Category: لاہور

وفاقی حکومت جلد رمضان ریلیف پیکیج کا اعلان کرے گی، جو معاشرے کے کمزور اور مستحق طبقات کو رمضان کے مقدس مہینے میں مالی اور ضروری امداد فراہم کرنے کے لیے تیار کیا گیا ہے۔
ذرائع کے مطابق پیکیج کی رونمائی وزیراعظم شہباز شریف خود وزیراعظم ہاؤس میں منعقدہ خصوصی تقریب میں کریں گے۔ اس سے قبل وفاقی کابینہ کا اجلاس آج شام وزیراعظم کی صدارت میں طلب کیا جا سکتا ہے تاکہ پیکیج کی منظوری دی جا سکے۔
‎اجلاس میں ملک کی موجودہ سیاسی اور اقتصادی صورتحال کا جائزہ بھی لیا جائے گا اور کئی اہم معاملات زیر غور آئیں گے۔ اسلام آباد کے ٹارلائی علاقے میں حالیہ خودکش حملے کی ابتدائی رپورٹ بھی کابینہ کو پیش کی جائے گی تاکہ وزراء کو بریفنگ دی جا سکے۔
‎کابینہ اجلاس میں موجودہ سیکیورٹی اور اقتصادی چیلنجز کے پیش نظر عوامی مفاد میں مؤثر اقدامات پر بھی غور کیا جائے گا۔

مرکزی مسلم لیگ کے صدر خالد مسعود سندھو نے کہا ہے کہ بلوچستان پاکستان کی جان ہے، لاہور میں بیٹھ کر ادھر تم ادھر ہم کی باتیں کرنے والے ملک دشمنوں کی ترجمانی کر رہے ہیں، بلوچستان پاکستان کا حصہ تھا، ہے اور رہے گا ،ملک دشمنوں کی زبان بولنے والوں کے خلاف سخت کاروائی ہونی چاہئے.

خالد مسعود سندھو کا کہنا تھا کہ بلوچستان میں دہشتگردی بڑھ چکی ہے، آئے روزنہتے شہریوں، سیکورٹی فورسز کے جوانوں کی شہادتیں ہو رہی ہیں،بھارت کی ہمیشہ سے یہ کوشش رہی ہے کہ وطن عزیز پاکستان کو دہشتگردی،افراتفری سے عدم استحکام سے دو چار کیا جائے ،بلوچستان میں بھارت کی مداخلت کے واضح ثبوت ہیں، کلبھوشن یادیو بھی بلوچستان ہی گرفتار ہوا تھا، اب پاکستان کے نام نہاد رہنما بھی دشمنوں کی زبان بولنا شروع ہو گئے ہیں، لاہورمیں ادھر ہم ،ا دھر تم کا بیان واضح طور پر ملک دشمنی ہے، اس پرکسی صورت خاموشی اختیار نہیں کی جا سکتی،پاکستان کلمہ کے نام پر بنا تھا ،پاکستان کا دفاع مضبوط ہاتھوں میں ہے،ادھر ہم ادھر تم کی باتیں کرنے والوں کے خلاف کاروائی کی جائے،بلوچوں کو پاکستان سے کوئی الگ نہیں کر سکتا، اہل بلوچستان کی محرومیوں کے خاتمے کی ضرورت ہے،بلوچستان میں بھارتی مداخلت کے خاتمے کے لیے اقدامات کئے جائیں.

‎وزیراعلیٰ پنجاب مریم نواز شریف نے لاہور کے پنجاب سٹیڈیم نشتر پارک سپورٹس کمپلیکس میں کھیلتا پنجاب پنک گیمز 2026 کی افتتاحی تقریب سے خطاب کرتے ہوئے پنجاب کے پہلے سپورٹس سٹی کی تعمیر کا اعلان کیا اور تحصیل سطح پر پنک گیمز کے آغاز کا اعلان کیا۔ انہوں نے پنک گیمز کی خواتین کھلاڑیوں کے لیے 2 کروڑ روپے کے انعامات، رہائش اور طعام کے خصوصی انتظامات کی ہدایت بھی دی۔
‎وزیراعلیٰ نے خواتین کھلاڑیوں کو "سپر پنجاب کی سپر بیٹیاں” قرار دیتے ہوئے کہا کہ عورتیں ملک، صوبہ، وزارت اور معیشت چلا سکتی ہیں، جنگ لڑ سکتی ہیں، جہاز اڑا سکتی ہیں اور وزیراعلیٰ بن کر مردوں کو ٹف ٹائم دے سکتی ہیں۔ انہوں نے بیٹیوں سے کہا کہ "زمین آپ کی ہے، آسمان آپ کا ہے، آگے بڑھیں اور جیت کر دکھائیں”۔
‎تقریب میں ہر ڈویژن کی اتھلیٹس نے پنک گیمز کی مشعل لے کر سٹیڈیم کا چکر مکمل کیا اور اولمپین اتھلیٹ فائقہ ریاض نے مارچ پاسٹ کی قیادت کی۔ تقریب میں وزراء، ارکان اسمبلی، ویٹرن کھلاڑیوں اور ہزاروں بچیوں نے شرکت کی۔ تقریب کے دوران وزیراعلیٰ نے صوبائی وزیر کھیل فیصل کھوکھر اور سپورٹس ڈیپارٹمنٹ کی ٹیم کو شاباش دی۔
‎وزیراعلیٰ نے کہا کہ کھیلوں کو تحصیل تک لے جا رہے ہیں، خواتین کھلاڑیوں کو ماہانہ وظیفے دیے جا رہے ہیں اور ہر ڈسٹرکٹ میں ہاکی کے فروغ کے لیے سینتھیٹک آسٹرو ٹرف سٹیڈیم بنائے جائیں گے۔ انہوں نے ملک کی نوجوان نسل میں ٹیلنٹ اور بیٹیوں کی کامیابی پر فخر کا اظہار کیا اور کہا کہ حالات مشکل بھی ہوں تو گھبرانا نہیں، عورت صنف آہن ہے اور ہر میدان میں نمایاں کامیابی حاصل کر سکتی ہے۔
‎اس موقع پر تقریب میں 3,400 خواتین کھلاڑیوں نے حصہ لیا اور پورا سٹیڈیم ڈھول کی تھاپ اور نعروں سے گونجتا رہا۔ وزیراعلیٰ نے اعلان کیا کہ رواں سال سپورٹس سٹی کی تعمیر کا آغاز ہوگا اور پنک گیمز کو یونین کونسل سطح تک بڑھایا جائے گا تاکہ زیادہ سے زیادہ نوجوانوں اور خواتین کو کھیلوں میں حصہ لینے کے مواقع فراہم کیے جا سکیں۔


توشہ خانہ فوجداری کیس میں سپریم کورٹ نے بانی پی ٹی آئی عمران خان کی جیل میں حالت کا جائزہ لینے کے لیے ایڈووکیٹ بیرسٹر سلمان صفدر کو فرینڈ آف دی کورٹ مقرر کر دیا ہے۔ سپریم کورٹ نے سلمان صفدر کو اڈیالہ جیل میں عمران خان کی بیرک تک رسائی کی اجازت دی تاکہ وہ بانی پی ٹی آئی کی سہولیات اور جیل میں موجود حالت کے بارے میں مکمل رپورٹ تیار کر کے عدالت میں جمع کرا سکیں۔
‎بیرسٹر سلمان صفدر نے اڈیالہ جیل میں عمران خان سے تقریباً تین گھنٹے تک ملاقات کی۔ ملاقات کے بعد میڈیا سے گفتگو میں انہوں نے کہا کہ عمران خان کی صحت اچھی ہے اور انہیں جیل میں تمام سہولیات تک رسائی حاصل ہے۔ انہوں نے مزید کہا کہ رپورٹ سپریم کورٹ میں جمع کرانے تک وہ کیس کے حوالے سے مزید کوئی بیان نہیں دیں گے۔
‎سپریم کورٹ نے فرینڈ آف دی کورٹ کے حوالے سے اپنے حکم میں واضح کیا کہ 24 اگست 2023 کے حکمنامے کے تحت جو رپورٹ پہلے حاصل کی گئی تھی، اس وقت عمران خان اٹک جیل میں تھے، اس لیے موجودہ رپورٹ ان کی موجودہ حالت اور سہولیات کے جائزے کے لیے ضروری ہے۔ عدالت نے سلمان صفدر کو ہدایت کی کہ وہ تحریری رپورٹ تیار کریں اور عدالت میں جمع کروائیں۔
‎سپریم کورٹ نے کیس کی سماعت کو 12 فروری تک ملتوی کر دیا ہے تاکہ رپورٹ عدالت میں پیش کی جا سکے اور بانی پی ٹی آئی کی جیل میں حالت پر مکمل جانچ کی جا سکے۔

قرآن پبلشرز ایسوسی ایشن کے صدر قدرت اللہ، چیئرمین سید احسن محمود شاہ اور سرپرستِ اعلیٰ حفیظ البرکات شاہ نے اپنے ایک مشترکہ بیان میں کہا ہے کہ بیگناہوں کا خون بہانے والے اسلام، انسانیت اور پاکستان کے دشمن ہیں اور ایسے عناصر کا کسی دین، مسلک یا نظریے سے کوئی تعلق نہیں۔ قرآنِ کریم ایک انسان کے ناحق قتل کو پوری انسانیت کا قتل قرار دیتا ہے، دہشت گردی اور قتل و غارت اسلامی تعلیمات کی صریح توہین ہے۔ مساجد، مدارس اور امام بارگاہیں امن، عبادت اور اخوت کا مرکز ہوتی ہیں، ان مقدس مقامات کو نشانہ بنانا صرف عبادت گزاروں پر ہی حملہ نہیں بلکہ ملک کے امن، مذہبی ہم آہنگی اور قومی اتحاد پر براہِ راست حملہ ہے۔ پاکستانی عوام کامطالبہ ہے کہ ملک بھر کی تمام مساجد، مدارس، امام بارگاہوں اور دیگر مذہبی و عوامی مقامات پر فول پروف سیکیورٹی انتظامات فوری طور پر یقینی بنائے جائیں اور غفلت یا لاپرواہی برداشت نہ کی جائے۔

قرآن پبلشرز ایسوسی ایشن کے رہنمائوں نے حکومت اور متعلقہ انتظامیہ سے مطالبہ کیا کہ دہشت گردی کے مکمل خاتمے کے لیے بلاامتیاز اور فیصلہ کن کارروائیاں کی جائیں، سہولت کاروں اور سرپرستوں کو قانون کے کٹہرے میں لایا جائے اور امن دشمن نیٹ ورکس کو جڑ سے اکھاڑ پھینکا جائے۔

قرآن پبلشرز ایسوسی ایشن کے عہدیداران نے ملک و قوم کے دفاع میں جانوں کا نذرانہ پیش کرنے والے سیکیورٹی فورسز کے جوانوں کو زبردست خراجِ تحسین پیش کرتے ہوئے کہا کہ یہ بہادر سپاہی ہمارے حقیقی محسن، قومی وقار کی علامت اور دشمن کے سامنے آہنی دیوار ہیں۔ ان کی قربانیاں تاریخ میں سنہرے حروف سے لکھی جائیں گی۔ان حالات میں جبکہ دشمن ہم پر دہشت گردی کی جنگ مسلط کرنے کی کوشش کررہا ہے قوم سے ہماری اپیل ہے کہ وہ مسلکی، لسانی اور علاقائی اختلافات کو پسِ پشت ڈال کر اتحاد، صبر اور شعور کا مظاہرہ کرے، افواہوں اور منفی پروپیگنڈے سے ہوشیار رہے اور ریاستی اداروں کے ساتھ مکمل تعاون کرے۔ پاکستان ایک پُرامن اسلامی ریاست ہے اور ان شاء اللہ دہشت گردی، نفرت اور خونریزی کو ہر صورت شکست دی جائے گی۔