رپورٹ، سردار مظہر فاروق
قصور کے نواحی گاؤں کیسر گڑھ میں لیسکو (واپڈا) کی جانب سے بجلی چوری کے خلاف گزشتہ روز کیے گئے کریک ڈاؤن کے دوران حیران کن انکشاف سامنے آیا، جہاں محکمہ کے اپنے ہی دو ملازمین مبینہ طور پر بجلی چوری میں ملوث پائے گئے۔
ذرائع کے مطابق کارروائی کے دوران مختلف کنکشنز کی جانچ پڑتال کی گئی، جس میں دو ملازمین کے خلاف بھی بجلی چوری کے شواہد سامنے آئے۔ واقعے کے بعد مقامی شہریوں نے مطالبہ کیا ہے کہ اگر عام صارفین کے خلاف سخت کارروائیاں کی جا سکتی ہیں تو محکمہ کے اپنے ملازمین کو بھی قانون کے مطابق جوابدہ بنایا جائے۔
شہریوں کا کہنا ہے کہ بجلی چوری کے خاتمے کے لیے بلاامتیاز احتساب ضروری ہے اور کسی بھی سرکاری ملازم کو رعایت نہیں ملنی چاہیے۔ ان کا مطالبہ ہے کہ اگر الزامات درست ثابت ہوتے ہیں تو متعلقہ ملازمین کے خلاف بھی قانونی کارروائی عمل میں لائی جائے۔عوامی حلقوں نے چیف لیسکو سے مطالبہ کیا ہے کہ کیسر گڑھ کے اس واقعے کا نوٹس لیا جائے اور واضح کیا جائے کہ بجلی چوری کے خلاف جاری کریک ڈاؤن صرف عام صارفین تک محدود ہے یا محکمہ کے اپنے ملازمین پر بھی یکساں طور پر قانون کا اطلاق ہوگا۔