Category: کراچی

سپریم کورٹ کے فیصلے کی روشنی میں ایف آئی اے اور متروکہ وقف املاک بورڈ نے اسلام آباد کے آرام باغ میں مشترکہ کارروائی کرتے ہوئے وفاقی حکومت کی ملکیت 1 ارب روپے مالیت کی عمارت صارم برنی ویلفئیر ٹرسٹ سے واپس حاصل کر لی۔

میڈیا رپورٹس کے مطابق ای ٹی پی بی کے زیر انتظام مذکورہ عمارت کافی عرصے سے ٹرسٹ کے غیر قانونی تسلط میں تھی، جس کا استعمال مبینہ طور پر غیر قانونی سرگرمیوں کے لیے کیا جا رہا تھا۔عمارت میں صارم برنی کی طرف سے کم عمر بچوں کی مبینہ اسمگلنگ کے الزامات بھی سامنے آئے ہیں، جس کے باعث وہ اس وقت جیل میں موجود ہیں،عمارت کو قبضے میں لینے کے بعد سیل کر دیا گیا اور بعد ازاں متروکہ وقف املاک بورڈ کے سپرد کر دیا گیا،حکام کا کہنا ہے کہ اس کارروائی کے بعد عمارت کا قانونی اور شفاف استعمال یقینی بنایا جائے گا، جبکہ غیر قانونی قبضے پر مزید سخت اقدامات جاری رہیں گے۔

سندھ اسمبلی نے صوبے بھر میں شراب خانوں کے لائسنس منسوخ کرنے اور خرید و فروخت پر پابندی کی قرارداد کو مسترد کردیا۔شراب خانوں پر پابندی کی قرارداد ایم کیو ایم کے رکن انیل کمار کی جانب سے پیش کی گئی تھی جس کی حکومت نے مخالفت کی۔

ایم کیو ایم کے رکن انیل کمار نے قرارداد کے ذریعے مطالبہ کیا تھا کہ صوبے بھر میں شراب کی خرید اور فروخت پر پابندی عائد کی جائے اور شراب خانوں کےتمام لائسنس منسوخ کیے جائیں۔ وزیر قانون و داخلہ سندھ ضیا لنجار نے قرارداد کی مخالفت کی اور کہا کہ اس سے ایک بہت بڑا طبقہ محروم ہوجائے گا، آج میرے دوست تھوڑے سے جذباتی لگ رہے ہیں جس کے بعد ایوان نے قرارداد مسترد کردی۔

ایوان نے ایم کیو ایم کی رکن قراۃ العین خان کی بھی 2 قراردادیں مسترد کردیں، ایک قرارداد جنسی زیادتی اور بچوں کی ہراسانی کو روکنے کے لیے لائیف بیسڈ اسکل لرننگ سے متعلق جبکہ دوسری سندھ بلڈنگ کنٹرول اتھارٹی کی کارکردگی کو دیکھنے کے لیے کمیٹی تشکیل دینے سے متعلق تھی۔


مصطفیٰ عامر کے قتل کیس میں چالان جمع ہونے کے چھ ماہ گزرنے کے باوجود ملزمان پر فردِ جرم عائد نہ ہونے پر مقتولہ کی والدہ نے سندھ ہائی کورٹ سے رجوع کر لیا۔ وکیل کے مطابق کیس انسداد دہشت گردی عدالت نمبر 16 کے جج کے انتقال کے بعد زیر التوا رہا، اور بعد ازاں سندھ حکومت کی عدالتوں کی ری اسٹرکچرنگ کے باعث اے ٹی سی 6 کو انسداد منشیات کی عدالت میں تبدیل کر دیا گیا، جس سے کارروائی میں مزید تاخیر ہوئی۔
سندھ ہائی کورٹ نے کیس ٹرانسفر کرنے کی منظوری دے دی اور نیا کیس نمبر الاٹ کرنے کی ہدایت کی۔ وکیل نے کہا کہ تاخیر انصاف کے تقاضوں کے خلاف ہے، اور اہم ملزمان ارمغان اور شیراز اس وقت جیل میں قید ہیں۔


کراچی میں ایڈیشنل آئی جی آزاد خان نے شہریوں کو دہشت گردی کے ممکنہ خطرے سے آگاہ کرتے ہوئے کہا ہے کہ تھریٹ لیول ہائی ہے، تاہم پولیس اور دیگر قانون نافذ کرنے والے ادارے مکمل طور پر الرٹ ہیں۔
کراچی پولیس آفس میں میڈیا نمائندگان سے گفتگو کرتے ہوئے آزاد خان نے بتایا کہ سیف سٹی پراجیکٹ جرائم کی روک تھام میں اہم کردار ادا کر رہا ہے اور جدید ٹیکنالوجی کے ساتھ ہیومن انٹیلی جنس کے ذریعے شہر کو جرائم سے پاک کرنے کی کوششیں جاری ہیں۔ انہوں نے کہا کہ فرانزک لیب کی سہولت پر کام جاری ہے لیکن مختلف مشکلات کی وجہ سے مکمل ہونے میں وقت لگے گا۔
‎ایڈیشنل آئی جی نے فتنہ الخوارج اور فتنہ الہندستان کو کراچی کے اہم اہداف میں شامل قرار دیتے ہوئے کہا کہ دہشت گردی کا خطرہ موجود ہے۔ دشمن اپنی پراکسیز کو زیادہ رقوم ادا کرتا ہے تاکہ شہر میں کارروائیاں کی جا سکیں، جبکہ ان گروہوں کی زیادہ توجہ خیبرپختونخوا اور بلوچستان پر ہے۔
‎آزاد خان نے پولیس کی کارکردگی بہتر بنانے پر زور دیتے ہوئے کہا کہ اہل اور پیشہ ور افسران کی تعیناتی ضروری ہے، تاکہ سفارشات سے گورننس متاثر نہ ہو۔ انہوں نے تھانہ کلچر ختم کرنے اور عوام کو زیادہ سہولت دینے کی خواہش کا اظہار کیا۔
‎انہوں نے واضح کیا کہ انسداد منشیات، اسمگلنگ، تجاوزات اور گداگری روکنا پولیس کا بنیادی کام نہیں، بلکہ جرائم کی روک تھام، تفتیش اور عوام کے تحفظ پر توجہ دینا اصل ذمہ داری ہے۔ اگر پولیس اپنے بنیادی فرائض پر توجہ دے تو نہ صرف کارکردگی میں بہتری آئے گی بلکہ رشوت کے خاتمے میں بھی مدد مل سکتی ہے۔

قومی اسمبلی کے اجلاس میں پیپلز پارٹی کی رکن قومی اسمبلی سحر کامران سمیت دیگر ارکان نے کراچی جناح انٹرنیشنل ایئر پورٹ پر ناقص انتظامات اور بدانتظامی پر شدید احتجاج کیاہے

پیپلز پارٹی کی رہنما رکن قومی اسمبلی سحر کامران کا کہنا تھا کہ کراچی جناح انٹرنیشنل ایئرپورٹ پر اس وقت لوگوں کو شدید اذیت کا سامنا کرنا پڑرہا ہے، طویل اور لمبی قطاریں لوگوں کے وقت کے ضیاع اور مشکلات کی وجہ بن رہی ہیں، ایم کیو ایم کے رہنما امین الحق نے کہا کہ کراچی ایئر پورٹ خستہ حالی کا شکار ہو رہا ہے، امیگریشن سسٹم کو اپ گریڈ کیا جانا چاہیے، ایئر پورٹ پر عوام ذلیل ہو رہے ہیں۔پیپلز پارٹی کی رہنما شازیہ مری نے اجلاس میں کہا کہ کراچی ایئر پورٹ پر مسافروں کو شدید مشکلات کا سامنا ہے اور امیگریشن کلیئرنس اور آمد کے عمل کے دوران مسائل آ رہے ہیں،انہوں نے سول ایوی ایشن کی نااہلی کی وجہ سے پیدا ہونے والے مسائل کی نشاندہی کرتے ہوئے وفاقی حکومت سے جناح ایئر پورٹ کے نظام کو درست کرنے کا نوٹس لینے کا مطالبہ کیا،اختیار بیگ نے کہا کہ ایئر پورٹ پر دستاویزات رکھنے والوں کو بھی مشکلات کا سامنا ہے۔

ن لیگی رہنما طارق فضل چوہدری نے کہا کہ کراچی ایئر پورٹ معیشت کے لیے اہمیت کا حامل ہے اور ارکان کی تجاویز کو ایڈریس کیا جائے گا، ایئر پورٹس کو آؤٹ سورس کرنے کی ضرورت ہے، اسلام آباد ایئر پورٹ سے متعلق فیصلہ کیا جا رہا ہے، کل متعلقہ وفاقی وزیر اس مسئلے پر جواب دیں گے