلات نہ ہونے کی 2 بار وارننگ دی گئی، حفاظتی انتظامات مکمل نہ ہونے پر عمارت کو سیل کردیا جائے گا،بلڈنگ بننے کی زمہ داری حکومت کی ہوتی ہے اگر کوئی بلڈنگ بننی ہے تو اس کی زمین کی سوائل ٹیسٹنگ ہونی لازمی ہے ۔سانحہ گل پلازا میں انتظامیہ کا بھی قصور تھا، 2 بار وارننگ دی لیکن انتظامیہ نے توجہ نہیں دی،اس سانحے میں 80 قیمتی جانیں ضائع ہوئیں، اور تحقیق سے ثابت ہوا کہ عمارت کے مالک نے غیرقانونی طور پر اضافی منزلیں تعمیر کیں اور منظور شدہ نقشے کی خلاف ورزی کی

بحیرہ عرب میں پاکستانی اداروں نے مشترکہ آپریشن کرکےاربوں روپے مالیت کی منشیات سمگل کرنیکی کوشش ناکام بنادی

اینٹی نارکوٹکس فورس اور دیگرایجنسیاں منشیات کی روک تھام کیلئے بھرپور کردار ادا کررہی ہیں،اے این ایف کی فراہم کردہ اطلاع پربحریہ عرب میں کامیاب آپریشن ، منشیات کی بڑی کھیپ پکڑی گئی، آپریشن میں اے این ایف،پاک نیوی،میری ٹائم سکیورٹی ایجنسی،جوائنٹ میری ٹائم انفارمیشن کوآرڈی نیشن سنٹرنے حصہ لیا، آپریشن میں کشتی کی تلاشی کے دوران 1300کلوگرام سے زائد چرس اور بڑی مقدار میں شراب برآمد کرلی گئی ،برآمد شدہ منشیات اور دیگر ممنوعہ اشیاء کی مجموعی مالیت 20 ارب روپے سے زائد بتائی جاتی ہے ، انسداد منشیات آپریشن متعلقہ پاکستانی اداروں کے مربوط باہمی رابطے،معلومات کے تبادلے اورموثرحکمت عملی کا مظہر ہے.

‎امیر جماعت اسلامی کراچی منعم ظفر نے اعلان کیا ہے کہ جماعت اسلامی کل سندھ اسمبلی کے باہر دھرنا دے گی، جس کا مقصد کراچی کے شہری مسائل اور حقوق کے لیے آواز بلند کرنا ہے۔
‎میڈیا سے گفتگو کرتے ہوئے انہوں نے کہا کہ احتجاج شام چار بجے شروع ہوگا اور ہر صورت جاری رکھا جائے گا۔ ان کے مطابق دھرنے کا مقصد شہریوں کو درپیش بنیادی مسائل کے حل کے لیے حکومت کو جوابدہ بنانا ہے۔
‎منعم ظفر نے کہا کہ احتجاج بااختیار میگا سٹی گورنمنٹ کے قیام، شہریوں کے جان و مال کے تحفظ کو یقینی بنانے اور حکومتی کارکردگی پر سوال اٹھانے کے لیے کیا جا رہا ہے۔ انہوں نے مؤقف اختیار کیا کہ گزشتہ 18 برسوں کی نااہلی کے خلاف عوامی سطح پر آواز بلند کی جائے گی۔
‎ان کا کہنا تھا کہ “جینے دو کراچی مارچ” کے بعد یہ احتجاجی تحریک کا اگلا مرحلہ ہے، جبکہ دھرنے کے اعلان کے بعد حکومتی حلقوں میں بھی تشویش پائی جا رہی ہے۔
‎امیر جماعت اسلامی کراچی نے حکومت کو خبردار کرتے ہوئے کہا کہ احتجاج روکنے کے لیے کسی بھی قسم کے ہتھکنڈے استعمال نہ کیے جائیں، کیونکہ دھرنا ہر صورت ہوگا۔


کراچی کے علاقے کاٹھور کے قریب ایک ہولناک حادثے میں آئل ٹینکر مسافر وین پر گر گیا، جس کے نتیجے میں 12 افراد جاں بحق اور 6 زخمی ہو گئے۔ حادثے میں حیدرآباد سے کراچی آنے والی ایک گاڑی بھی ٹینکر کی زد میں آ گئی۔
‎ریسکیو حکام کے مطابق جاں بحق ہونے والوں میں 3 مرد، 3 خواتین اور 6 بچے شامل ہیں، جن کی عمریں 6 سے 40 سال کے درمیان ہیں۔ آئل ٹینکر کو کاٹ کر ریسکیو آپریشن جاری ہے تاکہ زخمیوں کو فوری طبی امداد فراہم کی جا سکے۔
‎ایس ایس پی ملیر نے بتایا کہ حادثہ چند گاڑیوں کے رانگ وے پر آنے کے باعث پیش آیا۔ ریسکیو اور پولیس ٹیمیں علاقے میں موجود ہیں اور مزید امدادی کارروائیاں جاری ہیں۔

‎کراچی میں ماہِ صیام کی آمد سے قبل پانی کا بحران دوبارہ نمودار ہو گیا ہے۔ گلشنِ اقبال شانتی نگر کے قریب واٹر کارپوریشن کی 84 انچ قطر کی مرکزی لائن کے لیک ہونے سے شہر کے بڑے حصے میں پانی کی فراہمی متاثر ہوئی۔
‎واٹر کارپوریشن حکام نے بتایا کہ متاثرہ لائن کی مرمت مکمل کر دی گئی ہے اور دھابیجی پمپنگ اسٹیشن سے پانی کی فراہمی بحال کر دی گئی ہے۔ تاہم، دھابیجی سے شہر تک پانی پہنچنے میں تقریباً 18 گھنٹے لگتے ہیں، جس کے باعث شہریوں کو مکمل فراہمی کل سے متوقع ہے۔
‎حکام کا کہنا ہے کہ رمضان سے قبل پیدا ہونے والے اس بحران سے شہریوں کو مشکلات کا سامنا کرنا پڑا، مگر صورتحال جلد معمول پر آ جائے گی۔

‎کراچی سے لاپتا ہونے والے شہری شاہ میر کے پولیس مقابلے میں مارے جانے کا انکشاف ہوا ہے۔ یہ بات جمعرات کو سندھ ہائی کورٹ میں سماعت کے دوران سامنے آئی، جہاں شہر کے مختلف علاقوں سے 20 سے زائد لاپتا افراد سے متعلق درخواستوں پر کارروائی کی گئی۔
‎پولیس کی جانب سے پیش کی گئی رپورٹ میں بتایا گیا کہ شاہ میر ایک مبینہ پولیس مقابلے میں ہلاک ہو چکا ہے، جس پر عدالت نے حیرت کا اظہار کیا۔
‎سچل تھانے کے تفتیشی افسر نے عدالت میں پیش ہو کر مؤقف اختیار کیا کہ شاہ میر مقابلے میں مارا گیا۔ درخواست گزار کے وکیل نے عدالت کو بتایا کہ شاہ میر کو مبینہ مقابلے سے دو روز قبل حراست میں لیا گیا تھا۔
‎عدالت نے زیر حراست شہری کی پولیس مقابلے میں ہلاکت پر تشویش کا اظہار کرتے ہوئے ایس ایس پی ایسٹ کو ذاتی حیثیت میں طلب کر لیا اور آئینی بینچ کو ہدایت کی کہ 19 فروری کو مکمل رپورٹ پیش کی جائے۔
‎عدالت نے دیگر لاپتا افراد سے متعلق بھی تفصیلی رپورٹس طلب کر لی ہیں۔

‎کراچی کے جناح انٹرنیشنل ایئرپورٹ پر مسافروں کو ٹرالیاں دستیاب نہ ہونے کے معاملے پر پاکستان ایئرپورٹس اتھارٹی کے 9 ملازمین کو معطل کر دیا گیا۔
‎ذرائع کے مطابق معطل افراد میں شفٹ کے ڈیوٹی فیلڈ آفیسر، ڈپٹی ڈیوٹی فیلڈ آفیسر اور ٹرالی اسٹاف شامل ہیں۔ شکایات سامنے آئیں کہ ٹرالیوں کو ٹرمینل بلڈنگ سے باہر نہیں لے جایا جا رہا تھا، جس کے باعث مسافروں کو سامان خود اٹھا کر لے جانا پڑا۔
‎واقعے کے بعد کراچی ایئرپورٹ منیجر کی سربراہی میں انکوائری شروع کر دی گئی ہے۔ حکام کا کہنا ہے کہ تحقیقات مکمل ہونے پر مزید کارروائی کی جائے گی۔