Category: لاہور

بانی پی ٹی آئی عمران خان کے سابق میڈیا کوآرڈینیٹرجاوید بدر نے کہا ہے کہ پاکستانی موجودہ و سابق کرکٹرز کے ساتھ 7 ارب کے فراڈ کی تحقیقات ہونی چاہیے.

جاوید بدر کا کہنا تھا کہ ورلڈ کپ سے قبل ایسی خبر کا آنا سازش بھی ہوسکتی ہے،پی سی پی اور ایف آئی اے کو مل کر اصل حقائق سامنے لانے چاہیے،اس خبر سے مُلک کی جگ ہنسائی ہورہی ہے ،اتنی بڑی رقم مُلک سے باہر کس طرح گئی،اس خبر کا فائدہ ہندستان اُٹھا کر بدنام کر سکتا ہے ،بہتر ہے کہ پاکستان خود اصل حقائق سامنے لاۓ ،میں نے ڈائریکٹر ایف آئی اے کو تفشیش کے لیے درخواست دے دی ہے،قومی ہیروز کا پیسہ محفوظ نہیں تو عام آدمی کیا سنوائی ہوگی،جو بھی غیر قانونی کام میں ملوث پایا گیا تو اُسے سزا ملنی چاہیے،مُتاثرہ کرکٹرز بابر اعظم انضمام الحق کو خود سامنے آنا چاہیے ،قومی ہیروز کے ساتھ مُلک کی عزت جُڑی ہے،چئیرمین بورڈ مُحسن نقوی کو خود کرکٹرز سے بات کرنی چاہیے ،ایف آئی اے کے پاس خبر پر ایکشن لینے کا اختیار بھی ہے،میرے علم کے مُطابق معاملے کو دبانے کی کوشش کی جارہی ہے،ایف آئی اے نے میری درخواست تفشیش کے لیے این سی سی آئی اے کو بھیج دی ہے

لاہور کی سیشن کورٹ نے آن لائن جوئے کی تشہیر کے مقدمے میں نامزد معروف یوٹیوبر رجب بٹ اور ندیم مبارک کی عبوری ضمانت میں 16 فروری تک توسیع کردی۔

ایڈیشنل سیشن جج منصور احمد قریشی نے کیس کی سماعت کی، جس میں عبوری ضمانت کی مدت ختم ہونے پر دونوں ملزمان عدالت میں پیش ہوئے۔ دورانِ سماعت عدالت نے فریقین کے دلائل سننے کے بعد رجب بٹ اور ندیم مبارک کی عبوری ضمانت میں توسیع کا حکم جاری کیا۔

عدالت کو بتایا گیا کہ تفتیشی افسر کو کیس سے متعلق ریکارڈ جمع کروانے کے لیے پہلے ہی مہلت دی جاچکی ہے، تاہم مقررہ وقت میں مکمل ریکارڈ پیش نہیں کیا جاسکا۔ اس پر عدالت نے تفتیشی افسر کو مزید مہلت دیتے ہوئے آئندہ سماعت پر مکمل ریکارڈ پیش کرنے کی ہدایت کی۔

استغاثہ کے مطابق ملزمان پر سوشل میڈیا پلیٹ فارمز کے ذریعے آن لائن جوئے کی تشہیر کرنے کا الزام ہے، جو کہ ملکی قوانین کے تحت قابلِ تعزیر جرم ہے۔ مقدمہ درج ہونے کے بعد ملزمان نے گرفتاری کے خدشے کے پیش نظر عبوری ضمانت کی درخواست دائر کی تھی۔

ملزمان کے وکلا نے مؤقف اختیار کیا کہ رجب بٹ اور ندیم مبارک بے گناہ ہیں اور انہیں سوشل میڈیا پر کیے گئے مواد کی بنیاد پر بلاجواز مقدمے میں نامزد کیا گیا ہے، جبکہ کیس میں مزید تفتیش درکار ہے۔عدالت نے کیس کی مزید سماعت 16 فروری تک ملتوی کرتے ہوئے ملزمان کو عبوری ضمانت پر برقرار رکھا۔

وفاقی وزیر داخلہ محسن نقوی نے ڈائریکٹوریٹ جنرل امیگریشن اینڈ پاسپورٹس کا دورہ کیا، انہوں نے پاسپورٹس درخواستوں، پرنٹنگ اور کارکردگی کے جدید ترین مانیٹرنگ نظام کا افتتاح کردیا۔

وزیر داخلہ نے ڈائریکٹوریٹ جنرل آف امیگریشن اینڈ پاسپورٹس میں 24/7 مانیٹرنگ روم اور کال سینٹر فعال کردیا، محسن نقوی کی ہدایت پر ایمرجنسی ٹریول ڈاکیومنٹ نظام کو بھی ڈیجیٹل کردیا گیا۔وزیر داخلہ نے ای مانیٹرنگ روم، کال سینٹر، فارنزک لیب اور جدید پروڈکشن یونٹ کا دورہ کیا۔ محسن نقوی نے کہا کہ پاکستان پاسپورٹ سسٹم کو عالمی نظام کے مطابق ڈھال دیا گیا، نئے نظام سے پاسپورٹ درخواستوں، ڈیلیوری کی ریئل ٹائم مانیٹرنگ ممکن ہوگی۔وزیر داخلہ کا کہنا ہے کہ شہریوں کو عالمی معیار کی تیز اور محفوظ خدمات کی فراہمی یقینی بنارہے ہیں، پاسپورٹ کے سیکیورٹی فیچرز کو آئی سی اے او اسٹینڈرڈز کے مطابق بنایا گیا۔

محسن نقوی نے کہا کہ جدید جرمن مشینوں سے محکمے کی استعداد کار میں اضافہ ہوا ہے، آٹومیٹک مشینوں سے پاسپورٹ پرنٹنگ پراسیس سے انسانی مداخلت کو مکمل ختم کردیا گیا ہے۔

لاہور: وفاقی وزیر دفاع خواجہ آصف نے کہا ہے کہ نئے صوبے بنانے میں کوئی حرج نہیں، اصل مسئلہ اختیارات کی نچلی سطح تک منتقلی ہے، جب تک اختیارات عوام کے قریب نہیں آئیں گے ملک مؤثر انداز میں نہیں چل سکے گا۔ مقامی سطح پر اختیار اور ذمہ داری دینے سے نہ صرف گورننس بہتر ہوتی ہے بلکہ ٹیکس وصولی میں بھی نمایاں اضافہ ہوتا ہے۔

لاہور میں ایک نجی یونیورسٹی کے زیر اہتمام جاری تین روزہ تھنک فیسٹ کے دوسرے روز ’تاریخی اور تقابلی تناظر میں عالمی عدم مساوات‘ کے موضوع پر خطاب کرتے ہوئے خواجہ آصف نے کہا کہ پاکستان جیسے ممالک میں معاشی اور سماجی عدم مساوات کی بڑی وجہ یہ ہے کہ فیصلے اور وسائل مرکز میں مرتکز رہتے ہیں، جس سے نچلی سطح پر مسائل جوں کے توں رہ جاتے ہیں۔انہوں نے کہا کہ 18ویں آئینی ترمیم کا سب سے بڑا نعرہ اور مقصد اختیارات کی نچلی سطح تک منتقلی تھا، تاہم عملی طور پر اس وژن پر مکمل عملدرآمد نہیں ہو سکا۔ خواجہ آصف کے مطابق اگر صوبے اور ضلعی حکومتیں مضبوط ہوں، لوکل گورنمنٹ کا نظام فعال ہو اور عوامی نمائندوں کو حقیقی اختیارات دیے جائیں تو نہ صرف مسائل کا حل تیز ہوگا بلکہ ریاست اور شہری کے درمیان اعتماد بھی بحال ہوگا۔

وفاقی وزیر دفاع نے سیاسی قیادت پر تنقید کرتے ہوئے کہا کہ سمجھ نہیں آتی کہ سیاسی برادری لوکل گورنمنٹ سسٹم سے اتنی خائف کیوں ہے۔ ان کا کہنا تھا کہ مضبوط مقامی حکومتیں کسی کے لیے خطرہ نہیں بلکہ ریاستی نظام کے استحکام کی ضمانت ہوتی ہیں۔ انہوں نے زور دیا کہ تمام اسٹیک ہولڈرز کو ذاتی اور جماعتی مفادات سے بالاتر ہو کر قومی مفاد میں فیصلے کرنے چاہئیں۔

‎لاہور کے علاقے گلبرگ میں واقع ایک ہوٹل میں آگ لگنے کے نتیجے میں جاں بحق افراد کی تعداد دو ہوگئی، جبکہ امدادی اور ریسکیو کارروائیاں تاحال جاری ہیں۔ ریسکیو ٹیمیں لاپتہ وینڈر ریاض کی تلاش میں مصروف ہیں۔
‎رپورٹ کے مطابق ہوٹل میں لگنے والی آگ پر قابو پانے کے لیے ساڑھے تین گھنٹے سے کوششیں جاری ہیں۔ آگ لگنے کے بعد ہوٹل میں موجود 200 سے زائد افراد کو بحفاظت باہر نکال لیا گیا۔
‎ریسکیو حکام کا کہنا ہے کہ واقعے میں زخمی ہونے والے 6 افراد کو اسپتال منتقل کر دیا گیا ہے، جبکہ آگ لگنے کی وجوہات جاننے کے لیے تحقیقات جاری ہیں۔