Category: قصور

قصور
چونیاں میں پولیس کا کریک ڈاؤن، 3 منشیات فروش اور 3 عادی ڈاکو گرفتار

قصور ڈی پی او قصور آفتاب احمد پھلروان کی ہدایت پر چونیاں پولیس نے جرائم پیشہ عناصر اور منشیات فروشوں کے خلاف بھرپور کریک ڈاؤن کرتے ہوئے 6 ملزمان کو گرفتار کر لیا۔

پولیس کے مطابق ایس ایچ او سٹی چونیاں نے اپنی ٹیم کے ہمراہ مختلف علاقوں میں کارروائیاں کرتے ہوئے 3 بدنام زمانہ اور ریکارڈ یافتہ منشیات فروشوں کو گرفتار کیا۔ ملزمان کے قبضے سے ڈیڑھ کلو گرام چرس، 150 لیٹر کچی شراب اور 65 لیٹر تیار شراب برآمد کر لی گئی۔

پولیس کا کہنا ہے کہ گرفتار ملزمان چونیاں اور گردونواح میں منشیات فروشی کے ذریعے نوجوان نسل کو نشے کی لعنت میں مبتلا کر رہے تھے۔ ملزمان کے خلاف امتناعِ منشیات کی مختلف دفعات کے تحت الگ الگ مقدمات درج کر کے مزید تفتیش شروع کر دی گئی ہے۔

دوسری جانب جرائم پیشہ عناصر کے خلاف جاری کریک ڈاؤن کے دوران 3 عادی ڈاکوؤں کو بھی گرفتار کر لیا گیا، جن سے متعلق مزید تفتیش جاری ہے۔

ڈی پی او قصور آفتاب احمد پھلروان نے کہا ہے کہ ضلع کو منشیات سے پاک بنانے کے لیے منشیات فروشوں اور دیگر جرائم پیشہ عناصر کے خلاف بلاامتیاز کارروائیاں جاری رہیں گی اور قانون شکن عناصر کے لیے کوئی رعایت نہیں برتی جائے گی

قصور میں پتنگ بازی بدستور جاری، تھانہ سٹی اے ڈویژن کے اطراف بھی خلاف ورزیوں کا انکشاف
قصور میں پتنگ بازی پر عائد پابندی کے باوجود یہ خطرناک سرگرمی تاحال نہ رک سکی جس کے باعث شہریوں کی جانیں مسلسل خطرے میں ہیں
شہریوں کا کہنا ہے کہ شہر کے مختلف علاقوں میں صبح و شام کھلے عام پتنگیں اڑائی جا رہی ہیں جبکہ حیران کن طور پر تھانہ سٹی اے ڈویژن کے اطراف اور اس کے اوپر بھی پتنگیں اڑتے دیکھی گئی ہیں

مقامی افراد نے اس صورتحال پر شدید تشویش کا اظہار کرتے ہوئے سوال اٹھایا ہے کہ اگر قانون نافذ کرنے والے اداروں کی موجودگی کے باوجود پتنگ بازی جاری ہے تو اس کی روک تھام کیوں نہیں کی جا رہی
شہریوں کا کہنا ہے کہ پتنگ بازی کے دوران استعمال ہونے والی ڈور موٹر سائیکل سواروں، راہگیروں اور بچوں کے لیے جان لیوا ثابت ہو سکتی ہے تاہم متعلقہ حکام کی جانب سے مؤثر کارروائی نظر نہیں آ رہی

شہری حلقوں کا مؤقف ہے کہ پولیس عوامی جان و مال کے تحفظ کی ذمہ دار ہے اس لیے انتظامیہ اور پولیس کو چاہیے کہ پتنگ بازی میں ملوث افراد کے خلاف بلاامتیاز کارروائی عمل میں لائی جائے اور پابندی پر سختی سے عمل درآمد یقینی بنایا جائے

شہریوں نے اعلیٰ حکام سے مطالبہ کیا ہے کہ قصور میں پتنگ بازی کے خلاف جاری مہم کا ازسرنو جائزہ لیا جائے خصوصاً ان علاقوں میں جہاں قانون کی خلاف ورزیاں سرعام ہو رہی ہیں تاکہ کسی بھی ناخوشگوار واقعے سے قبل مؤثر اقدامات کیے جا سکیں

واضح رہے کہ پنجاب میں پتنگ بازی اور دھاتی یا کیمیکل لگی ڈور کے استعمال پر پابندی عائد ہے، جبکہ خلاف ورزی کرنے والوں کے خلاف قانونی کارروائی کی جا سکتی ہے

قصور
پولیس کی بڑی کارروائی، انتہائی مطلوب منشیات فروش گرفتار

قصور: تھانہ صدر قصور پولیس نے نواحی علاقے حویلی نتھو والی میں کامیاب کارروائی کرتے ہوئے انتہائی مطلوب اور بدنام زمانہ منشیات فروش کو گرفتار کر لیا۔

پولیس کے مطابق گرفتار ملزم جاوید میو خفیہ اداروں کی مطلوب افراد کی فہرست میں شامل تھا اور طویل عرصے سے قانون نافذ کرنے والے اداروں کے لیے دردِ سر بنا ہوا تھا۔

کارروائی کے دوران ملزم کے قبضے سے ایک کلوگرام سے زائد ہیروئن برآمد ہوئی، جس پر اس کے خلاف منشیات فروشی کا مقدمہ درج کر لیا گیا ہے۔

پولیس ریکارڈ کے مطابق جاوید میو قتل، اقدام قتل اور انسدادِ دہشت گردی ایکٹ (7-ATA) کے مقدمات میں نامزد ہے، جبکہ دو دیگر مقدمات میں وہ اشتہاری ملزم بھی تھا۔

ڈی پی او قصور آفتاب احمد پھلروان نے کامیاب کارروائی پر ایس ایچ او صدر قصور ذوالفقار بھٹی اور ان کی ٹیم کی کارکردگی کو سراہتے ہوئے انہیں شاباش دی

قصور
اسلحہ بردار ڈاکوؤں کی سپیئر پارٹس کی دکان اور شہریوں سے لاکھوں روپے کی لوٹ مار

قصور کے تھانہ صدر قصور کے علاقے دیپالپور روڈ پر واقع ایک سپیئر پارٹس کی دکان اور قریبی شہریوں سے نامعلوم مسلح ڈاکوؤں نے اسلحہ کے زور پر لاکھوں روپے نقدی، موبائل فون اور دیگر سامان لوٹ لیا۔

درخواست گزار کمال چشتی کے مطابق وہ 31 مئی 2026 کو شام تقریباً 5 بجے اپنی مزدا سپیئر پارٹس کی دکان پر موجود تھا کہ تین نامعلوم مسلح ملزمان اچانک وہاں پہنچ گئے۔ ملزمان نے پہلے ہمسایہ دکاندار علی حیدر سے 28 ہزار روپے اور ناصر سے 10 ہزار روپے نقدی چھین لی۔ بعد ازاں ایک گاہک احمد علی سے 3 ہزار روپے نقدی اور موبائل فون بھی چھین لیا۔

درخواست کے مطابق ملزمان بعد ازاں سپیئر پارٹس کی دکان میں داخل ہوئے اور اسلحہ کے زور پر دکان کے گلے سے 3 لاکھ 75 ہزار روپے نقدی لوٹ کر فرار ہو گئے۔ ملزمان فرار ہوتے وقت بنگلہ کمیواں کی جانب روانہ ہوئے۔

متاثرین کے مطابق ملزمان کی عمریں تقریباً 28 سے 30 سال کے درمیان تھیں جبکہ انہیں سامنے آنے پر شناخت کیا جا سکتا ہے۔ درخواست گزار نے پولیس سے مقدمہ درج کرکے ملزمان کی فوری گرفتاری اور لوٹا گیا مال برآمد کرنے کا مطالبہ کیا ہے

قصور
چونیاں پولیس مقابلے میں مطلوب ڈاکو زخمی گرفتار، ساتھی فرار

تفصیلات کے مطابق قصور کی تحصیل چونیاں میں تھانہ صدر چونیاں کے علاقے اٹاری کرم سنگھ کے قریب پولیس اور ڈاکوؤں کے درمیان مقابلے کے دوران سنگین وارداتوں میں مطلوب ایک ڈاکو زخمی حالت میں گرفتار کر لیا گیا جبکہ اس کا ساتھی فرار ہونے میں کامیاب ہو گیا۔

پولیس کے مطابق دورانِ ناکہ بندی مشکوک موٹر سائیکل پر سوار دو ملزمان کو رکنے کا اشارہ کیا گیا تو انہوں نے پولیس پارٹی پر فائرنگ شروع کر دی۔ تعاقب کے دوران ملزمان تیز رفتاری کے باعث موٹر سائیکل سے گر گئے۔ فائرنگ کے تبادلے میں ایک ڈاکو زخمی ہو گیا جسے گرفتار کر لیا گیا جبکہ اس کا ساتھی موقع سے فرار ہو گیا۔

گرفتار زخمی ڈاکو کی شناخت سجاد عرف ہیرا ماچھی سکنہ کوٹلی رائے ابو بکر کے نام سے ہوئی ہے۔ پولیس نے ملزم کے قبضے سے ایک پسٹل بھی برآمد کر لیا

پولیس کا کہنا ہے کہ گرفتار ڈاکو اور اس کے ساتھی سے 17 روز قبل ڈھوک قبرستان کے قریب ایک شہری سے چھینی گئی موٹر سائیکل بھی برآمد کر لی گئی ہے۔

زخمی ملزم کو طبی امداد کے لیے ہسپتال منتقل کر دیا گیا ہے جبکہ فرار ملزم کی گرفتاری کے لیے خصوصی ٹیم تشکیل دے کر تلاش شروع کر دی گئی ہے۔ پولیس کے مطابق گرفتار ملزم سے مزید تفتیش جاری ہے

قصور
وزیراعلیٰ پنجاب سے فوری نوٹس لینے کا مطالبہ مصطفی آباد سروس روڈ پر لگائی گئی ٹف ٹائلوں کے معیار پر سنگین سوالات، مصطفی آباد کی سروس روڈ پر حال ہی میں لگائی گئی ٹف ٹائلوں کے ناقص معیار نے ترقیاتی منصوبوں کی شفافیت پر بڑے سوالیہ نشان کھڑے کر دیے ہیں۔ اہلِ علاقہ نے وزیراعلیٰ پنجاب سے فوری نوٹس لینے کا مطالبہ کرتے ہوئے کہا ہے کہ لاکھوں روپے کی لاگت سے مکمل ہونے والا منصوبہ چند ہی دنوں میں اپنی خامیاں ظاہر کرنے لگا ہے شہریوں کے مطابق سروس روڈ پر بچھائی گئی ٹف ٹائلیں انتہائی ناقص میٹریل سے تیار کی گئی ہیں، جو معمولی استعمال کے باوجود ٹوٹ پھوٹ کا شکار ہو رہی ہیں متعدد مقامات پر ٹائلیں اکھڑ چکی ہیں جبکہ کئی جگہوں پر دراڑیں پڑنے سے تعمیراتی کام کے معیار پر شدید تحفظات جنم لے رہے ہیں مقامی افراد کا کہنا ہے کہ ٹف ٹائلوں کی موٹائی، مضبوطی اور پائیداری مقررہ معیار کے مطابق نہیں، جس سے قومی خزانے کے ضیاع کا خدشہ بڑھ گیا ہے ترقیاتی منصوبوں میں ناقص میٹریل استعمال کر کے عوامی وسائل کو نقصان پہنچایا جا رہا ہے جبکہ کاغذوں میں ترقی کے دعوے کیے جا رہے ہیں ان کا کہنا ہے کہ اگر منصوبے میں معیاری میٹریل استعمال کیا جاتا تو نئی لگائی گئی ٹائلیں اتنی جلدی خراب نہ ہوتیں اہلِ علاقہ نے وزیراعلیٰ پنجاب، ڈپٹی کمشنر قصور اور دیگر متعلقہ حکام سے مطالبہ کیا ہے کہ اس منصوبے کا فوری تکنیکی آڈٹ کروایا جائے، استعمال شدہ میٹریل کے نمونوں کی جانچ کی جائے اور ناقص تعمیراتی کام میں ملوث ذمہ داران کے خلاف سخت قانونی کارروائی عمل میں لائی جائے۔ شہریوں کا کہنا ہے کہ عوام کے ٹیکس کے پیسے سے مکمل ہونے والے منصوبوں میں کرپشن، بدانتظامی اور ناقص کام کسی صورت برداشت نہیں کیا جا سکتا اور ذمہ دار عناصر کا احتساب وقت کی اہم ضرورت ہے